Ezekiel 30:1-26
30 Bóhólníihii shichʼįʼ hanáánáádzíiʼgo kóní,
2 Diné nílíinii, ádahodooníiłii baa hólneʼgo kódíní, Bóhólníihii Diyin God kóní, Éí jínígíí, dadohníigo daohchxa.
3 Koshídę́ę́ʼ hoolzhish; Bóhólníihii bá ashjaʼiilaaígíí koshídę́ę́ʼ hadziih; éí bijı̨́ doo ééhodoozįįł da; ałʼąą dineʼé ałtso atídoolníłígíí baa hodoolzhish.
4 Ííjip dineʼé éí diltłish bee atíbiʼdiilyaago diné nidaatseedii naa ahineezdeeʼgo áádóó diné tʼóó ahayóí dah hoʼdiijaaʼgo índa kin bee danił dzilgo bitłʼááh nídaastłʼinii táádaoshchxǫʼgo Iithiyópiya dineʼé haa yínííł danilı̨́įgo haa daachxa doo.
5 Áádóó Iithiyópiya dineʼé, Put dineʼé, Lud dineʼé áádóó Aréíbiyadę́ę́ʼ dineʼé tʼáá ałtso índa Líbiyadę́ę́ʼ dineʼé danilíinii áádóó dadineʼé bił ałchʼodajíʼníinii tʼáá ałtso diltłish bee nidahodiʼdootsił.
6 Áko Bóhólníihii Diyin God kóní, Ííjip dineʼé bíká aníjíjahii hakʼeh hodidoodleeł áádóó Ííjip dineʼé hadziil bee ádaa deijódlíhígíí bikʼeh hodidoodleeł; tʼáá níléí Mígdal hoolyéédóó Saiyíínii kin haalʼáajįʼ Ííjip kéyahgi kééhojitʼínígíí tʼáá ájítʼé diltłish bee nidahodiʼdootsił, ní Bóhólníihii Diyin God.
7 Kéyah dahóóchxǫʼgóó éí bitahgi Ííjip bíká aníjíjahígíí ałdóʼ doo łaʼ nijigháágóó áhodiʼdoolnííł índa hanaagóó kin hadaasʼáii ałtso ahiih nídahaasdáazii éí bitahgi hó ałdóʼ hakin hadaasʼáii ałtso ahiih nídahaasdáaz doo.
8 Áko Ííjip kéyahgi ohodíínilgo áádóó bíká anájahii ałtso áhoséłdįįdgo áadi índa Bóhólníihii nishłı̨́įgo hoł béédahodoozįįł.
9 Ííjip dineʼé bitah nahałniihgo yoołkááł yę́ędą́ą́ʼ éigi átʼéego éí bijı̨́ Iithiyópiya dineʼé doo ayadahoolii yę́ę nídadooldzííł biniyé haneʼ nideiʼáii shitsʼą́ą́dóó tsinaaʼeeł bee bił adahidooʼoł; éí baa hoolzhíísh, jóʼakon.
10 Bóhólníihii Diyin God kóní, Bábilan dineʼé aláahgo binanitʼaʼí Nébukadnézzar bee Ííjip kéyahgi daashíínéelą́ą́ʼ diné kééhojitʼíinii ałtso áhodeeshdįįł.
11 Ałʼąą dineʼé bitahdóó tsʼídá agháago báádahadzidii Nébukadnézzar áádóó bidineʼé yił yah adoonéełgo kéyah bikááʼgóó tsʼídá ałtso nidaʼdoołtsił, áko Ííjip kéyahgi bidiltłish hadeidiyoodzı̨́įsgo diné nideistseedii ákweʼé hadeididoołbı̨́ı̨́ł.
12 Tooh danílínígíí nídeestsih áádóó diné tʼáá íiyisí doo yáʼádaashóonii bichʼįʼ éí kéyahígíí nahideeshnih; déʼéyóní danilíinii choideeshʼįįłgo éí kéyah bikááʼgóó dahólóonii áádóó éí kéyah bikáaʼgi áhootʼéhígíí ałtso deeshchxǫǫł; shí Bóhólníihii kótʼéego haasdzííʼ.
13 Bóhólníihii Diyin God kóní, Edaʼalyaii éí ałtso nihideeshchxǫǫł áádóó Mémfis* kin haalʼáagi edaʼalyaii ákwii doo nááhódlǫ́ǫ́góó ádeeshłííł; Ííjip kéyahgi naatʼáanii doo łaʼ náánídlı̨́į da dooleeł, áko Ííjip kéyahgi yééʼ hólǫ́ǫgo ádeeshłííł.
14 Páthras kin haalʼáagi hóóchxǫʼgo áhodeeshłííł; Zówan kin haalʼáii éí bohodideeshnił; Thiibz* kin haalʼáagi kéédahatʼíinii hainíshtʼı̨́į doo.
15 Pelúsiyam* kin haalʼáhígíí, éí Ííjip dineʼé yee ayóó ábóodziilii tʼóó báhádzidgo bee atíʼéshʼíinii bee atídeeshłííł, áádóó Thiibzgi diné ayóó ánéelą́ą́ʼ kéédahatʼíinii éí ałtso áhodeeshdįįł.
16 Ííjip kéyahgi ohodideeshnił; Pelúsiyam éí bikʼeʼíyéʼígi átʼéego tiʼhojooníih doo; Thiibz binaa ahééʼítłʼinii nidahidoolkał; Mémfisgi tʼáá ákwíí jı̨́ nitsijikai doo.
17 Éíven kin haalʼáádóó áádóó Paibííseth kin haalʼáádóó diné ániid nidajikaii diltłish bee nidahodiʼdootsił áádóó díí kin hadaasʼáii dadoolnééł.
18 Ákwii Ííjip dineʼé bee bóhólníihii doo bee bóhólnííhgóó áshłaago Tahápaniizdi chahałheełgo ooʼáał doo; ayóó ájítʼéego bee ádaa hojiʼniihii éí ninítʼiʼ doo; kʼos éí hakʼi dah yilzhoł doo áádóó hachʼéʼé danilíinii éí yisnáágóó ałtso adahidoonééł.
19 Kótʼéego Ííjip dineʼé baa nídéeshtʼįįł, áko índa Bóhólníihii nishłı̨́įgo hoł béédahodoozįįł.
20 Łaʼtsʼáadah yihah góneʼ, áłtsé nídízííd binih, tsostsʼidgóó yoołkáałgo Bóhólníihii shichʼįʼ haadzíiʼgo kóní,
21 Diné nílíinii, Ííjip dineʼé aláahgo binanitʼaʼí Féro bigaan kʼínítiʼ; doo bidziil náádoodleełgóó diltłish doo nináánéíchʼid da doo índa doo nídoodzih da biniyé tʼáadoo bá bikʼídeesdiz da.
22 Éí bąą Bóhólníihii Diyin God kóní, Ííjip dineʼé aláahgo binanitʼaʼí Féro bikʼijįʼ nishłı̨́, jóʼakon; bigaan tʼáá ałchʼijí kʼídeeshtih; bigaan tʼáá íídą́ą́ʼ kʼínítiʼígíí áádóó hagaan doo átʼéhígíí ałdóʼ kʼídeeshtihgo diltłish hálákʼee hadookǫsgo ádeeshłííł.
23 Ííjip dineʼé éí kédaayahgóó tahwiidínéeshkałgo ałʼąą dineʼé bitahgóó tahwiidínéeshkał.
24 Bábilan dineʼé aláahgo binanitʼaʼí bidziilgo ádeeshłíiłgo shidiltłish bílákʼedeeshtı̨́ı̨́ł, nidi Féro bigaan kʼideeshtihgo diné tʼáá íiyisí habiʼdookalii nahalingo hadááhdóó diʼníi doo.
25 Áko Bábilan dineʼé aláahgo binanitʼaʼí bidziilgo ádeeshłííł, nidi Féro bigaan éí bąąh nidínóodah, áko Bábilan dineʼé aláahgo binanitʼaʼí shidiltłish bílákʼéétą́ągo áádóó Ííjip kéyah yikʼijįʼ yił kʼídeeshchidgo, áadi índa shí Bóhólníihii nishłı̨́įgo hoł béédahodoozįįł.
26 Ííjip dineʼé éí kédaayahgóó tahwiidínéeshkałgo ałʼąą dineʼé bitahgóó tahwiidínéeshkał, áko índa Bóhólníihii nishłı̨́įgo hoł béédahodoozįįł.
Footnotes
^ Naf ałdóʼ hoolyéego Ííjip kéyah shádiʼááhjígo kin haalʼá aláahgo átʼéii.
^ No ałdóʼ hoolyé.
^ Sin hoolyéii éí Gríik kʼehjí Pelósiyam hoolyé.
