Ezekiel 31:1-18
31 Łaʼtsʼáadah yihah góneʼ, tááʼ nídízííd binih, łaʼa jı̨́ı̨́góó yoołkáałgo Bóhólníihii shichʼįʼ haadzíiʼgo kóní,
2 Diné nílíinii, Ííjip dineʼé aláahgo binanitʼaʼí Féro áádóó diné eelʼáago yinantʼáhígíí ábidiní, Ayóó ádanohtʼéego háí lá bił ahąąh ninihideeshnił lá?
3 Shoo, Asíriya dineʼé éí Lébanandi hodíłchʼilgi gad léiʼ tʼááłáʼí aghááʼáago bitsʼáozʼaʼígíí baa dadzólní áádóó díłchʼilgo biyaagi chahaʼoh; dego wótʼááh yíʼáago kʼos biih yíʼá.
4 Kʼidoolyáago ííʼáhígi tooh binázlı̨́, áádóó éí tó bitsʼádaazlı̨́įgo binaagóó tsin yílʼáhígíí tʼáá ałtso daʼadlą́, áko éí gad ííʼáhígíí tʼóó ahayóí tó baa nílı̨́, áádóó éí tóhígíí yee wótʼááh níísą́.
5 Ákweʼé tó tʼóó ahayóigo bąą tsin yílʼáhígíí tʼáá ałtso yilááh níísą́, bitsʼáozʼaʼ ląʼí áádóó danineez daazlı̨́ı̨́ʼ.
6 Bitsʼáozʼaʼ bąąhgóó tsídii wótʼáahdi nidaatʼaʼii tʼáá ałtso bitʼoh ádayiilaa, bitsʼáozʼaʼ biyaagóó éí halgaigóó naaldlooshii tʼáá ałtso ákǫ́ǫ́ nidaʼiishchı̨́, áádóó bichahaʼohgóó ałʼąą dineʼé ayóó ádaatʼéii tʼáá ałtso kéédahatʼı̨́ı̨́ nítʼééʼ.
7 Behétłʼóól tó tʼóó ahayóí nílı̨́įjįʼ łeeh daneesánígíí bee bitsʼáozʼaʼ ayóó ádaníłnééz daazlı̨́ı̨́ʼ, áko ayóó átʼéego tʼóó baa dzólníigo sikaad.
8 Diyin God bidáʼákʼehgi gad yílʼáhígíí éí doo nídabidółʼı̨́ı̨́ł átʼée da, áádóó chʼó bitsʼáozʼaʼ éí gad ayóó áníłnéezii bitsʼáozʼaʼ doo bíʼjítı̨́įh da, índa tsin cháʼoł éí gad bitsʼáozʼaʼ bił ahąąh nahodiʼnilgo yáadi shı̨́ı̨́ nidahojílin; Diyin God bidáʼákʼehgi tsin yílʼáhígíí éí doo łaʼ ákótʼéego baa dzólníi da.
9 Bitsʼáozʼaʼ tʼóó ahayóígíí bee baa dzólníigo áshłaa; Diyin God bidáʼákʼehgi Ííden hoolyéegi tsin yílʼáhígíí tʼáá ałtso daboołchʼı̨́ı̨́d.
10 Éí bąą Bóhólníihii Diyin God kóní, Ayóó áníłnééz silı̨́ı̨́ʼ áádóó kʼos yiih níísą́ągo bijéí biyiʼdę́ę́ʼ ádaa haʼniih silı̨́ʼígíí,
11 biniinaa ałʼąą dineʼé bitahdóó ayóó átʼéii nilínígíí baa hodideeshʼááł; doo yáʼájíshǫ́ǫ́góó biniinaa tʼáá áhodiʼdoolníłígíí bíighahgo haa nídóotʼįįłgo chʼíhodínéeshchééł.
12 Ałʼąą dineʼé bitahdóó déʼéyóní danilíinii, tsʼídá agháago báádahadzidii éí kʼídahaztsxéelgo tʼáá ákǫ́ǫ́ jiztą́ągo ádahoolaa; dził daníʼáágóó áádóó dahónítsʼaaʼgóó hatsʼáozʼaʼ adahidínóodah; hatsʼáozʼaʼ éí nidahaastǫʼgo kéyahdi dabikoohgóó tʼáá ałtsogo naaztą́ą doo áádóó nihokááʼgóó dadineʼé danilíinii tʼáá ałtso hachahaʼohdóó hahidookahgo hatsʼáhidookah.
13 Gad naaʼanííkaadii éí tsídii wótʼáahdi nidaatʼaʼii tʼáá ałtso yiiʼgóó dabaghan doo, áádóó halgaigóó naaldlooshii tʼáá ałtso éí gad bitsʼáozʼaʼ yikʼi naaldeeh doo.
14 Tsin tábąąhgóó ííʼáii doo łaʼ ayóó áníłnééz náádoodleeł da, índa kʼos doo yiih náádínóoséeł da, índa náánáłaʼ tsin ákótʼéego tó yidláanii doo ákóníłnééz náádoodleeł da biniyé áhóótʼįįd; jishchááʼ góyaa ahekáhígíí bił niʼ bitłʼááh góyaa dazhdooleeł; diné daninéii bitahgi atah dazhdínóonéełgo haa dadeestʼą́.
15 Bóhólníihii Diyin God kóní, Jishchááʼ góyaa silı̨́įʼgo tʼóó haa yínííł danilı̨́įgo ádeeshłííł; tooh danílíinii doo danílı̨́ı̨́góó ádeeshłííł, áko tooh tʼóó ahayóí doo danílı̨́į da doo; éí biniinaa Lébanan kéyahgi kéédahatʼíinii atínídadindleehgo ádeeshłííł áádóó éí biniinaa tsin adaazʼáii tʼáá ałtso daniiłnaʼ.
16 Jishchááʼ góyaa deíkáhígíí bił hoolʼáágóó tiʼhooʼnííh góyaa ahííłhango nihízdeesxałgo ayóó íistsʼą́ʼígíí bee ałʼąą dineʼé bitah dahoditłidgo ádeeshłííł; Ííden hoolyéegi tsin yílʼáii tʼáá ałtso áádóó Lébanan hoolyéegi tsin agháago yáʼádaatʼéehgo bitah haasdláʼígíí tʼáá ałtso, tó deidlánígíí tʼáá ałtso niʼ bitłʼáahdi hadaʼíídóolniił.
17 Diltłish bee nidabiʼdiztseedii bichʼįʼ ałʼąą dadineʼé tʼáá hoł hoolʼáágóó tiʼhooʼnííh góyaa ałdóʼ dadzizlı̨́ı̨́ʼ; hadziilgo ádahoolaii éí ałʼąą dineʼé bitahgóó hachahaʼohgi kéédahatʼı̨́ı̨́ nítʼééʼ.
18 Ííden hoolyéegi ayóó ádanihóodziil áádóó ayóó ádanohtʼéego háí lá bił ahąąh ninihideeshnił lá? Íídengi tsin yílʼáhígíí tʼáá bił niʼ bitłʼááh góyaa ánihidiʼdooʼnił; doo bąąh nídahineeshgizhii diltłish bee nidaaztseedii bitahgi sínítı̨́į doo.
Díí lą́ą Féro áádóó bidineʼé ayóó ánéelą́ąʼgo éí ádaatʼı̨́ ni, ní Bóhólníihii Diyin God.
