Ezekiel 32:1-32
32 Naakitsʼáadah náhááh góneʼ, naakitsʼáadah nídízííd binih, łaʼa jı̨́ı̨́góó yoołkáałgo Bóhólníihii shichʼįʼ haadzíiʼgo kóní,
2 Diné nílíinii, Ííjip dineʼé aláahgo binanitʼaʼí Féro baa yínííł nílı̨́įgo nichago ábidiní, Ałʼąą dineʼé bitahgóó náshdóíyáázh bitsiijįʼ daditłʼooígíí nahonílingo ádaa nitsísíníkééz, nidi tónteel biiʼ łóóʼtsohígíí nahonílin; nitooh nił chʼíjiisxaal áádóó biiʼ dítałgo tááchxąąʼgo ádeinilaa.
3 Bóhólníihii Diyin God kóní, Dadineʼé bitsʼą́ą́dę́ę́ʼ dah yinéłígíí bee shitłʼóól naneesdizígíí nikʼijįʼ ahideeshxą́ąłgo hadandooloh.
4 Áko shiłóóʼ bee hahaltsósí bee dah nidideeshxéełgo doo naagháhídi tʼáá áhoodzaajįʼ nideeshxał, áádóó tsídii tʼáá ałtso naa áłah dooleełgo dandoolghał; nahasdzáán tʼáá siʼą́ą́ nítʼééʼ bikááʼdę́ę́ʼ naaldlooshii tʼáá ałtso naa áłah dooleełgo nee nídadínóochał.
5 Nitsʼíís éí daadziłgóó taideesxas áádóó deíldzisgóó nitsʼin bee hahodideeshbı̨́ı̨́ł.
6 Kéyah áádóó dził naaznilígíí tʼáá bił nidił nílínígíí łeeh dadínóotsisgo ádeeshłííł, áko tó nídadinahígóó hadadidííbı̨́ı̨́ł.
7 Ninéłtsizgo yádiłhił bichʼą́ą́h niʼdeeshbałgo, sǫʼ bił chahałheełgo ádeeshłííł; kʼos éí jı̨́honaaʼéí bichʼą́ą́h adooldoh; ooljééʼ éí doo adiníłdíin da doo.
8 Wótʼááhdę́ę́ʼ bee daʼdinídíinii doo nihikʼi daʼdiiłdííngóó ádeeshłííł, áko nihikéyahgi chahałheełgo ádeeshłííł, ní Bóhólníihii Diyin God.
9 Kéyah doo hwííníʼínígóó yisnááh nílı̨́įgo ałʼąą dineʼé bitahgóó ándeeshdįįłgo dadineʼé tʼóó ahayóí dabijéí bichʼįʼ nidahwiishnáa doo.
10 Dabinááł shidiltłish bee naanáʼeeshxałgo nikʼeh hodeesdlı̨́ı̨́ʼ bijı̨́ tʼáá ádzíłtso tʼááłáʼí jinítínígo tʼáadoo bitaʼ hooʼaahí hatah dahoditłid doo, índa dadineʼé tʼóó ahayóí nikʼee tʼóó bił adahayóigo áádóó aláahgo binanitʼaʼí danilíinii niniinaa tʼóó báhádzidgo nídadooldzííł.
11 Háálá Bóhólníihii Diyin God kóní, Bábilan dineʼé aláahgo binanitʼaʼí bidiltłish yee naatįįh doobah.
12 Siláo ayóó ádabóodziilii dabidiltłish bee nidiné ninádeelʼáii nidadootsił; éí tʼáá ałtso ałʼąą dineʼé dabitahgóó éí tʼáá íiyisí tʼóó báádahadzid. Ííjip dineʼé bee ádaa hojiʼniihii ádingo ádeidoolííł, diné deílʼáii ałtso ábididooldįįł.
13 Ákweʼé tábąąhgóó daʼalı̨́ı̨́ʼ nidaakaii tʼáá ałtso nideestsił, áko diné dajílíinii doo łaʼ biih náázhdoodáałgo hakeeʼ bee tanáázhdoołchįįł da, índa daʼalı̨́ı̨́ʼ doo łaʼ yiih náádookahgo bikeeʼ yee tanáádeidoołchįįł da.
14 Áko índa tó niłtólígo áńdadeeshdlííł; tooh éí akʼah nílı̨́ nahalingo ádadeeshłííł, ní Bóhólníihii Diyin God.
15 Ííjip kéyahgi hóółchxǫʼgo bee ádaʼazįįdii tʼáá ałtso nahjįʼ haalyáago, ákweʼé kéédahatʼínígíí tʼáá ałtso atéshłaago, áko índa Bóhólníihii nishłı̨́įgo hoł béédahodoozįįł.
16 Díí jichago baa yínííł hasinígíí bee dahojitaał doo; ałʼąą dineʼé bichʼéʼé danilíinii yee dahataał doo; Ííjip kéyah áádóó diné deílʼáá nítʼééʼ yę́ę daaníigo atínídadindleehgo dahataał doo, ní Bóhólníihii Diyin God.
17 Naakitsʼáadah náhááh góneʼ, ashdlaʼáadahgóó yoołkáałgo Bóhólníihii shichʼįʼ haadzíiʼgo kóní,
18 Diné nílíinii, Ííjip kéyahgi diné yílʼáá nítʼééʼ yę́ę baa yínííł nílı̨́įgo diníʼní, áko hó lá áádóó ałʼąą dineʼé ayóó ádabóodziilii bitsiʼ danilínígíí jishchááʼ góyaa ahekáhígíí tʼáá hoł niʼ bitłʼááh góyaa ahóółkaad.
19 Háishąʼ biláahgo ayóó áníínílnin? Nílááh, tʼáadoo bąąh nídahineeshgizhii bitah góyaa sínítı̨́.
20 Diltłish bee nidaaztseedii bitah dazhdínóonééł; diltłish baa hoʼdeetʼą́; hodineʼé tʼóó ahayóí deílʼáhígíí tʼáá hoł nahjįʼ kóbiʼdilnééh.
21 Naatʼáanii danilíinii éí ayóó ádabóodziilii bitahdóó bíká anídaajah yę́ę tʼáá yił hoolʼáágóó tiʼhooʼnííhdę́ę́ʼ ádabiłníi doo, Tʼáadoo bąąh nídahineeshgizhii diltłish bee nidaatseedgo ákóyaa adahaaskai yę́ę tʼahdii shijééʼ.
22 Asíriya dineʼé áádóó diné yił dah yinééł nítʼééʼ yę́ę éí hanaagóó dabijishcháaʼgo áadi bił dahojílǫ́; éí tʼáá ádzíłtso diltłish bee nidahoʼdiztseed;
23 hó éí aʼáán nihoodzą́ądi yóóʼáhoʼdiilyaa, áádóó diné binazhnitʼáá nítʼééʼ yę́ę éí hanaagóó yóóʼádaalyaa, éí diné dahináanii bitahdi diné hwéédaaldzid nítʼééʼ yę́ę tʼáá ádzíłtso diltłish bee nidahoʼdiztseed.
24 Íílam dineʼé* áádóó bisiláo dah yinééł nítʼééʼ yę́ę tʼáá ałtso hanaagóó yóóʼádaalyaago áadi hoł dahólǫ́; éí tʼáá ałtso tʼáadoo bąąh nídahineeshgizhgóó diltłish bee nidabiʼdiztseedgo niʼ bitłʼááh góyaa aheeskai; éí dahináanii bitahdi diné hwéédaaldzid nítʼééʼ, áko jishchááʼ góyaa aheeskaígíí bił ádaa yádaznídzin doo.
25 Diné nidaaztseedii bitahdi diné dah yinééł nítʼééʼ yę́ę tʼáá bił yóóʼádahoʼdidoolnííł biniyé dziztı̨́į dooleełgi há hashtʼedahoolaa; tʼáadoo bąąh nídahineeshgizhii danilı̨́įgo diltłish bee nidaaztseedgo hanaagóó leeyiʼ shijééʼ; éí dahináanii bitahdi diné hwéédaaldzid nítʼééʼ; jishchááʼ góyaa ahekáhígíí bił ádaa yádaznídzin; nidaaztseedii bitahdi nidahoʼdiisʼnil.
26 Azhą́ diné dahináanii bitahdi yił nidahoołyééʼ nítʼééʼ nidi, Mííshek dineʼé áádóó Túbal dineʼé índa bidineʼé dah yinééł nítʼééʼ yę́ę tʼáá ałtso ałdóʼ áadi, áko tʼáadoo bąąh náhineeshgizhii danilíinii diltłish bee nidaaztseedgo hanaagóó yóóʼádaalyaa.
27 Doo bąąh nídahineeshgizhii bitahdóó ayóó ádaatʼéé nítʼééʼ yę́ę hoolʼáágóó tiʼhooʼnííh góyaa binaageʼ tʼáá yił aheeskai yę́ę bidiltłish éí bitsiiʼáál bá ádaalyaii éí doo bitahdi jizhjéeʼ da. Azhą́ dahináanii bitahdi ayóó ádaatʼéii danilı̨́įgo diné hwéédaaldzid nítʼééʼ nidi, doo ákwii ádajíítʼįįdii hakʼijįʼ nídadoodleeł.
28 Tʼáá aaníí, doo bąąh nídahineeshgizhii diltłish bee nidaaztseedii bitahgi nitahwiistǫʼgo sínítı̨́į doo.
29 Íídam dineʼé áádóó aláahgo binanitʼaʼí índa binanitʼaʼí danilı̨́ı̨́ nítʼééʼ yę́ę tʼáá ałtso éí ayóó ádabóodziil nítʼééʼ, nidi diltłish bee nidabiʼdiztseedii bitahdi áádóó tʼáadoo bąąh nídahineeshgizhii jishchááʼ góyaa ahikáahii éí ałdóʼ áadi bił jizhjéeʼ doo.
30 Náhookǫsdę́ę́ʼ naatʼáanii danilı̨́ı̨́ nítʼééʼ yę́ę tʼáá ałtso áádóó Sáídan dineʼé danilı̨́ı̨́ nítʼééʼ yę́ę tʼáá ałtso nidabidiztseedii yił łeeyiʼ shijééʼ, ayóó ádahóodziilgo bee diné bił dahojíłyééʼ nítʼéʼígíí biniinaa ádaa yádaznidzingo ákóyaa adziiskai; tʼáadoo bąąh náhineeshgizhii dajílı̨́įgo diltłish bee nidaaztseedii bił jizhjééʼ, áko jishchááʼ góyaa ahekáhígíí bił ádaa yádaznidzin.
31 Féro éí díí nidabiʼdiztseedii yiidoołtsééł, áádóó tʼáá bí bisiláo tʼóó ahayóí tʼáá ałtso diltłish bee nidaaztseedii yee haʼíídóolniił, ní Bóhólníihii Diyin God.
32 Jó, dahináanii bitahdi diné hakʼee bił nidahooyeehgo áshłaa; doo bąąh nídahineeshgizhii danilíinii diltłish bee nidaaztseedii bitahdi Féro áádóó tʼóó ahayóí bisiláo dah yinééł nítʼééʼ yę́ę bił yóóʼádahodiʼdoolnííł, ní Bóhólníihii Diyin God.
Footnotes
^ Bábilan kéyah haʼaʼaahjigo bikéyah.
