Ezekiel 33:1-33
33 Nááʼáłdóʼ Bóhólníihii shichʼįʼ haadzíiʼgo ání,
2 Diné nílíinii, nidineʼé bichʼįʼ handziihgo ábidiní, Bóhólníihii ání, Łahgo kéyah siʼą́ągi diltłish nítą́ągo áádóó ákwii diné kéédahatʼínígíí bitahdóó diné łaʼ bá haʼídéesʼı̨́įʼ dooleełii nideistı̨́įgo
3 hakéyahjįʼ diltłish bił oonéełgo éí diné há haideelʼı̨́įʼgo deenástsʼaaʼ bideeʼ bee íʼdílzoołí yee ádidooniiłgo diné yiʼdoołnih,
4 áko tʼáá háiida deenástsʼaaʼ bideeʼ bee íʼdílzoołí ánínígíí yidiiztsʼą́ąʼgo nidi bee biʼílniiʼígíí éí tʼáadoo yaa náʼáhodéestʼı̨́ı̨́ʼgóogo diltłish bee hoʼdiisyı̨́įgo tʼáá hó hadił bee hohodiitʼiʼ doo.
5 Deenástsʼaaʼ bideeʼ bee íʼdílzoołí áníigo jidiiztsʼą́ą́ʼ bee hoʼílniiʼígíí éí tʼáadoo biʼjiilaa da, áko hoʼdiisyínígíí tʼáá hó hadił bee hohodiitʼiʼ doo. Nidi bee hoʼílniiʼígíí biʼjiilaago éí jidoodzih nítʼééʼ.
6 Nidi haʼídéesʼı̨́ʼí aadę́ę́ʼ diltłish bił daʼínéehgo yiyiiłtsą́ągo áádóó deenástsʼaaʼ bideeʼ bee íʼdílzoołí tʼáadoo yee ádííniidgóogo diné tʼáadoo bidaʼasniiʼ da dooleeł. Áko diltłish bił anínáago diné tʼáá háiida łaʼ seesyı̨́įgo éí diné seesyínígíí doo ákwii áátʼįįdii tʼáá bił seesyı̨́į dooleeł, nidi haʼídéesʼı̨́ʼí éí diné seesyínígíí bidił bee hohodiitʼiʼ doo.
7 Áko ni, diné nílíinii, Ízrel dineʼé bá haʼídéesʼı̨́įʼii ániishłaa; tʼáá ooleełee nichʼįʼ yáshtiʼgo nídiitsʼı̨́įhgo shá bee iʼiyíłníih doo.
8 Tʼáá íiyisí doo yáʼáshóonii nílíinii, Tsʼídá tʼáá aaníí dadíítsaał, bidishníigo áádóó diné tʼáá íiyisí doo yáʼáshóonii yee átʼéii yitsʼádoogááł biniyé tʼáadoo biʼííníłniiʼgóó, áko diné tʼáá íiyisí doo yáʼáshóonii doo ákwii áátʼįįdii tʼáá yił dadootsaał, áádóó éí diné biʼdiisyínígíí bidił bee nihodiitʼiʼ doo.
9 Nidi diné tʼáá íiyisí doo yáʼáshóonii, Naʼátʼeʼ yóóʼadíʼaah, bidiníigo bee biʼííníłniiʼgo, nidi baʼátʼeʼígíí tʼáadoo yóóʼiidííʼą́ą́góogo éí doo ákwii áátʼįįdii tʼáá yił dadootsaał, nidi ni éí doo bee nikʼíhodootʼah da.
Diyin God átʼéii éí tʼáá ákogi átʼé (Ezek. 18:21-32)
10 Áko ni, diné nílíinii, Ízrel dineʼé kóbidiní, Kódadohníi niʼ, Bee hazʼáanii kʼidahiitíhígíí áádóó ádił nidaʼayiilzíhígíí bikʼee doo asohdadeelʼįįd da; ákoshąʼ haa yitʼéego dahiniiʼnáa dooleeł?
11 Kóbidiní, Tsʼídá tʼáá aaníí hinishná; ákótʼéego diné tʼáá íiyisí doo yáʼáshóonii daaztsą́ągo tsʼídá doo baa shił hózhǫ́ǫ da, ní Bóhólníihii Diyin God; nidi diné tʼáá íiyisí doo yáʼájíshóonii haʼátʼeʼígíí yóóʼazhdidooʼáałgo jiináago baa shił hózhǫ́. Tʼáá íiyisí doo yáʼáshǫʼ baa naahkaígíí yóóʼadahidohʼaahgo bitsʼánóhkááh, bitsʼánóhkááh, Ízrel dineʼé nohłíinii; haʼátʼíísh biniyé dadínóohnééł?
12 Áko ni, diné nílíinii, nidineʼé ábidiní, Diné tʼáá ákogi átʼéii bee hazʼáanii doo yikʼeh hółʼı̨́į da silı̨́įʼgo tʼáá ákogi ájoonííł nítʼééʼ yę́ę doo yisdáhodoołtéeł da, áádóó diné doo yáʼáshóonii bidoo yáʼáshǫʼ yitsʼáníyáago bidoo yáʼáshǫʼ yee doo ádił nááʼdoolzih da, índa diné tʼáá ákogi ájítʼéii ádił niʼdziilzíihgo tʼáá ákogi ájoonííł nítʼééʼ yę́ę bee jiináago doo bízhneelʼą́ą da doo.
13 Diné tʼáá ákogi átʼéii, Tʼáá aaníí hinínáa doo, bidííniidgo, nidi tʼáá ákogi ááníłígíí yaa dzólíigo áádóó tʼáá náábíláahjįʼ doo ákwii áátʼįįdgóogo tʼáá ákwii ádziidzaa yę́ę éí doo há bééhodoonih da, nidi doo ákwii ájíítʼįįdii biniinaa dazdootsaał.
14 Nááʼáłdóʼ diné tʼáá íiyisí doo yáʼáshóonii, Tʼáá aaníí dadíítsaał, bidííniidgo, nidi ádił niʼdziisíiʼii yóóʼazhdííʼą́ągo áádóó bee há hazʼáanii baa nijigháago tʼáá ákǫ́ǫ́ ájooníiłgo,
15 áádóó diné tʼáá íiyisí doo yáʼáshóonii bąąh niilyáii aa néídláago índa diné yighaʼídláii yaa néídláago, áádóó bee nihwiistʼáanii yikʼehgo hináago índa doo ádił niʼiilzííhgóó éí diné doo dadootsaał da, nidi tʼáá aaníí hináa doo.
16 Ádił niʼdziisíiʼii tʼááłáʼí nidi doo bee hachʼįʼ haʼdoodzih da; tʼáá áhoʼdiʼnínígi ájítʼéé nítʼééʼ áádóó tʼáá ákwii ájítʼéé nítʼééʼ, áko éí tʼáá aaníí jiináa dooleeł.
17 Nidi nidineʼé bitsʼą́ą́dóó oochíiłii éí, Bóhólníihii yee átʼéii doo ákǫ́ǫ́ átʼée da, daaní. Nidi tʼáá bí yee ádaatʼéii doo ákǫ́ǫ́ ádaatʼée da.
18 Diné tʼáá ákogi átʼéii tʼáá ákǫ́ǫ́ ájooníiłii yóóʼazhdííʼą́ągo áádóó doo ákwii ádziidzaagóogo éí bikʼé dazdootsaał.
19 Áádóó diné tʼáá íiyisí doo yáʼáshóonii bidoo yáʼáshǫʼ yóóʼiidííʼą́ągo áádóó bee bá hazʼáanii yaa naagháago tʼáá ákǫ́ǫ́ ááníiłgo éí diné hináa dooleeł.
20 Nidi Bóhólníihii yee átʼéii éí doo ákǫ́ǫ́ átʼée da, dadohní. Ízrel dineʼé nohłíinii, tʼááłáʼí nootínígo ádanohtʼéii bikʼehgo nihaa nídadéeshtʼįįł.
Jerúsalem kin haalʼáii bikʼeh hodeesdlı̨́įʼii baa haneʼ
21 Yisnááh daniidlı̨́įgo naakitsʼáadah náhááh góneʼ, neeznáá nídízííd binih, ashdlaʼgóó yoołkáałgo Jerúsalemdę́ę́ʼ diné léiʼ łaʼ yisdááyáá lágo shaa níyáago Jerúsalem kin haalʼáii tsʼídá ałtso biʼdisná, shiłníigo shił hoolneʼ.
22 Hoosʼįįdgo diné yisdáákaii dookah lágo éí tʼáá bítséedi iʼííʼą́ągo Bóhólníihii shikʼi dah déesniiʼgo yáshtiʼ ánáshiidlaa, áko éí diné abínígo yíkaigo doo yáshtiʼ yę́ę yáshtiʼgo ánáshiʼdiilyaa.
23 Áádóó Bóhólníihii shichʼįʼ hanáánáádzíiʼgo kóní,
24 Diné nílíinii, Ízrel bikéyahdi doo nidaagháhígóó nahazʼą́ą́góó ákǫ́ǫ́ diné kéédahatʼínígíí ádaaní, Éíbraham éí tʼáá łah diltʼéhí nítʼééʼ, áko kéyah bííʼ silı̨́ı̨́ʼ, nidi nihí éí tʼóó ahoniiʼyóí, áko tʼáá aaníí kéyah nihííʼ dooleełgo nihaa deetʼą́.
25 Éí bąą kóbidiní, Bóhólníihii Diyin God kóní, Dił tʼáá bił daʼołghał* áádóó nihiʼedaʼalyaii bichʼįʼ adahohaał índa diné nidaołtseedgo dił bitsʼádaazlı̨́įgo ádaohłeʼ. Ákótʼéegoósh kéyah nihííʼ dadooleeł?
26 Diltłish éí baa dadzíínóhłí áádóó doo daaldinii baa nidaahkai índa tʼááłáʼí nootínígo bił kééhohtʼíinii beʼasdzą́ą́ bił daʼahidołyé; kótʼéegoósh kéyah shóideeshtʼeeł danohsin?
27 Kóbidiní, Bóhólníihii Diyin God kóní, Tsʼídá tʼáá aaníí hinishná; ákótʼéego doo naagháhídi kéédahojitʼíinii tsʼídá diltłish bee nidahodiʼdootsił, índa halgaigóó kéédahojitʼíinii éí naaldlooshii dahodooldił biniyé tsʼídá baa hodideeshʼááł, índa bineʼ nidaʼadziʼgóó áádóó tsé daaʼáángóó kéédahojitʼíinii éí tsʼídá naałniih hodadidoolnahgo dazhdínóonééł.
28 Áko éí kéyah honoojíigo áádóó doo naagháhígóó ádeeshłííł áádóó bee hadziilgo bee ádaa hojiʼniihii ninítʼiʼ dooleeł índa Ízrel dineʼé dabidziilii éí doo bikááʼ siláhí da doo, áko doo łaʼ yąąh híidoogáał da.
29 Doo daaldinii baa nidadziskaígíí biniinaa éí kéyah honoojíigo áádóó doo naagháhígóó áhooshłaago, áko índa Bóhólníihii nishłı̨́įgo hoł béédahodoozįįł.
30 Áko diné nílíinii, ni éí nidineʼé naa nídaatʼı̨́įgo tsé ahénástłʼingo níʼáhígíí bitsı̨́ı̨́góó índa tʼáá dabighangóó chʼéʼétiingi naa yádaałtiʼgo ahił dahalneʼgo bikʼis danilíinii yił ałchʼįʼ yádaałtiʼgo, Haaʼíyeeʼ ahíídiikahgo Bóhólníihii nihichʼįʼ haadzíʼígíí dadidiitsʼı̨́ı̨́ł, daʼahidiʼní.
31 Niʼiildéhígíigi átʼéego naa nídaakah, shidineʼé danilı̨́įgo nidááhdóó nídinibįįh, bee bichʼįʼ yáníłtiʼígíí deidiitsʼaʼ, nidi tsʼídá doo yidaʼóleʼ átʼée da; Diyin God ayóóʼádayóʼníigo yádaałtiʼ nidi tʼáá bizábąąhídóó tʼéiyá yee ádaaní, nidi dabijéí yee yidádanoolníinii deinízin.
32 Áko shoo, ni éí bizhí ayóó ánóolningo áádóó ayóóʼahijoʼnííjí sin yee hataałii índa sin yee dahataałgo bee naʼaʼnéii yáʼátʼéehgo yee naanéhígíí áníínílnin, háálá bee bichʼįʼ yáníłtiʼígíí deidiitsʼaʼ, nidi tsʼídá doo yidaʼóleʼ ádaatʼée da.
33 Áko baa hoolzhiizhgo, jó, tʼáá aaníí baa honíyáa doo, áadi índa, Diyin God yá halneʼii nihitah naagháá nítʼééʼ lá, danízingo bił béédahodoozįįł.
Footnotes
^ Mózes bibee hazʼáanii bikʼehgo, Dił doo yidą́ą da, ní.
