Ezekiel 35:1-15
35 Nááʼáłdóʼ Bóhólníihii shichʼįʼ haadzíiʼgo kóní,
2 Diné nílíinii, Dził Síyer bichʼįʼgo ninítʼaah áádóó bikʼijįʼ nílı̨́įgo bá handziih,
3 kóbidiní, Bóhólníihii Diyin God kóní, Shoo, Dził Síyer yinílyéii nikʼijįʼ nishłı̨́; nichʼįʼ kʼídideeshnihgo atíndeeshłííł áádóó tsʼídá tʼáadoo nikááʼ siláhígóó ándeeshłííł.
4 Nikin hadaasʼáii naaʼahideeshkałgo kintsʼiil tʼéí dah naazhjaaʼ dííleeł, áko Bóhólníihii nishłı̨́įgo nił bééhodoozįįł.
5 Tʼáá áłahjįʼ akʼee diníniihgo biniinaa Ízrel dineʼé atíbiʼdiilyaa bikʼi hoolzhiizhdi, éí akéeʼdi atíbiʼdilnééh góneʼ diltłish bee atíbidiʼdoolnííł biniyé baa hodííníʼą́;
6 éí bąą Bóhólníihii Diyin God kóní, Tsʼídá tʼáá aaníí hinishná; ákótʼéego nidił doonah biniyé tsʼídá hashtʼenideeshłííł, índa nidił doonah biniyé diné dandínóołchééł; diné nisíníłtseedgo bidił dadeeznaʼígíí tʼáadoo dziisíníłháaʼ da biniinaa ni nidił doonah biniyé diné dandínóołchééł.
7 Dził Síyergi doo siláhígóó áádóó dah nídzílbáago áhodeeshłííł, áko áajįʼ ałnáádaakahii índa áádę́ę́ʼ nídadikahii éí ałtso nideestsił.
8 Bidził naaznilgóó diné nidaaztseedii biniinaa doo hazʼą́ą́góó áhodeeshłííł; nidah daaskʼidgóó áádóó nidah honítsʼaaʼgóó índa deíldzisgóó diné diltłish bee nidadootsił.
9 Tʼáá áłahjįʼ doo nąąh hólónígóó ándeeshłííł, índa nikin hadaasʼáágóó doo nidaagháhí da doo, áko índa Bóhólníihii nishłı̨́įgo nił bééhodoozįįł.
10 Azhą́ ákwii Bóhólníihii hólǫ́ǫ nidi, díí naakigo dineʼé kééhatʼínígíí índa díí naakigo kéyah sinilígíí shí doo, dííníniid;
11 éí bąą Bóhólníihii Diyin God kóní, Tsʼídá tʼáá aaníí hinishná; ákótʼéego bikʼee diníniihii biniinaa bichʼįʼ náhóóchįįdii áádóó yiiniłchʼı̨́dígíí bikʼehgo tsʼídá neiníshtʼı̨́į dooleeł, áko naa nísístʼįįdgo bitahgóó shéédahósingo ádeeshłííł.
12 Ákohgo Ízrel dineʼé bidził naaznilii bikʼijįʼ nahółtʼiʼgo hahínídzíiʼgo ádííníniid, Doo siláhígóó ábiʼdiilyaa; baa nidahodidiikah biniyé nihaa dadeestʼą́. Shí Bóhólníihii éí tʼáá ałtso disétsʼą́ąʼgo nił bééhodoozįįł.
13 Áko shichʼįʼ ádaa dzíínídlíigo shikʼijįʼ yáníłtiʼgo áádóó shikʼijįʼ nílı̨́įgo saad tʼóó ahayóí shichʼįʼ ahíínínil; shí disétsʼą́ą́ʼ.
14 Bóhólníihii Diyin God kóní, Nahasdzáán tʼáá siʼą́ą́ nítʼééʼ bikááʼgóó bił nidahoozhǫǫhgo nikéyah bikááʼgóó doo siláhígóó ándeeshłííł.
15 Ízrel dineʼé bikéyahgi doo siláhí da hazlı̨́įʼgo baa nił nihoozhǫǫhígíí biniinaa ni ałdóʼ ákóndeeshłííł; Dził Síyer áádóó Íídam kéyah tʼáá átʼé bikááʼ doo siláhí da doo, áko índa Bóhólníihii nishłı̨́įgo hoł béédahodoozįįł.
