Ezekiel 36:1-38
36 Áko ni, diné nílíinii, Ízrel dineʼé bidził naaznilígíí bichʼįʼ handziihgo ábidiní, Ízrel dineʼé bidził nohłíinii, Bóhólníihii áníinii dadoohtsʼı̨́ı̨́h:
2 Bóhólníihii Diyin God kóní, Anaʼí danilíinii, Heeyéiiʼ, tʼáá nááshiinídą́ʼídi aghánídahazʼáago nahazʼánígóó nihííʼ daazlı̨́ı̨́ʼ, danihidííniidígíí biniinaa
3 kódíníigo hólneʼ, Bóhólníihii Diyin God kóní, Ałʼąą dineʼé daadziihígíí bííʼ dadoohłeeł biniyé ałtso nihąąh daʼííbı̨́įʼgo daʼníłchʼishídę́ę́ʼ danihishjizh áádóó nihaa yádaałtiʼ índa doo yáʼátʼééhgóó nihaa aseezı̨́ dandzin;
4 éí bąą Ízrel dineʼé bidził soonilígíí Bóhólníihii Diyin God áníinii dadoohtsʼı̨́ı̨́h; dził soonilii índa dah daaskʼidii, dayíldzisii áádóó dabikoohii tʼáadoo siláhígóó tʼóó dah nídadzilbáago ádahoolyaii índa kin hadaasʼáágóó bikʼi dahoneesdzoodii éí diné tʼóó bąąh daʼííbı̨́įʼgo náánáłaʼ ałʼąą dineʼé danilíinii tʼóó bá nidahałtʼiʼgo baa daadloohii, Bóhólníihii kóbíłní;
5 jó, éí bąą Bóhólníihii Diyin God kóní, Tʼáá íiyisí shił halchíiʼgo łeʼnisingo ałʼąą dineʼé dajílíinii dadzidziihii hakʼijįʼ áádóó Íídam dineʼé tʼáá átʼé hakʼijįʼ nishłı̨́įgo yáshtiʼ, háálá hó shikéyah hwííʼ dadooleeł áádóó tʼóó bikʼi nizhdookah biniyé tʼáá íiyisí baa hoł dahózhǫ́ǫgo índa akʼee dazhdiniihgo ádá shódadzoostʼeʼ.
6 Éí bąą Ízrel dineʼé bikéyah baa handziihgo dził naaznilígíí áádóó dah daaskʼidígíí, deíldzisígíí áádóó dahonítsʼaaʼígíí ábidiní, Bóhólníihii Diyin God kóní, Shoo, ałʼąą dineʼé tʼóó nidahałtʼiʼgo bikʼee tiʼdahwiisooniiʼígíí biniinaa łeʼnisingo tʼóó báhádzidgo sháháchįʼgo haasdzííʼ;
7 éí bąą ałʼąą dineʼé nihinaagóó kéédahatʼínígíí bá nidahatʼiʼgo yikʼee tiʼdahwiidoonih; kótʼéego ádee haasdzííʼ, ní Bóhólníihii Diyin God.
8 Shidineʼé kʼadę́ę nákahígíí bąą, nihí Ízrel bidził danohłíinii, nihitsʼáozʼaʼ dahodooleełgo shidineʼé Ízrel bá nihineestʼąʼ dahodooleeł.
9 Háálá nihichʼijí nishłı̨́įgo nihichʼįʼ nídeesxis; nihikááʼ hashtʼééhodoolníiłgo kʼidiʼdoolyééł, jóʼakon;
10 nihikáaʼgi Ízrel dineʼé nilíinii tʼóó ahayóigo ádeeshłííł áádóó kin hadaasʼáágóó kénáádahojitʼı̨́į doo índa kin hadaasʼáii dááchǫʼígíí ninádadooʼnił,
11 áádóó nihikáaʼgi diné índa naaldlooshii tʼóó ahayóigo kʼeeʼąą nootʼı̨́įłgo ádeeshłííł, áko éí biyázhí nídahoodleełgo kʼeeʼąą nootʼı̨́įł doo; tʼáá átséedi ádanohtʼé yę́ęgi átʼéego nihikááʼgóó diné kéédahatʼı̨́į doo; átséédą́ą́ʼ nihaa jooshbaʼ nítʼééʼ yę́ę bilááh átʼéego nihaa jooshbaʼ doo, áko índa Bóhólníihii nishłı̨́įgo nihił béédahodoozįįł.
12 Tʼáá aaníí, shidineʼé Ízrel éí dineʼé lą́ą nihikááʼ naaldeeh doo; danihótąʼ doo áádóó bííʼ danohłı̨́į doo; áłchíní éí doo bąąh náádaohʼı̨́į da doo.
13 Bóhólníihii Diyin God kóní, Diné daołdeeł áádóó nihidineʼé tʼáá kééhatʼı̨́ı̨́ nítʼééʼ áłchíní bąąh daohʼı̨́, diné danihiłnínígíí biniinaa;
14 diné doo náádaołdeeł da doo, áádóó nihidineʼé tʼáá kééhatʼı̨́ı̨́ nítʼééʼ áłchíní doo bąąh náádaohʼı̨́į da dooleeł, ní Bóhólníihii Diyin God.
15 Ałʼąą dineʼé doo daʼnohłı̨́ı̨́góó ádanihííłʼįįdii yee nihá nidahałtʼiʼii doo náádadidootsʼı̨́ı̨́łgóó ádeeshłííł, dadineʼé doo nihá nináádahałtʼiʼ da dooleeł áádóó nidineʼé ádił nidaʼiilzíihgo doo ánáádadoohdlíił da, ní Bóhólníihii Diyin God.
16 Bóhólníihii shichʼįʼ hanáánáádzíiʼgo kóní,
17 Diné nílíinii, Ízrel dineʼé tʼáá bí bikéyahdi kééhatʼı̨́ yę́ędą́ą́ʼ yee ádaatʼéii áádóó yaa nidaakaígíí éí yee bikéyah dayííłchxǫʼ; asdzání ąądii nídaadleehígíí nahalingo shinááł yee ádaatʼéhígíí tʼóó badaaʼih nítʼééʼ.
18 Áko éí kéyah biyiʼ diné nidadziłtseedgo bidił daneeznaʼígíí áádóó hweʼedaʼalyaii bee kéyah dajííłchxǫʼígíí biniinaa tʼóó báhádzidgo sháháchįʼígíí bee atíhooshłaa;
19 ałʼąą dineʼé bitahgóó ahonííłkaad áádóó kédaayahgóó tadahodiʼnooskaad; bee ádajítʼéii índa ádajíítʼįįdígíí bikʼehgo haa nídasistʼįįd.
20 Tʼáá adadziiskaigóó ałʼąą dineʼé baa dadziiskaidi shízhiʼ doo ílı̨́ı̨́góó ádajiilaago diné ádaaní, Díí dineʼé Bóhólníihii bidineʼé ádaatʼı̨́, ákondi Bóhólníihii bikéyahdóó nahjįʼ hadadziizná, dahałní.
21 Ízrel dineʼé daʼníłtsʼą́ą́ʼgóó ałʼąą dineʼé bitahgóó tadzooskaígíí baa dadziiskaidi shízhiʼ doo ílı̨́ı̨́góó ádajiilaaígíí éí shízhiʼ diyinii tʼáá íiyisí bikʼédí nishłı̨́ı̨́ nítʼééʼ.
22 Éí bąą Ízrel dineʼé ábidiní, Bóhólníihii Diyin God kóní, Ízrel dineʼé nohłíinii, nihí éí doo nihiniinaa da, nidi ałʼąą dineʼé baa dahisoonáago shízhiʼ diyinii doo ílı̨́ı̨́góó ádaołaaígíí biniinaa kʼadę́ę kóshnééh.
23 Áádóó ałʼąą dineʼé bitahgóó shízhiʼ doo ílı̨́ı̨́góó ályaa yę́ę éí ałʼąą dineʼé bitahgóó shízhiʼ doo ílı̨́ı̨́góó ádaohłaa yę́ę éí shízhiʼ ayóó átʼéii diyingo yitʼı̨́įgo áńdeeshdlííł, áko dinishyinígíí nihitahgóó ałʼąą dineʼé dabinááł tʼáá sahdii átʼéego ánáshdlaago Bóhólníihii nishłı̨́įgo ałʼąą dineʼé bił béédahodoozįįł, ní Bóhólníihii Diyin God.
24 Kédaayah naaznilígíí tʼáá ałtso biiʼdę́ę́ʼ áádóó ałʼąą dineʼé bitahdóó nínánihidiyeeshdlahgo tʼáá nihí nihikéyah biih nánihideeshnił.
25 Ákohgo tó niłtólígo nihikʼídadeeshtahgo, tʼóó baaʼihii nihąąh dahólóonii tʼáá ałtso índa edaʼalyaii bichʼįʼ nidahohłáii tʼáá ałtso nihąąh táádadeesgis.
26 Ajéí ániidíii índa áhwiindzin ániidíii nihiih náhideeshʼnił; nihijéí daatséhígíí nihiiʼdóó hahideeshniłgo, ajéí yilzhólíii nihiih náhideeshʼnił.
27 Áádóó shiNíłchʼi Diyinii nihiiʼ dahólǫ́ǫgo, adanihideeshłíiłgo shibikʼeh óʼooʼníiłii bikʼehgo deínóhkáahgo áádóó shibikʼehgo hoogáałii bikʼeh dahonołʼı̨́įgo ádanihideeshłííł.
28 Danihizhéʼé kéyah baa diníʼáanii biiʼ kéédahohtʼı̨́į doo, áádóó shidineʼé danohłı̨́įgo nihiDiyin God nishłı̨́į doo.
29 Ninihiiłchxǫǫhii tʼáá ałtso bitsʼánihideeshnił; doo nááhodidoochįįłígíí biniyé tłʼoh naadą́ą́ʼ ałʼąą ádaatʼéii nidantʼąʼ dooleełgo bá hadeesdzih.
30 Doo nááhodidoochįįłgóó ałʼąą dineʼé bitahgóó doo nihaa yánááhodoosįįłígíí biniyé nihitsin bineestʼąʼ deílʼáágóó, áádóó nihidádaʼakʼehgóó tsʼídá tʼáá íiyisí hózhǫ́ łą́ągo nidaʼntʼąʼgo ádeeshłííł.
31 Tʼáá íiyisí doo yáʼáshǫ́ǫ́góó ádanohtʼéé nítʼééʼ yę́ę, áádóó ádaotʼįįd nítʼééʼ yę́ę béédadoołnih, áko ádił nidaʼayoosííʼ nítʼééʼ yę́ę índa doo ákwii ádaotʼįįd nítʼééʼ yę́ę biniinaa ádił ninádaʼohtʼįįh doo.
32 Ízrel dineʼé nohłíinii, díí tʼáá ałtso baa naasháhígíí éí doo nihí nihá baa naasháa da; bee ádanohtʼéii tʼóó bee ádaa yádanohdzin leʼ áádóó bee nihił dahalą́ą leʼ, shí Bóhólníihii kótʼéego haasdzííʼ.
33 Bóhólníihii Diyin God kóní, Doo ákwii ádaotʼįįdii tʼáá ałtso nihąąh deíłdeeʼgo nihikin hadaasʼáágóó kénáádahohtʼı̨́į dooleeł, áádóó kin dááchxǫʼígóó ninádadooʼnił.
34 Nihidádaʼakʼeh yę́ęgóó yíighah chʼídahaaskaígíí tʼáá ałtso nihidádaʼakʼehgóó nídahodíítłʼohgo áádóó doo siláhígóó dayiiłtsánígi kʼéédadidoolyééł.
35 Áko, Díí kéyah honoojíigo hazʼą́ą́ nítʼééʼ yę́ę Íídendi dáʼákʼeh nahalin silı̨́ı̨́ʼ, daaníigo yaa yádaałtiʼ doo, áádóó kin hadaasʼáágóó daakin naaʼadayiiskaadgo ałtso yąąh daʼííbı̨́įʼgo kintsʼiil tʼéí dah naazhjaaʼgo ádayiilaa yę́ęgóó bidahoníłdzilgo nináádaasʼnil áádóó ákǫ́ǫ́ diné kénáádahatʼı̨́.
36 Áko índa ałʼąą dineʼé tʼáá bą́ą́h níhą́dígóó kéédahatʼı̨́įgo daadziihii éí shí Bóhólníihii kin hadaasʼáago dááchxǫʼ yę́ę ninádasénilgo áádóó doo siláhígóó ádahoolyaa yę́ęgóó kʼéédaʼdíshdlaʼgo bił béédahózin doo, shí Bóhólníihii díí kódeeshnííł, dííniid, áko ákódeeshnííł.
37 Bóhólníihii Diyin God kóní, Ízrel dineʼé kódashiłníigo díí shí deídóokił: dibé nahalingo diné nihá nízhdínóołtʼı̨́ı̨́ł.
38 Hodílzingo áłah nídaʼadleeh góneʼ łah Jerúsalem kin haalʼáagi dibé náádahidoonihii ałtsʼááʼnilgo yílʼáhígi átʼéego kin hadaasʼáágóó kintsʼiil ádaalyaa yę́ę ákǫ́ǫ́ diné náádeílʼáa dooleeł, áko índa Bóhólníihii nishłı̨́įgo hoł béédahodoozįįł.