Ezekiel 37:1-28
37 Nítʼééʼ Bóhólníihii shikʼi dah deesniiʼgo Bóhólníihii biNíłchʼi Diyinii dah shidiiłtı̨́įgo honítsʼaaʼ léiʼgi tsʼin tʼóó ahayóí yílʼáago ákwii nishiníłtı̨́,
2 áko yitahgóó táshidíílóóz, áko shoo, honítsʼaaʼ góde tʼóó ahayóí eelʼá; nítʼééʼ shoo, tʼáá íiyisí nídááltsei lá.
3 Áádóó áshíłní, Diné nílíinii, díí tsʼin yílʼáhígíísh dahináa dooleełgo bohónéedzą́? Áko ádíshní, Bóhólníihii Diyin God nílíinii, ni nił bééhózin.
4 Áko ánááshidiʼní, Díí tsʼin yílʼáhígíí bichʼįʼ handziihgo ábidiní, Tsʼin nááltseii nohłíinii, Bóhólníihii nihichʼįʼ haadzíʼígíí dadoohtsʼı̨́ı̨́h.
5 Bóhólníihii Diyin God díí tsʼin haalʼáhígíí yichʼįʼ haadzíiʼgo ání, Jó, bee nídadohdzihii nihiih dahodooleełgo dahinohnáa doo;
6 nihitsʼid dahólǫ́ǫgo ádanihideeshłííł, áádóó nihitsįʼ dahodooleeł, áádóó nihikágí nihikʼídadeeshtihgo bee nídadohdzih dooleełii nihiih dadeeshłééł, áko dahinohnáa doo, áádóó Bóhólníihii nishłı̨́įgo nihił béédahodoozįįł.
7 Áádóó tʼáá bee shichʼįʼ haʼoodzíʼígíí bikʼehgo haasdzííʼ, áko haasdzíiʼgo hodiistsʼą́ąʼgo ajigháadgi íistsʼą́ąʼgo tsʼin ahidadiijil; tsʼin ahą́ą́h dadíʼáii ahéédadiijil.
8 Níshʼı̨́ı̨́ nítʼééʼ, jóʼakon, éí tsʼin bitsʼid dahazlı̨́ı̨́ʼ, nítʼééʼ bitsįʼ náádahasdlı̨́ı̨́ʼ, áádóó bikágí tʼáá ałtso bikʼínáádaastiʼ, nidi yee nídadidzihii biiʼ ádaadin.
9 Nítʼééʼ Bóhólníihii áshíłní, Níyol bichʼįʼ handziih, diné nílíinii, níyol bichʼįʼ handziihgo kóbidiní, Bóhólníihii Diyin God kóní, Níyol nílíinii, díí nidaaztseedígíí dahináa dooleeł biniyé tʼáá dı̨́ı̨́ʼdę́ę́ʼ bichʼįʼ díyóołgo biih daniyooł.
10 Tʼáá bee shichʼįʼ haʼoodzíʼígíí bikʼehgo haasdzííʼ, áko dahiná daazlı̨́įʼgo deizįʼ áádóó ayóó ánéelą́ą́ʼ yílʼá.
11 Ákohgo áshíłní, Diné nílíinii, díí tsʼin haalʼáhígíí éí Ízrel dineʼé tʼáá yílʼáá nítʼéʼígíí átʼé, áko shoo, ádaaní, Nihitsʼin nídááltsei, nihá chohooʼíinii ásdįįd áádóó ałtso ánihiʼdisdįįd.
12 Éí bąą kódíníigo bichʼįʼ handziih, Bóhólníihii Diyin God kónihiłní, Shoo, shidineʼé nohłíinii, danihijishchááʼ* nihá ąą ádadeeshłííł; áádę́ę́ʼ nánihidideeshjahgo Ízrel dineʼé bikéyah biih nánihideeshʼnił.
13 Áko shidineʼé nohłíinii, dajishchááʼgóó nishoojééʼ yę́ę nihá ąą ádaashłaadóó náánihidiiłjéeʼgo Bóhólníihii nishłı̨́įgo nihił béédahodoozįįł,
14 áko shiNíłchʼi nihiih dadeeshłeełgo dahinohnáa doo, áádóó tʼáá nihí nihikéyah biih nánihideeshʼish, áko shí Bóhólníihii éí haadzíiʼii áádóó íʼiilaii nishłı̨́įgo nihił béédahodoozįįł.
Júdah dineʼé áádóó Ízrel dineʼé tʼááłáʼí nídoodleełii baa haneʼ
15 Bóhólníihii shichʼįʼ hanáánáádzíiʼgo kóní,
16 Nááʼákóneʼ, diné nílíinii, tsin tʼááłáʼí nídiitįįhgo Júdah bá, áádóó bikʼisóó danilíinii Ízrel dineʼé bá bikáaʼgi bikʼeʼíłchí, áádóó Íífreiyim bitsin éí tsin nínáádiitįįhgo Jóseph bá índa bikʼisóó danilíinii Ízrel dineʼé bá bikáaʼgi bikʼeʼíłchí,
17 áko tsin tʼááłáʼí dooleeł biniyé ahidiiníiłgo ahííníłtąʼgo dahíjih.
18 Áko nidineʼé, Díí tsin éí haʼátʼíí ááhdiní? daniłníigo kóbididííniił,
19 Bóhólníihii kóní, Jó, Jóseph bitsin éí Íífreiyim áádóó yił ahéédahólzinii Ízrel dineʼé yił dah yootı̨́įłii éí nídideeshtı̨́įłgo Júdah bitsin bił ahidideeshnił índa tʼááłáʼí ádeeshłíiłgo tsin tʼááłáʼí dah yishtı̨́įł doo.
20 Áko tsin bikʼeʼíłchíii binááł dah yíjih doo.
21 Áko ádabididííniił, Bóhólníihii Diyin God kóní, Shoo, Ízrel dineʼé ałʼąą dineʼé bitahgóó tajooskai yę́ę éí bitahdę́ę́ʼ nínáhodiyeeshdlah, daʼníłchʼishídę́ę́ʼ áłah ánáhodeeshdlíiłgo tʼáá hó hakéyah biih náhodeeshʼnił,
22 áádóó tʼáá hó hakéyahdi Ízrel dineʼé bidził naaznilígíí bighą́ąʼdi tʼááłáʼí dineʼé dajílı̨́įgo áhodeeshłííł, áko tʼáá jílʼáá nítʼééʼ tʼááłáʼí aláahgo naatʼáanii honantʼáa dooleeł; naakigo ałʼąą dineʼé doo náádajídlı̨́į da dooleeł áádóó doo naakigo kénáádahojitʼı̨́į da dooleeł índa bee óhólníihii doo naakigo bee hoł nááhástʼą́ą da dooleeł.
23 Áádóó hweʼedaʼalyaii áádóó bikʼee dazhdiniihii índa bee hazʼáanii doo bikʼeh dahojííłʼįįdii éí doo łaʼ bee ánáádazhdidoolchxǫǫł da; kéédahojitʼínígóó ádił nidaʼdziiszíiʼii éí bitsʼą́ąjįʼ yisdáhodiyeeshniłgo, tʼóó badaaʼihii hwee dahólóonii hąąh dadeeshdahgo shidineʼé dajílı̨́į doo áádóó haDiyin God nishłı̨́į doo.
24 Shá naalʼaʼí David aláahgo honantʼáa doo; tʼáá ádzíłtso haa áhályáanii tʼááłáʼí doo áádóó shibikʼehgo hoogáałii bikʼehgo dajíkáah doo índa bee nihodiishʼaahii bikʼeh dahojíłʼı̨́į doo.
25 Shá naalʼaʼí Jéíkab kéyah baa diníʼánídi, danihizhéʼé yę́ę kéédahatʼı̨́ı̨́ nítʼééʼ yę́ędi kéédahojitʼı̨́į doo áádóó hadaʼáłchíní índa banáádaʼáłchíní áádóó éí badaʼáłchíní ákwii hoolʼáágóó kéédahatʼı̨́į dooleeł; shá naalʼaʼí David éí hoolʼáágóó binantʼáa doo.
26 Bee achʼįʼ hózhóonii bee hoł ahadaʼdideeshtʼááł; hoolʼáágóó hoł ahadaʼdinishtʼą́ą dooleeł; hohoníłdzilgo áádóó tʼóó ahojíyóigo áhodeeshłííł índa hoolʼáágóó shikin biiʼ sohodizin hatahgi nideeshʼáałgo ákwii kééhashtʼı̨́į doo.
27 Áko hatahgi kééhashtʼı̨́į doo áádóó haDiyin God nishłı̨́į doo índa shidineʼé dajílı̨́į doo.
28 Shikin biiʼ sohodizin haníiʼgi hoolʼáágóó hólǫ́ǫgo ałʼąą dineʼé éí shí Ízrel dineʼé diyingo ádaashłaago bił béédahodoozįįł.
Footnotes
^ Bábilan kéyahdi yisnááh dajílı̨́ı̨́ nítʼéʼígíí ááhyiłní.
