Ezekiel 38:1-23
38 Bóhólníihii shichʼįʼ hanáánáádzíiʼgo kóní,
2 Diné nílíinii, Méígag dineʼé bikéyahdi Mííshek dineʼé áádóó Túbal dineʼé binanitʼaʼí Gag wolyéii bichʼįʼ dah diníitʼaahgo bikʼijįʼ nílı̨́įgo handziih,
3 áádóó, Shoo, Gag yinílyéii, Mííshek dineʼé índa Túbal dineʼé binanitʼaʼí nílíinii, nikʼijįʼ nishłı̨́, ní Bóhólníihii Diyin God,
4 áko nándeesxis áádóó nizééʼ góneʼ béésh názhahígíí adeeshniłgo bee niyaatsʼiin deeshah áádóó łı̨́ı̨́ʼ índa łı̨́ı̨́ʼ yee nidaabaahii tʼáá átʼéé nítʼééʼ béésh ééʼ yiiʼ naazhjéeʼgo nisiláo tʼáá dah yinééł nítʼééʼ; tʼáá bił ayóó ánéelą́ą́ʼ oonéełgo áádóó béésh téél áchʼą́ą́h dah yitʼáałii índa naagé deíjáahgo áádóó diltłish deíjáahgo éí tʼáá bił chʼíndeesłóós:
5 Pérzha dineʼé áádóó Iithiyópiya dineʼé índa Líbiya dineʼé éí hódaóltąʼgo éí tʼáá átʼé béésh chʼah dabichʼahgo áádóó naagé deíjáahgo
6 Gómar dineʼé* áádóó bisiláo tʼáá átʼéé nítʼééʼ bił índa náhookǫs biyaadę́ęʼgo Togármah dineʼé áádóó bisiláo tʼáá átʼéé nítʼééʼ yił yinéełgo diné tʼóó ahayóí nił hólónígíí bił chʼíndeesłóós.
7 Ni áádóó ayóó ádanéelą́ąʼgo ninaagóó dah daʼínéehii bił hashtʼeʼádadołnééh áádóó hashtʼeʼádíínílzingo bá haʼísííd.
8 Ląʼí yiską́ą́dóó bikʼijįʼ níká áhodidooʼniił áádóó ląʼí nááhaidóó bikʼijįʼ éí Ízrel dineʼé bikéyahgi dził naaznilgo tʼáá áłahjįʼ doo naagháhí yę́ęgóó ałʼąą dineʼé bitsʼą́ą́dę́ę́ʼ diné áłah danilínę́ę, éí kéyah anaaʼ biniinaa yíchxǫʼ yę́ę háádílyaii biih dahidoohnééł, nidi Ízrel dineʼé éí ałʼąą dineʼé bitahdę́ę́ʼ nínádahaasdláaʼgo ákwii tʼáadoo beinítʼínígóó bohoníłdzilgo kénáádahatʼı̨́į doo.
9 Ayóó átʼéego deeyolígíí nahalingo náás doohnééł; kʼos diłhił yilzhołígíí nahalingo kéyah tʼáá níłtéél nítʼééʼ bikááʼ nikidínóołtʼeeł áádóó nisiláo tʼáá yinééł nítʼééʼ bił índa diné tʼóó ahayóigo éí bił kódoohnííł.
10 Bóhólníihii Diyin God kóní, Éí bijı̨́ doo yáʼátʼééhgóó tsídííkosgo nahodííʼaałgo
11 ádidííniił, Kin dah naazhjaaʼgo doo binaa ahéédaʼastłʼinii bichʼįʼ hideeshdáałgo diné bohoníłdzilgo doo íitsʼaʼígóó kéédahatʼíinii éí doo binaa ahéédaʼastłʼinii áádóó doo bidáńʼdaʼditı̨́įhii índa doo bichʼą́ą́h dáńʼdaʼdilkałii bikʼiidiijah,
12 áko bąąh daʼoogą́ąʼii nídahidííchił áádóó hééł tʼóó ahayóí chʼídahidííyééł; doo nidaagháhí yę́ęgóó kʼad ákǫ́ǫ́ diné kéédahatʼíinii áádóó ałʼąą dineʼé bitahdę́ę́ʼ áłah ánályaii éí bił anaaʼ daʼahidíílʼįįł; éí béégashii índa naalyeʼé nishódayoostʼeʼgo kédaayah ałníiʼgi kéédahatʼı̨́.
13 Shííba dineʼé áádóó Díídan dineʼé índa Társhish dineʼé bikin dah naazhjaaʼígíí áádóó baa nidaʼiiniihii kódaaníigo nidanídídóołkił, Hééł índa béésh łigaii áádóó óola áádóó naalyeʼé índa bąąh daʼoogą́ąʼii ayóó ánéelą́ąʼgo náádahídóohchiłgo nihidahidoohxéełgo béégashii tʼáá bił nihidahidínóołkałígíísh biniyé nisiláo áłah íinilaa?
14 Éí bąą diné nílíinii, Gag bichʼįʼ handziihgo kóbidiní, Bóhólníihii Diyin God kóní, Éí bijı̨́ Ízrel shidineʼé bohoníłdzilgo kééhatʼı̨́įgo tsʼídá nił bééhózin doo.
15 Náhookǫs nidahoneesʼą́ądi kééhótʼı̨́ı̨́dę́ę́ʼ díínááł; ni áádóó diné ayóó ánéelą́ąʼgo, éí tʼáá ałtso łı̨́ı̨́ʼ bił deíjeehgo, ayóó ánéelą́ą́ʼ siláo yinéełgo siláo ayóó ánéelą́ą́ʼ bił díínééł.
16 Kʼos éí kéyah ałtso bikʼi diilkǫʼ nahonílingo shidineʼé Ízrel baatįįh díínééł áádóó akéeʼdi yoołkáałdi, Gag yinílyéii, ałʼąą dineʼé dabinááł dinishyinígíí bééhoozįįhgo ałʼąą dineʼé bił béédahózin dooleełígíí biniyé shikéyahdi anadíníídzįįł.
17 Bóhólníihii Diyin God kóní, Tʼah nigháídę́ę́ʼ Ízrel dineʼé bitahgi diné shá nidaalʼaʼí tʼáá éí binahjįʼ naa hashneʼgo hahásdzíiʼii ánítʼı̨́; éí shá dahalneʼii danilı̨́ı̨́ nítʼéeʼii éí yoołkááł yę́ędą́ą́ʼ shidineʼé bikʼi niideeshjahgo kótʼéego shá yaa dahalneʼgo ląʼí nááhai.
18 Bóhólníihii Diyin God ání, Baa hoolzhiizhdi Gag éí Ízrel bikéyahdi kéédahatʼíinii yikʼiidoojah yiniyé nínáago tʼóó báhádzidgo bee atíʼéshʼíinii bááhodoodzííł.
19 Jó, łeʼnisingo áádóó tʼóó báhádzidgo atíʼéshʼínígíí hadíínóód bijı̨́ Ízrel dineʼé bikéyahdi ayóó átʼéego niʼ nahaʼnáa doo, dishníigo bee haasdzííʼ;
20 łóóʼ éí tónteel biyiʼ yílʼáhígíí, tsídii wótʼáahdi nidaatʼaʼii, naaldlooshii halgaigóó naaldeehii áádóó nihokááʼ nidaaʼnaʼii tʼáá ałtso áádóó nihokááʼ dineʼé tʼáá ałtso honishłónígíí bikʼee bitah dahoditłid doo áádóó dził éí naaʼahidooʼnił áádóó tsé danítʼiʼii éí nidahidoołdas áádóó kin bá nídaastłʼinii éí tʼáá ałtso nidahidoołdas.
21 Áádóó shidził naaznilgóó tʼáá átʼé honiyé diltłish yíídéeshkił índa diné tʼáá ałtso diltłish yee bikʼis anaaʼ néidoołʼįįł, ní Bóhólníihii Diyin God.
22 Naałniih áádóó diné naatseedgo dił danílı̨́įgo ádaalneʼígíí tʼáá bił bee hainíshtʼı̨́į doo áádóó hó índa hasiláo dah deínéehii áádóó diné tʼóó ahayóí hóóltąʼígíí tʼáá bił tó yajiiłı̨́ nahalingo nahałtinígíí áádóó nílótsoh áádóó kǫʼ índa tsékǫʼ hakʼijįʼ naałtingo ádeeshłííł.
23 Kótʼéego ayóó átʼéii nishłínígíí áádóó tʼáá íiyisí dinishyinígíí ííshją́ą́ ádeeshłííł índa ałʼąą dineʼé tʼóó ahayóí binááł ííshją́ą́ ídiʼdeeshnííł, áko índa Bóhólníihii nishłı̨́įgo hoł béédahodoozįįł.
Footnotes
^ Bikéyah nítʼéʼígíí éí díí jı̨́ kéyah Térkii hoolyé.
