Ezekiel 39:1-29
39 Diné nílíinii, Gag bikʼijįʼ nílı̨́įgo handziihgo kóbidiní, Gag yinílyéii, Mííshek dineʼé índa Túbal dineʼé agháago binanítʼáii, Bóhólníihii Diyin God kóní, Nikʼijįʼ nishłı̨́, jóʼakon;
2 nándeesxisgo náhookǫsjigo nihoneelʼą́ą́dę́ę́ʼ handínéesoł, áko tʼáá náás nineesołgo Ízrel dineʼé dabidził bikʼiidoohjah,
3 áádóó ałtı̨́ı̨́ʼ nishtłʼajígo bee dah yítı̨́įłii nílákʼee habízhdeeshhałgo nishʼnáájí kʼaaʼ dah yíjihii nílákʼee hadoołdas.
4 Áko índa ni áádóó nisiláo dah deínéehgo bił yínínáanii tʼáá ałtso índa diné tʼóó ahayóí nóóltąʼígíí éí tʼáá bił Ízrel dineʼé bidził naaznilgóó nidanihidiʼdootsił, índa tsídii daʼalghałii tʼáá ałtso índa naaldlooshii dahashkéii tʼáá ałtso danihidoolghał biniyé baa nihidideeshʼááł.
5 Halgaigi nidanihidiʼdootsił, háálá shí haasdzííʼ, ní Bóhólníihii Diyin God.
6 Méígag dineʼé áádóó tónteel bibąąhgóó bohoníłdzilgo kéédahojitʼíinii kǫʼ hakʼijįʼ yeideeshnił, áádóó índa Bóhólníihii nishłı̨́įgo hoł béédahodoozįįł.
7 Shidineʼé Ízrel bitahgi éí shízhiʼ diyinii bééhózingo ádeeshłííł, áádóó shízhiʼ diyinii doo ílı̨́ı̨́góó tsʼídá doo bee hanááʼdoodzih da, áko índa Ízrel dineʼé bitahgi Bóhólníihii Diyinii nishłı̨́įgo ałʼąą dineʼé bił béédahodoozįįł.
8 Bóhólníihii Diyin God ání, Shoo, bichʼįʼ hoolzhish áádóó bohodoolnííł, éí tʼáá íídą́ą́ʼ bee haasdzííʼ.
9 Áadi índa Ízrel dineʼé bikin hadaasʼáágóó kéédahojitʼínígíí áádę́ę́ʼ chʼíhizhdookahgo naagé ádaatʼéii, béésh téél áchʼą́ą́h dah yitʼáałii áádóó ałtı̨́ı̨́ʼ índa kʼaaʼ, tsihał áádóó tsiidétáán éí bee anadahatʼíinii yee déédeidiłjahgo dabikǫʼ doo; tʼáá ákódaatʼı̨́įgo tsostsʼid nídoohah,
10 áko chizh dahólǫ́ǫ́góó doo nídazhdikah da doo, índa tsintahdi doo daʼdzitseełgóó áádę́ę́ʼ doo chizh nidajiiyeeh da doo, háálá bee anadaʼalʼíinii éí dahachizh dooleeł; nidahałtseedgo honaalyeʼé náádayíizhchid yę́ę nidadziłtseedgo binaalyeʼé náádahízhdóochił, áádóó nidahałtseedgo hayéél adayiizyíinii nidadziłtseedgo biyéél adahizhdooyééł, ní Bóhólníihii Diyin God.
11 Éí bijı̨́ Ízrel dineʼé bikéyahgi tónteel hiníyínígíí haʼaʼaah bichʼijígo honítsʼaaʼgo diné bideetiingi Gag índa hasiláo tʼáá yinééł nítʼééʼ bił łeeh hodiʼdooʼnił; Gag dineʼé tʼóó ahayóí dah yinéełii ákwii yóóʼádaalyaaígíí biniinaa atiingóó nidadikahii tʼáá ádíjįʼ nidahakáah doo; ákwii Héíman-gag honítsʼaaʼ hoolyée doo.
12 Tsostsʼid nídeezidjįʼ kéyah tʼáá náhwiistʼą́ą́ nítʼééʼ hashtʼééhálnééh biniyé Ízrel dineʼé yóóʼádahaleʼ doo.
13 Éí hoolzhishdi ayóó áníshtʼéhígíí ííshją́ą́ áshłaago éí kéyahdóó diné tʼáá yílʼáá nítʼééʼ yóóʼádahodoolíiłgo bee béédahoʼdílzingo baa haʼniih doo, ní Bóhólníihii Diyin God.
14 Tsostsʼid nídeezidóó bikʼijįʼ diné łaʼ yitsʼádeidooniłgo kéyah tʼáá nidahashjizhígi nidantáago éí kéyahgóó háádiikahgo, áko diné nidaaztseedgo tʼah doo yóóʼádaalnéehii ahandayiijáahgo yóóʼadeidoolííł; kótʼéego kéyah tʼáá náhwiistʼą́ą́ nítʼééʼ hashtʼéédahodoodlííł.
15 Éí kéyahgi díí diné bitsʼáʼnilígíí yikahgóó łaʼ tʼáá háiida diné bitsʼin shijaaʼgo yiyiiłtsą́ągo diné yóóʼadaʼałʼínígíí Héíman-gag honítsʼaaʼdi yóóʼádayiilaajįʼ tsʼin naazhjaaʼígíí bíighahgóó bee ééhózinii yadahizhniishı̨́įh doo.
16 Hamónah kin haalʼáhígíí ałdóʼ ákweʼé doo. Kótʼéego kéyah tʼáá náhwiistʼą́ą́ nítʼééʼ hashtʼéédahozhdoodlííł.
17 Áko ni, diné nílíinii, tsídii ałtah ádaatʼéii tʼáá ałtso índa naaldlooshii ałtah ádaatʼéii tʼáá ałtso bichʼįʼ handziihgo ábidiní, Bóhólníihii Diyin God kóní, Ízrel bidził naaznilii bighą́ąʼdi náádahaniihiigi átʼéego bee ádaʼazįįdii ayóó ánéelą́ą́ʼ, áko náádahaniihiigi átʼéego bee ádaʼazįįdii nihibaʼ hashtʼeeshłéhígíí biniyé ahíhohkáahgo hágo áłah hohłeeh áádóó daʼdoołghał índa dił dadoohdlı̨́ı̨́ł.
18 Béíshan nahósʼaʼdóó daneeskʼahii tʼáá ałtso diné ayóó ádaatʼéii éí deenástsʼaaʼ nidahalinii, dibé yázhí nidahalinii, tłʼízí nidahalinii, dóola nidahalinii dadoołghał áádóó nihokááʼgóó naatʼáanii danilíinii bidił dadoohdlı̨́ı̨́ł.
19 Náádahaniihiigi átʼéego bee ádaʼdoozįįłii nihá hashtʼeeshłéhídi hwiih dasoolı̨́įʼjįʼ neeskʼahii dadoołghał áádóó nihił dahoniidoijįʼ dił dadoohdlı̨́ı̨́ł.
20 Łı̨́ı̨́ʼ índa tsindaabąąs bijáád naakiígíí yee nidaabaahii áádóó diné ayóó ádaatʼéii índa tʼáá ałtah átʼéego nidaabaahii éí shibikááʼ adání bikááʼdóó daołghałgo bee hwiih dadoohłeeł, ní Bóhólníihii Diyin God.
21 Áko bee ayóó áníshtʼéii ałʼąą dineʼé bitahgóó bééhózingo ádeeshłííł, áádóó hánihoníʼánígíí índa kʼídinishniiʼgo atíhooshłaaígíí ałʼąą dineʼé tʼáá ałtso bił béédahodoozįįł.
22 Éí bijı̨́ áádóó náás hoolzhishgóó Ízrel dineʼé biDiyin God yídahółníihii nishłı̨́įgo bił béédahodoozįįł.
23 Áádóó ałʼąą dineʼé éí Ízrel dineʼé doo ákwii ádáátʼįįdígíí biniinaa biʼdisnáago bił béédahodoozįįł; ádił nidaʼiisíiʼgo biniinaa doo bikʼi díníshʼı̨́įʼ da sélı̨́ı̨́ʼ, áko hweʼanaʼí danilíinii baa hodiníʼą́ągo tʼáá ádzíłtso diltłish bee hoʼdoogą́ą́ʼ.
24 Tʼóó badaaʼihígi ádajitʼínígíí áádóó bee hazʼáanii dajiitíihii biniinaa haa nísístʼįįd áádóó doo honíshʼı̨́į da sélı̨́ı̨́ʼ.
25 Éí bąą Bóhólníihii Diyin God kóní, Kʼad lą́ą índa Jéíkab bitsʼą́ą́dóó oochíiłii yisnááh danilíinii nahjįʼ kódeeshłíiłgo daabííʼ nítʼééʼ yę́ę bíiʼgo áńdeeshdlííł, áádóó Ízrel dineʼé tʼáá ałtso baa aʼááh dínéesįįł áádóó shízhiʼ Diyinii baa łeʼnisingo hánígo baa áháshyą́ą doo.
26 Ízrel dineʼé tʼáá bí bikéyahdi tʼáadoo bił yééʼ áhóleʼí kééhatʼı̨́įgo baa yádaznízin nítʼééʼ yę́ę áádóó naʼadloʼ shindajiisdéél nítʼééʼ yę́ę ałtso baa deizhdiyoonah.
27 Dadineʼé bitahdę́ę́ʼ náhoníʼeezhgo áádóó hwedaʼanaʼí danilíinii bikédaayahdę́ę́ʼ áłah ánáhooshdlaago, áko índa ałʼąą dineʼé tʼóó ahayóí binááł Ízrel dineʼé bitahgi dinishyin doo,
28 áko índa bídahojíłníihii nishłı̨́įgo áádóó biDiyin God nishłı̨́įgo hoł béédahodoozįįł, háálá ałʼąą dineʼé bitahgóó yisnááh dazhdooleełgo ahonííł kaad áádóó tʼáá ádzíłtso tʼáá hó hakéyahjįʼ áłah ánáhodeeshdlííł, áko ałʼąą dineʼé bitahdi doo łaʼ tʼáá áánináádajikai da dooleeł.
29 Tsʼídá doo hatsʼą́ąjįʼ hanáádínéeshniił da, háálá Ízrel dineʼé shiNíłchʼi Diyinii baa diníʼą́, ní Bóhólníihii Diyin God.
