Ezekiel 4:1-17
4 Nidi, diné nílíinii, bistʼą́ʼí sitʼéhígíí łaʼ nídiiʼaahgo nidááhdóó niníʼaah; bikáaʼgi Jerúsalem kin haalʼáhígíí bééʼídlééh;
2 bikʼi dah adishjéeʼgo ádíílííł; bichʼįʼ bineʼ naʼadziʼii ádíílííł índa bíilkʼidgo ádíílííł áádóó ałdóʼ binaagóó siláo dah deínéehgo ádíílííł índa binaagóó tsin bee naʼnílgohígíí naaznilgo ádíílííł.
3 Áádóó ałdóʼ béésh nitłʼizii łeetsʼaaʼ niteelii nídiiʼaahgo Jerúsalem bichʼįʼ ádáahgi nihidiitséehgo doo ákónítʼéégóó bichʼįʼ ninítʼaah, áko bináʼáshzhiizhgo ánílééh. Ízrel dineʼé dajílíinii díí hachʼįʼ bee ééhózin doo.
4 Kʼad éí nishtłʼajigo naa níshíníjizhgo níteeh, áko Ízrel dineʼé doo ákǫ́ǫ́ ádáátʼįįdii nooshkʼiizhjí ákááʼ dasíyeeh; naa níshíníjizhgo sínítínígíí tʼáá yoołkááł bikʼeh Ízrel dineʼé doo ákǫ́ǫ́ ádáátʼįįdii bá dah yíyéeł doo.
5 Ízrel dineʼé doo ákǫ́ǫ́ ádaatʼı̨́ı̨́góó nináháháahii tʼáá éí bikʼehgo táadi neeznádiindóó baʼaan náhástʼédiin yiską́ąjįʼ ákótʼéego sínítı̨́į dooleełgo naa diníʼą́, kótʼéego Ízrel dineʼé doo ákǫ́ǫ́ ádáátʼįįdii bá dah yíyéeł doo.
6 Díí ałtso łaʼ yinilaago ninishʼnáajigo náádíníítéełgo Júdah dineʼé doo ákǫ́ǫ́ ádáátʼįįdii bá dah yíyéeł doo; dízdiin yiską́ąjįʼ kótʼéego sínítı̨́į doo; tʼááłáʼí niyiiłkaahígíí éí tʼááłáʼí náháhígíí bikʼehgo wóltaʼgo naa diníʼą́.
7 Nigąąziz de niigiizhgo Jerúsalem bikʼi dah adishjéʼígíí bichʼįʼ doo ákónítʼéégóó ninítʼaah áádóó Jerúsalem bikʼijįʼ hadíídzih.
8 Kʼad shoo, Jerúsalem ałtso bikʼi dah adishjéeʼjįʼ doo náhííjish da dooleełígíí biniyé nikʼi niʼdeeshtłʼooł.
9 Nááʼákóneʼ tłʼoh naadą́ą́ʼ índa tłʼoh naadą́ą́ʼ bideeʼí, naaʼołí ałdóʼ índa naaʼołí nímazí áádóó tłʼoh naadą́ą́ʼ biyázhí índa tłʼoh naadą́ą́ʼ noolniní éí ahiih dadííjih áádóó ałtaa nídííkʼáałgo taidíínihgo ádá bááh ádíílííł;* táadi neeznádiindóó baʼaan náhástʼédiin yiską́ąjįʼ nishtłʼahjigo sínítı̨́įgo éí bááh niyą́ą doo.
10 Tʼááłáʼí dah adiidlohígíí ałnííʼdóó áníłdásígíí bíighahgo łaʼa jı̨́įjįʼ nánídı̨́įh doo.
11 Tó díídlı̨́łígíí éí kwáart ałnííʼdóó baʼaan bínáʼneelʼąąhgo łaʼa jı̨́įjįʼ tsʼídá tʼáá ákweʼé oolkiłgo nánídlı̨́įh doo.
12 Bááh ályaaígíí diné bichaan bee niłtʼeesgo binááł nánídı̨́įh doo.
13 Áádóó Bóhólníihii ánáádíʼní, Ízrel dineʼé éí ałʼąą dineʼé bitahgóó tahodínéeshkałígíí éí kótʼéego bááh doo dílzinii dajiyą́ą doo.*
14 Áádóó ádíshní, Shoo, Bóhólníihii Diyin God nílíinii, tsʼídá laʼ tʼah doo kótʼéego tʼóó shaaʼihgo íʼdíshnéeh da; tʼáá bíniʼ daaztsáanii áádóó naaldlooshii nibiizhnizhii índa atsįʼ doo dílzinii éí ashiiké nishłı̨́ı̨́dą́ą́ʼdóó díí jı̨́įjįʼ tsʼídá tʼah doo łaʼ yishą́ą da.
15 Áádóó ánááshidiʼní, Diné bichaan bitsáskʼehgi béégashii bichaan* bee bááh niłtʼees dooleełgo naa diníʼą́.
16 Áádóó ánááshidiʼní, Diné nílíinii, shoo, Jerúsalemgi kóhodeeshłííł: bááh bídin hóyéeʼgo ádeeshłííł, áko bááh há dah dahidiidleehgo hoł nidahooyeehgo dajiyą́ą doo; tʼóó bikʼee hoł adahayóigo tó áłchʼı̨́ı̨́dígo hataakaʼgo dajidlą́ą doo;
17 bááh índa tó hwee ádaadingo ałchʼįʼ tʼóó hoł adahayói doo índa doo ákwii ádajíítʼįįdígíí biniinaa nidahizhdoołgą́ą́ł.
Footnotes
^ Chʼiyáán bídin hóyéeʼgo álástsiiʼ ałʼąą ádaatʼéii ałtaa násdziidgo bá álʼı̨́.
^ Mózes bibee hazʼáanii éí chʼiyáán łaʼ doo bidiʼdéhígíí doo yidą́ą́góó yee hasʼą́.
^ Díí bee dahakǫʼgo dazhdiłid nítʼééʼ; éí doo diné bichaanígi átʼéego tʼóó baaʼih da.
