Ezekiel 40:1-49
40 Yisnááh daniidlı̨́įgo naadiin ashdlaʼ náhááh góneʼ tʼóó hááhaidóó neeznáágóó yoołkáałgo, kin haalʼáagi kééhojitʼíinii hakʼeh hodeesdlı̨́ı̨́ʼdóó bikʼijįʼ dı̨́ı̨́ʼtsʼáadah nááhaidi tʼáá éí bijı̨́ Bóhólníihii shikʼi diilniiʼgo áadi shił níʼáázh.
2 Diyin God bitsʼą́ą́dę́ę́ʼ shił áhátʼı̨́įgo áshiilaaígíí éí bee Ízrel dineʼé bikéyahdi shił níʼáazhgo dził tʼáá íiyisí aláahdi níʼáá léiʼ yikáaʼgi dah shineesdá; ákweʼé shádiʼááh bichʼijígo kin haalʼá nahalingo yiiłtsą́.
3 Ákwii shił níʼáázh nítʼééʼ, shoo, diné łaʼ béésh łitsoii noolningo* áádóó tłʼóół ditsʼidígíí índa lókʼaaʼ bee íʼneelʼąąhí dah yoojihgo dáńʼdítı̨́įhgi sizı̨́.
4 Áádóó éí diné áshíłní, Diné nílíinii, díníʼı̨́ı̨́ʼ áádóó ííníłtsʼą́ą́ʼ índa nichʼįʼ ádeeshłíłígíí tʼáá ałtso baa nitsíníkees, háálá nichʼįʼ ádeeshłíłígíí biniyé kweʼé nideedlóóz, áko yíníʼínígíí tʼáá ałtso Ízrel dineʼé bee bił hólneʼ.
5 Áádóó shoo, kin biiʼ sohodizin siʼánígíí binaago ahééhoolʼáhígíí éí bikʼi dinaadgo tʼáá átʼé ahééʼítłʼin diné éí lókʼaaʼ bee íʼneelʼąąhí dah yootı̨́łígíí éí áníłtsooígíí kúbit wolyéii hastą́ą́h ahą́ą́h dadeestsihgo ákóníłnééz, áko ahééʼítłʼinígíí yíʼnééłʼąądgo lókʼaaʼ bee íʼneelʼąąhí áníłtsoígi íídéetą́ą́ʼ áádóó dego ałdóʼ tʼáá ákónízah.
6 Ákohgo haʼaʼaahjigo dáńʼdítı̨́hígíí bichʼįʼ ałkʼi hooʼniłí híiʼáago éí bąąh hajiyá áádóó chʼéʼétiin siláii wóyahdi bízhnééłʼąądgo lókʼaaʼ bee íʼneelʼąąhí áníłtsoígi ákóníłtéél lá, áádóó łahjí chʼéʼétiin siláii ałdóʼ lókʼaaʼ bee íʼneelʼąąhí áníłtsoígi ákóníłtéél.
7 Áko booshkʼiizhjígo yah adahwiisdzą́ągo wóneʼí nahazʼánígíí éí nááseeʼgo lókʼaaʼ bee íʼneelʼąąhí áníłtsoígi ákódahonízah áádóó naaniigo éí ałdóʼ ákódahoníłtéél índa éí hooghan bitaʼgi tʼáá bíniʼ nahazʼánígóó ádahonízahígíí éí tseebíí ké siláádóó nááʼáłnííʼ ákódahonízah. Chʼéʼétiin siláii wóyahdi bízhnééłʼąądgo tʼáá áłah lókʼaaʼ bee íʼneelʼąąhí áníłtsoígi ákóníłtéél.
8 Áádóó dáńʼdítı̨́ı̨́hdóó bitsʼáníʼáhígíí éí wóneʼdę́ę́ʼ yíʼnééłʼąądgo lókʼaaʼ bee íʼneelʼąąhí áníłtsoígi ákónízah.
9 Áko kin biiʼ sohodizin dáńʼdítı̨́ı̨́hdę́ęʼgo biiʼ yah ahoolʼáhígi yíʼnééłʼąąd nítʼééʼ: tááʼtsʼáadah ké siláádóó nááʼáłnííʼ áhoníłtso áádóó tsin ííʼáhígíí éí táadi ké siláádóó nááʼáłnííʼ ákódaníłtsááz. Áko dáńʼdítı̨́ı̨́hdóó bitsʼáníʼáago éí kin biiʼ sohodizin bichʼįʼgo deezʼá.
10 Haʼaʼaahjigo dáńʼdítı̨́hígíí éí ałtsʼą́ą́hjí táaʼgo yah adahwiisdzánígíí éí tʼáá táaʼgo ahee dahoníłtso; ałtsʼą́ą́hjí adaazʼáhígíí éí tʼáá ahee daníłtso.
11 Nááʼákóneʼ dáńʼdítı̨́hígi yínááʼnééłʼąąd nítʼééʼ tsostsʼidtsʼáadah ké silá bíighahgo yah ahoolʼá áádóó kin biiʼ sohodizin bichʼįʼgo atiinígíí éí naaniigo yínááʼnééłʼąąd nítʼééʼ naadiin naaki ké silá ákóníłtéél.
12 Áádóó hastą́ągo ałtsʼą́ą́hjí dahooghanígíí éí bichʼą́ą́h naakigo tʼáá ałtsʼą́ą́hjí aníʼá; éí tʼáá áłah tʼááłáʼí ké siláádóó nááʼáłnííʼ tʼįįhdí biláhígo áníłtéél. Áádóó éí dahooghanígíí biiʼ ádahoníłtsoígíí éí nááseego lókʼaaʼ bee íʼneelʼąąhí áníłtsoígi ákódahonízah áádóó naaniigo ałdóʼ tʼáá ákódahonízah.
13 Ákohgo dáńʼdítı̨́hígíí łahjígo hooghan siʼánígíí bikááʼdóó áádóó haʼnaa náánáłahjígo hooghan siʼánígíí bikáaʼjįʼ yah aʼatiinígíí yínááʼnééłʼąąd nítʼééʼ; dáádílkał bitaʼ ánízahígíí éí dízdiindóó baʼaan naaki ké siláádóó nááʼáłnííʼ bíighahgo bitaʼ ánízah.
14 Dáńʼdítı̨́hígíí binaagóó ahééhoolʼáhígíí bikʼi dinaadgo tsin yadaaʼáii éí lókʼaaʼ bee íʼneelʼąąhí neeznáadi ahą́ą́h díʼáh bíighahgo ákódaníłnééz.
15 Nááʼáłdóʼ dáńʼdítı̨́hígíí tłʼóóʼdę́ęʼgo yah iʼiildéhígi éí áádóó ahééhoolʼáhígíí nááseego nihoneelʼą́ąjįʼ tseebídiindóó baʼaan ashdlaʼ ké siláádóó nááʼáłnííʼ ákónízah.
16 Dáńʼdítı̨́hídę́ę́ʼ honítʼiʼígíí éí ałtsʼą́ą́hjí dahooghanígíí bitsésǫʼ dahólǫ́, áádóó éí bineʼdę́ę́ʼ tsin yadaaʼáhígíí éí bíchı̨́ı̨́shkʼą́ąhgo bitsésǫʼ náásee dahaatsʼóóz; tʼah tʼáá násídi ałdóʼ yah ajigháahgo wóneʼdę́ę́ʼ tʼáá ákótʼéego tsésǫʼ náádahódlǫ́ áádóó tsin yadaaʼáhígíí éí bąąhjįʼ páam sikaadii bidaʼalyaago nidaaskʼęęʼgo ahéédaasʼá.
17 Áko shił dah diiʼáazhgo hózhǫ́ tłʼóoʼdi ahééhoolʼáhí góneʼ shił yah ííʼáázh áádóó shoo, hótłʼizgo ahééhoolʼáago áhoolyaaígíí bikááʼgóó tádiingo dahooghango ahééhoolʼá.
18 Áko chʼíjíghááhdóó dáńʼdaʼditı̨́hígíí dego ádaníłtsooígíí bíighahgo tsʼídá ákóhoníłtéelgo ahééhoolʼá, áko díí wóyahgo hótłʼizgo ahééhoolʼá.
19 Áádóó índa tłʼóoʼjigo dáńʼdítı̨́hígíí biyiʼdę́ę́ʼ éí áádóó náwóneʼdi ahééhoolʼáhígíí éí bíighahjįʼ ánízahígíí yínááʼnééłʼąądgo tʼááłáhídi neeznádiindóó baʼaan tsostsʼidiindóó baʼaan naaki ké siláádóó nááʼáłnííʼ ánízah; haʼaʼaahjigo índa náhookǫsjigo tʼáá áłah ákóhonízah.
20 Áádóó tłʼóoʼdi ahééhoolʼáhígíí náhookǫsdę́ęʼgo bidáńʼdítı̨́hígíí áádóó éí haa honíłtéelgo yah ahoolʼáhígíí yíʼnééłʼąąd índa nááseego áníłtsooígíí ałdóʼ yíʼnééłʼąąd.
21 Ałtsʼą́ą́hjí éí táaʼgo dahooghan áádóó bíighahgi tsin yadaaʼáhígíí ádaníłtsooígíí índa yah iʼiildéehgi áhoníłtsooígíí éí áłtsé yah aʼatiin ádaníłtso yę́ęgi ádaníłtso; ákweʼé yah aʼatiinígíí nááseego tseebídiindóó baʼaan ashdlaʼ ké siláádóó nááʼáłnííʼ ákónízah índa dízdiindóó baʼaan naaki ké siláádóó nááʼáłnííʼ ákóhoníłtéél.
22 Bitsésǫʼ áádóó náasdi yah iʼiildéehdi índa tsin yadaaʼáhígíí bąąhjįʼ páam sikaadii béédaʼalyaago nidaaskʼęęʼígíí éí haʼaʼaahjí yah aʼatiinígíí áníłtsooígi ákódaníłtso áádóó tsostsʼidgo ałkʼi hooʼniłí éí dah náhástʼánígíí bichʼįʼ haazʼá.
23 Náwóneʼdi ahééhoolʼáhígíí haʼaʼaahdę́ęʼgo yah aʼatiin áhootʼéhígíí tʼáá ákótʼéego náhookǫsdę́ę́ʼ yah aʼatiinígíí binaashiijí yah aʼatiin hólǫ́, áádóó bitaʼ ánízahígíí yíʼnééłʼąądgo tʼááłáhídi neeznádiindóó baʼaan tsostsʼidiin ké silá bitaʼ ánízah.
24 Ákohgo shádiʼáahjigo shił náánátʼáazhgo, shoo, ákwii yah aʼatiin lá, áko éí ałtsʼą́ą́hjí tsin níyizgo nihidiiʼáhígíí tʼáá áłah yíʼnééłʼąąd áádóó yah iʼiildéhígi ákwii naaniigo ałdóʼ yíʼnééłʼąąd; łaʼ yah aʼatiinígíí tʼáá áłah yił aheeníłtso lá.
25 Łaʼ naakigo yah aʼatiinígíí bitsésǫʼ tʼáá łaʼ yę́ęgi átʼéego díí shádiʼááhdę́ęʼgo yah aʼatiinígíí bitsésǫʼ dahólǫ́ índa yah iʼiildéhígi tsésǫʼ dahólǫ́; yah aʼatiinígíí nááseego tseebídiindóó baʼaan ashdlaʼ ké siláádóó nááʼáłnííʼ ákónízah áádóó naaniigo éí dízdiindóó baʼaan naaki ké siláádóó nááʼáłnííʼ ákóhoníłtéél.
26 Áádóó dah náhástʼánígíí bichʼįʼ tsostsʼidgo ałkʼi hooʼniłí haazʼá; wóneʼdi éí yah ahóótʼiʼ chʼéʼétiindóó tłʼóoʼdi éí tsin ałtsʼą́ą́hjí ííʼáhígíí éí tʼáá áłah bąąhjįʼ páam sikaadii béédaʼalyaago nidaaskʼęęʼ.
27 Áádóó wóneʼdi ahééhoolʼáhígíí éí shádiʼááhjígo yah aʼatiin; éí áádóó yónáasdi shádiʼáahjigo áadi yah aʼatiiníjįʼ yíʼnééłʼąąd nítʼééʼ tʼááłáhídi neeznádiindóó baʼaan tsostsʼidiin ké silá bitaʼ ánízah.
28 Ákohgo shádiʼááhdę́ęʼgo yah aʼatiindę́ę́ʼ shił yah ííʼáazhgo wóneʼdi ahééhoolʼáhíjįʼ shił niníʼáázh, áádóó shádiʼáahjigo yah aʼatiinígíí yíʼnééłʼąąd, nítʼééʼ tʼáá łaʼ áníłtsooígi áníłtso lá;
29 ałtsʼą́ą́hjí dahooghanígíí áádóó tsin yadaaʼáhígíí áádóó yah iʼiildéehgi ákóníłtsooígíí tʼáá łaʼ ádaníłtsooígi ádaníłtso índa bitsésǫʼ dahólǫ́ índa yah iʼiildéehgi ałdóʼ tsésǫʼ dahólǫ́; yah aʼatiinígíí nááseego éí tseebídiindóó baʼaan ashdlaʼ ké siláádóó nááʼáłnííʼ ákónízah, áádóó naaniigo éí dízdiindóó baʼaan naaki ké siláádóó nááʼáłnííʼ ákóhoníłtéél.
30 Binaagóó éí yah adaʼiildéhígíí dahólǫ́, áko nááseego dízdiindóó baʼaan naaki ké siláádóó nááʼáłnííʼ ákódahonízah, áádóó naaniigo éí tseebíí ké siláádóó nááʼáłnííʼ ákódahoníłtéelgo yah adaʼiiztiin.
31 Áádóó tłʼóoʼjigo ahééhoolʼáhígíí bichʼįʼgo chʼéʼétiingi tsin yadaaʼáhígíí bąąhjįʼ páam sikaadii béédaʼalyaago nidaaskʼęęʼ, áádóó dah náhástʼánígíí bichʼįʼ tseebíigo ałkʼi hooʼniłí haazʼá.
32 Áádóó shił dah náádiitʼáazhgo haʼaʼaahjígo wóneʼdi ahééhoolʼáhígíí yíighahjįʼ shił niníʼáazhgo yah aʼatiinígíí yínááʼnééłʼąąd, nítʼééʼ éí áníłtsooígíí éí łaʼ ádaníłtsooígíí tsʼídá tʼáá ákóníłtso lá.
33 Ałtsʼą́ą́hjí dahooghanígíí áádóó tsin yadaaʼáhígíí índa yah iʼiildéehgi áníłtsooígíí tʼáá łaʼ ádaníłtsooígi ádaníłtso, éí tʼáá ałtso bitsésǫʼ dahólǫ́ índa yah iʼiildéehgi tsésǫʼ dahólǫ́; yah aʼatiinígíí nááseego éí tseebídiindóó baʼaan ashdlaʼ ké siláádóó nááʼáłnííʼ ákónízah; naaniigo éí dízdiindóó baʼaan naaki ké siláádóó nááʼáłnííʼ ákóhoníłtéél.
34 Éí tłʼóoʼjigo ahééhoolʼáhígíí bichʼįʼgo chʼéʼétiingi ałtsʼą́ą́hjí tsin yadaaʼáhígíí bąąhjįʼ páam sikaadii béédaʼalyaago nidaaskʼęęʼ áádóó dah náhástʼánígíí bichʼįʼ tseebíigo ałkʼi hooʼniłí haazʼá.
35 Ákohgo náhookǫsjígo yah aʼatiiníjįʼ shił náánátʼáazhgo éí yínááʼnééłʼąąd, nítʼééʼ łaʼ áníłtsooígi átʼéego tʼáá ákónáádaníłtso,
36 áádóó ałtsʼą́ą́hjí dahooghanígíí áádóó tsin yadaaʼáhígíí índa yah aʼatiingi ákóníłtsooígíí éí łaʼ ádaníłtso yę́ęgi átʼéego tʼáá ákódaníłtso; bitsésǫʼ ałdóʼ dahólǫ́, yah aʼatiinígíí nááseego éí tseebídiindóó baʼaan ashdlaʼ ké siláádóó nááʼáłnííʼ ákónízah; naaniigo éí dízdiindóó baʼaan naaki ké siláádóó nááʼáłnííʼ ákóhoníłtéél.
37 Tłʼóoʼjigo ahééhoolʼáhígíí bichʼįʼgo chʼéʼétiingi ałtsʼą́ą́hjí tsin yadaaʼáhígíí bąąhjįʼ páam sikaadii béédaʼalyaago naaskʼęęʼ, áádóó dah náhástʼánígíí bichʼįʼ tseebíigo ałkʼi hooʼniłí haazʼá.
38 Yah aʼatiinígi tsin yadaaʼáhígíí bíighahgóó hooghan siʼą́; éí bichʼéʼétiin hólǫ́; ákwii didlidgo náádahaniihii tánínádaagis.
39 Yah aʼatiin bíighahgóó ałdóʼ yah iʼiildéhígi éí ałtsʼą́ą́hjí bikááʼ adání naaki sinil; éí bikáaʼgi didlidgo náádahaniihii áádóó ádił niʼiidzííhjí náádahaniihii índa ádił oodzíiʼgi bee kʼééhodooldǫǫłgo náádahaniihii ákwii nidaatseed.
40 Náhookǫsdę́ę́ʼ yah aʼatiinígíí éí yah iʼiildéhígi tłʼóóʼdę́ęʼgo ałtsʼą́ą́hjí bikááʼ adání naaki sinil áádóó wóneʼdę́ęʼgo ałdóʼ bikááʼ adání naaki sinil.
41 Áko wóneʼdę́ęʼgo bikááʼ adání dı̨́ı̨́ʼ sinil; tłʼóóʼdę́ęʼgo ałdóʼ dı̨́ı̨́ʼ sinil, áko bikááʼ adání bikáaʼgi náádahidoonihii nidaatseed dooleeł biniyé tseebíí sinil.
42 Áko tsé dı̨́ı̨́ʼ hashtʼeʼnibídaʼastséelgo didlidgo náádahidoonihii bá sinil; nááseego naakidi ké siláádóó nááʼáłnííʼ ákódaníłtso; naaniigo ałdóʼ tʼáá ákódaníłtéél, dego éí tʼááłáʼí ké siláádóó nááʼáłnííʼ tʼįįhdí biláhígo ákódanízah; éí bikáaʼgi didlidgo náádahaniih dooleełii bee naatseedígíí ákwii ninádaaʼnił doo.
43 Áádóó yah aʼatiingi hazʼání góneʼ béésh nídaazhahígíí dı̨́ı̨́ʼ bikʼehgo ádaníłtsogo bąąh hadaazʼá; tsé bikáaʼgi atsįʼ náádahidoonihígíí ninádaaʼnił doo.
44 Áko tłʼóóʼdę́ę́ʼ wóneʼdi dáńʼdítı̨́híjįʼ náwóneʼdi ahééhoolʼáhí góneʼ naakigo hooghan éí sin yee dahataałígíí bá hazʼą́; náhookǫsjí yah aʼatiinígíí éí bichʼijígo łaʼ hooghan, éí shádiʼáahjigo chʼéʼétiin; łaʼ haʼaʼaahjí yah aʼatiin bíighahgi náhookǫsjigo chʼéʼétiin.
45 Áko áshíłní, Díí hooghan shádiʼáahjigo chʼéʼétiinígíí éí náádaʼiiłniihii kin biiʼ sohodizin bee bídahólníih dooleełii bá siʼą́.
46 Áádóó hooghan náhookǫsjigo chʼéʼétiinígíí éí náádaʼiiłniihii ákwii bikááʼ nááʼiiniihí bee bídahólníih dooleełii bá siʼą́; éí Zéídak* baʼáłchíní náás ahoolchíiłii tʼéiyá náádaʼiiłniihii nídaadleehgo Líívai dineʼé bitsʼą́ą́dóó oochíiłii tʼáá bí tʼéiyá Bóhólníihii yitʼáahjįʼ nídadikahgo ákwii ninádaalʼaah dooleeł.
47 Náwóneʼdi ahééhoolʼáhígíí éí yíʼnééłʼąądgo nááseego tʼááłáhídi neeznádiindóó baʼaan tsostsʼidiin ké siláádóó nááʼáłnííʼ ákónízah; naaniigo ałdóʼ tʼááłáhídi neeznádiindóó baʼaan tsostsʼidiin ké siláádóó nááʼáłnííʼ ákóníłtéél, áko dı̨́ı̨́ʼdę́ę́ʼ tʼáá aheedaníłtso áádóó bikááʼ nááʼiiniihí éí kin biiʼ sohodizin bidáahgi siʼą́.
48 Ákohgo kin biiʼ sohodizin siʼánígíí bichʼéʼétiinjįʼ shił niníʼáázh, áádóó chʼéʼétiingi ałtsʼą́ą́hjí tsin ííʼáhígíí yíʼnééłʼąąd, nítʼééʼ éí tʼáá áłah tseebíidi ké siláádóó nááʼáłnííʼ íídéetą́ą́ʼ, áádóó dáńʼdítı̨́hígíí tʼáá ałchʼijí naaniigo ashdlaʼ ké silá áníłtéél.
49 Áádóó bichʼéédą́ąʼgi chahaʼohígíí tádiindóó baʼaan dı̨́ı̨́ʼ ké silá ánízah áádóó naaniigo tseebíítsʼáadah ké siláádóó nááʼáłnííʼ ákóhoníłtéél índa ałkʼi dah nídahastʼą́ągo bikááʼ háádaʼaldahí áajįʼ haazʼá áádóó dáńʼdítı̨́hígíí bíighahgóó éí ałtsʼą́ą́hjí áyah niiʼáii naakigo ííʼá.
Footnotes
^ Diyingo naalʼaʼí ááhyiłní.
^ Aláahgo naatʼáanii David yę́ę éí Zéídak nááʼiiłniihii nilı̨́įgo niiníłtı̨́.
