Ezekiel 41:1-26
41 Áádóó índa hodiyingo hazʼáníjįʼ shił niníʼáázh, áádóó ákwii tsin naaki dego yaaʼáhígíí yíʼnééłʼąąd, nítʼééʼ tʼáá áłah neeznáadi ké silá íídéetą́ą́ʼ, áko níbaal biiʼ hodílzinii naaniigo ákóníłtéél nítʼééʼ.
2 Áádóó chʼéʼétiin éí tsostsʼidtsʼáadah ké silá ákóhoníłtéél áádóó chʼéʼétiingi niʼdóó níléí wódahjįʼ nineelʼáníjįʼ tseebíidi ké siláádóó nááʼáłnííʼ ánízah; tʼáá ałchʼijí ákótʼé áádóó hodiyingo hazʼání góneʼ nááseego yíʼnééłʼąąd, nítʼééʼ hastą́diindóó baʼaan tseebíí ké silá ákónízah, naaniigo éí tádiindóó baʼaan dı̨́ı̨́ʼ ké silá ákóhoníłtéél.
3 Ákohgo hodiyingo hazʼání góneʼ yah ííyáago chʼéʼétiin siláii tʼáá ałchʼijí yíʼnééłʼąąd, nítʼééʼ tʼáá áłah naaniigo táadi ké siláádóó nááʼáłnííʼ íídéetą́ą́ʼ; chʼéʼétiin éí neeznáadi ké silá ánízah índa naaniigo éí naakitsʼáadahdi ké silá áhoníłtéél.
4 Áádóó hodiyingo hazʼánígíí biláahdi łaʼ nááhástʼą́; éí yínááʼnééłʼąąd, nítʼééʼ nááseego tádiindóó baʼaan dı̨́ı̨́ʼ ké silá ánízah áádóó naaniigo tádiindóó baʼaan dı̨́ı̨́ʼ ké silá ákóhoníłtéél; ákóhoníłtsogo hazʼą́, áko áshíłní, Díí kweʼé hazʼánígíí éí tsʼídá agháago hodiyingo hazʼą́.
5 Índa kin biiʼ sohodizin bá ahénátłʼinígíí yínááʼnééłʼąąd nítʼééʼ éí neeznáadi ké silá íídéetą́ą́ʼ; díí kin bá nástłʼinígíí binahjįʼ hooghan éí hastą́ądi ké siláádóó nááʼáłnííʼ ákódaníłtsogo ádaalyaago ahéénínil.
6 Áko díí hooghan ahéénínilígíí tʼáá ałtso táaʼgo ałkʼi dahooghan; niʼdi hooghan ahéénínilígíí tʼáá ałtso bikáaʼgi dahooghango tʼáá átʼégo tádiingo náádahooghan; éí náábíkáaʼgi tádiin náádahooghan kótʼéego tádiin ałkʼi dahooghan; ałkʼi dahooghanígíí beego kin biiʼ sohodizin bá nástłʼinígíí áłtʼą́ą́ʼí silı̨́ı̨́ʼ, áko bá nástłʼinígíí bikááʼgóó dah náhástʼą́ągo ádahoolyaaígíí éí bee hooghan ałkʼiih naaznilígíí de ádayósin; kin biiʼ sohodizin bá nástłʼinígíí binahjįʼ hooghan ałkʼiih naaznilgo bá nástłʼinígíí tłʼóóʼdę́ęʼgo nílʼı̨́įgo bitsı̨́ı̨́dóó níléí bikáaʼjįʼ aheedéetą́ąʼgo hahodiilʼá.
7 Táaʼgo ałkʼi dahooghanígíí ałtis ádaníłtéelgo ádaalyaa, áko ayaadi hooghanídóó éí bikáaʼdi hooghanígíí áajįʼ atisgo niteel áádóó éí bikááʼdóó nááhooghanígíí áajįʼ hózhǫ́ niteel. Wóneʼé ałnííʼdóó níléí akáaʼdi hooghaníjįʼ hahaztʼiʼ.
8 Kin biiʼ sohodizin biyaadi ahééʼítłʼingo ałdóʼ yiiłtsą́. Kin ayaadi sinilígíí éí bikáaʼgi hooghan ałkʼiih naaznilgo bee niłdzilígíí éí lókʼaaʼ bee íʼneelʼąąhí bíneelʼą́ągo dah náhástʼą́.
9 Díí kin ałkʼiih naaznilígíí bá nástłʼinígíí éí tseebíí ké siláádóó nááʼáłníiʼgi ákwíídéetą́ą́ʼ, áádóó kin biiʼ sohodizin bá nástłʼinígíí áádóó tłʼóoʼdi ahéénínáʼítłʼingo bitaʼgi yidziihígíí éí hooghan ałkʼiih naaznilígíí bá hazʼą́.
10 Éí kin biiʼ sohodizin binaagóó kin ałkʼiih naaznilgo nineelʼánídóó tádiindóó baʼaan dı̨́ı̨́ʼ ké silá áhoníłtéelgo ahééhoolʼá.
11 Náhookǫsjígo kin ałkʼiih naaznilígíí éí tʼááłáʼí chʼéʼétiinígíí bee bichʼįʼ yah ahóótʼiʼ, shádiʼááhjí ałdóʼ kin ałkʼiih naaznilígíí ałdóʼ tʼááłáʼí chʼéʼétiin bee bichʼįʼ yah ahóótʼiʼ; kin biiʼ sohodizin binaagóó dah náhástʼą́ągo binázʼáhígíí éí tseebíí ké siláádóó nááʼáłnííʼ ákóníłtéél.
12 Eʼeʼaahjí kin biiʼ sohodizin bichʼįʼgo kin łaʼ náánástʼą́; éí kin siʼánígíí naaniigo tʼááłáhídi neeznádiindóó baʼaan náhástʼéítsʼáadah ké siláádóó nááʼáłnííʼ ákóníłtéél, nááseego éí tʼááłáhídi neeznádiindóó baʼaan ashdladiindóó baʼaan tááʼ ké siláádóó nááʼáłnííʼ ákóhonízah; kin bá nástłʼinígíí tʼáá dı̨́ı̨́ʼdę́ęʼgo tseebíí ké siláádóó nááʼáłnííʼ ákódeidéetą́ą́ʼ.
13 Áádóó kin biiʼ sohodizin siʼánígíí haʼaʼaahdóó eʼeʼaahjįʼ áníłtsooígíí yínááʼnééłʼąąd nítʼééʼ, tʼááłáhídi neeznádiindóó baʼaan tsostsʼidiin ké siláádóó nááʼáłnííʼ ákónízah; éí bighą́ąhjįʼ tʼáá bíniʼ hazʼánídóó kin eʼeʼaahjigo niníʼáhíjįʼ yínááʼnééłʼąąd nítʼééʼ, tʼááłáhídi neeznádiindóó baʼaan tsostsʼidiin ké siláádóó nááʼáłnííʼ ákónáánízah,
14 áádóó kin biiʼ sohodizin bidááh gónaa tʼáá bíniʼ hazʼánígíí tʼáá bóóltąʼgo éí tʼáá átʼégo tʼááłáhídi neeznádiindóó baʼaan tsostsʼidiin ké siláádóó nááʼáłnííʼ ákóhoníłtéél.
15 Kin biiʼ sohodizin siʼánígíí éí áádóó eʼeʼaahjigo tʼáá sahdii náánástʼánígíí ałtsʼą́ą́hjí bikʼi chahaʼohgo ahééhoolʼáhígíí tʼáá bił yínááʼnééłʼąąd nítʼééʼ, tʼáá átʼégo tʼááłáhídi neeznádiindóó baʼaan tsostsʼidiin ké siláádóó nááʼáłnííʼ ákóhonízah.
16 Kin biiʼ sohodizin bichʼéʼétiingi naa dah sitánígíí áádóó tsésǫʼ ádaałtsʼóózí índa chahaʼohgo ahééhoolʼáhígíí éí tʼáá bóóltąʼgo niʼdóó tsésǫʼíjįʼ tʼáá átʼé tsin neheeshjííʼ tʼéiyá ahééhiníkaadgo bee ályaa; tsésǫʼígíí éí dáńʼdadilbał dooleełgo átʼé.
17 Kin biiʼ sohodizin siʼánígíí biyiʼdę́ęʼgo áádóó tłʼóóʼdę́ęʼgo éí níléí dáádílkał dego niníʼáhíjįʼ ákónízahgo éí tsin neheeshjííʼ ahééhiníkaadii tʼáá átʼé yínáádaʼnééłʼąąd.
18 Nidaaskʼęęʼ áádóó nidaashchʼąąʼgo éí páam sikaadii áádóó diyingo naalʼaʼí chérab wolyéii bił ałtaʼ nínilgo ádaalyaago ahééhoolʼá; chérab wolyéii tʼááłáʼí nítínígo ałtsʼą́ąhjįʼ biniiʼ dahólǫ́;
19 łaʼ biniiʼígíí éí diné biniiʼ, áko páam sikaadii yichʼįʼgo biniiʼ, łahjígo biniiʼígíí éí náshdóítsoh bitsiijįʼ ditłʼooígíí biniiʼ, éí łahjí páam sikaadii deiníłʼı̨́įgo kótʼéego dabikáaʼgo tʼáá átʼéé nítʼééʼ ahééhoolʼá.
20 Hodiyingo hazʼánígi niʼdóó dáádílkał de niníʼáhíjįʼ áádóó ahééniníkaadígíí kótʼéego dabikáaʼgo ahééhoolʼá.
21 Hodiyingo hazʼánígi bichʼįʼ yah eʼetiinígi chʼéʼétiin siláii ánoolninígíí índa agháago hodiyingo hazʼání ánoolninígíí tʼáá áłah dikʼą́ągo ádaalyaa.
22 Bikááʼ nááʼiiniihí éí tsin bee ályaa booshkʼiizhjí naanídaazʼáhígóó níléí niʼjįʼ nihidadiiʼáajįʼ áádóó bááłkʼiisdóó níléí niʼdi éí tʼáá átʼé tsin bee ádaalyaa, áko dego ashdlaʼ ké silá ákónízah; naaniigo éí tááʼ ké siláádóó nááʼáłnííʼ áníłtéél áádóó áshíłní, Díí éí Bóhólníihii bidááhdóó bikááʼ nááʼiiniihí siʼánígíí átʼé.
23 Áádóó hodiyingo hazʼánígíí índa agháago hodiyingo hazʼánígíí éí tʼáá áłah ákweʼé ałtsʼą́ą́hjí dáádílkał naaki dahidínil.
24 Áádóó éí dáádílkał tʼáá áłah ałníiʼgi ąą ánáhtʼįįh.
25 Áádóó hodiyingo hazʼánígíí bichʼįʼ dáádílkał ąą ánálʼįįhígíí wóneʼdę́ę́ʼ ahééhoolʼáhígíigi átʼéego dáádílkał bikááʼdę́ęʼgo páam sikaadii índa diyingo naalʼaʼí chérab wolyéii béédaʼalyaago nidaaskʼęęʼ, áádóó tłʼóóʼdę́ę́ʼ yah ahóótʼiʼídę́ę́ʼ bidáádílkał dah hidínilíjįʼ tsin neheeshjííʼ ditánígíí bikʼi niilkaad.
26 Áádóó kin biiʼ sohodizin siʼánígíí bichahaʼoh ałtsʼą́ą́hjígo índa booshkʼiizhjí hooghan biniyé nahazʼánígíí éí tsésǫʼ ádaałtsʼóózígo ádaalyaa índa páam sikaadii béédaʼalyaago bikááʼ nidaaskʼęęʼ áádóó áajįʼ tsin neheeshjííʼ ditánígíí bikʼi niilkaad.
