Ezekiel 42:1-20
42 Áádóó tłʼóoʼdi ahééhoolʼáhíjįʼ shił chʼínáánátʼáazhgo kin biiʼ sohodizindóó náhookǫsjigo kin siʼą́ą́ léiʼjįʼ shił nináánátʼáázh; éí kin biiʼ sohodizin siʼą́ą́dóó náhookǫsjigo doo nízaadi kin siʼą́ą da.
2 Díí kin éí nááseego tʼááłáhídi neeznádiindóó baʼaan tsostsʼidiin ké siláádóó nááʼáłnííʼ áhoníłnééz, áádóó náhookǫsjígo chʼéʼétiin hólǫ́; naaniigo tʼéiyá tseebídiindóó baʼaan ashdlaʼ ké siláádóó nááʼáłnííʼ áhoníłtéél.
3 Wóneʼdi ahééhoolʼáhígíí tádiindóó baʼaan dı̨́ı̨́ʼ ké siláhígíí binaagóó áádóó tłʼóoʼdi hótłʼizgo ahééhoolʼáhígíí bíighahjįʼ tááʼ ałkʼi dahooghan; éí bitsı̨́ı̨́góó dahonítʼiʼ.
4 Díí ałkʼi dahooghanígíí náhookǫs bichʼijígo bichʼéʼétiin dahólǫ́ǫgo naaniigo tsostsʼidtsʼáadah ké silá ádaníłtéél. Díí dahooghanígíí bitsı̨́ı̨́góó tʼááłáhídi neeznádiindóó baʼaan tsostsʼidiin ké silá áníłnéezgo honítʼiʼ.
5 Índída akáaʼdi dahooghanígíí éí tʼah tʼą́ʼídi hideesʼnilígíí biniinaa ataʼgi dahooghanígíí áádóó atłʼáahdi dahooghanígíí éí biʼohgo ádaníłtso.
6 Háálá díí táaʼgo ałkʼi dahooghanígíí doo bíyah daʼniiʼáágóó ádaalyaa; éí bąą akáaʼdi dahooghanígíí tʼą́ą́ʼ hideesʼnilgo ádaalyaa.
7 Áko ałkʼi dahooghanígíí tłʼóóʼjígo bichʼą́ą́h tsé yítłʼinígíí éí tseebídiindóó baʼaan ashdlaʼ ké siláádóó nááʼáłnííʼ ákónízah.
8 Háálá tłʼóoʼdi ahééhoolʼáhígíí bíighahjįʼ ałkʼi dahooghango hadiitʼiʼígíí éí tseebídiindóó baʼaan ashdlaʼ ké siláádóó nááʼáłnííʼ áhoníłnééz áádóó kin biiʼ sohodizin bichʼijígo éí tʼááłáhídi neeznádiindóó baʼaan tsostsʼidiin ké siláádóó nááʼáłnííʼ áhoníłnééz.
9 Ałkʼi dahooghango hadiitʼiʼígíí biyaadi tłʼóóʼdę́ęʼgo łaʼ yah iigháahgo haʼaʼaah bichʼįʼdę́ęʼgo yah ahóótʼiʼ.
10 Wóneʼdi ahééhoolʼáhígíí haʼaʼaahjígo tʼáá bíniʼ hazʼánígíí áádóó kin biiʼ sohodizin siʼánígíí binaashiijí tsé yítłʼinígíí biiʼ dahooghan.
11 Tʼáá náhookǫs bichʼijí átʼéhígi átʼéego kweʼé ałdóʼ kin tsı̨́ı̨́góó honítʼiʼ; bídaʼnéélʼąądígíí tʼáá ákódaníłtso índa tʼáá ákótʼéego ałdóʼ ályaa índa tʼáá ákótʼéego yah adahwiiztʼiʼ.
12 Shádiʼááhjígo ałkʼi dahooghanígíí bidáádílkał dahólǫ́ǫgo éí łaʼ wóneʼjįʼ yah adeeshááł nízingo haʼaʼaahjigo kin niníʼáhídę́ęʼgo hahodiitʼiʼígíí bidáádílkał hólǫ́.
13 Áádóó éí diné áshíłní, Náhookǫsjígo ałkʼi dahooghanígíí áádóó shádiʼááhjígo ałkʼi dahooghanígíí éí tʼáá sahdii hazʼánígíí bíighahgóó diyingo sinilii ákweʼé náádaʼiiłniihii éí Bóhólníihii yichʼįʼ ninákahígíí agháago dadiyingo náádahaazniiʼii nídeidı̨́įh doo; biyiʼ góneʼ diyingo nahazʼánígíí biniinaa náádaʼiiłniihii éí agháago hodiyingo náádahaazniiʼii ákóneʼ nidayiiníił doo; akʼáán nááhániihii áádóó ádił niʼiidzííhjí nááhániihii índa ádił oodzíiʼgo bee kʼééhodoodǫǫłgo nááhániihii éí ákwii nidayiiníił doo.
14 Náádaʼiiłniihii níléí tłʼóoʼjįʼ chʼídeeshááł, danízingo ééʼ dazdósinii Bóhólníihii bá nidajilnishgo dahaʼééʼ éí átsé háádazhdiiʼniłgo áádóó índa náánáłaʼ daaʼééʼ éí biih nídajikahgo éí dahaʼéeʼgo índa níléí tłʼóoʼjįʼ diné áłah náádleełjįʼ áajįʼ chʼéédajikah doo.
15 Áádóó kin biiʼ sohodizin siʼánígíí bikʼi dinaago nahazʼánígíí ałtso yídaʼnééłʼąądgo haʼaʼaahdę́ęʼgo yah aʼatiin góneʼ shił chʼíníʼáázh áádóó tłʼóóʼdę́ęʼgo yínáádaʼnééłʼąąd.
16 Haʼaʼaahjí ánízahígíí yínááʼnééłʼąąd nítʼééʼ, lókʼaaʼ bee íʼneelʼąąhí ashdladi neeznádiin ahą́ą́h díʼá ákónízah.
17 Náhookǫsdę́ęʼgo ałdóʼ tʼáá ákónízah.
18 Shádiʼááhdę́ęʼgo ałdóʼ tʼáá ákónízah.
19 Eʼeʼaahjigo yínááʼnééłʼąądgo ałdóʼ tʼáá ákónízah.
20 Tʼáá dı̨́ı̨́ʼdę́ęʼgo yíʼnééłʼąąd. Áko binaa ahééʼítłʼinígíí éí lókʼaaʼ bee íʼneelʼąąhí ashdladi neeznádiin ahą́ą́h díʼá áníłnééz áádóó naaniigo ałdóʼ tʼáá ákóníłtéél. Binaa ahééʼítłʼinígíí éí dadílzinii áádóó doo dadílzinii bitaʼ níʼáago ahééníʼá.
