Ezekiel 43:1-27
43 Áádóó bikʼijįʼ haʼaʼaahjigo yah aʼatiinjįʼ shił niníʼáázh,
2 áádóó ákwii Ízrel dineʼé biDiyin God bee bitsʼádiʼnílíidii haʼaʼaahdę́ęʼgo áajįʼ yildohgo yiiłtsą́; tó ayóó ánéelą́ą́ʼ dzoołhał nahalingo Diyin God biinééʼ diistsʼą́ą́ʼ áádóó bee bitsʼádiʼnílíidii nahasdzáán bikááʼgóó bee niʼdeezlííd.
3 Díí shił ádzaaígíí Jerúsalem atíidoolííł biniyé Diyin God honíleʼ yę́ędą́ą́ʼ nahalin índa Kííbar tooh nílínígíí bibąąhdi shił ádzaa yę́ę nahalin áádóó niʼjįʼ níshjool.
4 Bóhólníihii bitsʼádiʼnílídígíí haʼaʼaahdę́ęʼgo yah aʼatiindę́ęʼgo kin biiʼ sohodizin góneʼ yah aaldoh.
5 Áko Bóhólníihii biNíłchʼi Diyinii náshidiiłtı̨́įgo wóneʼdi hazʼání góneʼ yah ashííłtı̨́ áádóó, shoo, ákwii Bóhólníihii bee bitsʼádiʼnílíidii kin biiʼ sohodizin biiʼ hadéébįįd.
6 Ákwii diné shíighahdóó sizı̨́įgo kin biiʼ sohodizin biiʼdę́ę́ʼ łaʼ shichʼįʼ hadzoodzíiʼgo disétsʼą́ą́ʼ.
7 Áko áshíłní, Diné nílíinii, kweʼé shibikááʼdóó nahatʼáii siʼą́ą doo áádóó ákwii dínísʼeez doo. Ákwii Ízrel dineʼé hoolʼáágóó bitah honishłǫ́ǫ doo, índa Ízrel dineʼé áádóó aláahgo honanitʼaʼí nídaadleełii shízhiʼ doo ílı̨́ı̨́góó doo ánáádazhdoodlíił da biniyé hweʼedaʼalyaii doo ánáádazhdoodlíił da, índa aláahgo naatʼáanii danilı̨́ı̨́ nítʼéeʼii bee bééhániihígíí dah daaskʼid bighą́ąʼdi ádayiilaaígi doo nináádazhdooʼnił da.
8 Shikin biiʼ sohodizin bichʼéʼétiin siláii áádóó bá ííʼáii bíighahdóó aláahgo naatʼáanii danilíinii bighandóó chʼéʼétiin siláii índa bá ííʼáii ádayiilaa, áko tʼáá hazhóʼó ítłʼinígíí tʼéiyá nihitaʼgi naníʼá; doo daaldinígi ádáátʼįįdígíí bee shízhiʼ diyinii tʼáá íiyisí doo ílı̨́ı̨́góó ádayiilaa, áko sháhóóchįįdgo áhoséłdįįd.
9 Kʼad éí doo náádaʼjiłjił da doo, índa aláahgo naatʼáanii danilı̨́ı̨́ nítʼéeʼii bee bééhániihígíí nahjįʼ kódazhdoolííł; ákódadziidzaago hoolʼáágóó hatahgi honishłǫ́ǫ doo.
10 Diné nílíinii, Ízrel dineʼé doo ákwii ádáátʼįįdii yaa yádadínóozįįł biniyé kin biiʼ sohodizin bichʼįʼ ííshją́ą́ ánílééh áádóó bikʼehgo ályaaígíí yídadíʼnóołʼąął.
11 Áko doo ákwii ádáátʼįįdii tʼáá átʼé yaa yádaniizı̨́įʼgo kin biiʼ sohodizin ályaaígíí éí hazhóʼó bee bił hodíílnih: bikʼehgo ályaaígíí áádóó yah adaʼiiztiinígíí índa chʼídaʼiiztiinígíí tsʼídá hazhóʼó bee bił hodíílnih; biyiʼdi áhootʼéhígíí áádóó binaagóó áhootʼéhígíí éí hazhóʼó hashtʼeʼnidaasʼnilígíí áádóó bikʼehgo hoogáałii áádóó bee hazʼáanii tʼáá ałtso bee bił hodíílnih; díí tʼáá ałtso binááł bee bá akʼeʼdííłchííł, áko hazhóʼó nidaasʼnilígíí yikʼehgo ádaʼałʼı̨́į dooleełii tʼáá ałtso yikʼeh dahółʼı̨́į doo.
12 Díí kin biiʼ sohodizin bibee hazʼáanii átʼé. Dziłghą́ąʼgi kin biiʼ sohodizin siʼánígíí éí tʼáá bił áádóó bikʼi dinaago hazʼánígíí tʼáá sahdii atsʼádeetʼą́, áádóó tʼáá íiyisí hodiyingo hazʼą́ą doo. Díí lą́ą kin biiʼ sohodizin bibee hazʼáanii átʼé, jóʼakon.
13 Kin biiʼ sohodizin siʼą́ągi kúbit bee íʼneelʼąąhí bikʼehgo bídaʼnéélʼąądígi átʼéego tʼáá ákótʼéego kweʼé ałdóʼ bikááʼ nááʼiiniihí bíʼnéélʼąąd; kúbit éí achʼoozhlaaʼdóó yílá aníiʼgiígíí bílátahjįʼ áádóó dı̨́ı̨́ʼ bikʼeh áníłtsogo óolyé. Bikááʼ nááʼiiniihí bá siʼánígíí kʼasdą́ą́ʼ naakidi ké silá ánízah doo áádóó kʼasídą́ą́ʼ naakidi ké silá áníłtéel doo áádóó éí bibąąhgóó tʼááłáhídi yílá deestsʼǫ́ǫdgo ahééʼníʼáa doo.
14 Bikááʼ nááʼiiniihí bá siʼánídóó áłtsé dah náhástʼáníjįʼ tááʼ ké siláádóó nááʼáłnííʼ ánízah doo; éí dah náhástʼánígíí kʼasdą́ą́ʼ naakidi ké silá bíighahgo ákóhoníłtéelgo ahééhoolʼáa doo. Áádóó dah náhástʼą́ą́dóó dego éí hastą́ą́h ké siláádóó nááʼáłnííʼ ákónízah doo áádóó áadi kʼasdą́ą́ʼ naakidi ké silá ákóhoníłtéelgo ahéénínááhoolʼáa doo.
15 Éí dah náhástʼą́ą́dóó hastą́ądi ké siláádóó nááʼáłnííʼ ánízahdi bikááʼ nááʼiiniihí dah siʼą́ą doo; éí bikááʼdóó dadeekı̨́ı̨́góó adeeʼ yadaaʼáa doo.
16 Bikááʼ nááʼiiniihí bikáaʼdi éí łahdę́ęʼgo naadiindi ké siláádóó nááʼáłnííʼ bíighahgo áníłtéel doo, áko tʼáá dı̨́ı̨́ʼdę́ęʼgo aheedaníłtéel doo.
17 Biyaadi dah náhástʼą́ągo ahééhoolʼáhígíí, éí łahdę́ęʼgo naadiin dı̨́ı̨́ʼ ké silá bíighahgo áníłtéel doo, áko tʼáá dı̨́ı̨́ʼdę́ęʼgo aheedaníłtéel doo, áádóó bibąąhgóó ahééníʼáhígíí éí neeznáá dah alzhin bíighahgo ánízah doo; biyaadi éí kʼasdą́ą́ʼ naakidi ké silá bíighah áníłtéelgo ahéénááníʼáa doo; bikááʼ nááʼiiniihí dah siʼáníjįʼ haʼaʼaahdę́ęʼgo ałkʼi hooʼniłí bichʼįʼ haazʼáa doo.
18 Áádóó Bóhólníihii ánááshidooʼniid, Diné nílíinii, Bóhólníihii Diyin God kóní, Éí bijı̨́įdi bikááʼ nááʼiiniihí ályaago bikááʼdóó bikʼehgo hoogáałii bikʼehgo didlidgo náádahaniihii deididoołił, áádóó naaldlooshii náádahaazniiʼii bidił yikáaʼgi tádeididoosas.
19 Bóhólníihii Diyin God ání, Líívai dineʼé bitsʼą́ą́dóó náádaʼiiłniihii ahoolchíiłii, éí Zéídak* baʼáłchíní ahoolchíiłii, honishłóníjįʼ yah anídaakahgo shá nidaalʼaʼí éí dóola yáázh ádił oodzííʼjí nááhidoonihii baa dííłtééł.
20 Dóola yáázh bidiłígíí łaʼ nídidííkáałgo bikááʼ nááʼiiniihí akáaʼdi dah siʼánígíí éí naanídaazʼáhídóó adeeʼ dadeezʼáhígíí bee dah daalchíiʼgo ádadííliił áádóó ałdóʼ bikááʼdę́ę́ʼ naanídaazʼáhígi dił bee dah daalchíiʼgo ádadííliił índa dah náhástʼą́ągo ahééhoolʼáhígíí bibąąhgóó dił bee ahééjíchiiʼgo ádíílííł; kótʼéego bikááʼ nááʼiiniihí éí bíʼdíídeeʼgo áádóó diyingo ádíílííł.
21 Índa dóola yáázh ádił oodzííʼjí nááhaazniiʼii kin biiʼ sohodizin siʼą́ą́dóó, nílááh, tłʼóoʼdi biniyé nihootʼáníjįʼ chʼídííłtéełgo áadi didoodlił.
22 Biiskání tʼáá ákótʼéego tłʼízíchǫǫh ádił niʼiidzííhjí nááhániihii doo bąąh dah hazʼáanii nínááhidííłnih, áádóó bikááʼ nááʼiiniihí bíʼdíídeeʼgo ádíílíłígíí biniyé bidił tʼáá dóola bidił nisínísas yę́ęgi átʼéego nináádíísas.
23 Díí bíʼdíídeeʼgo íinilaago, áko índa dóola yáázh doo bąąh dah hazʼáanii índa deenástsʼaaʼ naakaídę́ę́ʼ łaʼ doo bąąh dah hazʼáanii Bóhólníihii baa didííʼááł.
24 Dóola yáázh áádóó deenástsʼaaʼ éí Bóhólníihii baa didííʼááł áádóó náádaʼiiłniihii éí áshįįh yikʼídeidooniłgo deidiłidgo Bóhólníihii yichʼįʼ náádeidiyoołnih.
25 Áko tłʼízí tʼááłáʼí índa dóola tʼááłáʼí áádóó deenástsʼaaʼ tʼááłáʼí naakaídę́ę́ʼ łaʼ doo bąąh dah nahazʼáanii łaʼa jı̨́įjįʼ ádił oodzííʼjí shichʼįʼ náádahołniihgo tsostsʼid jı̨́ adooleeł.
26 Náádaʼiiłniihii éí tsostsʼid jı̨́įjįʼ bikááʼ nááʼiiniihí yikááʼ bee kʼééhoodǫǫłii náádayiiłniihgo biʼdidéehgo ádeidoolííł. Kótʼéego bikááʼ nááʼiiniihí diyingo atsʼádeetʼą́ągo ádeidoolííł.
27 Tsostsʼid yiską́ą́dóó bikʼijįʼ bikááʼ nááʼiiniihí bikáaʼjįʼ nihá didlidgo nááhániihii índa hózhǫ́ǫ́jí nááhániihii éí náádaʼiiłniihii náádayiiłniihgo yaa nídidookah, áko índa nihidínéesįįłgo náánihidideeshʼnił, ní Bóhólníihii Diyin God.
Footnotes
^ Aláahgo naatʼáanii David yę́ę éí Zéídak nááʼiiłniihii nilı̨́įgo niiníłtı̨́.
