Ezekiel 44:1-31
44 Kin biiʼ sohodizin siʼą́ą́dóó haʼaʼaahjigo aláahdi yah aʼatiinjįʼ shił niníʼáázh; éí dáʼdeetą́ą́ lá.
2 Áko Bóhólníihii áshidííniid, Díí dáńʼdítı̨́hígíí éí tʼáá dáʼdeetą́ą dooleeł, índa tsʼídá doo ąą ádoolníił da; diné łaʼda doo choizhdoołʼįįł da, háálá shí Ízrel biDiyin God Bóhólníihii ákóneʼ chʼíhoníleʼ; éí bąą náásgóó tʼáá dáʼdeetą́ą doo.
3 Éí naatʼáanii hooʼáałii ákǫ́ǫ́ nídídáahgo áadi shinááł náʼádı̨́įh doo; naatʼáanii nilíinii yah aʼatiin góneʼ yah adoogááł áádóó nihééhédáahgo éí chahaʼoh hazʼání góneʼ chʼééhédáah doo.
4 Áádóó náhookǫsdę́ęʼgo yah aʼatiin góneʼ shił yah ííʼáázh, áko kin biiʼ sohodizin siʼánígíí bidááhdóogo shił niníʼáázh; dééʼı̨́ı̨́ʼ nítʼééʼ, shoo, Bóhólníihii bee bitsʼádiʼnílíidii kin biiʼ sohodizin tʼáá átʼé biiʼ hadeezbingo yiiłtsą́ áádóó niʼjįʼ níshjool.
5 Áko índa Bóhólníihii áshíłní, Diné nílíinii, kin biiʼ sohodizin siʼą́ągi bikʼehgo hoogáałii índa bibee hazʼáanii tʼáá ałtso bee nił hodeeshnihígíí éí tʼáá átʼé yíníʼínígíí índa dinitsʼaʼígíí hanisííd; kin biiʼ sohodizin góneʼ yah anídaakah dooleełii índa áádę́ę́ʼ chʼéédaakah dooleełii tsʼídá hazhóʼó hadíísił.
6 Ízrel dineʼé naasteeʼii kóbididííniił, Bóhólníihii Diyin God kóní, Doo haldinígi ádaohtʼínígíí kʼadí.
7 Jó, doo Jew dineʼé danilíinii bijéí doo daalzı̨́įʼii áádóó doo bąąh nídahineeshgizhii shikin biiʼ sohodizin góneʼ yah adahishooʼeezhgo shichʼiyąʼ éí akʼah áádóó dił náádahołniihgo tʼóó baaʼih ádaohłaa, áádóó doo haldinígi ádaohtʼínígíí tʼáá ałtso biniinaa nihił ahaʼdinishtʼáanii dayiiztiʼ.
8 Índa dadólzinii doo shá baa ádahołyą́ą da nítʼééʼ, nidi doo Jew dineʼé danilíinii ákwii nidasoonilgo shikin biiʼ sohodizin yaa ádahalyą́ą́ nítʼééʼ.
9 Áko Bóhólníihii Diyin God kóní, Déʼéyóní éí Ízrel dineʼé bitahgi kééhojitʼíinii hajéí doo daalzı̨́įʼii* índa doo hąąh náhineeshgizhii shikin biiʼ sohodizin góneʼ tsʼídá doo yah azhdoogáał da.
10 Ízrel dineʼé shitsʼáhaaskai yę́ędą́ą́ʼ Líívai dineʼé nízaadgóó shitsʼákaígíí éí haʼedaʼalyaii bichʼįʼ nidahojiłáago doo ákwii ádajíítʼįįdii biniinaa atídahoʼdilʼı̨́į doo.
11 Ákondi kin biiʼ sohodizin bił hazʼą́ągi yah adaʼiiztiinígíí baa ádahojilyą́ągo ákwii hondaanish doo, áádóó kin biiʼ sohodizin góneʼ naanish danilíinii baa nidajikai doo; didlidgo náádahaniihii áádóó diné bá náádahaniihii nidadziłtseed doo índa diné bá nidajilʼaʼgo ákwii hanaanish danilíinii bindajilnish doo.
12 Líívai dineʼé éí Ízrel dineʼé biʼedaʼalyaii bidáahjįʼ bá nidajisʼaʼgo kótʼéego Ízrel dineʼé nidaʼiisíihgo ádajiilaaígíí biniinaa Bóhólníihii Diyin God ání, Doo ákwii ádajíítʼįįdii bikʼé tsʼídá tʼáá tiʼdahwiizhdoonihí, dishníigo hwee ádee hadeesdzííʼ.
13 Náádaʼiiłniihii doo dajílı̨́ı̨́góó doo shitʼáahjįʼ dazhdookahgo shá nidazhdoolʼaał da, índa shidiyingo chodaoʼíinii éí tʼáá íiyisí dadiyinígíí doo bitʼáahjįʼ dazhdookah da, nidi tʼóó bee haa yádahóósįįdii índa doo yildinígi ádajíítʼįįdii bee hohodiitʼiʼgo nidajikai doo.
14 Azhą́ ákótʼée nidi, kin biiʼ sohodizin tʼáá bee hódahólníih doo, índa ákweʼé naanish nidaatʼiʼígíí tʼáá ałtso baa nidajikai doo, índa wóneʼé naanish danilíinii éí tʼáá ałtso baa nidajikai doo.
15 Ízrel dineʼé shitsʼą́ą́dóó yóóʼaheeskai yę́ędą́ą́ʼ, Líívai dineʼé éí Zéídak biyeʼké nááʼiiłniihii danilíinii shikin biiʼ sohodizin yaa ádahalyą́ą́ nítʼéʼígíí shitʼáahjįʼ ałnáádaakahgo shá nidaalʼaʼ doo; tʼáá ákǫ́ǫ́ shinaagóó nidajikaigo akʼah índa dił shichʼįʼ náádajiiłniih dooleeł, ní Bóhólníihii Diyin God;
16 shikin biiʼ sohodizin góneʼ yah anídajikah doo, índa shá nidazhdoolʼaał biniyé shibikááʼ adání bitʼáahjįʼ nídazhdikah doo, áádóó bichʼįʼ dahóółʼaadígíí bikʼeh dahojíłʼı̨́į doo.
17 Wóneʼdi hazʼání góneʼ yah anídajikahgo ninádajilʼaahgo kótʼée doo; ééʼ aghaaʼ bee ádaalyaii ádąąh dajitʼı̨́įgo éí doo dahaʼéeʼ da doo, nidi nidajilʼaʼgo áłtsʼóózígo yisdizígíí bee naʼatʼą́hí łigaii ditsʼidgo ályaii éí dahaʼéeʼ doo.
18 Áłtsʼóózígo yisdizígíí bee naʼatʼą́hí łigaii ditsʼidgo ályaii hatsiiʼ nídaaztʼiʼgo éí dahachʼah doo áádóó áłtsʼóózígo yisdizígíí bee naʼatʼą́hí łigaii ditsʼidgo ályaii dahatłʼaajiʼéeʼ doo; ééʼ éí tó ąąh háádeiniłkaʼii éí tʼáá ałtso ádąąh dajitʼı̨́į doo.
19 Ákohgo nááʼiiłniihii dajílíinii tłʼóoʼdi ahééhoolʼáhídi diné áłah nilínígíí bichʼįʼ chʼéédajiikáahgo áłtsé haʼééʼ bee nidajilʼaʼii háádazhdiiʼniłgo hodiyingo nahazʼání góneʼ ninádajiʼnił doo áádóó náánáłaʼ ééʼ biih nídajikah doo, áadi índa diné áłah nilínígíí bichʼįʼ chʼéédajikah doo; éí tʼáadoo ádadziidzaagóó éí haʼééʼ bee nidajilʼaʼii bee diné diyingo ádazhdoolííł.
20 Nááʼiiłniihii dajílíinii éí hatsiiʼ doo nídajishih da doo, áádóó doo tʼáá íiyisí nineez nídaadleeh da doo, nidi tʼáá áłtsʼísígo ádadzósin doo.
21 Nááʼiiłniihii dajílíinii łaʼda wóneʼdi hazʼání góneʼ yah ajigháahgo wáin ádąąh jitʼı̨́į doo.
22 Índa asdzání bąąh áhásdįįdii, doodaiiʼ asdzání yóóʼábiʼdooltʼeʼii doo łaʼ hweʼasdzą́ą́ ázhdoolíił da, nidi Ízrel dineʼé bitahdóó chʼikę́ę́h tʼah doo diné bee haleehii łaʼ hweʼasdzą́ą́ ázhdoolííł, éí doodaiiʼ nááʼiiłniihii łaʼ daaztsą́ągo éí beʼasdzą́ą́ nítʼéeʼii hweʼasdzą́ą́ ázhdoolííł.
23 Nááʼáłdóʼ dadiyinii índa doo dadiyinii éí tʼáá ałʼąą ádaatʼéegi shidineʼé bee nidazhnitin doo áádóó doo bíʼdéédeeʼii índa bíʼdéédeeʼii bił béédahózin doo.
24 Diné łaʼ ahinídiiltłiʼgo shibikʼehgo hoogáałii bikʼehgo ánihwiitʼaahjįʼ bá baa nídajitʼı̨́į doo; hodiyingo áłah nídaʼadleehii bee nihoníʼáanii baa nijikaigo shibee hazʼáanii áádóó bee nihoyíʼáanii bikʼeh dahojíłʼı̨́į doo índa shihááʼáyı̨́ı̨́h jı̨́ tʼéiyá tʼáá sahdii átʼéego ádadzósingo ákóneʼ dahozdósin doo.
25 Diné daaztsáanii doo bee ádazhdidoolchxǫǫł da biniyé doo bitʼáahjįʼ nidajikai da doo, nidi hazhéʼéda, hamáda, hayeʼda, hatsiʼda índa diné bił hajííʼáazhiida áádóó halahda tʼah doo diné bee haleehii éí tʼáá háiida łaʼ daaztsą́ągo éí tʼéiyá bitʼáahjįʼ jidoogáałgo bee ázhdidoolchxǫǫł.
26 Hóʼdíídeeʼdóó bikʼijįʼ tsostsʼid yidoołkááł.
27 Hodiyingo hazʼą́ą́ góneʼ yah anízhdoodááł bijı̨́ı̨́ góneʼ áadi nináájílʼaʼ dooleeł biniyé ádił niʼiidzííhjí nááhániihii áłtsé ádá nááhizhdoołnih, ní Bóhólníihii Diyin God.
28 Nááʼiiłniihii ídlínígíí éí daahó, shíyeeʼ hwííʼ nishłı̨́; Ízrel dineʼé bitahgi ííʼ dadooleełii doo łaʼ baa didííʼáał da, shíyeeʼ hwííʼ nishłı̨́.
29 Akʼáán nááhániihii áádóó ádił niʼiidzííhjí nááhániihii índa doo ákǫ́ǫ́ ájítʼı̨́ı̨́jí nááhániihii éí dahachʼiyąʼ doo, áádóó Ízrel dineʼé bitahdóó nááhidoonih biniyé tʼáá sahdii atsʼádahaasʼnilii daahó doo.
30 Áłtsé neestʼáanii ałʼąą ádaatʼéii tʼáá ałtso áádóó shichʼįʼ nááhániihii ałʼąą ádaatʼéii tʼáá ałtso náádaʼiiłniihii baa dah hidohʼaah doo, áádóó diné éí áłtsé akʼáán táádayooʼnihígíí náádaʼiiłniihii yaa dayiikaah doo; ákódaohtʼı̨́įgo danihighan bikʼidajishdlíi doo.
31 Nááʼiiłniihii dajílíinii éí tsídiida, éí doodaiiʼ naaldlooshiida tʼáá bíniʼ daaztsą́ągo, éí doodaiiʼ náánáłaʼ naaldlooshiida biisxı̨́įgo éí doo dajilghał da doo.
Footnotes
^ Ajéí doo ąąh náhineeshgizhii éí ajéí doo daalzı̨́įʼii ááhyiłní. Col. 2:11.
