Ezekiel 45:1-25
45 Yááʼiiltʼeʼ bikʼehgo kéyah ííʼ dooleełii ałtsʼádaohsogo łahdóó diyingo Bóhólníihii bá atsʼádadidoohʼááł; éí nááseego tseebíídóó nááʼáłnííʼ tʼįįhí biʼohgo tsin sitą́ą doo áádóó naaniigo éí tááʼdóó nááʼáłnííʼ tʼįįhí biʼohgo tsin sitą́ą doo; kweʼé tʼáá náhwiistʼą́ą́ nítʼééʼ hodiyingo hazʼą́ą doo.
2 Díí nahósʼaʼgi kin biiʼ sohodizin nidootʼáłígíí biniyé łahgi dikʼą́ągo hahodoodzo, tʼáá dı̨́ı̨́ʼdę́ę́ʼ tʼááłáʼí tʼįįhí biʼohgo tsin sitą́ ákódahonízah doo; kin biiʼ sohodizin siʼą́ą dooleełígíí éí binaago ákóhoníłtéelgo ahééhoolʼáa doo.
3 Kin biiʼ sohodizin bá kéyah haadzooígíí binaagóó kéyah náánástʼánígíí éí díí íʼnéélʼąądígíí bikʼehgo nááseego tseebíídóó nááʼáłnííʼ tʼįįhí biʼohgo tsin sitą́ą doo áádóó naaniigo éí tááʼdóó nááʼáłnííʼ tʼįįhí biʼohgo tsin sitą́ą doo; kweʼé lą́ą kin biiʼ sohodizin tsʼídá agháago hodiyingo bił hazʼą́ą doo.
4 Kéyah tʼáá náhwiistʼą́ą́ nítʼééʼ kweʼé lą́ą nááʼiiłniihii danilíinii kin biiʼ sohodizingi Bóhólníihii yá nidaalʼaʼgo tʼáá íiyisí hodiyingo hazʼą́ą doo; kin biiʼ dahaghan dooleełii kweʼé há sinil doo, áádóó kin biiʼ sohodizin binaagóó hodiyingo hazʼą́ą doo.
5 Nááʼákóneʼ kin biiʼ sohodizingi nidaalʼaʼí Líívai dineʼé bá kéyah daabííʼ dooleeł biniyé łaʼ hadoodzoh; nááseego tseebíídóó nááʼáłnííʼ tʼįįhí biʼohgo tsin sitą́ą doo; naaniigo éí tááʼdóó nááʼáłnííʼ tʼįįhí biʼohgo tsin sitą́ą doo; ákwii naadiingo dahooghan éí daabííʼ dooleeł.
6 Áádóó ałdóʼ hodiyingo hazʼánígíí bíighahgi kéyah naaniigo tʼááłáʼídóó nááʼáłnííʼ tʼįįhí biláahgo tsin sitą́ hanáádoodzogo bihiníʼą́ą doo, nááseego éí tseebíídóó nááʼáłnííʼ tʼįįhí biʼohgo tsin sitą́ą doo; éí kin haalʼáhígíí bííʼ doo, áádóó éí kéyah Ízrel dineʼé tʼáá yílʼáá nítʼééʼ daabííʼ doo.
7 Naatʼáanii éí kéyah łaʼ tʼáá sahdii bá atsʼádidootʼááł; hodiyingo hazʼą́ą́dóó índa kin haalʼáádóó eʼeʼaahjigo tónteel bibąąhjįʼ kéyah siʼánígíí bá atsʼádidootʼááł; haʼaʼaahjigo kéyah nineelʼą́ąjįʼ kéyah siʼánígíí ałdóʼ bá atsʼádidootʼááł; haʼaʼaahdóó eʼeʼaahjįʼ kéyah siʼánígíí éí Ízrel dineʼé bitaadadeestʼáanii tʼáá ákóníłtso doo.
8 Díí kweʼé kéyah siʼánígíí Ízrel dineʼé bitahgi naatʼáanii danilíinii bííʼ doo; ákótʼéego diné doo bichʼįʼ nidahojiiłnáa da doo, áádóó łahjįʼ kéyahígíí Ízrel dineʼé dadóoneʼé bikʼehgo daabííʼ doo.
9 Bóhólníihii Diyin God kóní, Nihí Ízrel dineʼé bitahgi naatʼáanii nídaohdleehígíí ádił nidaʼiyohsíihgo hoolzhiizh éí kʼadí; diné tʼáadoo baa tįįh nídaahkahí; diné tʼáadoo bichʼįʼ nidahoyołnání; doo haa dayitʼéégóó índa tʼáá ákogi átʼéego ádaʼołʼı̨́; kodóó shidineʼé nidaʼiiléego doo łínáádadohcháash da, índa bikéyah doo yitsʼánáádahidooʼnéeł da, ní Bóhólníihii Diyin God.
10 Tʼááłáʼí jinítínígo bee dah níʼdiidlohí áádóó ásaaʼ bee íʼneelʼąąhí índa yikáałii bee bééhózinii chodajoołʼı̨́įgo doo binaʼadloʼígíí chodajoołʼı̨́į doo.
11 Íífa índa bath wolyéii bee íʼneelʼąąhí éí tʼáá aheenéeltʼeʼ, áko bath neeznáá bíighahgo hómer wolyé,* índa íífa neeznáá bíighahgo ałdóʼ hómer wolyé, áko hómer wolyéii éí íiyisí bikʼehgo ídaʼneełʼąąhgo chodayoołʼı̨́.
12 Gíírah wolyéii naadiin bíighahgo éí tʼááłáʼí shékel; shékel naadiingo áádóó shékel naadiin ashdlaʼgo baʼaan shékel ashdlaʼáadahgo éí ahídeidzogo tʼááłáʼí máína wolyé.
Náádahaniihii áádóó hodílzingo áłah nídaʼadleehii
13 Díí bikʼehgo náádaʼiyołniih doo, hómer wolyéii tłʼoh naadą́ą́ʼ tʼááłáʼí bitsʼáką́ągo áádóó éí hastą́ąjįʼ ahádaashjaaʼgo tʼááłáʼí bidoojaaʼígíí Bóhólníihii bichʼįʼ náádahołniih doo; tłʼoh naadą́ą́ʼ bideeʼí ałdóʼ tʼááłáʼí bidoojaaʼgo Bóhólníihii bichʼįʼ náádahołniih doo;
14 akʼah bikʼehgo álʼínígíí éí cor wolyéii tʼááłáʼígo éí bitsʼą́ą́dóó akʼah náhástʼéidi haadziidgo, áko éí haadziidígíí neeznáajįʼ ahádaasdziidgo tʼááłáʼí bidoodziidígíí Bóhólníihii bichʼįʼ náádahołniih doo; cor éí akʼah náhástʼédiindi yikáałgo óolyé índa hómer ałdóʼ akʼah náhástʼédiindi yikáałgo óolyé.
15 Ízrel dineʼé bikéyahdóó tó bee ádaʼazįįdgo nidahósʼaʼdóó naakidi neeznádiin dibé deílʼáágóó dibé yázhí tʼááłáʼí bitsʼádahaastı̨́įgo, Diyin God bił kʼéédahodoołdǫǫł biniyé akʼáán nááhániihii áádóó didlidgo nááhániihii índa hózhǫ́ǫ́jí nááhániihii náádahołniih doo, ní Bóhólníihii Diyin God.
16 Diné tʼáá jílʼáá nítʼééʼ Ízrel dineʼé bitahdóó díí nááhidoonihii naatʼáanii baa dahizhdiʼaah doo.
17 Ízrel dineʼé bitahgi hodiyingo áłah nídaʼadleeh yaa nidaakai dooleeł biniyé bee bá nidahodeestʼą́ą́ góneʼ éí yaa nidaakaigo áádóó dah néitı̨́ı̨́h góneʼ índa hááʼáyı̨́ı̨́h jı̨́ náʼoodleeł góneʼ naatʼáanii nilíinii éí didlidgo nááhániihii índa akʼáán nááhániihii, áádóó yanáadziʼgo nááhániihii diné bitaaníjíʼnih dooleeł, Ízrel dineʼé bá Diyin God yił kʼééhodoołdǫǫł biniyé ádił niʼiidzííhjí nááhániihii, akʼáán nááhániihii, didlidgo nááhániihii áádóó hózhǫ́ǫ́jí nááhániihii hashtʼééjiilʼįįh doo.
18 Bóhólníihii Diyin God kóní, Áłtsé nídízídígíí binih, łaʼa jı̨́ı̨́ góneʼ dóola yáázh hadaałtʼéii tʼááłáʼí nínááhíłnihgo éí bee kin biiʼ sohodizin biʼdidéehgo ánéílʼįįh doo;
19 nááʼiiłniihii éí ádił niʼiidzííhjí nááhániihii bidił łaʼ bitsʼázdooziłgo kin biiʼ sohodizin bichʼéʼétiin siláii bee dazhʼdoodlish áádóó bikááʼ nááʼiiniihí naanídaazʼáágóó bee dazhʼdoodlish índa ałníiʼgi ahééhoolʼáhí góneʼ éí yah aʼatiingi bichʼéʼétiin siláii ałdóʼ bee dazhʼdoodlish.
20 Łaʼda ádił asiihgo índa doo hóyą́ą́góó naagháii biniinaa ádił asiihgo nídízííd binih, tsostsʼidgóó yoołkáałgo tʼáá ákónáádíídlííł, áko kwíínidzaaígíí bee kin biiʼ sohodizin bá kʼééhoodǫǫł ánáádlíił doo.
21 Áłtsé háázidígíí binih, dı̨́ı̨́ʼtsʼáadahgóó yoołkáałgo atisʼadeesdzá bee bééhániihii bee nahodííłaał, áko éí hodílzingo áłah náʼádleeh góneʼ tsostsʼid yiską́ą doo; dííkʼǫsh tʼáágééd bááh ályaii yidą́ą doo.
22 Áádóó éí bijı̨́ı̨́ góneʼ naatʼáanii jílíinii áádóó diné tʼáá kééhatʼı̨́ı̨́ nítʼééʼ ádił niʼiidzííhjí nááhániihii dóola yáázh tʼááłáʼí ádá shódeizhdoołtʼeełgo há nááhidoonih.
23 Áádóó naatʼáanii ałdóʼ dóola yáázh tsostsʼidgo índa deenástsʼaaʼ tsostsʼidgo shóizhdoołtʼeeł, éí diné bá índa hó ałdóʼ há, dóola yáázh tʼááłáʼígo índa deenástsʼaaʼ tʼááłáʼígo didlidgo há nínáhánihgo tsostsʼid jı̨́ adooleeł índa tłʼízíchǫǫh ałdóʼ tsostsʼidgo shóizhdoołtʼeeł; éí ádił niʼiidzííhjí nááhániihii tʼáá ákwíí jı̨́ tʼááłáʼí há nínáhánihgo tsostsʼid jı̨́ adooleeł.
24 Dóola yáázh índa deenástsʼaaʼ éí akʼáán hastą́diin dahidiidloʼgo bikʼeh níką́ą dooleeł áádóó akʼáán éiyá áliv akʼahígíí tʼááłáhídi yikááł bíighahgo bikʼeh níką́ą doo.
25 Áádóó tsostsʼid yiziłígíí binih, ashdlaʼáadahgóó yoołkáałgo áádóó yówehjįʼ tsostsʼid yiską́ąjįʼ tʼáá ákótʼéego ałdóʼ ádił niʼiidzííhjí nááhániihii áádóó didlidgo nááhániihii áádóó akʼáán nááhániihii índa áliv bikʼah hashtʼezhdoolííł.
Footnotes
^ Náhástʼédiindi yikááł bíighahgo hómer wolyé.
