Ezekiel 46:1-24
46 Bóhólníihii Diyin God kóní, Ałníiʼgi ahééhoolʼáhígíí haʼaʼaahdę́ęʼgo dáńʼdítı̨́hígíí hastą́ą́h néílkáahjįʼ dáńʼdítı̨́įh doo, nidi hááʼáyı̨́ı̨́h jı̨́ı̨́ góneʼ índa dah néitı̨́ı̨́h góneʼ éí shá bíighah ąą átʼée doo.
2 Naatʼáanii nilíinii éí yah aʼatiin góneʼ yah adoogáałgo ałtsʼą́ą́hjí tsin ííʼáhígíí łaʼ yíighahgi yidoozįįł áádóó náádaʼiiłniihii éí didlidgo nááhániihii índa hózhǫ́ǫ́jí nááhániihii há hashtʼedeidoolííł; hó tʼéí yah aʼatiingi nahozhdoołaał áádóó chʼéézhdoodááł; iʼííʼą́ągo índa dáńʼdidootı̨́ı̨́ł.
3 Hááʼáyı̨́ı̨́h jı̨́ náʼádleehgo áádóó dah néitı̨́įhgo kéyahdóó dineʼé díí dáńʼdítı̨́įhgi Bóhólníihii bidáahgi ninádahałaah doo.
4 Naatʼáanii nilíinii éí hááʼáyı̨́ı̨́h jı̨́ aleeh góneʼ dibé yázhí hastą́ągo hadaałtʼéii índa deenástsʼaaʼ tʼááłáʼígo hadaałtʼéii didlidgo nááyiiłnih doo.
5 Akʼáán éí íífa hadeezbingo índa deenástsʼaaʼ bóóltąʼgo nááyiiłnih doo áádóó dibé yázhí éí tʼáá bízhneelʼánígo akʼáán yił nááyiiłnih doo índa akʼáán íífa hadeezbingo éí áliv akʼah tʼááłáhídi yikááł bídaóltąʼgo yił nááyiiłnih doo.
6 Dah néitı̨́ı̨́h góneʼ éí dóola yáázh hadaałtʼéii áádóó hastą́ą́h dibé yázhí índa tʼááłáʼí deenástsʼaaʼ hadaałtʼéii náádayiiłnih doo.
7 Akʼáán íífa hadeezbingo éí dóola yáázh bóóltąʼgo áádóó akʼáán íífa hadeezbingo éí deenástsʼaaʼ bóóltąʼgo áádóó dibé yázhí éí tʼáá bízhneelʼánígo akʼáán bóóltąʼgo nááyiiłnih doo índa akʼáán íífa hadeezbingo éí áliv akʼah tʼááłáhídi yikááł bídaóltąʼgo nááyiiłnih doo.
8 Naatʼáanii yah anádáahgo éí yah aʼatiin bikʼi chahaʼohídę́ę́ʼ yah anádáah doo áádóó tʼáá ákóneʼ chʼééhédáah doo.
9 Hodílzingo áłah nídaʼadleeh bee nidahwiistʼání góneʼ diné éí Bóhólníihii yidááhdóó nehekáahgo nahodeeshłaał jinízingo éí biniyé náhookǫsdę́ę́ʼ yah adajiikáhígíí shádiʼáahjigo chʼéédajiikáah dooleeł, áádóó shádiʼááhdę́ę́ʼ yah adajiikáhígíí éí náhookǫsjigo chʼéédajiikáah dooleeł; yah aʼatiindę́ę́ʼ yah ajííyáhígíí doo tʼáá áajigo nátʼą́ą́ʼ chʼéézhdoodáał da, nidi tʼááłáʼí jinítínígo tʼáá náásee chʼíjiikáah doo.
10 Yah áníjíkahgo naatʼáanii hoł yah anádáah doo, áádóó chʼééjiikáahgo naatʼáanii ałdóʼ chʼínádáah doo.
11 Ádaʼazįįdgo áádóó hodiyingo áłah nídaʼadleeh bee nidahodeestʼánígíí baa náhwiilzhíishgo dóola yáázh tʼááłáʼígo áádóó íífa bee akʼáán hadeezbingo bóóltąʼgo áádóó deenástsʼaaʼ tʼááłáʼígo áádóó akʼáán éí íífa bee hadeezbingo bóóltąʼgo índa dibé yázhí éí tʼááłáʼí nítínígo akʼáán tʼáá bízhneelʼánígo bikʼeh níką́ągo ákwii áliv akʼah tʼááłáhídi yikááł bíighahgo tʼáá ałtso bídaóltąʼgo nááhániih dooleeł.
12 Naatʼáanii tʼáá bí íinízingo Bóhólníihii yichʼįʼ náádiʼyoołnihgo éí didlidgo nááhániihii, doodaiiʼ hózhǫ́ǫ́jí nááhániihii átʼéego éí haʼaʼaahjigo dáńʼdítı̨́hígíí há ąą ánálʼįįh doo; tʼáá hááʼáyı̨́ı̨́h jı̨́ nááʼiiłnihígi átʼéego didlidgo nááhániihii, doodaiiʼ hózhǫ́ǫ́jí nááhániihii nááyiiłnih doo áádóó índa chʼééjiidáahgo hakéédę́ę́ʼ dáńʼdílkał doo.
13 Tʼáá ákwíí jı̨́ dibé yázhí hadaałtʼéii nááhániihgo hashtʼeiyínísin doo, tʼáá ákwíí bíní didlidgo nááhániihii áajįʼ ahíníiłgo íínísin doo.
14 Tʼáá ákwíí bíní akʼáán nááhániihii hashtʼeiyínísin doo; íífa bee akʼáán hadeezbingo hastą́ągo ahááką́ągo tʼááłáhí haaką́ bíighahgo áádóó áliv akʼah tʼááłáhídi yikááł ałnííʼ tʼáá bichʼįʼ anéeltʼeʼgo akʼáán tʼóó bee niłhinígo ályaago éí nááhániihgo íínísin doo; díí tʼáá áłahíjįʼ akʼáán nááhániihgo éí Bóhólníihii bichʼįʼ bee hoogáałii átʼéego ahoolʼáa doo.
15 Kótʼéego dibé yázhí índa akʼáán áádóó áliv akʼah tʼáá áłahjįʼ didlidgo nááhániih doo biniyé tʼáá ákwíí bíní hashtʼéédayiilʼįįhgo ahoolʼáa doo.
16 Bóhólníihii Diyin God kóní, Naatʼáanii éí bikéyah łaʼ biyeʼké łaʼ yeidiníʼą́ągo ííshją́ą́ éí kéyah baa deetʼánígíí bííʼ dooleeł.
17 Naatʼáanii bikéyah łaʼ binaalteʼ yeidiníʼą́ągo, naalteʼ jílíinii kéyah haa deetʼánígíí tʼáá jótąʼgo baa hózhǫ́ǫgo yihahígíí baa hoolzhiizhgo kéyah jótąʼii naatʼáanii bííʼ nídoodleeł; éí kéyah biyeʼké daabííʼ dooleeł.
18 Naatʼáanii ałdóʼ diné bííʼ danilíinii doo bitsʼáhizhdoonił da biniyé diné bííʼ danilíinii doo łaʼ bighazhdidootʼáał da; tʼáá hóhígíí tʼéiyá hayeʼké baa hizhdiʼaah doo; kótʼéego shidineʼé łaʼ bikéyah doo bighadahididootʼáał da.
19 Ákohgo yah aʼatiin bibąąhjígo yah iʼiildééh góneʼ shił chʼíníʼáazhgo náhookǫs bichʼijígo náádaʼiiłniihii kin diyingo bá nahazʼą́ąjįʼ shił niníʼáázh; éí áádóó eʼeʼaahjigo nihoneelʼą́ądi łahgo hazʼą́ągo yiiłtsą́, jóʼakon.
20 Áko áshidííniid, Nááʼiiłniihii dajílíinii, tłʼóoʼdi ahééhoolʼáhíjįʼ chʼéédajikahgo diné ákwii áłah nilínígíí diyinii doo bíhididooʼnáał da biniyé doo ákǫ́ǫ́ ájítʼı̨́ı̨́jí nááhániihii índa ádił niʼiidzííhjí nááhániihii kweʼé dajiłbéezh doo, áádóó kweʼé akʼáán nááhániihii tadajoonihgo bááh ádajiłʼı̨́į doo.
21 Ákohgo tłʼóoʼdi ahééhoolʼáhíjįʼ shił chʼínáánátʼáázh áádóó éí naanídaazʼáágóó ákǫ́ǫ́ shił tádííʼáázh, áko naanídaazʼáhígíí tʼáá éí bikʼeh tʼáá ákǫ́ǫ́ ałdóʼ nahazʼą́.
22 Dı̨́įʼgo nahazʼánígíí éí tʼáá ałtso tʼáá aheedaníłtso; nááseego tsostsʼidiindóó baʼaan ashdlaʼ ké silá ákódanízah; naaniigo éí ashdladiindóó baʼaan naakidóó ałnííʼ ké silá ákódaníłtéelgo nahazʼą́.
23 Dı̨́įʼgo bee nídaastłʼahgo nahazʼání góneʼ déédadiljahgo ahéédahoolʼá; ákǫ́ǫ́ háádaʼnilgah biniyé nahazʼą́.
24 Ákohgo áshidííniid, Kǫ́ǫ́ chʼiyáán álʼı̨́ biniyé nahazʼą́, náádahidoonihii diné nidayiijáhígíí éí kin biiʼ sohodizingi nidajilʼaʼígíí ákwii dajiłbéezh doo.
