Ezekiel 47:1-23
47 Áádóó kin biiʼ sohodizin bichʼéʼétiinjįʼ shił ninátʼáázh, nítʼééʼ shoo, chʼéʼétiin biyaadę́ęʼgo tó łaʼ chʼínílı̨́ áádóó haʼaʼaahjigo íílı̨́; kin biiʼ sohodizin éí haʼaʼaahjigo chʼéʼétiingo siʼą́; tʼáá éí nishʼnáájígo biyaadę́ę́ʼ tó chʼínílı̨́įgo bikááʼ nááʼiiniihí siʼánígíí shádiʼááhjígo ahéénílı̨́.
2 Nááʼákóneʼ náhookǫsjigo dáńʼdítı̨́hígíí ákóneʼ shił chʼínáánátʼáazhgo haʼaʼaahjigo tłʼóoʼdi dáńʼdítı̨́hígíí áajįʼ shił nináánátʼáázh, áko dáńʼdítı̨́hígíí biyaadi nishʼnáájígo tó chʼínílı̨́.
3 Éí áádóó tłʼóół bee íʼneelʼąąhí tʼáá yoozǫ́ǫsgo haʼaʼaahjigo tʼáá tó íílı̨́ı̨́góó naadiindi mííldóó baʼaan tsostsʼidi neeznádiindóó baʼaan hastą́diin ké silá ákónízahjįʼ shił niníʼáázh; nááʼákóneʼ tó nílínígíí tséʼnaa shił niníʼáázh nítʼééʼ shikétsı̨́įgo tó néésʼąąd.
4 Éí áádóó tłʼóół bee íʼneelʼąąhí tʼáá náás nááyoozǫ́ǫsgo shił dah náádiitʼáázh, áko naadiindi mííldóó baʼaan tsostsʼidi neeznádiindóó baʼaan hastą́diin ké silá ákónízáágóó shił nináánátʼáázh; áadi shił tséʼnaa nináánátʼáázh nítʼééʼ shigodtaʼgo tó néésʼąąd. Éí áádóó shił dah náádiitʼáazhgo tłʼóół bee íʼneelʼąąhí tʼáá nááyoołtʼihgo, áko naadiindi mííldóó baʼaan tsostsʼidi neeznádiindóó baʼaan hastą́diin ké silá ákónízáágóó shił nináánátʼáázh, áádóó tséʼnaa shił nináánátʼáázh nítʼééʼ shiníiʼgo tó néésʼąąd.
5 Áádóó shił dah náádiitʼáazhgo naadiindi mííldóó baʼaan tsostsʼidi neeznádiindóó baʼaan hastą́diin ké silá ákónízáágóó shił nináánátʼáázh nítʼééʼ áadi tooh nílı̨́ı̨́ lá; doo haʼnaa nooshaʼ átʼée da; tó de adínéesʼąąd; tʼáá biiʼ niʼjółkǫʼígi íídéetą́ą́ʼ; doo haʼnaa nijóyaʼ átʼée da.
6 Áádóó áadi áshíłní, Diné nílíinii, díísh kʼad yiniłtsą́?
Áadi índa tʼáá tooh nílínígíí bibąąhgóó nátʼą́ą́ʼ shił nátʼáázh.
7 Nátʼą́ą́ʼ nánísdzáago tooh nílínígíí ałtsʼą́ą́hjígo tsin tʼóó ahayóí yílʼáago yiiłtsą́.
8 Áádóó áshíłní, Tó nílínígíí éí haʼaʼaahjigo nahósʼaʼgóó íílı̨́įgo honoojí biih yílı̨́ı̨́dóó tónteel biih yílı̨́, áko tónteel díkʼǫ́ǫzhii łikango ánéidoodlííł.
9 Tʼáá tooh nílı̨́ı̨́góó dahináanii dah nidaʼasołgo kéédahatʼı̨́ı̨́góó éí dahináa doo áádóó łóóʼ tʼóó ahayóí nídínóotʼı̨́ı̨́ł, háálá díí tooh áajįʼ íílı̨́ índa éí tónteel łikan dooleeł, áko tooh tʼáá nílı̨́ı̨́góó tʼáá ałtsoní dahináa doo.
10 Engíídai Enégleiyimjįʼ* tónteel bibąąhgóó łóóʼ hadayiileehígíí áádóó łóóʼ hadayiiłtsósígíí nízı̨́į doo; ákweʼé łóóʼ hadahaltsóós biniyé hazʼą́ą doo, Ayóóʼátʼé Tónteel hoolyéii éí biiʼ łóóʼ yílʼáhígi átʼéego ákwii łóóʼ ałʼąą ádaatʼéii ayóó ánéelą́ą́ʼ bee ádaʼazįįd doo.
11 Nidi tónteel bibąąhgóó tó hashtłʼishgo tʼáá sahdii naazkánígíí éí yáʼátʼéehgo doo ádadoolníił da; éí tʼáá dadókʼǫ́ǫzhgo naazyı̨́įgo áshįįh biniyé doo baa náhódóotʼįįł da.
12 Tooh nílínígíí ałtsʼą́ą́hjígo bibąąhgóó tsin ałʼąą ádaatʼéii chʼiyáán biniyé nidaniseʼ doo; bitʼąąʼ éí doo dadínóołnah da, bineestʼąʼ ałdóʼ tʼáá dahólóní dahólǫ́ǫ doo; tʼááłáʼí nínádíziʼ bikʼeh nínádanitʼı̨́įh doo, háálá hodiyingo hazʼánídóó bitoʼ háálı̨́; bineestʼąʼ éí yidą́ą doo, áádóó bitʼąąʼ éí náʼáłdziih doo.
Kéyah binídahasdzoígíí áádóó hadahwiisdzohígíí
13 Bóhólníihii Diyin God kóní, Ízrel naakitsʼáadah dineʼé bitahgóó kéyah daabííʼ dooleeł biniyé bá nidahodíízohígíí díí éí átʼé: Jóseph dineʼé éí naakigo bá náhodíízoh.*
14 Tʼáá aheedaníłtsogo bá daʼdidíízoh: danihizhéʼé yę́ę bichʼįʼ bee ádee hadeesdzííʼ; díí kéyahígíí nihííʼ dooleełgo nihaa didootʼááł.
15 Kótʼéego náhookǫsjigo kéyah bá hoodzo doo: Ayóóʼátʼé Tónteel nihiníyı̨́ı̨́dóó Héthlan hazʼánígóó áádóó Zíídad kin haalʼáajįʼ yah eʼetiingóó
16 áádóó Héímath kin haalʼáágóó, Biiróthah kin shijaaʼgóó índa Sibráyim hazʼánígóó, díí Sibráyim hoolyéii Damáskas kin haalʼáii áádóó Héímath bitaʼ gónaa hazʼą́ índa Héízar-hátikan, éí kéyah Háoran baa níhánígóó kin sinilgóó,
17 áádóó tónteel bibąąhdóó Héízar-íínan kin shijaaʼgóó hoodzo doo; éí Damáskas hoolyéédóó náhookǫsjigo kéyah siʼánígíí bibąąhdi áadi áhoolyé áádóó tʼáá náhookǫs bichʼijígo Héímath kin haalʼáajįʼ hoodzo doo. Áko díí náhookǫsjigo kéyah bá hoodzo doo.
18 Haʼaʼaahjígo éí Háoran hoolyéégóó áádóó Damáskas kin haalʼáágóó áádóó Gíliyad hoolyéégóó áádóó Ízrel dineʼé bikéyahgóó éí tooh Jórdan bibąąhgóó haʼaʼaahjí tónteel siyı̨́įjįʼ hoodzo doo. Díí éí haʼaʼaahjigo kéyah bá hoodzo doo.
19 Shádiʼááhjígo éí Téímar hoolyéédóó Kéídesh hoolyéejįʼ áádóó Ííjip kéyah siʼánígíí bibąąhgóó tooh nílíníjįʼ índa níléí Ayóóʼátʼé Tónteel hoolyéejįʼ hoodzo doo. Díí éí shádiʼááhjígo hoodzo doo.
20 Héímath hoolyéii éí bikʼą́ąhgo éiyá eʼeʼaahjigo Ayóóʼátʼé Tónteel hoolyéhígíí bibąąhgóó bee hoodzo doo. Díí éí eʼeʼaahjígo hoodzo doo.
21 Áko nihí Ízrel dineʼé nohłíinii, ałʼąą ádóoneʼé nohłínígíí bikʼehgo díí kéyah ałtaa doohdzoh.
22 Kéyahígíí nihííʼ dooleeł biniyé ałtaa doohdzoh, índa doo Ízrel dineʼé danilíinii nihitahjįʼ adahaaskaigo baʼáłchíní dahazlı̨́ʼígíí éí ałdóʼ kéyah łaʼ bá dadiʼdoosoh; éí áłchíní tʼáá Ízrel dineʼé bá nidahaazhchı̨́įgo baa nitsídaohkees doo; éí kéyahígíí tʼáá aheedaníłtsogo bííʼ dadooleełgo bił ałtsʼą́ą́ʼ daʼnołkʼiiz doo.
23 Áádóó háí dineʼé shı̨́ı̨́ bitahgi déʼéyóní kééhatʼı̨́įgo tʼáá éí bitahgi kéyah bííʼ dooleełii baa dahididooʼááł, ní Bóhólníihii Diyin God.
Footnotes
^ Beʼekʼid eʼeʼaahjigo bibąąhgóó ałníiʼgi tó háálíinii Engíídai hoolyé áádóó náhookǫsdóó eʼeʼaahjí bibąąhgi tó háálíinii Enégleiyim hoolyé.
^ Jóseph biyeʼ Íífreiyim índa Manáseh éí tʼáá ałʼąą bá náhodíízoh.
