Ezekiel 48:1-35
48 Ízrel dineʼé ádóoneʼé danilínígíí kódaolyé: náhookǫsjigo hoodzoígíí éí Ayóóʼátʼé Tónteel bibąąhdóó dahodiidzogo haʼaʼaahjigo hoodzo níléí Héthlan hoolyéejįʼ, éí áádóó haʼaʼaahjigo Héímath hoolyéejįʼ nááhoodzo, éí áádóó Héízar-íínan hoolyéejįʼ nááhoodzo, éí áádóó náhookǫsjigo Damáskasdóó Héímath bá hoodzoígíí áajįʼ bohodiidzo, áko haʼaʼaahjí hoodzodóó eʼeʼaahjí hoodzojįʼ Dan dineʼé éí łaʼ hahoodzoígíí baa didootʼááł.
2 Dan dineʼé bikéyahdóó shádiʼáahjigo bíighahgóó haʼaʼaahjí áádóó eʼeʼaahjí hoodzo doo, éí Ásher dineʼé bííʼ doo.
3 Ásher dineʼé bikéyahdóó shádiʼáahjigo bíighahgóó haʼaʼaahjí áádóó eʼeʼaahjí hoodzo doo, éí Náftalai dineʼé bííʼ doo.
4 Náftalai dineʼé bikéyahdóó shádiʼáahjigo bíighahgóó haʼaʼaahjí áádóó eʼeʼaahjí hoodzo doo, éí Manáseh dineʼé bííʼ doo.
5 Manáseh dineʼé bikéyahdóó shádiʼáahjigo bíighahgóó haʼaʼaahjí áádóó eʼeʼaahjí hoodzo doo, éí Íífreiyim dineʼé bííʼ doo.
6 Íífreiyim dineʼé bikéyahdóó shádiʼáahjigo bíighahgóó haʼaʼaahjí áádóó eʼeʼaahjí hoodzo doo, éí Rúben dineʼé bííʼ doo.
7 Rúben dineʼé bikéyahdóó shádiʼáahjigo bíighahgóó haʼaʼaahjí áádóó eʼeʼaahjí hoodzo doo, éí Júdah dineʼé bííʼ doo.
8 Júdah dineʼé bikéyah shádiʼáahjigo bíighahgóó haʼaʼaahjí áádóó eʼeʼaahjí hoodzo doo; éí ákwii nááʼiiniih biniyé hazʼą́ą doo, áádóó ákwii ałníiʼgi kin biiʼ sohodizin siʼą́ą doo; éí kéyah nááseego tseebíídóó nááʼáłnííʼ tʼįįhí biʼohgo tsin sitą́ą doo; naaniigo éí haʼaʼaahdóó eʼeʼaahjįʼ éí Ízrel dóoneʼé bikédaayah áníłtso yę́ęgi átʼée doo.
9 Kéyah éí Bóhólníihii tʼáá sahdii bá atsʼá deetʼánígíí nááseego tseebíídóó nááʼáłnííʼ tʼįįhí biʼohgo tsin sitą́ą doo; naaniigo éí tááʼdóó nááʼáłnííʼ tʼįįhí biʼohgo tsin sitą́ą doo.
10 Ákóhoníłtéelgo díí kéyah náádaʼiiłniihii łaʼ baa didootʼááł, náhookǫsjí hoodzoígíí índa shádiʼááhjí hoodzoígíí éí tʼáá áłah tseebíídóó nááʼáłnííʼ tʼįįhí biʼohgo tsin sitą́ą doo áádóó haʼaʼaahjí hoodzoígíí índa eʼeʼaahjí hoodzoígíí éí tʼáá áłah tááʼdóó nááʼáłnííʼ tʼįįhí biʼohgo tsin sitą́ą doo; Bóhólníihii bikin biiʼ sohodizin éí ałníiʼgi siʼą́ą doo.
11 Zéídak dineʼé bitsʼą́ą́dóó oochíiłii nááʼiiłniihii dajílínígíí tʼéiyá díí hodiyingo hazʼánígíí éí hó doo; Ízrel dineʼé yóóʼeekai yę́ędą́ą́ʼ hó haʼahódlíigo yáʼátʼéehgo shá nidajisʼaʼgo Líívai dineʼé yóóʼeekai yę́ęgi átʼéego tʼáadoo yóóʼajookai da.
12 Líívai dineʼé bikéyah bíighahgóó díí dah ooldahígíí kéyah tʼáá sahdii átʼéego bá atsʼádidootʼááł, ákwii tʼáá íiyisí hodiyin dooleeł.
13 Líívai dineʼé ałdóʼ bikéyah náádaʼiiłniihii bikéyah bihiníʼą́ą doo; éí kéyah nááseego tseebíídóó nááʼáłnííʼ tʼįįhí biʼohgo tsin sitą́ą doo; naaniigo éí tááʼdóó nááʼáłnííʼ tʼįįhí biʼohgo tsin sitą́ą doo; tʼáá átʼégo nááseego tseebíídóó nááʼáłnííʼ tʼįįhí biʼohgo tsin sitą́ą doo; naaniigo tááʼdóó nááʼáłnííʼ tʼįįhí biʼohgo tsin sitą́ą doo.
14 Éí kéyah tsʼídá doo nahidoonih da áádóó nááná łaʼ kéyah tsʼídá doo bił ałnáádooʼnił da índa náánáłaʼ diné doo baa didootʼáał da; ákwii Bóhólníihii tʼáá íiyisí bá hodiyin.
15 Łaʼ kéyah yidziihígíí naaniigo tʼááłáʼídóó nááʼáłnííʼ tʼįįhí biláahgo tsin sitą́ągo áádóó nááseego tseebíídóó nááʼáłnííʼ tʼįįhí biʼohgo tsin sitą́ągo éí ákwii Ízrel dineʼé ákwii kéédahatʼı̨́į doo índa doo siláhígóó doo diyingo chooʼı̨́į da doo; éí kéyah ałníiʼgi kin haalʼáa doo.
16 Kótʼéego éí bíʼnéélʼąąd doo: tʼáá dı̨́ı̨́ʼdę́ę́ʼ tʼááłáʼídóó nááʼáłnííʼ tsin sitą́ ákódahonízah doo.
17 Kin haalʼá binaagóó dahootsogo ahééhoolʼáa doo; kin haalʼáádóó náhookǫsjigo áádóó shádiʼáahjigo áádóó haʼaʼaahjigo índa eʼeʼaahjigo dı̨́įdi neeznádiindóó baʼaan tádiindóó baʼaan tsostsʼidóó nááʼáłnííʼ ké silá ákódanízah doo.
18 Hodiyingo hazʼánígíí bíighahgóó kéyah náánástʼánígíí éí bikáaʼgi kin haalʼáii, éí áádóó kéyah yidziihígíí haʼaʼaahjigo táadi tsin sitą́ągo áádóó eʼeʼaahjigo ałdóʼ táadi tsin sitą́ągo hodiyingo hazʼánígíí bíighahgóó nááhástʼą́ą doo; ákweʼé kin haalʼáádóó diné kʼéédaʼdidléeh doo.
19 Kintahgóó nidajilnishígíí éí Ízrel dineʼé ádóoneʼé dajílínígíí tʼáá ádzíłtso ákweʼé kʼéédazhdidléeh doo.
20 Kéyah tʼáá sahdii biniyé átʼéego atsʼádeetʼánígíí łahdę́ę́ʼ tseebíídóó nááʼáłnííʼ tʼįįhí biʼohgo tsin sitą́ą doo, áádóó náánáłahdę́ę́ʼ tseebíídóó nááʼáłnííʼ tʼįįhí biʼohgo tsin sitą́ą doo; tʼáá ákódanízahgo bináhásʼáa doo, áko kin haalʼáago bíighahgóó ałtsʼą́ą́hjí kéyahígíí ałdóʼ atah óoltąʼ doo.
21 Kéyah éí Bóhólníihii bá atsʼádeetʼánígíí índa kéyah kin haalʼáago ádoolníiłgo bá atsʼádeetʼánígíí éí kéyah bił ahóóltąʼgo tseebíídóó nááʼáłnííʼ tʼįįhí biʼohgo tsin sitą́ ákónízah áádóó naaniigo ałdóʼ tseebíídóó nááʼáłnííʼ tʼįįhí biʼohgo tsin sitą́; éí ałtsʼą́ą́hjígo bíighahgi kéyah hoodzooígíí áádóó eʼeʼaahjigo tónteeljįʼ kéyah niníʼáhígíí áádóó haʼaʼaahjigo kéyah niníʼáhígíí tʼáá átʼé éí tʼáá áłah naatʼáanii bikéyah doo. Kin biiʼ sohodizin índa kéyah tʼáá bóóltąʼgo Bóhólníihii bá atsʼádeetʼánígíí éí tʼáá ałtso kéyah ahééhoodzooígíí ałníiʼgi sinil doo;
22 kéyah Júdah dineʼé baa deetʼánígíí áádóó kéyah Bénjamin dineʼé baa deetʼánígíí bitaʼ gónaa, díí kéyahígíí éí tʼáá átʼé naatʼáanii bá sinil doo, tʼáá hazhóʼó Líívai dineʼé kéyah baa deetʼánígíí índa kin haalʼá bá haadzooígíí éí naatʼáanii bikéyah ałníiʼgi sinil doo.
23 Áádóó éí bíighahgóó shádiʼáahjigo Ízrel dineʼé daadziihígíí kéyah bá hadahwiisdzo doo; haʼaʼaahjídóó eʼeʼaahjí hoodzo doo, éí Bénjamin dineʼé bííʼ doo.
24 Bénjamin dineʼé bikéyahdóó shádiʼáahjigo bíighahgóó haʼaʼaahjí áádóó eʼeʼaahjí hoodzo doo, éí Símiyan dineʼé bííʼ doo.
25 Símiyan dineʼé bikéyahdóó shádiʼáahjigo bíighahgóó haʼaʼaahjí áádóó eʼeʼaahjí hoodzo doo, éí Ísakar dineʼé bííʼ doo.
26 Ísakar dineʼé bikéyahdóó shádiʼáahjigo bíighahgóó haʼaʼaahjí áádóó eʼeʼaahjí hoodzo doo, éí Zébyulan dineʼé bííʼ doo.
27 Zébyulan dineʼé bikéyahdóó shádiʼáahjigo bíighahgóó haʼaʼaahjí áádóó eʼeʼaahjí hoodzo doo, éí Géed dineʼé bííʼ doo.
28 Géed dineʼé kéyah baa deetʼánígíí éí shádiʼááh bichʼijígo Téímar kin haalʼáádóó shádiʼááhdóó eʼeʼaah bichʼįʼgo tó hadaazlı̨́įgo Kéídesh kin haalʼáajįʼ hoodzo, éí áádóó náhookǫsdóó eʼeʼaahjigo Ííjip dineʼé bikéyah siʼánígíí bibąąhgóó Ayóóʼátʼé Tónteel áajįʼ hoodzo doo.
29 Ízrel bitahdóó ádóoneʼé dajílíinii kéyah daahó áádóó hatsʼą́ą́dóó daʼahílchíihii baa dahizhdiʼaah dooleełígíí biniyé díí kéyah hataadidootʼááł áádóó ałtsʼą́ą́ʼ daʼjíłkʼiiz doo, ní Bóhólníihii Diyin God.
Kin haalʼáii bidáńʼdaʼditı̨́hígíí áádóó bee wójíii
30 Kin haalʼáago bináʼástłʼinígíí naanídaʼastłʼingo bitaʼ ádanízahígíí éí tʼááłáʼídóó nááʼáłnííʼ tsin sitą́ ákódahonízah. Kótʼéego yah adaʼiiztiin:
31 éí bitaʼ gónaa táaʼgo dáńʼdaʼditı̨́įh doo, áádóó dáńʼdaʼditı̨́hígíí Ízrel bitahdóó dineʼé bee dabiʼdójíhígíí éí bee dawójí. Náhookǫs bichʼijígo táaʼgo dáńʼdaʼditı̨́hígíí éí Rúben áádóó Júdah índa Líívai bee dawójí.
32 Haʼaʼaahjígo tʼááłáʼídóó nááʼáłnííʼ tsin sitą́; áádę́ęʼgo táaʼgo dáńʼdaʼditı̨́hígíí éí Jóseph áádóó Bénjamin índa Dan bee dawójí.
33 Shádiʼááhjígo tʼááłáʼídóó nááʼáłnííʼ tsin sitą́; áádę́ęʼgo táaʼgo dáńʼdaʼditı̨́hígíí éí Símiyan áádóó Ísakar índa Zébyulan bee dawójí.
34 Áádóó eʼeʼaahjígo tʼááłáʼídóó nááʼáłnííʼ tsin sitą́; áádę́ęʼgo táaʼgo dáńʼdaʼditı̨́hígíí éí Géed áádóó Ásher índa Náftalai bee dawójí.
35 Áko kin haalʼáago bináʼástłʼinígíí éí hastą́ą́h tsin sitą́; éí bijı̨́ı̨́dóó, Bóhólníihii Áadi Hólǫ́, wolyéego hahodoolzhish.
