Ezekiel 5:1-17
5 Shoo, diné nílíinii, tsiighá yishéehii dághá bee yilzhéhí deenínígi átʼéego diltłish deeníinii nídidíítı̨́įłgo nitsiiʼ áádóó nidághaaʼ bee dííshihgo ahiih dííłjoł. Nááʼákóneʼ tsiighá aheenéeltʼeʼgo táaʼgo ałtsʼádííłjołgo biniyé bee dah adiidleehí nídidííʼááł.*
2 Akʼi dah adishjéʼígíí ałtso bohoolyaago tsiighá tʼááłáʼí shijoolígíí kin haalʼáhígíí ałníiʼgi adidííłkʼą́ą́ł; nááʼákóneʼ tsiighá shijoolígíí éí kin haalʼáhígíí bitahgóó tsʼídá ałtso diltłish bee nihidííłgish; tááʼ góneʼ tsiighá shijoolígíí éí níyol biyiʼgóó taidííghas; shí éí shidiltłish bizis tʼáágééd bikééʼ yishtı̨́įł doo.
3 Akéeʼdiígíí tʼah doo ákónílééhgóó éí tʼáá díkwíí yeeʼ bitsʼádííłjołgo yaago niʼéʼígíí biyiʼdę́ęʼgo bídííłtłʼóół.
4 Áko łaʼ éí nínáádidííłjołgo tsédzadííłkałgo adidííłkʼą́ą́ł; éí bitsʼą́ą́dóó kǫʼ hadidoonołgo Ízrel dineʼé tsʼídá tʼáá ałtso bitahgóó adidoonoł.
5 Bóhólníihii Diyin God kóní, Díí Jerúsalem átʼé; ałʼąą dineʼé kéédahatʼínígíí ałníiʼgi hojílǫ́ǫgo áhooshłaa; hanaagóó éí kéyah ahéénínil.
6 Shibikʼehgo hoogáałii doo dazniizı̨́įʼ da, bee nihoyíʼáanii doo bikʼehgo dajíkai da. Áko ałʼąą dineʼé hanaagóó kéédahatʼínígíí índa kéyah hanaagóó ahéénínilígíí biláahgo shibikʼehgo hoogáałii índa bee nihoyíʼáanii doo bikʼeh dahojíłʼı̨́ı̨́góó tʼáá íiyisí doo yáʼáshónígi ádajíítʼįįd.
7 Ákohgo Bóhólníihii Diyin God kónihiłní, Nihinaagóó ałʼąą dineʼé kéédahatʼínígíí biláahgo tʼáá íiyisí doo yáʼáshónígi ádaotʼįįd, áádóó bee nihoyíʼáanii doo bikʼehgo danoohkai da, áádóó shibikʼeh hoogáałii doo bikʼeh dahonołʼı̨́į da nítʼééʼ índa ałʼąą dineʼé nihinaagóó kéédahatʼínígíí bibikʼehgo hoogáałii doo bikʼeh dahonołʼı̨́į da nítʼééʼ;
8 éí bąą Bóhólníihii Diyin God kóní, Tʼáá shí nidi nihikʼijįʼ nishłı̨́įgo ałʼąą dineʼé dabinááł nihiníiʼgi atídanihishʼı̨́į doo, jóʼakon.
9 Tsʼídá tʼóó baaʼihii baa naahkaígíí biniinaa tsʼídá tʼah doo ánihishłééh yę́ęgi ánihideeshłííł índa kodóó tsʼídá doo ákónáánihideeshdlíił da.
10 Éí bąą nihiníiʼgi dabiyeʼké nídeidooldił índa ayeʼké danilíinii dabizhéʼé nídeidooldił; tsʼídá tʼáá íiyisí atínihideeshłííł, áko daohdzíʼígíí tʼáá ánółtso éí tʼáá ałtsogóó tanihidínéeshkał.
11 Bóhólníihii Diyin God kóní, Tsʼídá tʼáá aaníí hinishná; ákótʼéego nichǫ́ʼígíí índa tʼóó baaʼihii baa naohkaígíí bee shikin biiʼ sohodizin daołchǫʼígíí biniinaa tsʼídá tʼáá aaníí nahjįʼ ánihideeshłííł áádóó doo nihaa jooshbaʼ da doo índa doo nihikʼédí deeshłeeł da.
12 Tʼááłáʼí góneʼ dah wohkahígíí éí nihitahgi naałniihii índa dichin ánihidoołdįįł; nááʼákóneʼ dah wohkahígíí diltłish bee nidanihidiʼdootsił; tááʼ góneʼ dah wohkahígíí tʼáá ałtsogóó tanihidínéeshkałgo diltłish nihikééʼ tádíshtįįh doo.
13 Kótʼéego lą́ą hachʼįʼ sháhóóchįįdígíí bohodoolníił ni, áko hachʼįʼ sháhóóchįįdígíí bee atíhooshłaago shiiʼ hááhodiyooldoh; tʼóó báhádzidgo hachʼįʼ hashké niisdzı̨́įʼgo atíhooshłaaígíí éí ałtso bohoolyaago Bóhólníihii nishłíinii hóneeshdlı̨́įgo haasdzíʼígíí hoł béédahodoozįįł.
14 Áádóó ałʼąą dineʼé ninaagóó kéédahatʼínígíí bitahgóó ałtso nąąh daʼííbı̨́įʼgo índa ná nahatʼiʼgo ną́ą́h dahidikáahii ákótʼéego daniníłʼı̨́į doo. Kónítʼéego ándeeshłííł.
15 Áko nichʼįʼ hashké niisdzı̨́įʼgo áádóó tʼáá íiyisí nandishteehgo atíníshʼı̨́įgo ałʼąą dineʼé ninaagóó kéédahatʼínígíí binááł tʼóó ná nahatʼiʼii áádóó nee adlohodichíii, áádóó bee iʼílniiʼii índa tʼóó bikʼeʼayóii nílı̨́į doo. Bóhólníihii nishłíinii kótʼéego haasdzííʼ.
16 Tʼáá íiyisí kʼaaʼ bikʼediniihígi átʼéego hodidoochįįłgo ándoołdįįł biniyé nikʼijįʼ dichin biʼníłniiʼígíí tʼóó tséʼédinda ádeeshłíiłgo bááh bee hinínáanii bídin hóyéeʼgo ádeeshłííł.
17 Áko tʼáá íiyisí hodichinii índa naaldlooshii báádahadzidii nikʼijįʼ biʼníłniiʼgo naʼáłchíní nitsʼą́ą́ʼ deidooldił; naałniih naa doołnih índa dandiyoołhéełgo nidił nitsʼánílı̨́į dooleełígíí bohodoolnííł; kótʼéego diltłish bee atíndeeshłííł. Bóhólníihii nishłíinii kótʼéego haasdzííʼ.
Footnotes
^ Baa yáhodoosįįłii bee bééhózinígíí éí dineʼé bikʼeh hodeesdlı̨́įʼii ákódabiʼdiilʼįįhgo ááhyiłní.
