Ezekiel 6:1-14
6 Áádóó Bóhólníihii bizaad disétsʼą́ąʼgo kóshíłní,
2 Diné nílíinii, Ízrel dineʼé bidził naaznilgóó díníʼı̨́įʼgo ábidiʼdoolníłígíí bee bikʼijįʼ handziihgo
3 kódíní, Ízrel dineʼé bidził naaznilii danohłíinii, Bóhólníihii Diyin God áníinii deísółtsʼą́ą́ʼ: Dził naaznildi dayílkʼidgóó, dabíníkoohgóó índa dahonítsʼaaʼgóó kéédahohtʼíinii, Bóhólníihii Diyin God kónihiłní, Shí, tʼáá shí diltłish bee atínihideeshłíiłgo dah daaskʼid bighą́ąʼdi ádaalyaaígíí atídadeeshłííł.
4 Bikááʼ nááʼiiniihí danihíiʼii binaagóó doo siláhí da doo; jı̨́honaaʼéí bidaʼalyaago bichʼįʼ nidahohłáhígíí ałtso dadidoolzéí áádóó nihitahdóó diné nidaaztseedii éí edaʼalyaii bidáahjįʼ ahideeshkał.
5 Ízrel dineʼé bitsʼíís daneeznáanii edaʼalyaii bichʼįʼ nidahohłáhígíí bidáahjįʼ ałkʼijįʼ ahidínóodahgo ádeeshłííł; bikááʼ nááʼiiniihí nisoołnilii éí dabinaagóó danihitsʼin nihideideeshkał.
6 Nihibikááʼ náádaʼiiniihí dadoolchxǫǫł áádóó binaagóó doo siláhígóó ádahodoolnííł áádóó edaʼalyaii bichʼįʼ nidahohłáhígíí ahiih nídadooljishgo atídadoolnííł áádóó jı̨́honaaʼéí bidaʼalyaago bichʼįʼ nidahohłáhígíí kʼídahidootsxił índa nihinaanish kʼéédaʼdoolchxǫǫł biniyé nihił dah nahazʼą́ą́góó ákǫ́ǫ́ kin hadaasʼáhígíí kintsʼiil tʼéí dah naazhjaaʼgo ádahodoolnííł áádóó dah daaskʼid bighą́ąʼdi ádaalyaaígíí doo siláhí da doo.
7 Tʼáá nihitahgóó nidabiditseedígíí naaʼahindéeh doo, áko Bóhólníihii nishłı̨́įgo nihił béédahodoozįįł.
8 Kéyah naaznilgóó tanihidiʼnooskaadgo łaʼ nisoozı̨́; anaʼí bidiltłish baa dahididoołwoł; éí ákódaadzaaígíí áádeesįįł.
9 Nihí yisdádahinoochą́ʼígíí ałʼąą dineʼé bitahgóó yisnááh dasoolı̨́įʼgo shéédaołniih doo; jó, dabijéí yee ajił kʼehgo adádanoolníigo áádóó edaʼalyaii ajił kʼehgo yidádanoolníigo deiníłʼíinii shitsʼádahaaskaigo biniinaa yínííł naashá. Doo yildinígi átʼéego ádił nidaʼiisíʼígíí yiniinaa ákʼee dadiʼniih doo.
10 Ákohgo, Bóhólníihii nishłı̨́ áádóó doo yáʼátʼéhígi ánihideeshłííł, hodííniidii doo tʼáadoo biniyéhígóó haasdzíiʼgo hoł béédahodoozįįł.
11 Bóhólníihii Diyin God kóní, Ízrel dineʼé éí doo yildinígi átʼéégóó ádił nidaʼiisíʼígíí tʼáá ałtso biniinaa atihíláaneʼ! diníigo bikʼee ahínéikaʼ áádóó nihínídiiltał, háálá diltłish bee, dichin bee índa naałniih bee atíhoʼdilnééh.
12 Nízaadi nijigháii naałniih bikʼee dazhdootsaał; tʼáá áyídígóó nijigháii diltłish bee hodiʼyoolyééł; tʼáá ákweʼé nijigháii hakʼi dah adishjéeʼgo dichin hodiyoołhééł; kótʼéego tʼóó báhádzidgo hachʼįʼ hashké niisdzı̨́ʼígíí biʼdeeshłííł, ní Bóhólníihii.
13 Bikááʼ náádaʼjiiłniihígóó índa edaʼalyaii bichʼįʼ nidahojiłáhígóó, dah daaskʼid tʼáá ałtso bighą́ą́ʼgóó índa dziłghą́ąʼdi tʼáá ałtsogóó, tsin dootłʼizh naazkaadii tʼáá átʼé dabiyaagóó índa chéchʼil díłchʼilgo naazkaadii tʼáá ałtso biyaagóó áádóó edaʼalyaii bichʼįʼ nidahojiłáhígíí tsin bijeeh dilidgo łikání halchinii tʼáá háádę́ę́ʼ shı̨́ı̨́ bichʼįʼ náádaʼjiiłniihgo nahazʼánígóó hodineʼé nidaaztseedii naazhjéeʼgo daołtsą́ągo Bóhólníihii nishłı̨́įgo nihił béédahodoozįįł.
14 Áádóó hakʼijįʼ kʼídideeshchiłgo hakéyahgi kéédahojitʼínígíí tʼáá átʼé Díblath* bichʼįʼ honoojí doo naagháhígóó hazʼánígíí biláahgo átʼéego doo naagháhígóó áhodeeshłííł, áko índa Bóhólníihii nishłı̨́įgo hoł béédahodoozįįł.
Footnotes
^ Síriya kéyahgi kin haalʼáii Ízrel kéyah náhookǫsjigo hoodzooígíí.
