Ezekiel 7:1-27
7 Áádóó ałdóʼ Bóhólníihii kóshíłníigo náádisétsʼą́ą́ʼ,
2 Diné nílíinii, Bóhólníihii Diyin God éí Ízrel dineʼé bikéyah kwííłní, Nihá nihonítʼiʼ; kéyah tʼáá dı̨́ı̨́ʼgóó bá nihodootʼihígíí baa hoolzhiizh.
3 Kʼad lą́ą nihá nihodootʼihígíí baa hoolzhiizh ni. Nihichʼįʼ sháhodoochįįłgo ádanohtʼéii bee nihaa nídéeshtʼįįłgo doo yildinígi ádaotʼįįdígíí tʼáá ałtso bikʼé kʼéénihidideeshdlííł.
4 Doo nihikʼédí nishłı̨́įgo nihidínéeshʼįįł da, áko doo yildinígi ádaotʼįįdii tʼahdii nihitah hólǫ́ǫgo ádanohtʼéii bikʼé kʼéénihidideeshdlííł; áadi índa Bóhólníihii nishłı̨́įgo nihił béédahodoozįįł.
5 Bóhólníihii Diyin God kóní, Tʼáá íiyisí doo yáʼáshóonii tʼáá éí tʼéiyá ákótʼéhígíí nihikʼi hwiidooleeł, jóʼakon.
6 Nihá nihonítʼiʼ, nihá nihodootʼihígíí baa hoolzhiizh; nihikʼijįʼ ídlı̨́įgo hanihidilzíidgo nihikʼi hwiidooleeł, jóʼakon.
7 Kéyah bikááʼgóó kéédahohtʼíinii, nihá nihonítʼiʼígíí baa hoolzhiizh; baa hoolzhiizh lą́ą koshídę́ę́ʼ hadziih: achʼįʼ nahwiiʼná baa hoolzhiizh, dziłghą́ą́ʼgóó diné bił dahózhǫ́ yę́ę doo dadilwosh da doo.
8 Tʼóó hodíínaʼígo tʼóó báhádzidgo nihichʼįʼ hashké dínéesdzįįłgo atínihideeshłííł áádóó nihichʼįʼ sháhóóchįįdígíí biʼdeeshłíiłgo ádanohtʼéii bee nihaa nídadéeshtʼįįł índa doo yildinígi ádaotʼįįdígíí bikʼehgo kʼéédanihidideeshdlííł.
9 Doo nihikʼédí nishłı̨́įgo nihidínéeshʼįįł da; doo yildinígi ádaotʼįįdii tʼahdii nihitah hólǫ́ǫgo ádanohtʼéii bikʼehgo kʼéédanihidideeshdlííł, áko shí Bóhólníihii nihikʼíʼołhaałgo nihił béédahodoozįįł.
10 Beidoołkááł, beidoołkááł, jóʼakon: nihonítʼiʼígíí baa hoolzhiizh; tsihał bílátah iichiiʼ, ádaa hodzódlí yiitsoi.
11 Tʼáá naʼníleʼdii áhátʼíinii éí tsihał tʼáá íiyisí doo yáʼáshóonii násdlı̨́ı̨́ʼ; daahó lá áádóó tʼóó ahayóí haa áłah daazlı̨́įʼii doo łaʼ yidziih da doo áádóó hayódí tʼáá ałtso ádin doo índa doo łaʼ haicha da doo.
12 Baa hoolzhiizh, koshídę́ę́ʼ hadziih; naʼiiłniihii tʼáadoo bił nihoozhǫǫhí índa baa naʼiiniihii tʼáadoo yínííł naagháhí, háálá tʼáá kééhojitʼı̨́ı̨́ nítʼééʼ tʼóó báhádzidígi átʼéego bee atíʼélʼíinii bee atíhodiʼdoolnííł.
13 Baa naʼiizniiʼii áádóó naʼiisniiʼii éí tʼah hináa nidi, haa nahazniiʼígíí doo bichʼįʼ tʼą́ą́ʼ nízhdoodáał da,* háálá tʼáá kééhojitʼı̨́ı̨́ nítʼééʼ tʼóó báhádzidígi átʼéego bee atíʼélʼíinii doo tʼą́ą́ʼ kónídoolníił da; doo ákǫ́ǫ́ ájíítʼįįdígíí doo łaʼ beezhdoodzih da.
14 Dilní yee ádadííniidgo tʼáá ałtso hashtʼeʼádadiilyaa, nidi doo łaʼ dazhdoobah da, háálá diné tʼáá yílʼáá nítʼééʼ tʼóó báhádzidgo atíháshłééh.
15 Diltłish éí tłʼóóʼdę́ę́ʼ dadeezʼá; kin haalʼáagi éí nahałniih áádóó dahodííchįįd; dáʼákʼehdi nijigháii éí diltłish haghá doolzihgo dazdootsaał; kin haalʼáagi nijigháhígíí éí dichin áádóó naałniihii hodidoolnahgo hodiyoołhééł.
16 Łaʼda yisdádahineezhchą́ąʼgo éí honítsʼaaʼgi hasbídí nidahojílingo doo ákǫ́ǫ́ ádajíítʼįįdii baa chadazhdilwą́ąʼgo dziłghą́ą́ʼgóó adahizhdoolwoł.
17 Dahálaʼ tʼáá ałtso doo bitah dahwiináa da doo índa tʼáá ádzíłtso hagodtaʼ gónaa tʼóó nidanilʼeeł doo.
18 Tʼáá ádzíłtso tłʼoh azis bee áká dazdoolzisgo dah nídajiltǫǫh doo; tʼáá ádzíłtso tʼóó ádaa yádaznidzin dazhnoolnin doo áádóó hatsiiʼ daalzhéeʼ doo.*
19 Habéésh łigaii yę́ę kintaa daʼaztiingóó adahizhdoołkał; haʼóola yę́ę éí tʼóó baaʼihgo baa nitsídadzikees doo; Bóhólníihii tʼóó báhádzidgo atíhálééh baa hoolzhiizhdi habéésh łigaii índa haʼóola tsʼídá doo yisdáhodoonił da áádóó doo hwiih dajílı̨́ı̨́góó ádahodoolííł índa doo nídahodínóołchał da, háálá doo ákǫ́ǫ́ ádajíítʼįįdígíí bikʼee dazhdidoogohgo ádił dazdoosih.
20 Yee nidaʼachʼąąhii yee edaʼalyaii ádayiilaago tʼáadoo biniyéhígóó yee ádaa dahasʼnihgo doo daaldinii índa dajoodláii ádá ádayiilaa; éí bąą tʼóó baaʼihgo baa nitsídadzikeesgo áhodeeshłííł.
21 Naalyeʼé éí déʼéyóní baa dideeshʼááł; ałʼąą dineʼé tʼáá íiyisí doo yáʼádaashóonii éí daasnáanii baa dideeshʼáałgo deidoołchxǫǫł.
22 Áádóó ałdóʼ hatsʼą́ąjįʼ hadínéeshniiłgo shinahontʼingo hazʼání góneʼ dahodoołchxǫǫł,* áko aghadaʼiiʼníiłii yah ahidookahgo dahodoołchxǫǫł.
23 Álátsíín ninádaaʼniłí ánílééh; kéyah tʼáá náhwiistʼą́ą́ nítʼééʼ diné bidił yee ádidahodiiltʼiʼii áádóó kin haalʼáagi tʼáá naʼníleʼdii ádaʼoolíłígíí nihinééstʼeʼ.
24 Éí bąą ałʼąą dineʼé agháago doo yáʼádaashóonii dahaghan haghadeidiyooʼniłgo ákǫ́ǫ́ bighan ádahodoolííł; ayóó átʼéego hwee ádaa dadzódliʼígíí éí doo ádajítʼéégóó ádahodeeshłííł índa dahozdósingo nahazʼánígóó hatsʼą́ą́ʼ dahodoołchxǫǫł.
25 Yééʼ bił haa hoolzhiizhgo bee achʼįʼ hózhóonii há dajitʼı̨́į doo, nidi doo łaʼ bikʼídazhdookah da.
26 Tʼóó báhádzidígi áhooníiłii ałkééʼ ahooníił doo. Tʼóó jiní jiní, haʼníigo dahaneʼígíí tʼáá ałkééʼ nidadidlaad doo; náásgóó ádahodooníiłii yaa halneʼii, Náásgóoshąʼ haa hodoonííł, deiłníigo nideídíłkid doo, nidi nááʼiiłniihii éí bee hazʼáanii yee hadoodzihii nidi tʼóó bił hodijool doo áádóó aląąjįʼ naazíinii éí kótʼé daaníinii ałdóʼ ákódaatʼée doo.
27 Aláahgo naatʼáanii éí yínííł nilı̨́į doo; naatʼáanii éí tʼáá íiyisí bąąh nahóókaad doo; éí kéyah biiʼ diné kéédahatʼíinii yééʼ bitah dahóóghą́ąʼ doo; ádajíítʼįįdígíí bikʼehgo kʼéédahodideeshdlííł; tʼáá hó aa nídajitʼíinii bikʼehgo haa nídadéeshtʼįįł; áadi índa Bóhólníihii nishłı̨́įgo hoł béédahodoozįįł.
Footnotes
^ Baa Hózhǫ́ǫgo Yihah wolyéii daatsʼí bídéétʼiʼ. Lev. 25:9-13.
^ Achʼįʼ nahwiiʼnáago atínídinidleeh bee ééhózinii.
^ Kin biiʼ sohodizin, doodaiiʼ Jerúsalem kin haalʼá ááhyiłní.
