Ezekiel 8:1-18
8 Ákohgo hastą́ą́h náhááh góneʼ hastą́ą́h nídízííd binih éí ashdlaʼgóó yoołkáałgo shighan góneʼ sédáago Júdah dineʼé aląąjįʼ naazíinii shidááhgóó naháaztą́ągo Bóhólníihii Diyin God shideelchidgo baa ákoniizı̨́ı̨́ʼ.
2 Dééʼı̨́ı̨́ʼ nítʼééʼ, shoo, haʼátʼíí shı̨́ı̨́ bitsʼádiʼnílíidgo sizı̨́įgo yiiłtsą́: ánoolninígíí binííʼdóó yaago éí kǫʼ nahalin, áádóó binííʼdóó dego éí bitsʼáhojilgishii nahalin.
3 Áádóó yílá nahalingo kʼídeelchidgo shitsiiʼ łaʼ yisił, áko Diyin God bitsʼą́ą́dę́ę́ʼ shił áhátʼı̨́įgo nahasdzáán áádóó yádiłhił bitaʼgi Níłchʼi Diyinii dah shidiiłtı̨́įgo Jerúsalem kin haalʼáadi nishiníłtı̨́; hodílzingo hazʼánígíí náhookǫsdę́ęʼgo chʼéʼétiingi dáádílkał náwóneʼdę́ęʼgo eʼelyaii łeʼhasingo ádaʼaleʼii* dah sidáhíjįʼ nishiníłtı̨́.
4 Shoo, tʼáá níléí halgaidi shił ádzaa yę́ęgi átʼéego Ízrel dineʼé biDiyin God ayóó ánóolninii ákwii náánéiłtsą́.
5 Ákohgo áshidííniid, Diné nílíinii, kʼad náhookǫsjigo anaghaał. Áko náhookǫsjigo ííghal, nítʼééʼ shoo, bikááʼ nááʼiiniihí siʼánígíí náhookǫsjigo dáńʼdítı̨́hígi díí eʼelyaii łeʼhasingo ádaʼaleʼii sizı̨́ı̨́ lá.
6 Áádóó ánááshidiʼní, Diné nílíinii, Ízrel dineʼé ayóó átʼéego doo yildinígi átʼéego yaa nidaakaigo biniinaa shikin biiʼ sohodizin doo deeghánígóó bitsʼádeesháłígíísh yíníʼı̨́? Nidi náánáłahjigo náádínítʼı̨́ı̨́ʼ. Díí biláahgo tʼáá íiyisí doo daaldinii yaa nidaakaigo néidííłtsééł.
7 Ákohgo hodílzingo hazʼánígíí yah aʼatiin bíighahjįʼ nishiníłtı̨́; nítʼééʼ dééʼı̨́įʼgo, shoo, tsé ahénátłʼingo níʼáhígíí biih hoodzą́ągo yiiłtsą́.
8 Áádóó áshíłní, Diné nílíinii, tsé ahénátłʼingo níʼáhígíí biiʼ ígééd, áko biiʼ íígeed nítʼééʼ dáádílkał léiʼ bikʼíʼnígeed.
9 Áko áshíłní, Nílááh, yah anináahgo diné doo yáʼádaashóonii kweʼé tʼáá íiyisí doo daaldinii yaa nidaakaígíí níníłʼı̨́.
10 Yah ííyáá nítʼééʼ; nidaaʼnaʼii índa nidaaldlooshii doo daaldinii* tsʼídá tʼáá ałtso ałʼąą ádaatʼéii áádóó Ízrel dineʼé biʼedaʼalyaii tsʼídá tʼáá ałtso tsé ahénátłʼingo níʼáhígíí bikáaʼjįʼ béédaʼalyaago ahééhoolʼá.
11 Nítʼééʼ béédaʼalyaago dabikáʼígíí bidááhdóó Ízrel dineʼé bitahdóó aląąjįʼ naazíinii tsostsʼidiin yiltʼéhígíí ákwii naazı̨́. Shéífan biyeʼ Jeiyazanáíyah ákwii atah sizı̨́. Tʼáá ałtso łeetsʼaaʼ biyiʼdóó tsin bijeeh dilidgo łikání halchingo nááhániihii dah deíjááh, áko éí dabilid dego adaʼiijooł.
12 Ákohgo áshíłní, Diné nílíinii, Ízrel dineʼé bitahdóó aląąjįʼ naazíinii tʼááłáʼí nítínígo tʼáá sahdii biʼedaʼalyaii bá nahazʼánígi chahałheeł góneʼ yaa nidaakaígíísh yiniłtsą́? éí ádaaní, Bóhólníihii doo nihooʼı̨́į da; Bóhólníihii kéyah yóóʼiidííʼą́.
13 Áádóó ánááshidooʼniid, Náánáłahjigo náádínítʼı̨́ı̨́ʼ. Díí biláahgo tʼáá íiyisí doo daaldinii yaa nidaakaigo néidííłtsééł.
14 Áko nítʼééʼ Bóhólníihii bikin biiʼ sohodizin siʼánígíí náhookǫsdę́ęʼgo dáńʼdítı̨́įhgi ninááshiníłtı̨́; nítʼééʼ shoo, ákwii sáanii łaʼ éí diyin bidiʼníinii Támaz* yaa daachago naháaztą́.
15 Áádóó áshidííniid, Diné nílíinii, díísh yiniłtsą́? Díí deiniłtsánígíí tʼah bilááh átʼéhígo tʼáá íiyisí doo daaldinii yaa nidaakaigo néidííłtsééł.
16 Áádóó shił dah diiʼáazhgo Bóhólníihii bikin biiʼ sohodizin siʼánígíí binaa hazʼą́ąjįʼ shił niníʼáázh, nítʼééʼ shoo, Bóhólníihii bikin biiʼ sohodizin bichʼéédą́ąʼgi chahaʼoh áádóó bikááʼ nááʼiiniihí bitaʼgi diné naadiin ashdlaʼ yiltʼéego kin biiʼ sohodizin yitsʼą́ąjįʼ dadéezʼı̨́įʼgo haʼaʼaahjigo jı̨́honaaʼéí yichʼįʼ nidahałáago yiiłtsą́.
17 Áádóó áshíłní, Diné nílíinii, díísh yiniłtsą́? Júdah dineʼé kweʼé tʼáá íiyisí doo daaldinii baa nidajikaígíí daʼ tʼįįhdígo átʼéhígíísh biniinaa yaa nidaakaígíí yee kéyah bikááʼgóó tʼáá átʼé tʼáá naʼníleʼdii nilíinii nihinééstʼeʼ áádóó shá náádahóółchįįd? Áko shoo, bíchı̨́įhjįʼ tsin bitsʼáozʼaʼ dah nídeidiiłjoł.
18 Éí bąą tʼóó báhádzidgo atíháshʼı̨́įgo haa nídéeshtʼįįł; doo haa aʼááh dínéesįįł da índa doo hakʼédí deeshłeeł da; azhą́ ayóó íitsʼaʼgo dajicha nidi, doo dahodideestsʼı̨́įł da.
Footnotes
^ Eʼelyaii Ásherah wolyéii aláahgo naatʼáanii Manáseh niiníʼánígíí daatsʼí átʼé. 2Kgs. 21:7.
^ Mózes bibee hazʼáanii éí chʼiyáán łaʼ doo bidiʼdéhígíí doo yidą́ą́góó yee hasʼą́.
^ Naniseʼ diyin bidiʼníinii Támaz wolyéii éí nidaniseʼ ádįįhgo bí ałdóʼ ádįįh áádóó náhahgo hááhiniséehgo dayoodlą́.
