Ezekiel 9:1-11
9 Ákohgo kóníigo ayóó íitsʼaʼgo haadzíiʼgo disétsʼą́ą́ʼ, Diné éí deezlá dah deíjáahii kin haalʼáago yikʼi dadéezʼı̨́įʼii tʼááłáʼí nítínígo áháníjįʼ ahaninohkááh.
2 Áko shoo, diné hastą́ltʼéego wódahjí náhookǫsjigo dáńʼdítı̨́hídę́ęʼgo deezlá bee naʼatseedii deíjáahgo yíkai, áko náánáłaʼ diné éí áłtsʼóózígo yisdizígíí bee naʼatʼą́hí łigaii ditsʼidgo ályaii yee hadítʼéego tó bee akʼeʼelchíhí bee naajaahii booshkʼiizhjí béstłʼǫ́ǫgo atah níyá áádóó yah aakaigo bikááʼ nááʼiiniihí béésh łitsoii bee ályaaígíí yíighahdóó deizįʼ.
3 Ákohgo Ízrel dineʼé biDiyin God bibiʼoh adidilyéehii diyingo naalʼaʼí beʼelyaago chérab wolyéii yikʼigi hólǫ́ǫ́ nítʼéeʼii dah hodiileʼgo kin biiʼ sohodizin bichʼéʼétiinígíí bideígi nihoníleʼ. Áko diné éí áłtsʼóózígo yisdizígíí bee naʼatʼą́hí łigaii ditsʼidgo ályaii yee hadítʼéego tó bee akʼeʼelchíhí bee naajaahii booshkʼiizhjí béstłʼóonii yichʼįʼ ádííniid,
4 Bóhólníihii áháłní, Nílááh, Jerúsalem kin haalʼáhígíí bitah hadiináahgo kin haalʼáagi doo haldinígi átʼéégóó baa ooldahii yikʼee diné daachaii áádóó yikʼee ádił hadahadzoołii dabítáaʼgi daʼiizoh.
5 Áádóó yáłtiʼii tʼah diistsʼaʼgo diné hastą́ltʼéhígíí áyidííniid, Nílááh, kin haalʼáá góneʼ bikééʼ oohkáahgo ákwii kéédahatʼíinii tʼáadoo bikʼédí danohłı̨́įgo bikʼi dahohxaałí índa doo łaʼ áádoosįįł da; bił nidadziyołhaał;
6 hastóí danilíinii, tsíłkéí danilíinii, chʼikéida, áłchínída índa sáaniida ałtso nidaałtseed, nidi bítáaʼgi daʼasdzohii bitʼáahjįʼ dadohkááh yíilaʼ. Shikin biiʼ sohodizindóó hahodoolzhish. Áko Bóhólníihii bikin biiʼ sohodizin siʼánígi hastóí danilíinii nidadziłtseedgo baa nízhdiikai.
7 Áádóó áhodííniid, Nihílááh, kin biiʼ sohodizin siʼánígíí daołchxǫǫhgo binaagóó hazʼáanii biiʼ diné nidaaztseedii hadadołbin. Áko dashdiikaigo kin haalʼáagi diné nidadzistseed.
8 Áádóó shitsʼą́ą́ʼ dah adiildeeʼígíí níláahdi daʼíłtséedgo shí éí tʼáá sáhí sélı̨́įʼgo tséʼyaa níshjool áádóó náʼooshkąąhgo ádííniid, Bóhólníihii Diyin God nílíinii! Jerúsalemgi Ízrel dineʼé daadziihgo kééhatʼínígíísh tʼáá ałtso tʼóó báhádzidgo atíʼéłʼínígíí bee ádííłdįįł?
9 Áádóó áshidííniid, Ízrel dineʼé índa Júdah dineʼé doo ákwii ádáátʼįįdígíí tsʼídá tʼáá íiyisí ayóó ánéelą́ą́ʼ áádóó kéyah bikááʼgóó tʼáá átʼé diné nidabiʼdiztseedígíí dabidił dadeeznaʼ índa kin haalʼáagi bindaʼadloʼgo naaki nidahwiiláii hadeezbin; éí ádaaní, Bóhólníihii kéyah yóóʼiidííʼą́, Bóhólníihii doo ajooʼı̨́į da.
10 Áádóó shí ałdóʼ doo hatsʼą́ąjįʼ adeeshxał da, doo nidi hakʼédí deeshłeeł da, nidi ádajíítʼįįdii hatsiitsʼiin nídazhdííłhaal nahalingo hakʼéédeidootʼih.
11 Nítʼééʼ shoo, diné éí áłtsʼóózígo yisdizígíí bee naʼatʼą́hí łigaii ditsʼidgo ályaii yee hadítʼéego tó bee akʼeʼelchíhí bee naajaahii booshkʼiizhjí béstłʼóonii, Kódíínííł, diníigo bee háínídzíiʼii biʼiishłaa, kóníigo Bóhólníihii yił hoolneʼ.
