Ezra 1:1-11
1 Pérzha dineʼé aláahgo binanitʼaʼí Sáíras nantʼáago tʼááłáʼí náhááh góneʼ Jeremáíyah éí Bóhólníihii bizaad yee haadzíiʼii bohodoolnííł biniyé Bóhólníihii éí Pérzha dineʼé aláahgo binanitʼaʼí Sáíras biníłchʼi yidiisnááʼ, áko aláahgo naatʼáanii bee bóhólníihgo bił hazʼáanii tʼáá nidahoneesʼą́ą́góó baa nahodoonihgo áyiilaa índa bee akʼeʼashchı̨́įgo ałdóʼ áyiilaago ání,
2 Pérzha dineʼé aláahgo binanitʼaʼí Sáíras kóní, Yáʼąąshdę́ę́ʼ Bóhólníihii Diyin God nilíinii éí nahasdzáán bikááʼgóó tsʼídá aláahgo bee óhólníihgo bił nahazʼáanii tʼáá átʼé sheidiníʼą́, áádóó Júdah kéyahgi Jerúsalem kin haalʼáadi kin bá áńdeeshdlíiłgo yee shíhoosʼnííʼ.
3 Bidineʼé nohłíinii tʼáá ánółtso nihitahdóó tʼáá háiida ádeinízinígíí biDiyin God bił hólǫ́ǫ leʼ. Áádóó hániʼdii Júdah kéyahgi Jerúsalem góde nídookah índa Ízrel dineʼé biBóhólníihii Diyin God bikin áńdeidoodlííł; bí tʼéí Diyin God nilı̨́įgo Jerúsalemdi bichʼįʼ nahadlá.
4 Áko tʼáá háiida tʼáá haaída tʼóó átsééd kéédahatʼı̨́įgo tʼáá ákwii hanaagóó dabighanígíí bíniʼ béésh łigaii áádóó óola áádóó naalyeʼé índa naaldlooshii yee háká adoojah, Jerúsalemgi Diyin God bikin bá tʼáá bí ádeinízingo adayiiníłígíí náádeidiyoołnihii nidayiijáah doo.
Yisnááh éí Jerúsalem kin haalʼáajįʼ nináhaaskai
5 Júdah dineʼé áádóó Bénjamin dineʼé dabizhéʼé yę́ę baʼáłchíní yá aląąjįʼ naazíinii áádóó náádaʼiiłniihii índa Líívai dineʼé danilíinii éí Diyin God haníłchʼi dayidiisʼnáaʼii tʼáá ałtso bił Jerúsalemgi Bóhólníihii bikin ádoolnííł biniyé dashdidookahgo hashtʼeʼádazhdiilyaa.
6 Áádóó hanaagóó kéédahatʼíinii bee dahólóonii éí béésh łigaii beedí bee ádaalyaii, óola, naalyeʼé, naaldlooshiida áádóó yódí daʼílíinii bitsxeʼgo yee háká ííjééʼ índa tʼáá bí ádeinízingo yee adahaazhjéʼígíí tʼáá ałtso nidayiizhjaaʼ.
7 Nébukadnézzar éí Jerúsalemgi Bóhólníihii bikinídóó beedí chʼíiníjaaʼgo tʼáá bí bidiyin dabidiʼníinii bikin góneʼ yah ayííjaaʼígíí éí aláahgo naatʼáanii Sáíras chʼééyiizhjaaʼ.
8 Éí yódí yaa áhályáanii Míthriidath wolyéii Pérzha dineʼé aláahgo binanitʼaʼí Sáíras yá yiníjaaʼgo Júdah dineʼé binaatʼáanii nilíinii Sheshbéízer bichʼįʼ yééltaʼ.
9 Áko díí yééltaʼgo kódanéelą́ą́ʼ lá: łeetsʼaaʼ nímazí óola bee ádaalyaii tádiin, łeetsʼaaʼ nímazí béésh łigaii bee ádaalyaii tʼááłáhídi mííl, béésh bee naʼalgizhí éí naadiin náhástʼéí,
10 biiʼ táʼádígisí óola bee ádaalyaii tádiin, biiʼ táʼádígisí náánáłaʼ béésh łigaii bee ádaalyaii ałdóʼ dı̨́įdi neeznádiindóó baʼaan neeznáá áádóó łeetsʼaaʼ náádaałaʼ éí daamiilgo ádanéelą́ą́ʼ.
11 Óola łeetsʼaaʼ áádóó béésh łigaii łeetsʼaaʼ tʼáá átʼégo éí ashdladi mííldóó baʼaan dı̨́įdi neeznádiin lá. Éí tʼáá átʼé Sheshbéízer áádóó yóóʼadabidiʼniiskaad yę́ę bił Bábilan kin haalʼáádóó Jerúsalemgóó nídajizhjaaʼ.
