Ezra 3:1-13
3 Tsostsʼid nídeezidgo áádóó Ízrel dineʼé kin hadaasʼáágóó kéédahatʼı̨́ hazlı̨́įʼgo diné łáʼí nilínígi átʼéego Jerúsalem kin haalʼáagi nidahaaskaigo áłah daazlı̨́ı̨́ʼ.
2 Ákohgo Jázadak biyeʼ Jéshuwa yiizįʼ áádóó bikʼisóó náádaʼiiłniihii áádóó Zerábabel éí Shiyáltiyel biyeʼ jílı̨́įgo hakʼisóó bił jíkaigo Diyin God yá naalʼaʼí Mózes bibee hazʼáanii tʼáá yee akʼeʼashchínígi átʼéego Ízrel dineʼé biDiyin God bibikááʼ nááʼiiniihí bikáaʼgi didlidgo náádahaniihii náádahidoonih biniyé ádajiilaa.
3 Bikááʼ nááʼiiniihí bá hazʼą́ągi nideizʼą́; ákwii kéyahgi kéédahatʼínígíí yéédaaldzidgo biniinaa abínígo áádóó eʼeʼáahgo didlidgo náádahaniihii Bóhólníihii yichʼįʼ náádayiiłniih nítʼééʼ.
4 Áádóó tʼáá bee akʼeʼashchínígi átʼéego chadahaʼohgi hodílzingo áłah daazlı̨́įʼgo tʼáá ákwíí jı̨́ bee hazʼánígi átʼéego biʼéʼélʼįʼ bikʼehgo tʼáá ákwíí jı̨́ didlidgo náádahaniihii náádayiisniiʼ.
5 Áádóó bikʼijįʼ tʼáá ákwíí jı̨́ didlidgo náádahaniihii áádóó dah néitı̨́įhgo áádóó hodílzingo áłah nídaʼadleehii tʼáá ałtso éí Bóhólníihii bá dílzingo nidahideestʼáanii náádahaniihii índa tʼááłáʼí jinítínígo náádahizhdoołnihii Bóhólníihii bichʼįʼ tʼáá hó ádeiznízingo náádajiiłniihii náádayiisniiʼ.
6 Tsostsʼid nídízííd binih łaʼa jı̨́ı̨́ góneʼ Bóhólníihii bichʼįʼ didlidgo nááhániihii náádayiiłniihgo yaa nídiikai. Nidi Bóhólníihii bikin biiʼ sohodizin bitłʼááh nástłʼinii tʼah doo álnéeh da.
7 Ákohgo daʼatłʼinii áádóó kin ádeiłʼíní béeso yaa deiznil; chʼiyáán áádóó doodlı̨́įłii índa akʼah bidookįįłii éí Sáídan dineʼé índa Táir dineʼé yaa dayiiznil, áko Lébanan kéyahdę́ę́ʼ gadtsoh tónteel bibąąhgóó Jápa kin haalʼáajįʼ adayiizyı̨́; Pérzha dineʼé aláahgo binanitʼaʼí Sáíras tʼáá yee nihoníʼáanii bikʼehgo ádáátʼįįd.
Diyin God bikin biiʼ sohodizin ánálnééh
8 Jerúsalem kin haalʼáagi Diyin God bikin ánálnéhíjįʼ nináhaaskaigo naaki béédaahááh góneʼ naaki nídízííd binih, Shiyáltiyel biyeʼ Zerábabel áádóó Jázadak biyeʼ Jéshuwa áádóó dabikʼisóó nidahaasdzíʼígíí éí náádaʼiiłniihii áádóó Líívai dineʼé danilíinii índa yisnááh danilı̨́ı̨́ nítʼééʼ yę́ę éí Jerúsalemjįʼ nidahaaskaígíí tʼáá ałtso bił. Diyin God bikin bidazhdeeshnish, áádóó yikʼi dadéezʼı̨́įʼ dooleeł biniyé Líívai dineʼé naadiindóó yówehgo béédááhaígíí nídeidiinil.
9 Jéshuwa áádóó biyeʼké áádóó bikʼisóó danilíinii áádóó Hodaváíyah baʼáłchíní náás ahoolchíiłii łaʼ Kádmiyel baʼáłchíní náás ahoolchíiłii índa Hénadad biyeʼkéhígíí dabiyeʼké áádóó dabikʼisóó éí Líívai dineʼé danilíiniida yił deizįʼgo Diyin God bikin ałtso biniʼdoonishígíí díí diné nidaalnishii bił nidajishnish.
10 Áádóó dahałbįʼii Bóhólníihii bikin biiʼ sohodizin bitłʼááh nástłʼinii ałtso ádayiilaago Ízrel dineʼé aláahgo binanitʼaʼí David yę́ę bibikʼeh hoogáałii bikʼehgo náádaʼiiłniihii biʼééʼ ayóó ádanóolninii yiih dahaaskaigo béésh dilní bee íʼdílzoołí deíjáahgo áádóó Líívai dineʼé Éísaf biyeʼké béésh ahídíʼniłgo diitsʼaʼii yee hahodííłdláadgo Bóhólníihii yaa dahaniih.
11 Áko tʼáá łaʼ bizhiʼee dahataałgo Bóhólníihii yaa dahaniih áádóó yichʼįʼ ahééh danízingo ádaaní, Tʼáá bí tʼéí yáʼátʼéehii nilı̨́; jó, Ízrel dineʼé yaa aʼááh nízingo ahóyéelʼá. Áádóó diné tʼáá ałtso hahodííłdláadgo ayóó átʼéego hahóółʼáago Bóhólníihii yaa dahaniih, háálá Bóhólníihii bikin biiʼ sohodizin bitłʼááh nástłʼinii tʼáá átʼé ałtso ályaa.
12 Nidi náádaʼiiłniihii tʼóó ahayóí áádóó Líívai dineʼé índa azhéʼé danilíinii bindanitʼaʼí tʼáá éí bizhéʼé yę́ę danilíinii éí áłtséedi kin yę́ę yéédaalniihgo díí atłʼááh nástłʼinii ałtso ályaago dayiiłtsą́ągo ayóó íitsʼaʼgo dadilwoshgo daachxa, nidi tʼóó ahayóí éí bił dahózhǫ́ǫgo ayóó íitsʼaʼgo dadilwosh.
13 Ákohgo diné danilíinii éí biniinaa ił hózhǫ́ǫgo hahóóʼáhígíí daachxago hahóóʼáhígíí tʼáadoo yéédaʼdeeztą́ą da, háálá ayóó íitsʼaʼgo diné hahodííłdláadgo ayóó átʼéego hahóóʼá; doo deeghánígóó nidi ayóó íitsʼaʼ.
