Ezra 4:1-24
4 Kʼad Júdah dineʼé áádóó Bénjamin dineʼé biʼanaʼí danilíinii éí yisnááh danilı̨́ı̨́ nítʼéeʼii Ízrel dineʼé biDiyin God Bóhólníihii yá kin biiʼ sohodizin ádeiléehgo yaa dahodiiztsʼą́ą́ʼ.
2 Ákohgo Zerábabel áádóó azhéʼé danilíinii bindanitʼaʼí yaa heeskaigo ádeidííniid, Haaʼíshąʼ nihił kin ádadiilnííł, háálá Diyin God hádaahtʼínígi átʼéego nihí ałdóʼ aají nihiDiyin nilínígíí hádeiitʼı̨́ áádóó Asíriya dineʼé aláahgo binanitʼaʼí Íísar-hádan kojįʼ anihííʼeezh yę́ędóó nihí ałdóʼ bichʼįʼ náádaʼayiilniih.
3 Nidi Zerábabel áádóó Jéshuwa índa Ízrel dineʼé dabizhéʼé yindanitʼaʼí ádahodííniid, Tʼáadoo biniyéhígóó nihiDiyin God bichʼįʼ nihił kin ádadoohłííł, nidi Pérzha dineʼé aláahgo binanitʼaʼí Sáíras aláahgo naatʼáanii nilíinii tʼáá yee nihichʼįʼ haadzíʼígi átʼéego tʼáá nihí tʼéiyá Ízrel dineʼé biDiyin God, Bóhólníihii nilíinii, bichʼįʼ kin ádadiilnííł.
4 Ákohgo kéyahdóó dineʼé éí Júdah dineʼé yąąh nidahwiiskaadgo kin ádeiléehii yitsʼą́ą́ʼ deineestłʼa.
5 Áko kótʼé daaníinii yichʼįʼ nidaʼiiléego hakʼijįʼ danilı̨́įgo biniyé ádajitʼíinii deineestłʼago Pérzha dineʼé aláahgo binanitʼaʼí Sáíras bíiníłką́, áádóó Pérzha dineʼé aláahgo binanitʼaʼí Daráíyas nídíníitʼą́ąjįʼ dahoníłtłʼa nítʼééʼ.
6 Áádóó Ahazawííras nantʼáago hahoolzhiizh yę́ędą́ą́ʼ Júdah kéyahgi áádóó Jerúsalem kin haalʼáagi kéédahatʼíinii yikʼi dahodiiʼaahgo akʼedaʼashchı̨́.
7 Áádóó Artazérksiiz bíyoołkááłdą́ą́ʼ Bíshlam áádóó Míthriidath áádóó Téíbiyel daolyéii índa yił ałchʼodaoʼníinii éí Pérzha dineʼé aláahgo binanitʼaʼí Artazérksiiz yichʼįʼ akʼedaʼashchı̨́; naaltsoos bikááʼ yee akʼedaʼashchínígíí éí tʼáá Síriya dineʼé bizaad yee akʼedaʼashchı̨́ áádóó tʼáá Síriya dineʼé bizaad kʼehjí bee ataʼ hóóneʼ.
8 Rííham haashkééjí naatʼááh nilíinii áádóó Shímshai naaltsoos ííłʼíní nilíinii Jerúsalemdóó dineʼé yikʼijįʼ nilı̨́įgo aláahgo naatʼáanii Artazérksiiz kótʼéego yichʼįʼ akʼeʼashchı̨́.
9 Hashkééjí naatʼááh Rííham áádóó naaltsoos ííłʼíní nilíinii Shímshai índa yił ałchʼodaoʼníinii, Dáína dineʼé, Áfarsath dineʼé, Tárpel dineʼé, Afársa dineʼé, Árkiiva dineʼé, Bábilandóó dineʼé, Súsadóó dineʼé, Diihéívadóó dineʼé índa Íílam dineʼé,
10 áádóó ałʼąą dineʼé éí ayóó átʼé ił nilíinii Asnápper wolyéii Samériya kin hadaasʼáajįʼ niyiizhʼeezhígíí áádóó náádaałaʼ éí tooh nílíní eʼeʼaahjí kéédahatʼínígíí índa náádaałaʼ
11 kótʼéego yee akʼedaʼashchı̨́įgo aláahgo naatʼáanii Artazérksiiz yichʼįʼ ádayiilaa, Diné ná nidaalʼaʼí tooh nílínígíí eʼeʼaahjígo níínínilígíí, éí yáʼátʼééh daniłní.
12 Áko kʼad nitsʼą́ą́dę́ę́ʼ Jew dineʼé kodi nihaa heeskaígíí éí Jerúsalem kin haalʼáajįʼ neheeskaigo aláahgo naatʼáanii bił béédahoniilzin dooleeł. Éí nidaalteehgo áádóó kin haalʼá doo yáʼáhooshxóonii ádeilééh; kin haalʼá binaa ahéédaʼastłʼinii kʼadę́ę ałtso ádeiléehgo kin bitłʼááh nástłʼinii áńdeidlééh.
13 Kʼad éí aláahgo naatʼáanii bił béédahodiilzįįłígíí éí díí kin haalʼá ałtso áńdayiidlaago áádóó binaa ahéédaʼastłʼingo, áko daʼnítiin bikʼé siláhígíí áádóó ínáoltąʼí índa nahalyéii doo nidayiilée da doo, áádóó aláahgo naatʼáanii nídaadleełii bibéeso biʼoh dooleeł.
14 Áko kʼad aláahgo naatʼáanii bighan bił hazʼą́ą́dóó halniihgo daʼiidánígíí áádóó aláahgo naatʼáanii doo bił danilı̨́ı̨́góó deidiiltséłígíí biniinaa doo nihił bidaałtʼée da; éí bąągo aláahgo naatʼáanii bichʼįʼ ídaʼiilnééh áádóó hazhóʼó bił chʼídahodiitʼááł daniidzin.
15 Danizhéʼé yę́ę ádáátʼįįdii naaltsoos biyiʼ hazhóʼó ninádoolkah. Naaltsoos biyiʼ bikʼídíníítááł áádóó díí kin haalʼáagi kéédahatʼínígíí náádadiiltehgo nił bééhodoozįįł, áádóó aláahgo naatʼáanii nídaadleełii índa bił nidahósʼaʼgóó bee bide áhólzinii átʼé. Tʼáá shiidą́ąʼdii yide ádeinízingo hoolzhiizh; éí biniinaa kin haalʼáii éí łah ałtso atílyaa nítʼééʼ.
16 Díí kin haalʼáago ánályaago áádóó nidaʼaztłʼinígíí ałtso hadiidzaago, díí aláahgo naatʼáanii bił bééhózingo ádeiilnééh: éí díí tooh nílíní eʼeʼaahjígo doo bee nóhólníih da dooleełgo átʼé.
17 Ákohgo aláahgo naatʼáanii haneʼ ánáyiidlaago hashkééjí naatʼááh Rííham áádóó naaltsoos ííłʼíní nilíinii Shímshai áádóó yił ałchʼodaoʼníinii Samériyagi kéédahatʼínígíí índa tooh nílínígíí eʼeʼaahjigo nidaakaígíí áyidííniid, Kótʼéego danihichʼįʼ hózhǫ́ǫgo hoolzhish leʼ índa náádaałaʼ ałdóʼ.
18 Naaltsoos nihichʼįʼ ádaahłaaígíí shinááł hazhóʼó shichʼįʼ yééltaʼ.
19 Áko bee nihodiníʼą́ągo áádóó naaskááʼ, áko díí nihił béédahoozin: tʼáá shiidą́ąʼdii díí kin haalʼáagi kéédahatʼı̨́ı̨́ nítʼééʼ yę́ę éí aláahgo naatʼáanii danilı̨́ı̨́ nítʼééʼ yę́ę bikʼijįʼ naʼadzil nítʼéeʼgo áádóó naʼalteeh índa bidahodeestʼą́ągo ákwii baa naʼasdeeʼ lá.
20 Áádóó aláahgo naatʼáanii ayóó ádabóodziilii Jerúsalem kin haalʼá bikʼé siláhígíí yindantʼáago tooh nílínígíí eʼeʼaahjigo kéyah tʼáá átʼé yindantʼáá nítʼééʼ lá; daʼnítiin bikʼé siláhígíí áádóó ínáoltąʼí índa nahalyéii bichʼįʼ nidahalyéé nítʼééʼ lá.
21 Éí bąągo díí diné tʼáadoo nidaałnishí dabidohní áádóó díí kin doo haalʼáago áńdeidoodlíił da, tʼáá hazhóʼó bee hazʼáanii łaʼ nihá hanáádiishdlaago índa.
22 Kʼad díí baa nidaʼáhodołtʼı̨́įʼgo tʼáadoo chʼééh ádaahtʼíní, Haʼátʼíísh biniyé aláahgo naatʼáanii nídaadleełii bibéeso biʼoh ádaalnéeh doo?
23 Kʼad Rííham áádóó naaltsoos ííłʼíní nilíinii Shímshai índa yił ałchʼodaoʼníinii dabinááł aláahgo naatʼáanii Artazérksiiz binaaltsoos yééltaʼgo, tsı̨́įłgo Jerúsalemgóó Jew dineʼé yichʼįʼ adahaaskaigo tʼáá bizááká áádóó bee adziilii bee naanish yitsʼádeineeskaad.
24 Ákohgo Jerúsalemgi Diyin God bikin binaʼanishígíí tʼóó ánászįįd, áko Pérzha dineʼé aláahgo binanitʼaʼí Daráíyas nantʼáago naaki náhááh góneʼ áádahoostʼįįd.