Ezra 5:1-17
5 Ákohgo Hágeiyai áádóó Ído biyeʼ Zekaráíyah Diyin God yá halneʼii jílíinii Júdah kéyahgi áádóó Jerúsalem kin haalʼáagi Jew dineʼé kéédahatʼíinii Ízrel dineʼé biDiyin God ánínígíí bízhiʼ bee bił nidahodzisneʼ.
2 Ákohgo Shiyáltiyel biyeʼ Zerábabel áádóó Jázadak biyeʼ Jéshuwa dashdiiʼáazhgo Jerúsalemgi Diyin God bikin áńjídléehgo baa nízhdiitʼáázh. Índa Diyin God yá halneʼii háká anáʼahinilchééh nítʼééʼ.
3 Íídą́ą́ʼ tooh nílíní eʼeʼaahjígo naatʼáanii Tátnai wolyéii áádóó Shííthar-báznai wolyéii índa yił ałchʼodaoʼníinii haa yíkaigo ádahodííniid, Háishąʼ díí kin ádadoohłíiłgo yee nihichʼįʼ haadzíiʼgo ahéédaʼohtłʼingo baa naahkai?
4 Áádóó ałdóʼ ádahodííniid, Diné díí kin ádeiléhígíishąʼ haa daolyé?
5 Nidi biDiyin God éí Jew dineʼé yá aląąjįʼ naazíinii yikʼi déezʼı̨́įʼgo binaanish danilíinii doo bitsʼą́ą́ʼ dazhnoołtłʼááh átʼée da, aláahgo naatʼáanii Daráíyas yichʼįʼ naaltsoos ádayiilaago índa, áko áádę́ę́ʼ díí bídéétʼiʼgo naaltsoos ánáyiidlaa.
6 Naaltsoos ályaaígíí éí tooh nílíní eʼeʼaahjí naatʼáanii Tátnai wolyéii áádóó Shííthar-báznai índa yił ałchʼodaoʼníinii, éí Áfarsath dineʼé tooh nílíní eʼeʼaahjí nibideeʼnilii, aláahgo naatʼáanii Daráíyas yichʼįʼ ádayiilaii átʼé.
7 Hachʼįʼ naaltsoos ályaaígíí kótʼéego bee akʼeʼashchı̨́, Aláahgo naatʼáanii Daráíyas bichʼįʼ hózhǫ́ǫ leʼ.
8 Aláahgo naatʼáanii díí bił bééhózin leʼ: Judíyah kéyah biyiʼ Diyin God ayóó átʼéii bikin álnéhígíí daníilʼı̨́įʼgo tsé ayóó ádaníłtso bee kin ályaa lá, áádóó ahééʼítłʼinígíí tsin bá nidaazʼáago ályaa lá; tsʼídá tʼáá íiyisí haleebee bigaan yee nidaalnishgo bichʼįʼ hooldohgo deílníísh.
9 Áko aląąjįʼ naazíinii kótʼéego bíndabídéelkidgo ádabidiiʼniid, Háishąʼ díí kin ádadoohłíiłgo áádóó bá ahéédaʼdoohtłʼı̨́įłgo yee nihichʼįʼ haadzííʼ?
10 Bee nił nídahodiilnih biniyé dabízhiʼ bíndaʼídéelkid; éí diné bindanitʼaʼí dabízhiʼ naaltsoos bikááʼ ádadiilnííł biniyé nidaʼídéelkid.
11 Ákohgo áńdanihidooʼniidgo ádaaní, Diyin God éí yáʼąąsh áádóó nahasdzáán bee Bóhólníihii binaalʼaʼí daniidlı̨́, áádóó tʼóó ahayóí nááhaídą́ą́ʼ kin ályaii, tʼáá éí Ízrel dineʼé aláahgo binanitʼaʼí ayóó átʼéii kin áyiilaago niiníʼą́ą́ nítʼééʼ yę́ę éí áńdeiilnééh.
12 Bikʼijįʼ Diyin God yáʼąąshdi hólóonii yá dahóółchįįdgo tʼóó báhádzidgo báhóóchįįdgo Bábilan kin haalʼáádóó Kaldíya dineʼé nilíinii Nébukadnézzar éí aláahgo naatʼáanii nilı̨́įgo yílákʼe hodííʼą́; éí kin kweʼé siʼą́ą́ nítʼéʼígíí yiyííłchǫʼ, áádóó ákwii kéédahatʼíinii Bábilangóó adabidiʼniiskaad.
13 Bábilan kéyahgi Sáíras aláahgo naatʼáanii nilı̨́įgo átsé náhááh góneʼ, tʼáá éí aláahgo naatʼáanii Sáíras éí díí Diyin God bikin áńdoolníiłgo yee nihoníʼą́ągo yee akʼeʼashchı̨́.
14 Áádóó Diyin God bikin biiʼ sohodizin biyiʼ óola áádóó béésh łigaii beedí chodaoʼíinii éí Jerúsalem kin haalʼáagi kin biiʼ sohodizin biiʼdóó Nébukadnézzar chʼíiníjaaʼgo Bábilan kin haalʼáagi kin biiʼ sohodizin yiih yiyííjaaʼígíí áádę́ę́ʼ aláahgo naatʼáanii Sáíras chʼínéiníjaaʼgo Sheshbéízer yeidiníʼą́; tʼáá éí ałdóʼ naatʼáanii nilı̨́įgo áyiilaa.
15 Áko áyidííniid, Díí beedí éí Jerúsalemgi kin biiʼ sohodizin biih nídííʼnił biniyé ákǫ́ǫ́ nídííjih, áádóó hániʼ Diyin God bikin tʼáá siʼą́ yę́ęgi áńdoolnííł.
16 Ákohgo díí Sheshbéízer wolyéii níyáago Jerúsalemdi Diyin God bikin bitłʼááh nástłʼinii áyiilaa; éí áádóó wóshdę́ę́ʼ kin biʼadeezhnishgo kʼad díí jı̨́ biʼoonish, nidi tʼah doo ałtso álnéeh da.
17 Éí bąągo kʼad, aláahgo naatʼáanii bił yáʼátʼééh ládą́ą́ʼ, haaʼíshąʼ Bábilan kin haalʼáagi aláahgo naatʼáanii biyódí bá hooghangi naaltsoos bee naaznilígíí hazhóʼó ninádoolkah, áko aláahgo naatʼáanii nilíinii Sáíras díí Jerúsalemgi Diyin God bikin ninádootʼáałgo yee nihoníʼą́ągo bee akʼeʼashchíinii daatsʼí hólǫ́, áádóó hániʼdii aláahgo naatʼáanii yaa bił hózhǫ́ǫgo díí átʼée dooleełgi yee nihééʼdoołnih.