Ezra 6:1-22
6 Ákohgo aláahgo naatʼáanii Daráíyas yee nihoníʼą́ągo naaltsoos ałchʼįʼ yisdisii bá hooghan góneʼ hádeidééʼı̨́ı̨́ʼ; tʼáá ákweʼé Bábilangi yódí niiʼnilígíí sinil.
2 Áádóó Míídiya dineʼé bił nahósʼaʼ biyiʼ Ákmiitha kin haalʼáagi kin náhálgai góneʼ naaltsoos ałchʼįʼ yisdisii éí biiʼ kótʼéego bee akʼeʼashchı̨́įgo nídiitʼą́.
3 Sáíras aláahgo naatʼáanii nilı̨́įgo tʼááłáʼí náhááh góneʼ, tʼáá éí aláahgo naatʼáanii Sáíras yee nihoníʼáanii éí Jerúsalemgi Diyin God bikin áńdoolníiłgo yeinítʼı̨́įgo bee akʼeʼashchı̨́, Bíniʼ kin áńdoolnííł; náádahidoonihii náádayiiłniih nítʼééʼ yę́ęgi ákwii kin ninádootʼááł; bíniʼ bitłʼááh nástłʼinii bidziilgo nídootłʼı̨́ı̨́ł; éí dego náhástʼédiin ké silá ánízah índa naaniigo náhástʼédiin ké silá áníłtéel doo.
4 Tsé ayóó ádaníłtsooígíí tááʼ ałkʼi ahénátłʼin doo áádóó bikááʼ tsin ahéédaazʼáa doo índa aláahgo naatʼáanii biyódí bighandóó bee bikʼé azláa doo.
5 Áádóó hániʼ óola áádóó béésh łigaii bee beedí ádaalyaii Diyin God bikin biyiʼ chodaoʼíinii Jerúsalemgi kin biiʼ sohodizin biiʼdę́ę́ʼ Nébukadnézzar chʼíiníjaaʼgo Bábilangóó yiiníjaaʼígíí, éí Jerúsalemgi kin biiʼ sohodizin biih nídadoohjih; éí beedí tʼááłáʼí níʼánígo tʼáá naaznil yę́ęgóó Diyin God bikin biiʼ ninádahizhdooʼnił.
6 Éí bąągo kʼad, Tátnai, tooh nílíní eʼeʼaahjígo bił nahósʼaʼgi naatʼáanii nílíinii áádóó Shííthar-báznai índa nił ałchʼodaoʼníinii Áfarsath dineʼé nilíinii tooh nílíní biláahdi kéédahohtʼíinii tʼáá aa nízaadi nidaahkai.
7 Díí Diyin God bikin biʼoonishígíí tʼáadoo baa nídaohtʼíní áádóó hániʼ Jew dineʼé binaatʼáanii nilíinii áádóó Jew dineʼé yá aląąjįʼ naazíinii díí Diyin God bikin tʼáá siʼą́ nítʼééʼ yę́ęgi ninádeíʼaah.
8 Nááʼáłdóʼ díí bee nihonishʼaahígíí éí Jew dineʼé yá aląąjįʼ naazíinii díí Diyin God bikin áńdeidléhígíí bá kódaahtʼı̨́į dooleeł: éí aláahgo naatʼáanii binaalyeʼé bee tʼáá tooh nílínígíí eʼeʼaahdę́ęʼgo nidi bíká anídaahjah; daʼílíinii díí diné tsı̨́įłgo baa dahidoohnił, áko doo dabidíʼnóoltłʼah da.
9 Yídin danilínígíí éí dóola yázhí áádóó deenástsʼaaʼ áádóó dibé yázhí éí yáʼąąshdę́ę́ʼ Diyin God nilíinii bichʼįʼ didlidgo náádayiiłniih; tłʼoh naadą́ą́ʼ, áshįįh, wáin áádóó akʼah éí Jerúsalemgi náádaʼiiłniihii niiʼnilígíí bikʼehgo hániʼ tʼáadoo bínéélʼáʼí tʼáá bí tʼéí tʼáá ákwíí jı̨́ baa dahaʼníił doo.
10 Áko yáʼąąshdę́ę́ʼ Diyin God nilíinii bichʼįʼ łikání halchinii náádayiiłniih dooleeł áádóó aláahgo naatʼáanii índa biyeʼké bidaʼiinaʼ yá sodadilzin doo.
11 Áádóó ałdóʼ bee nihoníʼáanii łaʼda łahgo ájiilaago hakin bá naníʼáii nahjįʼ hahidoolghą́ąłgo áádóó haghá dootsihgo, éí dah hóʼoołtsihgo hoł ííʼáago ádoolnííł índa hakinígi tsʼiilzéítah ádahodoolííł.
12 Áádóó Diyin God tʼáá bí bízhiʼ ákwii bee hójíigo áyiilaii éí aláahgo naatʼáanii danilíinii, doodaiiʼ diné danilíinii Jerúsalemgi díí Diyin God bikin jidoołchxǫǫł biniyé díí bee nihoníʼánígíí łahgo átʼéego ádabizhniilaii tʼáá ałtso éí áhodiʼdooldįįłí. Shí Daráíyas díí bee hazʼáanii áshłaaígíí haneetehee biʼoolníił dooleeł.
13 Ákohgo aláahgo naatʼáanii Daráíyas éí tooh nílíní eʼeʼaahjígo naatʼáanii Tátnai wolyéii áádóó Shííthar-báznai índa yił ałchʼodaoʼníinii yichʼįʼ haneʼ áyiilaii haneetehee yikʼeh dahóółʼįįd.
14 Áádóó náásgóó áhodooníiłii yaa halneʼii Hágeiyai índa Ído biyeʼ Zekaráíyah éí Diyin God bizaad yaa halneʼgo Jew dineʼé bá aląąjįʼ naazíinii kin ádeiléehgo náás deeskai. Ízrel dineʼé biDiyin God yee haadzíiʼii bikʼehgo áádóó Pérzha dineʼé aláahgo binanitʼaʼí danilíinii Sáíras áádóó Daráíyas índa Artazérksiiz yee nahasʼáanii bikʼehgo kin ádayiilaago ałtso hadidzaa.
15 Áko aláahgo naatʼáanii Daráíyas nantʼáago hastą́ą́h náhááh góneʼ Éídar yiził binih tááʼgóó yoołkáałgo kin ałtso ályaa.
16 Áádóó Ízrel dineʼé éí náádaʼiiłniihii áádóó Líívai dineʼé índa dabidisnááh nítʼééʼ yę́ę áłah daazlı̨́įʼgo díí Diyin God bikin diyingo nideideezʼą́ągo yaa bił dahózhǫ́.
17 Áádóó díí Diyin God bikin diyingo nideideezʼą́ągo dóola tʼááłáhídi neeznádiin áádóó deenástsʼaaʼ naakidi neeznádiin índa dibé yázhí dı̨́įdi neeznádiin náádahaazʼniiʼ. Ízrel dineʼé tʼáá ałtso dadóoneʼé bikʼehgo ádił niʼiidzííh biniinaa tłʼízíchǫǫh naakitsʼáadah bá náádahaazʼniiʼ.
18 Áko Mózes binaaltsoos biyiʼ bee akʼeʼashchínígi átʼéego Jerúsalem kin haalʼáagi Diyin God bá nidajilʼaʼ biniyé náádaʼiiłniihii áádóó Líívai dineʼé chʼídahodoołáałii ałkééʼ nidadziznil.
19 Átsé nídízííd binih dı̨́ı̨́ʼtsʼáadahgóó yoołkáałgo yisnááh danilı̨́ı̨́ nítʼééʼ yę́ę atisʼadeesdzá bee bééhániihii yaa naaskai.
20 Jó, náádaʼiiłniihii áádóó Líívai dineʼé tʼáá bí naazínígi tʼáá łaʼ bizhiʼee tʼáá ałtso doo bąąh daachinígóó ídaʼdiilyaa. Yisnááh danilı̨́ı̨́ nítʼééʼ yę́ę bá atisʼadeesdzá bee bééhániihii biniyé dabikʼisóó náádaʼiiłniihii danilíinii bá áádóó tʼáá daabí ałdóʼ ádá dibé yázhí nideistseed.
21 Ízrel dineʼé yisnááhdę́ę́ʼ nákaígíí áádóó Ízrel dineʼé biBóhólníihii Diyin God hádajitʼı̨́įgo biniyé kéyahgóó ałʼąą dineʼé bitahgi badaaʼihii yitsʼá ádaʼdeesnilgo hodiikaígíí tʼáá ałtso daʼííyą́ą́ʼ.
22 Áádóó tsostsʼid yiską́ąjįʼ bił dahózhǫ́ǫgo dííkʼǫsh tʼáágééd bááh ályaii bee hodílzingo áłah náʼádleeh yaa naaskai, háálá Bóhólníihii éí hoł dahózhǫ́ǫgo áhoolaa áádóó Asíriya kéyahgi aláahgo naatʼáanii bijéí yee hachʼįʼ kʼé nídzingo áyiilaa, áko Diyin God éí Ízrel biDiyin God bikin bichʼįʼ dahadziilgo bindajilnish nítʼééʼ.*
Footnotes
^ Pérzha dineʼé aláahgo binanitʼaʼí éí Asíriya dineʼé ałdóʼ yinantʼá.
