Ezra 7:1-28
7 Kʼad díí kódahóótʼįįdóó bikʼijįʼ Pérzha dineʼé aláahgo binanitʼaʼí Artazérksiiz nantʼáago Ézra éí Siiréíyah biyeʼ jílı̨́, éí Azaráíyah yę́ę biyeʼ, éí Hilkáíyah yę́ę biyeʼ,
2 éí Shálam yę́ę biyeʼ, éí Zéídak yę́ę biyeʼ, éí Aháítab yę́ę biyeʼ,
3 éí Amaráíyah yę́ę biyeʼ, éí Azaráíyah yę́ę biyeʼ, éí Miiréíyath yę́ę biyeʼ,
4 éí Zeraháíyah yę́ę biyeʼ, éí Ázai yę́ę biyeʼ, éí Bákai yę́ę biyeʼ,
5 éí Abíshuwa yę́ę biyeʼ, éí Fíniyas yę́ę biyeʼ, éí Eliyéízar yę́ę biyeʼ, éí Éran aláahgo nááʼiiłniihii nilı̨́ı̨́ nítʼééʼ yę́ę biyeʼ jílı̨́.
6 Díí Ézra éí Bábilan kin haalʼáádóó dashdiiyá, áko Ízrel dineʼé biBóhólníihii Diyin God éí Mózes bibee hazʼáanii aidiníʼáanii jiichįįhgo bínazhʼniłtin nítʼééʼ, áádóó tʼáá jókeedígíí tʼáá ałtso éí aláahgo naatʼáanii haidiiʼaah, háálá haDiyin God Bóhólníihii hakʼi dah doolnih.
7 Aláahgo naatʼáanii Artazérksiiz nantʼáago tsostsʼid náhááh góneʼ, Ízrel dineʼé łaʼ áádóó náádaʼiiłniihii łaʼ áádóó Líívai dineʼé łaʼ áádóó dahataałígíí áádóó dáńʼdítı̨́hí yaa ádahalyáanii índa kin biiʼ sohodizin yindaalʼaʼii Néthinim wolyéii Jerúsalem kin haalʼáágóó eekai.
8 Aláahgo naatʼáanii nantʼáago tsostsʼid náhááh góneʼ, ashdlaʼ yiziłígíí binih Ézra éí Jerúsalemgi níyá.
9 Jó, tʼááłáʼí nídízííd binih łaʼa jı̨́ı̨́ góneʼ Bábilan kin haalʼáádę́ę́ʼ dashdiiyá áádóó haDiyin God ayóó ánóolningo hakʼi dah doolnihígíí bikʼehgo ashdlaʼ nídízííd binih łaʼa jı̨́ı̨́ góneʼ Jerúsalemgi jiníyá.
10 Jó, Ézra éí Bóhólníihii bibee hazʼáanii hájítʼı̨́įgo áádóó bikʼeh hojíłʼı̨́įgo áádóó bee nahazʼáanii índa bikʼeh hoogáałii Ízrel dineʼé bitahgóó bee nazhʼnitin doo biniyé hajéí bee hániʼ áhojiilaa.
11 Ézra nááʼiiłniihii índa bee hazʼáanii yínaʼniłtinii, tʼáá éí Bóhólníihii bibikʼeh óʼooʼníiłii áádóó bibee nahazʼáanii Ízrel dineʼé baa deetʼáanii yíhoołʼą́ąʼii nilı̨́įgo aláahgo naatʼáanii Artazérksiiz díí naaltsoos hainíłtsoozígíí átʼé.
12 Aláahgo naatʼáanii danilíinii aláahgo yinantʼáii Artazérksiiz wolyéii éí nááʼiiłniihii Ézra tʼáá éí yáʼąąshdę́ę́ʼ Diyin God bibee hazʼáanii yínaʼniłtinii nilíinii bichʼįʼ hadółtʼéego hózhǫ́ǫ leʼ índa náádaałaʼ ałdóʼ.
13 Díí bee nihonishʼaah: éí Ízrel dineʼé tʼáá háiida, doodaiiʼ binááʼiiłniihii áádóó Líívai dineʼé éí shóhólníihgo hazʼą́ągi kéédahatʼíinii tʼáá bí ádeinízingo Jerúsalem kin haalʼáágóó deeshááł, danízinígíí ákǫ́ǫ́ nił dookah.
14 NiDiyin God bibee hazʼáanii yínítąʼígíí bikʼehgo Júdah kéyah áádóó Jerúsalem kin haalʼáii bínaʼídídííłkił biniyé aláahgo naatʼáanii áádóó bá kótʼéego daaníinii tsostsʼidgo éí dandeesʼaʼgo
15 aláahgo naatʼáanii áádóó bá kótʼéego daaníinii éí béésh łigaii áádóó óola tʼáá bí ádeinízingo adayiiznilígíí éí Ízrel dineʼé biDiyin God, Jerúsalemdi hólóonii bichʼįʼ jideezhjaaʼ.
16 Bábilan nahósʼaʼ tʼáá átʼéé nítʼééʼ béésh łigaii áádóó óola shóoztʼeʼígíí áádóó diné índa náádaʼiiłniihii tʼáá bí ádeinízingo Jerúsalemgi biDiyin God bikin biniyé adayiiznilígíí bíidooʼniłgo ákǫ́ǫ́ dííjih biniyé dandeesʼaʼ.
17 Áko díí béesoígíí hazhóʼó chodaołʼı̨́įgo bee dóola, deenástsʼaaʼ, dibé yázhí, akʼáán náádahaniihii áádóó yanáadziʼgo náádahaniihii, tʼáá bił tsı̨́įłgo nidahidííłnihgo Jerúsalem kin haalʼáagi niDiyin God bikin siʼą́ągi bikááʼ nááʼiiniihí bikáaʼjįʼ náádahidoołnih.
18 Béésh łigaii áádóó óola chʼínííłnaʼígíí choidooʼįįłgi ni áádóó nikʼisóó bił nihił yáʼádaatʼééh góneʼ éí nihiDiyin God íinízinii bikʼehgo ádaʼdoohłííł.
19 Beedí naa deideezʼánígíí ałdóʼ niDiyin God bikingi chodaoʼı̨́į dooígíí éí Jerúsalemgi Diyin God bidáahjįʼ nidííjih.
20 Áádóó niDiyin God bikin biniyé haʼátʼíhída bídin nááhódlǫ́ǫgo éí aláahgo naatʼáanii biyódí daʼílíinii bá hooghandóó shóidííłtʼeeł.
21 Áko shí, Artazérksiiz aláahgo naatʼáanii nishłíinii, tooh nílíní eʼeʼaahjígo yódí daʼílíinii yaa ádahalyáanii tʼáá ałtso bichʼįʼ bee nihonishʼaah: éí Ézra nááʼiiłniihii nilíinii, yáʼąąshdę́ę́ʼ Diyin God bibee hazʼáanii yínaʼniłtinii, tʼáá haʼátʼíhída nihíyókeedgo hazhóʼó tʼáá ánihiłnínígi tsı̨́įłgo bá bidaʼdoohłííł.
22 Béésh łigaii neeznádiin dah hidiidloh tʼóó bíneelʼánígo áádóó tłʼoh naadą́ą́ʼ neeznádiin haaką́ bíighahgo áádóó wáin neeznádiin yikááł bíighahgo áádóó akʼah neeznádiin yikááł bíighahgo índa áshįįh tʼáá nidzinígíí bíighahgo bá bidaʼdoohłííł.
23 Tʼáá haʼátʼíhída yáʼąąshdę́ę́ʼ Diyin God nilíinii haadzíʼígíí hániʼ haleebee yáʼąąshdę́ę́ʼ Diyin God bikin bá áhodoonííł; jó, haʼátʼíísh biniyé aláahgo naatʼáanii áádóó biyeʼké danilíinii bee óhólnííh bił hazʼáanii bichʼįʼ tʼóó báhádzidgo hashké hwiindzin doo?
24 Áádóó ałdóʼ díí nihił béédahózingo ádeiilnééh: danihííníiʼnínígíí éí náádaʼiiłniihii áádóó Líívai dineʼé áádóó dahataałii áádóó dáńʼdítı̨́hí yaa ádahalyáanii índa kin biiʼ sohodizin yindaalʼaʼii Néthinim wolyéii, doodaiiʼ díí Diyin God bikingi nidaalʼaʼígíí éí daʼnítiin bikʼé siláhígíí áádóó nahalyéii índa ínáoltąʼí doo nidayiiléégóó bee bá hwiidooʼaał.
25 Áko ni Ézra yinílyéii, niDiyin God bibee hódzáanii nee hólónígíí bikʼehgo yah adaʼiiníiłii áádóó ándahwiiʼaahii nidahidííniłgo tooh nílíní eʼeʼaahjígo diné kéédahatʼínígíí tʼáá ałtso niDiyin God bibee nahazʼáanii bił béédahózinígíí yá dahwéeʼaah dooleeł, áádóó bee hazʼáanii doo bił béédahózinígíí éí bínabiníłtin doo.
26 Tʼáá háiida niDiyin God bibee hazʼáanii áádóó aláahgo naatʼáanii bibee hazʼáanii doo bikʼeh ájítʼéégóó hániʼdii tsʼídá tʼáá áhoʼdólneʼ góneʼ há nihodootʼáałgo hodiʼyoolyééł, doodaiiʼ łahgóó hoʼdoolnih, doodaiiʼ hanaalyeʼé haghadooʼnił, doodaiiʼ awáalyaa ahodiʼdooltʼeeł.
27 Danihizhéʼé yę́ę biBóhólníihii Diyin God baa haʼniih leʼ; éí Jerúsalem kin haalʼáagi Bóhólníihii bikin biiʼ sohodizin tʼáadoo bee nóoshónígóó ádoolnííł biniyé aláahgo naatʼáanii kótʼéego bijéí yee tsíideeskééz.
28 Áádóó aláahgo naatʼáanii binááł áádóó bá kótʼéego daaníinii índa aláahgo naatʼáanii bikééʼdóó bídahólníhígíí tʼáá ałtso dabinááł, ayóóʼáshóʼníigo shaa aʼáhí niizı̨́ı̨́ʼ. Áko Bóhólníihii shiDiyin God shikʼi dah doolnihgo bee shidziil sélı̨́ı̨́ʼ, índa Ízrel dineʼé bitsʼą́ą́dóó diné alááh dahideezíinii áłah íishłaago ákóde shił yikah dooleełii dah diiʼeezh.
