Ezra 8:1-36
8 Aláahgo naatʼáanii Artazérksiiz nantʼáá góneʼ Bábilan kin haalʼáádę́ę́ʼ ákóde shił yikaígíí dabizhéʼé yę́ę baʼáłchíní náás daʼahílchíihii áádóó dabizhéʼé yę́ę bitsʼą́ą́dóó danilíinii éí díí ádaatʼı̨́:
2 Fíniyas baʼáłchíní náás daʼahílchíihii łaʼ Gérsham wolyéii, Íthamar baʼáłchíní náás daʼahílchíihii łaʼ Daniel wolyéii, David baʼáłchíní náás daʼahílchíihii łaʼ Hátash wolyéii,
3 Péírash baʼáłchíní náás daʼahílchíihii łaʼ Shekanáíyah éí baʼáłchíní náás daʼahílchíihii łaʼ Zekaráíyah wolyéii bił níjíkai, áádóó diné neeznádiindóó baʼaan ashdladiin hastóí dabizhéʼé yę́ę daʼahílchíihii hoł dayééltaʼ.
4 Péíhath-móʼab baʼáłchíní náás daʼahílchíihii łaʼ Zeraháíyah biyeʼ Íílaiyowíínai éí diné naakidi neeznádiin bił níjíkai.
5 Záto baʼáłchíní náás daʼahílchíihii łaʼ Jahéíziyel biyeʼ Shekanáíyah éí diné táadi neeznádiin bił níjíkai.
6 Éíden baʼáłchíní náás daʼahílchíihii łaʼ Jánathan biyeʼ Ébed éí diné ashdladiin bił níjíkai.
7 Íílam baʼáłchíní náás daʼahílchíihii łaʼ Athaláíyah biyeʼ Jiishéíyah éí diné tsostsʼidiin bił níjíkai.
8 Shefatáíyah baʼáłchíní náás daʼahílchíihii łaʼ Máíkel biyeʼ Zebadáíyah éí diné tseebídiin bił níjíkai.
9 Jóʼab baʼáłchíní náás daʼahílchíihii łaʼ Jiiháíyel biyeʼ Obadáíyah éí diné naakidi neeznádiindóó baʼaan tseebíítsʼáadah bił níjíkai.
10 Béínai baʼáłchíní náás daʼahílchíihii łaʼ Jasifáíyah biyeʼ Shiilómith éí diné neeznádiindóó baʼaan hastą́diin bił níjíkai.
11 Bííbeiyai baʼáłchíní náás daʼahílchíihii łaʼ Bííbeiyai biyeʼ Zekaráíyah éí diné naadiin tseebíí bił níjíkai.
12 Ázgad baʼáłchíní náás daʼahílchíihii łaʼ Hákatan biyeʼ Johéínan éí diné neeznádiindóó baʼaan neeznáá bił níjíkai.
13 Adonáíkam baʼáłchíní náás daʼahílchíihii akééʼdóóígíí łaʼ Iilífalet, Jáíyel índa Shiiméíyah daolyéii éí diné hastą́diin bił níjíkai.
14 Bígveiyai baʼáłchíní náás daʼahílchíihii łaʼ Yúthai áádóó Zábad wolyéii éí diné tsostsʼidiin bił níjíkai.
15 Ahéíva tooh nílíníjįʼ áłah áhooshłaa áádóó áadi níbaal biyiʼ tágí jı̨́ı̨́ nihee idaʼazʼą́, áko diné áádóó náádaʼiiłniihii hazhóʼó bitah dééʼı̨́įʼgo Líívai baʼáłchíní náás daʼahílchíihii tʼáadoo łaʼ yiiłtsą́ą da.
16 Ákohgo Eliyíízer, Ériyel, Shiiméíyah, Elnéíthan, Jéírib, Elnéíthan, Néíthan, Zekaráíyah áádóó Miishálam diné nideiʼeeshii danilíinii áádóó Jóíyarib índa Elnéíthan ałdóʼ éí diné akʼidiʼyiitįįhii nilíinii bíká iʼííłʼaʼ.
17 Kasifáíyah hazʼánídi aląąjįʼ sizíinii Ído wolyéii bichʼįʼ adahoyéłʼaʼ áádóó Ído índa bikʼisóó kin biiʼ sohodizin yindaalʼaʼii Néthinim wolyéii ábizhdidooniiłii bee hoł hweeshneʼ; éí nihiDiyin God bikingi nidaalʼaʼ dooleełii nihaa deidooʼish.
18 NihiDiyin God ayóó ánóolningo nihikʼi dah déesʼniiʼgo diné akʼidiʼyiitįįhii nihił yaa daaskaii éí Ízrel biyeʼ Líívai bitsʼą́ą́dóó ahoolchíiłii Málai wolyéii baʼáłchíní náás daʼahílchíihii łaʼ Sheriibáíyah biyeʼké tʼáá bił índa bikʼisóó danilíinii tseebíítsʼáadah.
19 Áádóó Hashabáíyah ałdóʼ índa Miirárai baʼáłchíní náás daʼahílchíihii łaʼ Jiishéíyah bikʼisóó áádóó dabiyeʼké ałdóʼ tʼáá biłgo naadiin.
20 David áádóó naatʼáanii danilı̨́ı̨́ nítʼééʼ yę́ę éí kin biiʼ sohodizin yindaalʼaʼii Néthinim wolyéii Líívai dineʼé yíká anídaajah doo biniyé nideiznilii éí Néthinim dineʼé naakidi neeznádiindóó baʼaan naadiin ánéelą́ąʼgo éí tʼáá ałtso bízhiʼ naaltsoos dabikááʼ.
21 Áko nihiDiyin God binááł ádaa dahojiniilbáʼí ádadiʼdiilnííł biniyé Ahéíva tooh nílínígi hodílzingo doo adą́ baa nidiikah, dishníigo bee haasdzííʼ, áko nihá áádóó nihadaʼáłchíní bá índa nihinaalyeʼé tʼáá ałtso bá doo nahontłʼagóó nihá honítʼiʼ doo biniyé hádeiitʼı̨́į doo.
22 Háálá nihiʼanaʼí bitsʼąą nihaa ádahalyą́ą doo biniyé aláahgo naatʼáanii éí siláo nidaabaahii áádóó łı̨́ı̨́ʼ yee anadaʼałʼíinii bíídéeshkiłígíí baa yánísin nítʼééʼ, háálá aláahgo naatʼáanii bichʼįʼ yádeiiltiʼgo ádabidiiʼniid, NihiDiyin God éí yáʼátʼéehii biniyé há dabidéezʼı̨́įʼii tʼáá ałtso yikʼi dah doolnih, nidi yóóʼadabidiiʼaahii tʼáá ałtso yichʼįʼ bibee adziilii áádóó tʼóó báhádzidgo hashké nídzingo atíʼéłʼíinii yee yikʼijįʼ nilı̨́.
23 Ákohgo hodílzingo doo adą́ baa nisiikai áádóó díí biniyé nihiDiyin God nídeisiikango nihisodizin nihá yidiiztsʼą́ą́ʼ.
24 Ákohgo náádaʼiiłniihii aląąjįʼ naazíinii naakitsʼáadah yiltʼéego éí Sheriibáíyah wolyéii áádóó Hashabáíyah wolyéii índa bikʼisóó neeználtʼéego atsʼánínil.
25 Áádóó aláahgo naatʼáanii índa bá kótʼéego daaníinii áádóó bikéédę́ę́ʼ naatʼáanii danilíinii índa Ízrel dineʼé tʼáá ałtso ákwii nidaakaii éí béésh łigaii áádóó óola índa beedí chodaoʼíinii nihiDiyin God bikin biniyé adayiiznilii dah dahidiiloʼgo bitaa séniiʼ.
26 Dah hidiiloʼígíí béésh łigaii hastą́ądi neeznádiindóó baʼaan ashdladiin tálent wolyéii bíighahgo áádóó beedí béésh łigaii bee ályaii éí neeznádiin tálent bíighahgo índa óola éí neeznádiin tálent bíighahgo bitaa séniiʼ.
27 Óola łeetsʼaaʼ mííl bą́ą́h ílı̨́įgo áádóó łeetsʼaaʼ nizhóníii béésh łitsoii bee ályaii naakigo tʼáá óola ílínígi átʼéego ílíinii baa dasénil.
28 Áádóó ábidishní, Bóhólníihii bichʼįʼ dadinohyin; beedí ałdóʼ dadiyin áádóó béésh łigaii áádóó óola éí danizhéʼé yę́ę ádeinízingo biDiyin God Bóhólníihii nilíinii yichʼįʼ adayiiznilii átʼé.
29 Jerúsalem kin haalʼáagi Bóhólníihii bikin biyiʼ nahazʼání góneʼ aláahgo náádaʼiiłniihii áádóó Líívai dineʼé áádóó Ízrel dineʼé dabizhéʼé yę́ę baʼáłchíní daʼahílchíihii yá aląąjįʼ naazíinii dabinááł dah dahidooloʼjįʼ bikʼi hadaʼísídółʼı̨́ı̨́ʼ áádóó baa ádahołyą́ą doo.
30 Ákohgo náádaʼiiłniihii áádóó Líívai dineʼé éí béésh łigaii áádóó óola índa beedí dah deidiyiileehígíí Jerúsalemgi nihiDiyin God bikin biiʼ sohodizingóó nídeidoojih biniyé nídeidiinil.
31 Ákohgo tʼááłáʼí nídízííd naakitsʼáadahgóó yoołkáałgo Ahéíva tooh nílínídóó dah diiʼnáago Jerúsalem kin haalʼáágóó yiiʼnéełgo nihiDiyin God nihikʼi dah doolnihgo nihiʼanaʼí áádóó nihaa héeshjéeʼii bitsʼąą yisdánihíínil.
32 Áádóó Jerúsalemjįʼ niiʼnáago ákwii tááʼ danihiiską́.
33 Dı̨́ʼí jı̨́ı̨́ aleeh góneʼ nihiDiyin God bikin góneʼ Yuráíyah biyeʼ Mériimath éí béésh łigaii áádóó óola índa beedí dah deidiyiiloʼ; Fíniyas biyeʼ Eliyéízar áká ajoolwod áádóó Jéshuwa biyeʼ Jázabad índa Bínuwai biyeʼ Nowadáíyah éí Líívai dineʼé danilı̨́įgo hoł nákai.
34 Éí tʼááłáʼí jinítínígo bá wóltaʼgo dah dahizhdiiloʼígíí ádaníłdáasee tʼáá ałtso íídą́ą́ʼ naaltsoos há bikááʼ ádaalyaa.
35 Yisnááh ádabiʼdiilyaa yę́ę daasnáádę́ę́ʼ ninádahaasʼnáago Ízrel dineʼé biDiyin God bichʼįʼ didlidgo náádahaniihii náádayiisniiʼ: Ízrel dineʼé tʼáá ałtso bá dóola yázhí naakitsʼáadah áádóó deenástsʼaaʼ éí náhástʼédiindóó baʼaan hastą́ą́h índa dibé yázhí éí tsostsʼidiindóó baʼaan tsostsʼid náádahaazniiʼ. Ádił niʼiidzííhjí nááhániihii tłʼízíchǫǫh naakitsʼáadahgo náádahaazniiʼ. Díí tʼáá ałtso Bóhólníihii bichʼįʼ didlidgo náádahaazniiʼ.
36 Aláahgo naatʼáanii éí naaltsoos haidiilaaígíí tooh nílíní eʼeʼaahjí nahósʼaʼgóó bił bídahólníihii índa naatʼáanii danilíinii yichʼįʼ deistsooz áádóó yáʼátʼéehgo Ízrel diné yíká ííjééʼ índa Diyin God bikin hazʼą́ągi ałdóʼ łaʼ hoodzaa.
