Ezra 9:1-15
9 Kʼad díí ákódaadzaadóó bikʼijįʼ naatʼáanii danilíinii shaa daaskaigo ádaaní, Ízrel dineʼé áádóó náádaʼiiłniihii índa Líívai dineʼé danilíinii éí Kéínan dineʼé, Het dineʼé, Píírez dineʼé, Jííbas dineʼé, Áman dineʼé, Móʼab dineʼé, Ííjip dineʼé índa Ámor dineʼé, díí kédaayahgi kéédahatʼíinii tsʼídá nádı̨́ʼídi tʼóó baaʼihígi átʼéego naaldeehii doo bitsʼádahóniʼ da.
2 Jó, tʼáá daabí áádóó biyeʼké bidaʼasdzą́ą́ dadooleełígíí tʼáá bí ádá nídayiizlááʼ, ákohgo diyingo dineʼé éí kédaayahgóó dadineʼé yił ałtaa násdeeʼ; tʼáá aaníí naatʼáanii danilíinii áádóó nidantʼáii éí aláahgo doo ákǫ́ǫ́ ádáátʼįįd da.
3 Áko díí disétsʼą́ąʼgo shiʼééʼ áádóó shiʼéénééz ákʼinaashdláád áádóó shitsiiʼ índa shidághaaʼ hah háłdláád, tʼóó shił ahayóigo sédáá nítʼééʼ.
4 Ákohgo yisnááh danilı̨́ı̨́ nítʼéʼígíí bee hazʼáanii kʼídeiztiʼígíí biniinaa tʼááłáʼí nítínígo Ízrel dineʼé biDiyin God bizaad bikʼee bitah dahoditłidígíí tʼáá ałtso shaa áłah silı̨́ı̨́ʼ, áko tʼóó shił ahayóigo sédáago eʼeʼáahgo nááʼiiniihjįʼ ahoolzhiizh.
5 Áádóó eʼeʼáahgo nááʼiiniih baa hoolzhiizhgo shiʼééʼ áádóó shiʼéénééz nehéłdládígíí tʼahdii bee áká síszaazgo tʼóó shił ahayóigo sídáhídóó nídiishʼnaʼ, áko nitsidinígoʼgo Bóhólníihii shiDiyin God bichʼįʼ dah didiishniiʼ.
6 Áko ádíshní,
ShiDiyin God nílíinii, tsʼídá tʼóó ádaa yánísdzin áádóó bikʼee nichʼįʼ shiniiʼ deichxiiʼ, shiDiyin God, háálá nihidoo ákwii ádaatʼéii nihitsiitsʼiin bilááh danéesʼąąd, áádóó nihidoo ákǫ́ǫ́ éʼétʼéii yádiłhił bídanéesʼąąd.
7 Danihizhéʼé yę́ę bídayééłkaah yę́ędóó díísh jı̨́įjįʼ ayóó átʼéego doo ákǫ́ǫ́ éʼétʼéii baa nisiikai, háálá nihí doo ákwii ádeiitʼįįdgóó bąą nihí áádóó aláahgo nihindanitʼaʼí áádóó nihináádaʼiiłniihii éí kédaayahgóó aláahgo naatʼáanii danilíinii bílákʼee anihidootʼą́, áádóó diltłish áádóó naalteʼ índa yisnááh ádanihiʼdiilyaago bikʼee tʼóó nihił adahayóigo baa nihidootʼą́; éí díísh jı̨́ı̨́góó ákótʼé.
8 Nidi kʼad Bóhólníihii nihiDiyin God bitsʼą́ą́dóó ajoobaʼ tʼóó kónígháníjįʼ ííshją́ą́ ályaago bee łaʼ deiidzíiʼgo yisdádahaakai áádóó bihodiyingo hazʼáanii nihííʼ dooleełgo hahoolzhiizh, áko nihiDiyin God nihił chʼídiʼníłdláád áádóó binaalteʼ daniidlı̨́ı̨́ nítʼééʼ yę́ę bitsʼąą áłtsʼíísígo tʼáá nánihiłnaʼ.
9 Jó, naalteʼ daniidlı̨́ı̨́ nítʼééʼ; azhą́ naalteʼ daniidlı̨́į nidi, nihiDiyin God tʼáadoo yóóʼanihidííʼą́ą da, nidi Pérzha dineʼé aláahgo bindanitʼaʼí dabinááł nihaa aʼáhí niizı̨́ı̨́ʼ, áko nánihiłnaʼgo áádóó nihiDiyin God bikin anídeiilnéehgo áádóó nidahaazhchǫʼ yę́ęgóó hashtʼéédadiilníiłgo yee nihá hoołʼaʼ índa Júdah kéyahgi áádóó Jerúsalem kin haalʼáagi bineʼ nideidziʼ dooleełii nihaidiníʼą́.
10 Áko kʼad, nihiDiyin God nílíinii, díí bikééʼdóoshąʼ haʼátʼíí náádadiiʼníi doo; jó, nibikʼeh óʼooʼníiłii yóóʼadahideetʼą́.
11 Éí ninaalʼaʼí náás áhodooníiłii yaa dahalneʼii binahjįʼ háínídzííʼ, Kéyah nihííʼ ádadoohłíłígíí biih wookaigo éí kédaayahgóó kéédahatʼíinii tʼóó badaaʼihígi ádáátʼįįdii áádóó bidoo daaldinii bee kéyah ahidiníłnáago nidahoneesʼą́ą́góó baaʼihii yił ałnáʼátʼı̨́.
12 Éí bąą kʼad, danihitsiʼké éí dabiyeʼké tʼáadoo baa dahohníłí, doodaiiʼ dabitsiʼké éí danihiyeʼké tʼáadoo bichʼįʼ bá ídadołkidí, áádóó bee bił hózhóonii, doodaiiʼ hoolʼáágóó dabiyódí tʼáadoo bá hádaahtʼíní. Kótʼéego tʼéiyá danihidziil doo, índa kéyahdóó yáʼátʼéehii daohsą́ą doo, áádóó nihadaʼáłchíní náás ahoolchíiłii bá hoolʼáágóó kéyah bííʼ dooleełii bá ádahodoohłííł.
13 Áko doo yáʼátʼéhígi ádeiitʼįįdígíí índa tsʼídá doo ákǫ́ǫ́ ádeiitʼįįdígíí biniinaa éí tʼáá átʼé nihikʼi hooleʼgo, nihiDiyin God nílíinii, tsʼídá doo ákwii ádeiitʼįįdígíí biniinaa atínihidíílíłígíí tʼáá bichʼįʼígo atínihiinilaago áádóó díigi átʼéego łaʼ yisdádahaakaigo
14 nibikʼeh óʼooʼníiłiísh doo bikʼeh náádahoniilʼı̨́į da doo áádóó díí diné doo daaldingi ádaatʼínígíísh bił ahinínánéiikah doo? Ánihiniʼniłdįįd baa hoolzhiizhjįʼ daatsʼí nihichʼįʼ náháchįʼ doo nítʼééʼ, áko doo daatsʼí łaʼ dadiidzih da, doodaiiʼ doo daatsʼí yisdáhidiikah da?
15 Ízrel dineʼé biBóhólníihii Diyin God nílíinii, tsʼídá tʼáá ákwii átʼéii nílı̨́; jó, tʼáá díí jı̨́ átʼéhígi átʼéego łaʼ tʼáá deiidzííʼ. Shoo, ninááł doo ákǫ́ǫ́ ádeiitʼínígíí biiʼ honiidlǫ́; jó, díí biniinaa nidáahgi doo daodzįįh átʼée da.
