Galatians 1:1-24
1 Shí Paul yilʼaadii nishłı̨́. Doo diné shííłʼaad da, doo nidi diné binahjįʼ yilʼaadii nishłı̨́į da, nidi Jesus Christ áádóó Diyin God, aTaaʼ nilíinii, éí Jesus daaztsą́ą́dę́ę́ʼ néidiisáii, tʼáá bí binahjįʼ yilʼaadii nishłı̨́.
2 Christ bee ałkʼisóó danilíinii bił neiikaígíí éí biłgo oodlání danilíinii Galéíshiyadi áłah nídaadleehii kʼé dabidiiʼní:*
3 Diyin God aTaaʼ áádóó nihiBóhólníihii Jesus Christ bibee ajoobaʼii índa bibee achʼįʼ hózhǫ́ náhásdlı̨́įʼii yee nihikʼijidlíi doo.
4 Diyin God nihiTaaʼ íinízinígíí bikʼehgo díí doo yáʼátʼééhgóó hoogáłígíí biyiʼdóó Christ yisdánánihizhdiyooʼniłgo bąą nihibąąhági átʼéii biniyé nihá dadziztsą́.
5 Diyin God hoolʼáágóó ahóyéelʼáágóó baa haʼniih leʼ! Tʼáá ákótʼée doo.
Náánáłaʼ Christ baa haneʼ yáʼátʼéehii tʼáá ádin
6 Haʼátʼíí lá hąhí Diyin God éí Christ bibee ajoobaʼ yee nihíká ádííniidii bitsʼánáhóhjeehgo náánáłaʼ haneʼ bikééʼ naanánoohdahgo bikʼee tʼóó shił ahayóí!
7 Jó, éí doo haneʼ yáʼátʼéehii átʼée da, náánáłaʼ haneʼ yáʼátʼéehii tʼáá ádin, nidi łaʼ nihíniʼ deiłąąhgo áádóó Christ baa haneʼ yáʼátʼéehii dadidiilgis danízin.
8 Azhą́ nihída, doodaléiʼ yáʼąąshdę́ę́ʼ diyingo naalʼaʼída átséédą́ą́ʼ haneʼ yáʼátʼéehii bee nihił dahwiilneʼ yę́ę bitsʼą́ą́jí haneʼ łahgo ánáánátʼéii yee nihił náádahalneʼgo, hániʼdii éí biniinaa ádahodiʼdooldįįłgo há hadaʼdoodzih!
9 Tʼáá ádadiiʼniid yę́ęgi átʼéego kʼad ánáádíshʼní: Haneʼ yáʼátʼéehii daołtsood yę́ę bitsʼą́ą́jí haneʼ łahgo ánáánátʼéii bee nihił nááhojilneʼii hániʼdii éí biniinaa áhodiʼdooldįįłgo há haʼdoodzih.
10 Daʼ diné shichʼijí danilı̨́į dooleeł jinízingo ájíníísh dashíínóhní? Doodayéii! Diyin God shichʼijí nilı̨́į dooleełgo yeeʼ bíká áshtʼı̨́. Diné bił dahonishǫ́ǫ dooleełígíí tsʼídá doo bíká áshtʼı̨́į da. Jó, tʼahdii tʼóó diné bił honishǫ́ biniyé áshtʼı̨́įgo éí doo Christ yá naalʼaʼí nishłı̨́į da doo.
Haash yitʼéego Paul éí Jesus yá naalʼaʼí silı̨́ı̨́ʼ
11 Shikʼisóó, tʼáá aaníígóó ánihidishní: Haneʼ yáʼátʼéehii baa hweeshneʼii éí doo diné bitsʼą́ą́dóó haneʼ átʼée da.
12 Háálá éí doo diné bitsʼą́ą́dóó nídiiláii átʼée da, índa tʼáadoo yínashineestą́ʼí da, nidi Jesus Christ shił ííshjání áyiilaago shee hazlı̨́įʼii átʼé.
13 Átséédą́ą́ʼ Jew dineʼé binahaghaʼ bikʼehgo hinishnáá nítʼééʼ yę́ę, áádóó tʼáá iiʼ shíłjaaʼígi bee tʼáá shizááká Diyin God dayoodlání áłah nádleehii atéshʼı̨́įgo ádeeshdįįł nisin nítʼéʼígíí baa dahosidootsʼą́ą́ʼ.
14 Áádóó ałkʼidą́ą́ʼ dashizhéʼé yę́ę biʼéʼélʼįʼ tʼáá íiyisí bídin nishłı̨́įgo shidineʼé tʼáá bił ahąąh nidaashkai yę́ę biláahgo Jew dineʼé binahaghaʼ shił bééhoozin.
15 Nidi tʼah doo shiʼdichí yę́ędą́ą́ʼ Diyin God atsʼáshiníłtı̨́, áádóó bibee ajoobaʼ yinahjįʼ shíká ádííniid. Éí tʼáá bí íinízingo
16 doo Jew dineʼé danilíinii bitahgóó baa nahodeeshnih biniyé biYeʼ shił yitʼíní áyiilaa. Íídą́ą́ʼ atsʼíís áádóó bidił dahólóonii doo łaʼ bił baa nísístʼįįd da.
17 Shítséedi daalʼaadii danilíinii Jerúsalemgóó doo bichʼįʼ niséyáa da, nidi Aréíbiya kéyahgóó níyá, áádóó índa Damáskasgóó tʼą́ą́ʼ nináánísdzá.
18 Áádóó tááʼ nááhaidóó bikʼijįʼ índa Jerúsalemdi Peter baa níyá, áko tʼáá ákwii baʼałkʼee sédáago ashdlaʼáadah shiiską́.
19 Nidi náánáłaʼ daalʼaadii éí tʼáadoo deiłtsą́ą da, tʼáá hazhóʼó Bóhólníihii bitsilí James tʼéiyá.
20 Diyin God shá bił bééhózingo doo shiyoochʼíídgóó nihichʼįʼ akʼeʼashchí!
21 Áádóó índa Síriya índa Silíshiya kéyah nahósʼaʼdi níyá.
22 Íídą́ą́ʼ Judíyagi Christ dayoodlání áłah nídaadleehii tʼah doo dashiiłtsééhgóó doo shéédahósin da nítʼééʼ;
23 nidi, Łah atínihiłʼı̨́įgo Jesus baa haneʼ doo tʼáá aaníi da, níí nítʼééʼ yę́ę kʼad índa yoodlą́ągo yaa nahalneʼ, haʼníigo shaa dahodiitsʼaʼ.
24 Áko shinahjįʼ Diyin God yaa dahaniih.
Footnotes
^ Rome bibóhólníihgo bił hazʼánígíí biyaagi kéyah łaʼ Galéíshiya hoolyéé nítʼééʼ. Kʼad éí kéyah Térkii hoolyé.
