Galatians 2:1-21
2 Áádóó dı̨́ı̨́ʼtsʼáadah nááhaidóó bikʼijįʼ índa Jerúsalem góde Bárnabas bił nááníshtʼáázh, Táítas ałdóʼ bił niikai.
2 Diyin God shił ííshją́ą́ áyiilaii bikʼehgo ákǫ́ǫ́ níyá. Áko doo Jew dineʼé danilíinii bitahgóó haneʼ yáʼátʼéehii baa hashneʼii daʼoodlání yá naazíinii bee bił dahweeshneʼ. Nidi doo Jew dineʼé danilíinii bił nahosisneʼii doo tʼáadoo biniyéhígóó baa niséyáa da áádóó baa nináánáshdáa dooleełii bił tʼáá daʼáko doo biniyé tʼáá bí tʼéiyá bił dahweeshneʼ.
3 Táítas, bił naashʼaashígíí éí Gríik dineʼé nilı̨́į nidi, bąąh náhidínóolgish doo biʼdooʼniid da,
4 nítʼééʼ łaʼ diné ałkʼisóó ádahodilʼíinii tʼáadoo baa ákodaniidzı̨́ʼí yah aheeskai lá. Éí Christ Jesus binahjįʼ nihá honídleeʼígíí hadeidoosił biniyé naalchíʼí kʼehgo tʼáá nahonitʼinee yah aheeskai lá. Éí Jew dineʼé bibee hazʼáanii biyaa ninádíníidahgo binaalteʼ nídazhdoodleeł danihóʼní.
5 Nidi aají tʼáá aaníinii haneʼ yáʼátʼéehii baa haneʼii tʼáá nihá náás yitʼih dooleeł biniyé tʼóó kónízahíjįʼ nidi tʼáadoo hakʼeh dahosiilʼįįd da.
6 Aląąjįʼ naazíinii ádajitʼı̨́ dahodiʼnínígíí, (doo haash yitʼéegoda haa nitséskees da, Diyin God doo łaʼ aʼohgo yaa nitsékees da,) aląąjįʼ naazíinii dahodiʼnínígíí tʼáadoo haʼátʼéhígoda shighą́ą́h dazhʼdeeshjéeʼ da.
7 Nidi Peter éí Jew dineʼé danilíinii, bąąh nídahineeshgizhii bee dabiʼdééjiʼii, bichʼįʼ haneʼ yáʼátʼéehii bee haʼahoosdlíiʼgo hąąh niilyáhígíigi átʼéego shí ałdóʼ doo Jew dineʼé danilíinii, doo bąąh nídahineeshgizhii dabiʼdééjiʼii bichʼįʼ haneʼ yáʼátʼéehii bee shaʼahoosdlíiʼgo shąąh niilyáhígíí hoł béédahoozingo
8 (jó, Peter éí Diyin God bibee adziilii haidiníʼą́ągo bąąh nídahineeshgizhii* bitahgóó nahojilneʼgo nijilʼaʼ doo biniyé yichʼįʼ hóółʼaad, tʼáá ákótʼéego ałdóʼ shí, doo Jew dineʼé danilíinii bitahgóó nahashneʼgo naashʼaʼ doo biniyé yichʼįʼ shííłʼaad)
9 áádóó James, Peter índa John, daʼoodlání bá aląąjįʼ naazíinii dahodiʼníinii, díí hoł béédahoozingo índa Diyin God naashʼaʼgo áshiilaaígíí baa ákodazniizı̨́įʼgo, éí shí índa Bárnabas doo Jew dineʼé danilíinii bichʼįʼ diitʼash, áádóó hó tʼéí bąąh nídahineeshgizhii bichʼįʼ jidookah biniyé bee ahadadiʼniitʼą́ągo ahił daniidlı̨́įgo bee ahíláłkʼe dadeelniiʼ.
10 Tʼáá hazhóʼó badahojoobáʼíígíí tʼéiyá béédajilniihgo baa nitsídadzikees doo danihóʼní, áko tsʼídá éidíígíí tʼáá kʼadę́ę biʼiishłaa.
Paul Ántiyakdi Peter yideezteh
11 Áádóó nááhodideeshzhiizhí Peter Ántiyakdi jiníyáago, ákwii hachʼįʼ niníyáago áhodííniid, Doo ákǫ́ǫ́ ánítʼı̨́į da. Háálá tʼáadoo bahatʼaadí tʼáá ííłdįįd hakʼi hodiitʼą́ągo nijighá.
12 Háálá diné łaʼ Jerúsalemdę́ę́ʼ tʼah doo James yitsʼą́ą́dóó yíkááh yę́ędą́ą́ʼ daʼoodlání doo Jew dineʼé danilíinii bił nídaʼjidı̨́ı̨́h nítʼééʼ, nidi éí yíkaidóó bikʼijįʼ doo bił nídaʼjidı̨́įh da dzizlı̨́įʼgo tʼóó bitsʼánídzídzá, háálá, Daʼoodlání tʼáá ałtso Jew dineʼé bibee hazʼáanii bikʼehgo bąąh nídahidínóolgish, daanínígíí yíkai.
13 Áko łaʼ Jew dineʼé daʼoodlání danilíinii Peter tʼáá yikʼehgóó ádaatʼı̨́įgo yaa nídiikai. Bárnabas nidi áájí izhdiilwod.
14 Nidi haneʼ yáʼátʼéehii biyiʼdóó tʼáá aaníinii doo kʼéhézdongo bikʼeh dajíkááhgóó shił bééhoozingo tʼáá ałtso dabinááł Peter áhodííniid, Azhą́ lá ni Jew dineʼé nílı̨́į nidi, Jew dineʼé bibee hazʼáanii doo bikʼeh hinínáágóó, nidi doo Jew dineʼé nilíinii hinánígi átʼéego hinínáago, haʼátʼéegoshąʼ doo Jew dineʼé danilíinii éí Jew dineʼé dahinánígi átʼéego dahináago ádíílííł?
Doo Jew dineʼé danilíinii áádóó Jew dineʼé danilíinii ałdóʼ biʼoodląʼ yee yisdánáákai
15 Azhą́ nihí Jew dineʼé daniidlı̨́įgo danihiʼdizhchı̨́į nidi, doo Jew dineʼé danilíinii bąąhági ádaaníłígíí doo ákódaniitʼée da,
16 shą́ą́ʼ Jew dineʼé bibee hazʼáanii bikʼeh hólʼínígíí binahjįʼ doo łaʼda tʼáá ákogi ájítʼéego há haʼdoodzih da, nidi Jesus Christ joodlą́ągo baijólíhígíí tʼéiyá binahjįʼ tʼáá ákogi ájítʼéego há haʼdoodzihgo nihił béédahózin. Nihíyeeʼ éí Christ deiniidlánígíí bee tsʼídá tʼáá ákogi ádaniitʼéego nihá hadaʼdoodzih biniyé Christ Jesus deisiidląąd, nidi bee hazʼáanii bikʼeh dahoniilʼínígíí bee éí dooda, háálá bee hazʼáanii tʼóó bikʼeh hojíłʼı̨́įgo doo łaʼda tsʼídá tʼáá ákogi ájítʼéego bee há haʼdoodzih da.
17 Áko Christ bee tsʼídá tʼáá ákogi ádaniitʼéego bee nihá haʼdoodzihígíí hádeiitʼı̨́įgo nihí ałdóʼ ádił nidaʼayiilzíihgo bee nihéédahoozingo, daʼ ákoósh Christ ádił niʼiidzííh yiih nihíínil? Tsʼídá dooda lą́ą!
18 Nidi bee hazʼáanii biʼíínísingo nihéłchǫʼígíí hashtʼenáshdléehgo baa nídiisdzáago tʼáadoo bahatʼaadí bee hazʼáanii bee ádihodiishtʼiʼ doo.
19 Diyin God bá hinishnáa doo biniyé Jew dineʼé bibee hazʼáanii bee shá nihootʼą́ągo dasétsą́ą́ lágo shił bééhoozin.
20 Jó, Christ bił tsin ałnáoszid bąąhjįʼ shił oʼoolkaal, áko kʼad hinishnánígíí éí doo tʼáá shí hinishnáa da, nidi Christ shiiʼ hinánígíí bee hinishná, áko kʼad hinishnánígíí éí Diyin God biYeʼ ayóóʼáshóʼníigo shá daaztsáanii baa jííníshłíhígíí bee hinishná.
21 Diyin God bibee ajoobaʼ doo nahjįʼ kóshłéeh da, háálá bee hazʼáanii éí Diyin God binááł diné tsʼídá tʼáá ákogi ádaatʼé ádeiileʼgo tʼáadoo biniyéhígóó Christ daaztsą́ą doo nítʼééʼ!
Footnotes
^ Bąąh nídahineeshgizhii, jiníigo éí, Jew dineʼé, jiníigo óolyé.
