Galatians 5:1-26
5 Jew dineʼé bibee hazʼáanii biyaa siiʼnil yę́ę bitsʼąą á honídleeʼ biniyé Christ nihá honídleeʼgo ánihiilaa! Éí bąą yéego nisoozı̨́. Binaalteʼ dasoolı̨́ı̨́ʼ nítʼéʼígíí tʼáadoo baa ánídadiyohtʼaahí.
2 Jóʼakon, shí Paul ánihidishní: Nihąąh nídahidínóolgish ádanihiʼdiilyaa ládą́ą́ʼ, Christ éí tʼáadoo biniyéhí da nilı̨́.
3 Diné tʼááłáʼí jinítínígo hąąh nídahineeshgizhii éí bee hazʼáanii tʼáá átʼé tsʼídá bidaʼjiłʼı̨́į dooleełgi tʼáá aaníígóó bee hoł náádahashneʼ.
4 Nihí éí bee hazʼáanii bídahwíínółníhígíí bee tsʼídá tʼáá ákogi ádaniitʼéego nihá hadaʼdoodzih danohsinii éí Christ doo danoozı̨́įʼ dago Diyin God bibee ajoobaʼ bitsʼáhisoohkai.
5 Nidi nihí, Níłchʼi Diyinii binahjįʼ niheʼoodląʼ bee tsʼídá tʼáá ákogi ádaniitʼéego Diyin God nihá hadoodzihígíí bíká nihił chodahooʼı̨́įgo bibaʼ ádaniitʼé.
6 Háálá Christ Jesus bił łáʼí niidlı̨́įgo éí nihąąh náhinilgish, doodaiiʼ doo nihąąh náhinilgish éí tʼáadoo biniyéhí da, nidi Christ deiniidlánígíí niheʼayóóʼóʼóʼniʼ bee bééhózinii éí ílı̨́.
7 Shą́ą́ʼ yéego niheʼoodląʼ bee nisoozı̨́įgo bikʼehgo deínóhkáah niʼ! Háishąʼ tʼáá aaníinii bikʼeh dahonołʼı̨́ı̨́ nítʼéeʼii nihitsʼą́ą́ʼ yineestłʼah?
8 Díí nihíniʼ bee nihá ádahoołaii éí Diyin God nihíká ádííniidii doo bitsʼą́ą́dę́ęʼ da.
9 Jó, dííkʼǫsh áłchʼı̨́ı̨́dígo taosʼniiʼ tʼáá átʼé yiniisoł.
10 Doo łahgo átʼéego tsínáádadoohkosígíí biniyé Bóhólníihii binahjįʼ nihaa jííníshłí, áádóó tʼáá háiida nihíniʼ jiłąąhígíí éí tʼáá hó há nihodootʼáłígíí bikʼee tiʼhwiizhdoonih.
11 Jó nidi shikʼisóó, daʼoodlání bąąh nídahidínóolgishígíí tʼahdii bee naʼnishtingo doo atíshiʼdilʼı̨́į da doo nítʼééʼ. Éí bee naʼnishtingo Jesus tsin ałnáoszid bąąhjįʼ daaztsánígíí baa haneʼii diné doo bá nanitłʼah da doo nítʼééʼ.
12 Nihił dahółánígíí nahjįʼ kódabiʼdólneʼ laanaa nisin!
13 Háálá shikʼisóó, á honídleeʼ biiʼjįʼ nihíká ádahodooʼniidgo tʼáá hazhóʼó nihá dahonídleeʼígíí binahjįʼ nihitsʼíís yidánoolníinii bá tʼáadoo ashja daʼíínóhsiní. Ayóóʼádaʼahíínóhʼníigo ahíłká anáhjah.
14 Tʼáá ni ádííníʼnínígi átʼéego bił kééhótʼíinii ayóóʼííníʼní; kótʼéego tʼááłáhídi haʼoodzíʼígíí bee, bee hazʼáanii tʼáá átʼé biʼalʼı̨́.
15 Tʼáadoo ahináádadoołtłiʼí áádóó tʼáadoo saad bee hadaʼahiyołdlaadí, háálá ákódaahtʼı̨́įgo ałtso ahididołtah, éí bitsʼąą ádaa ádahołyą́.
Níłchʼi Diyinii yee akʼijidlíii áádóó tsʼísee kʼehgo baa ooldahii
16 Nidi ánihidishní, Níłchʼi Diyinii bee dayínóhkáahgo, tsʼísee kʼehgo átʼéii beʼadáhonooniʼ doo bidaʼdoohłíił da.
17 Háálá tsʼísee kʼehgo átʼéii beʼadáhonooniʼ éí Níłchʼi Diyinii yikʼijįʼ naaldzil, tʼáá ákótʼéego ałdóʼ Níłchʼi Diyinii éí tsʼísee kʼehgo átʼéii* yikʼijįʼ naaldzil, áko díí kótʼéego ałtsʼą́ą́jí nidlı̨́įgo baa nideeshaał danohsinii doo bídeínóhhah da dooleeł.
18 Nidi Níłchʼi Diyinii nihooʼishgo Jew dineʼé bibee hazʼáanii doo nihee ádíhólníih da.
19 Áko tsʼísee kʼehgo baa ooldahii éí tʼáadoo bahatʼaadí: jó éí adilyé, [naʼageh bee tsiʼnaʼadá,] baaʼihgo nitsáhákees, baa yádahasinii baa oodááł,
20 eʼelyaii bichʼįʼ nahadlá, naʼadloʼgo álílee bee nahaghá, akʼeʼdiniih, ahiníʼdiiltłáád, adáhonooní, áháchįʼ, ałkʼijįʼ naʼanish, ałchʼą́ą́h naʼaʼnaʼ, ałtsʼáʼáldah,
21 oochʼı̨́ı̨́d, [diné naatseed,] tó tsiʼnaʼiiłáii yidlą́, tʼáá naʼníleʼdii adlą́, áádóó tʼáá ákónáádaatʼéii. Ákótʼéii yaa nidaakaígíí Diyin God bee bóhólníihgo bił hazʼáanii doo bííʼ dadooleeł da dishníigo tʼáá átséedi bee nihiʼníłniiʼ yę́ę bee nihinááʼníshnííh.
22 Nidi Níłchʼi Diyinii bineestʼąʼ* éí díí: ayóóʼóʼóʼní, ił hózhǫ́, hashtʼehodítʼé, nízaadgóó haʼahóní, ajoobaʼ, yáʼátʼéehii, aʼahódlí,
23 aʼohgo éʼétʼé, ádaa áháyą́; kódaatʼéhígíí bee hazʼáanii doo bídéétʼiʼ da.
24 Áádóó Christ Jesus bííʼ dajílíinii éí tsʼísee kʼehgo beʼadáhonooní áádóó bee laanaa daznízinii tsin ałnáoszid bąąhjįʼ bił oʼoolkaal.
25 Níłchʼi Diyinii bee dahiniiʼnáago, haaʼíshąʼ Níłchʼi Diyinii bee dayíníikáah doo.
26 Haaʼíshąʼ tʼáadoo doo ádadiilkóhí doo, tʼáadoo ałkʼee dadiniiʼniihí doo, índa tʼáadoo daʼahiilchʼı̨́dí doo.
Footnotes
^ Tsʼísee kʼehgo átʼéii, jiníigo éí Diyin God bitsʼą́ąjigo ájítʼéego ádił niʼiidzííh bikʼehgo joogááł.
^ Níłchʼi Diyinii nihiyiʼ naalnishgo díí aneestʼąʼ yitʼíní áyoolííł.
