Galatians 6:1-18
6 Shikʼisóó, diné łaʼ bąąhági átʼı̨́įgo bééhoozingo, Níłchʼi Diyinii kʼehgo ádanohtʼéii, aʼohgo ádaʼdíínółzingo hashtʼeʼninádadoohdlóós. Ádaa ádahołyą́, nihí ałdóʼ nihídahodínóotahgoda átʼé.
2 Nihide ádahootʼéego ahíłká anáhjah, ákódaahtʼı̨́įgo Christ yee hasʼáanii bidaʼołʼı̨́įgo átʼé.
3 Háálá diné tʼáadoo nilíní da nidi ayóó áníshtʼé nízinii, éí ádinaʼadloʼgo átʼé.
4 Nidi diné tʼááłáʼí jinítínígo baa nijigháii ádá hadazdoolził, áko yáʼátʼéehgo baa nijigháá ládą́ą́ʼ éí baa hoł hózhǫ́ǫ doo. Diné náánáłaʼ yaa naagháii éí tʼáá bí bíniʼdii yaa naaghá.
5 Háálá diné tʼááłáʼí jinítínígo bá hoʼdiilzįʼii tʼááłahoditʼéhee bá nidzizı̨́į doo.
6 Diyin God bizaad bee nahodiʼnitinii éí nahonitinii áádóó tʼáá ałtso bee jiináanii bił ałtsʼą́ą́ʼ ajíłkʼiiz doo.
7 Nihidaʼdódleeh lágo; Diyin God doo bá nahatʼiʼ da. Diné tʼáá haʼátʼíhída kʼizhdííláhígíí tʼáá éí ałdóʼ áłah ázhdoolííł.
8 Háálá tʼáá háiida tʼáá hó hatsʼíís yidánoolníinii kʼizhdííláhígíí tʼáá éí áhodoołdįįłii ádá shóizhdoołtʼeeł, nidi Níłchʼi Diyinii bá kʼizhdííláhígíí éí Níłchʼi Diyinii bitsʼą́ą́dóó iiná doo ninítʼiʼii ádá shóizhdoołtʼeeł.
9 Áko haaʼíshąʼ yáʼádaatʼéehii baa nideiikaígíí tʼáadoo ádadadiidláhí doo, háálá doo áá dahosiitʼįįdgóó, baa hoolzhiizhgo daʼdiigish.
10 Éí bąą ashjaʼósingo haaʼíshąʼ diné tʼáá ałtso baa dajiiniibaʼgo nizhónígo bindeiilnish doo, Christ dayoodlání danilíinii íiyisí agháago bindeiilnish doo.
Naʼnitinii áádóó saad bee kʼé haʼníinii naaltsoos bee niiltʼiʼii
11 Jó, tʼáá shí shílaʼ bee nitsaago nihichʼįʼ akʼeʼashchíhígíí baa ákodanoohsįįh!
12 Tʼáá atsʼíís kʼehgo nitsídaakeesii tʼóó bee chʼíshiditʼáah dooleeł danízingo nihąąh nídahidínóolgishjįʼ yídanihiniłkad. Éíyeeʼ Christ tsin ałnáoszid bąąhjįʼ tiʼhoozniiʼígíí biniinaa doo atíshidiʼdoolníił da danízingo ádaatʼı̨́.
13 Azhą́ bąąh nídahineeshgizhii nidi tʼáá bí bee hazʼáanii doo tʼáá ałtso yikʼehgóó ádaatʼée da, nidi biyaa soonilii binahjįʼ ádaa dahaʼniih doo biniyé nihąąh nídahidínóolgishjįʼ nihídaalná.
14 Nidi tsʼídá doo ádaa hóshʼniih átʼée da, tʼáá hazhóʼó nihiBóhólníihii Jesus Christ tsin ałnáoszid bąąhjįʼ nihá daaztsánígíí tʼéiyá bee ádaa hodeeshʼnih. Jó, éí bee nihokááʼ bił nidahaztʼiʼii shitsʼą́ą́ʼ tsin ałnáoszid bąąhjįʼ shichʼįʼ bił oʼoolkaal, áádóó shí ałdóʼ nihokááʼ bił nidahaztʼiʼii bitsʼą́ą́ʼ tsin ałnáoszid bąąhjįʼ shił oʼoolkaal.
15 Ąąh náhinilgish tʼáadoo nilíní da índa doo ąąh náhinilgish ałdóʼ tʼáadoo nilíní da, nidi Christ bee diné ániidí ánályaii tʼéí tsʼídá ílı̨́.
16 Kótʼéego dajiináanii tʼáá ádzíłtso Diyin God éí Ízrel dineʼé náyiizláʼígi átʼéego náhwiizláaʼii hachʼįʼ hózhǫ́ náhodoodleeł, áádóó Diyin God haa joobaʼ doo!
17 Kodóó náásgóó tʼááká diné łaʼda shichʼįʼ ninááhoyółnááʼ lágo, háálá shikááʼgóó daasidgo naasháhígíí bee Bóhólníihii Jesus bííʼ nishłı̨́įgo bééhózin.
18 Shikʼisóó, nihiBóhólníihii Jesus Christ bibee ajoobaʼ nihiiʼ naazíinii yił dahólǫ́ǫ doo. Tʼáá ákótʼée doo.
