Genesis 17:1-27
17 Áko Éíbram náhástʼédiindóó baʼaan náhástʼéí binááhaigo Bóhólníihii bichʼįʼ yitʼíní íʼdiilyaago ádííniid, Diyin God Aláahgo Ayóóʼábóodziilii nishłı̨́; shinááł naniná áádóó tʼáadoo bee nikʼíhótʼahígóó hiníná.
2 Áádóó shí nił ahaʼdiʼdeeshtʼááł índa tʼáá íiyisí kʼeeʼąą noohtʼı̨́įłgo ánihideeshłííł.
3 Áko Éíbram niʼjįʼ tséʼyaa jineeshjool, áádóó Diyin God hachʼįʼ yáłtiʼgo ání,
4 Shoo, shí nił ahaʼdiʼnishtʼą́, áko ałʼąą dineʼé tʼóó ahayóí bizhéʼé nílı̨́į doo.
5 Éíbram* éí doo néinílyée da doo, Éíbraham yinílyée doo, háálá ałʼąą dineʼé tʼóó ahayóí bizhéʼé ániishłaa.
6 Áko naʼáłchíní náás daʼahílchíihii tʼóó ahayóigo ádeeshłííł, áádóó nitsʼą́ą́dóó ałʼąą dineʼé hólǫ́ǫgo ádeeshłííł, áádóó nitsʼą́ą́dóó naatʼáanii chʼíhidookah.
7 Índa bohoníłdzilgo nił ahaʼdiʼdeeshtʼááł áádóó naʼáłchíní náás daʼahílchíihii ałdóʼ éí hoolʼáágóó bee ahaʼdeetʼą́ą doo, áko ni áádóó naʼáłchíní náás daʼahílchíihii ałdóʼ bił nihiDiyin God nishłı̨́į doo.
8 Áádóó déʼéyóní nílı̨́įgo kéyah biyiʼ kééhótʼínígíí naa dideeshʼááł; Kéínan kéyah tʼáá átʼéé nítʼééʼ áádóó naʼáłchíní náás daʼahílchíihii hoolʼáágóó daabííʼ dooleeł, áádóó biDiyin God nishłı̨́į doo.
9 Áko Diyin God éí Éíbraham ánéidooʼniid, Áko ni tʼéí nił ahaʼdiʼnishtʼáanii bikʼeh honíłʼı̨́į doo; ni áádóó naʼáłchíní daʼahílchíihii ałdóʼ yikʼeh dahółʼı̨́į doo.
10 Shibee ahaʼdeetʼáanii ni áádóó naʼáłchíní náás daʼahílchíihii díidí nihá átʼé; nihitahgi ashiiké tʼáá ałtso bąąh nídahinołgish doo.
11 Nihí bąąh náhinilgishí bílátahgi nihá nahjįʼ adahalgéesh doo, áko bee ééhózingo bee ahaʼdeetʼáanii bee nihił ahaʼdiʼnishtʼą́ą doo.
12 Nihitahgi łaʼ hoʼdizhchı̨́ı̨́dóó tseebíí hwiiłkáahgo hąąh náhinilgish doo; nihighangi nidahachíhígíí áádóó náánáłahdę́ę́ʼ yigáałii béeso bikʼé nihíníláii ałdóʼ diné tʼáá ałtso badaʼáłchíní náás daʼahílchííhgóó ákótʼée doo.
13 Nighan biyiʼ yizhchíinii áádóó nibéeso bikʼé nihíníláii ałdóʼ díí tsʼídá bąąh nídahinołgish doo, áko shibee ahaʼdeetʼáanii nihitsʼíís tʼah hólǫ́ǫgo hoolʼáágóó nihił ahaʼdiʼnishtʼą́ą doo.
14 Áko ashkii łaʼ bitsʼíís doo bąąh náhineeshgizhii éí hodineʼé bitsʼą́ąjįʼ hodiʼyoolyééł, háálá bee ahaʼdeetʼáanii kʼízhnítiʼ.
15 Áko Diyin God éí Éíbraham áyidííniid, Jó, Sérai* neʼasdzą́ą́ éí Sérai doo nááhodidííʼniił da; kʼad éí Sárah bee hwíínízhíi doo.
16 Hakʼijishdlíi doo, áádóó niyeʼ dooleełii jidoołchííł; tʼáá aaníí hakʼijishdlíi doo áádóó ałʼąą dineʼé bimá jidooleeł; hatsʼą́ą́dóó diné binanitʼaʼí dahodooleeł.
17 Áko Éíbraham tséʼyaa jineeshjool áádóó aníjídlohgo tʼáá hajéí biyiʼídi ázhdííniid, Daʼ neeznádiin honááhaigoósh há adoochííł? Daʼ Sárah daatsʼí náhástʼédiin binááhaigo adoołchííł?
18 Áádóó Éíbraham éí Diyin God áyidííniid, Íshmeiyel éí ninááł hináa dooleełę́ę!
19 Nidi Diyin God ádííniid, Sárah neʼasdzą́ą́ tʼáá aaníí niyeʼ ná yidoołchííł; Áízak* bee yidíízhiił. Áko haʼáłchíní náás daʼahílchíihii tʼáá hóóltąʼgo hoolʼáágóó bohoníłdzilgo shibee ahaʼdeetʼáanii há átʼéego bee nihodeeshʼááł.
20 Áádóó Íshmeiyel bá nidisétsʼą́ą́ʼ; jó éí hakʼijiisisdliʼ; náás oołchíiłgo tʼáá íiyisí kʼeeʼąązhnootʼı̨́įłgo áhodeeshłííł; naatʼáanii naakitsʼáadahgo bizhéʼé jílı̨́į doo, áádóó ayóó átʼéii dineʼé áhodeeshłííł.
21 Nidi bohoníłdzilgo Áízak tʼéiyá bił ahaʼdiʼdeeshtʼááł; éí kodóó łaʼ nááhaigo Sárah ná yidoołchííł.
22 Áko ałchʼįʼ yájíłtiʼígíí áádzísįįdgo Éíbraham bitsʼą́ą́ʼ Diyin God dah náhodiileʼ.
23 Áko tʼáá Diyin God áhodííniidígi átʼéego Éíbraham hayeʼ Íshmeiyel áádóó tʼáá ałtso haghangi nidahaazhchínígíí índa habéeso bikʼé nidziizláhígíí éí haghangi diné tʼáá ałtso áłah ájiilaago éí bijı̨́ bąąh nídahizhneeshgizh.
24 Áko íídą́ą́ʼ Éíbraham náhástʼédiindóó baʼaan náhástʼéí binááhaigo hąąh náhineeshgizh.
25 Hayeʼ Íshmeiyel éí tááʼtsʼáadah binááhaigo bąąh náhineeshgizh.
26 Tʼáá éí bijı̨́ Éíbraham hąąh náhineeshgizh; hayeʼ Íshmeiyel ałdóʼ,
27 áádóó haghangi ashiiké áádóó diné tʼáá ałtso haghangi nidahaazhchínígíida, łahdę́ę́ʼ béeso bikʼé nidziizláhígíida éí tʼáá ałtso hoł bąąh nídahineeshgizh.
Footnotes
^ Hííbrew kʼehjígo Éíbram jiníigo éí aláahgo ataaʼ jiníigo óolyé áádóó Éíbraham jiníigo éí dineʼé tʼóó ahayóí bitaaʼ jiníigo óolyé.
^ Sárah jiníigo éí Hííbrew kʼehjígo aláahgo naatʼáanii bitsiʼ jiníigo óolyé.
^ Áízak jiníigo éí Hííbrew kʼehjígo dloh hasin jiníigo óolyé.
