Genesis 2:1-25
2 Kótʼéego yádiłhił áádóó nahasdzáán tʼáá átʼé ałtso ályaa.
2 Áádóó tsostsʼid jı̨́ bichʼįʼ hoolzhishgo Diyin God ałtso nijishnish, índa tsostsʼid jı̨́ azlı̨́įʼgo ałtso nijishnishígíí bitsʼą́ą́dóó háájoolyı̨́ı̨́ʼ.
3 Áádóó Diyin God éí tsostsʼid jínígíí yikʼijisdliʼgo atsʼáidiníʼą́, háálá Diyin God ałtso nijishnishgo bitsʼą́ą́dóó éí bijı̨́ háájoolyı̨́ı̨́ʼ.
4 Bóhólníihii Diyin God éí yádiłhił índa nahasdzáán áyiilaa bijı̨́ı̨́dą́ą́ʼ nahasdzáán índa yádiłhił bił niilyáii dahodideezlı̨́ı̨́ʼ.
5 Áko nahasdzáán bikáaʼgi chʼil tʼah doo hadanisée da áádóó chʼil daadáanii tʼah doo hadanisée da, háálá Bóhólníihii Diyin God éí nahasdzáán bikáaʼgi tʼah doo nahałtingo ííléeh da, índa diné dáʼákʼeh yeinítʼı̨́į dooleełígíí tʼah ádin;
6 nidi nahasdzáán bitsʼą́ą́dóó áhí hááshígishgo niʼ tʼáá átʼé nítʼééʼ nínéíłtłoh.
7 Áko Bóhólníihii Diyin God éí niʼ bitsʼą́ą́dóó łeezh yee diné áyiilaa áádóó biyol yee hánííʼ góneʼ bee iináanii yee ííyolgo diné hwiiʼ sizíinii hinááh silı̨́ı̨́ʼ.
Kéyah Ííden hoolyéedi dáʼákʼeh
8 Áádóó Bóhólníihii Diyin God haʼaʼaahjígo Ííden hoolyéedi dáʼákʼehgo áyiilaa, áko diné áyiilaaígíí ákwii niiníłtı̨́.
9 Áádóó niʼ bitsʼą́ą́dóó áyiilaaígíí éí Bóhólníihii Diyin God éí tsin ałʼąą ádaatʼéii yáʼátʼéehgo danílʼíinii índa yáʼátʼéehgo bąąhdóó daʼadáanii hainííłtʼą́. Éí dáʼákʼehgi iiná tsin ałdóʼ, índa tsin bineestʼąʼ bitsʼą́ą́dóó yáʼátʼééhjí áádóó doo yáʼátʼééhjí bééhózin dooleełii hainíísą́.
10 Áádóó tooh nílínígíí bee naʼniyęęsh doo biniyé Ííden kéyahdóó dáʼákʼehgóó nílı̨́, áádóó chʼínílı̨́įgo dı̨́ı̨́ʼgóó ałtsʼádaazlı̨́.
11 Átséhí góneʼ tooh nílínígíí Páísan woosyeʼ, éí kéyah Hávilah hoolyéhígíí tʼáá átʼé binázlı̨́; ákweʼé óola hólǫ́.
12 Éí kéyah biyiʼ óola yáʼátʼééh; tʼáá ákweʼé tsé bidéliyam índa ániks yolyéhígíí ałdóʼ hólǫ́.
13 Naaki góneʼ tooh nílínígíí Gáíhan woosyeʼ, éí kéyah Iithiyópiya hoolyéhígíí tʼáá átʼé binázlı̨́.
14 Tááʼ góneʼ tooh nílínígíí Hídikel woosyeʼ; éí Asíriya bíighahgóó haʼaʼaahjígo chʼínílı̨́. Dı̨́ı̨́ʼ góneʼ tooh nílínígíí Yufréítiiz woosyeʼ.
15 Áko Bóhólníihii Diyin God éí Ííden kéyahdi dáʼákʼehgi diné bił jiníʼáazhgo ákwii nizhníłtı̨́įgo dáʼákʼeh yinaalnish áádóó yaa áhályą́.
16 Áko Bóhólníihii Diyin God éí diné ádooníiłgi bee bá nihozhníʼą́ągo ájíní, Tsin naazkaadígíí bineestʼąʼ tʼáá ałtso tʼáá ni nínízingo niyą́ą doo,
17 nidi tsin bineestʼąʼ bitsʼą́ą́dóó yáʼátʼééhjí índa doo yáʼátʼééhjí bééhózin dooleełii tsʼídá doo dííyı̨́įł da, háálá bąąhdóó ííníyą́ą́ʼ bijı̨́įdi tʼáá aaníí dadíítsaał.
18 Áko Bóhólníihii Diyin God ánáádooʼniid, Diné tʼáá sáhí naagháago doo bá yáʼátʼéeh da; tʼáá ákónéehee háká análwoʼ dooleełii há ádeeshłííł.
19 Áko Bóhólníihii Diyin God éí naaldeehii áádóó nidaatʼaʼii tʼáá ałtso niʼ bitsʼą́ą́dóó łeezh yee áyiilaa, áko haash yitʼéego dabízhiʼ ádaazhdoolííł nízingo Ádam* yaa yiizhʼeezh, áko hináanii nináneelʼą́ąjįʼ tʼáá bee dajíízhiʼígíí bízhiʼ daazlı̨́ı̨́ʼ.
20 Áádóó Ádam éí bízhiʼ ádajiilaii alı̨́ı̨́ʼ tʼáá ałtso áádóó nidaatʼaʼii índa nihokááʼgóó naaldeehii tʼáá ałtso bízhiʼ hólǫ́ǫgo ájiilaa, nidi Ádam tʼáá ákónéehee háká análwoʼ dooleełii tʼah doo há álnéeh da.
21 Áko Bóhólníihii Diyin God éí Ádam yiʼiiłhaazh, áko ajiiłhaazhgo hátsą́ą́ʼ łaʼ hayíítą́ągo hatsįʼ ałchʼįʼ ánáyiidlaa.
22 Áko Bóhólníihii Diyin God éí Ádam bítsą́ą́ʼ hayíítánígíí yee asdzání áyiilaa, áádóó Ádam yichʼįʼ yił níʼáázh.
23 Áko Ádam ádííniid, Kʼad díí shitsʼinígíí bitsʼą́ą́dóó tsʼin áádóó shitsįʼígíí bitsʼą́ą́dóó atsįʼ jílı̨́, áko asdzání* joolyée doo, háálá diné bitsʼą́ą́dóó áhoʼdiilyaa.
24 Éí bąą diné jílíinii hazhéʼé índa hamá bitsʼą́ą́ʼ dashdidoogáałgo hweʼasdzą́ą́ tʼéiyá bił jiináa doo, áko nizhdiltʼé yę́ę atsʼíís tʼááłáʼí jileeh.
25 Áko Ádam índa hweʼasdzą́ą́ bił tʼáá ájíłah tʼáá jilchíʼígo nijiʼaash, ákondi doo baa yáznízin da.
Footnotes
^ Ádam jiníigo éí Hííbrew kʼehjígo łeezh jiníigo óolyé.
^ Asdzání jiníigo éí Hííbrew kʼehjígo diné bitsʼą́ą́dóó jiníigo óolyé.
