Genesis 21:1-34
21 Áko Bóhólníihii tʼáá ádííniidígi átʼéego Sárah yaa naneeztą́ą́ʼ, áko tʼáá haadzíʼígi átʼéego Sárah yá yiʼiilaa.
2 Áko Sárah iʼniiltsąąd, áádóó Éíbraham haastihdi índa biyeʼ bá jishchı̨́; tʼáá Diyin God hachʼįʼ haadzíʼíjįʼ ahoolzhiizhgo bohoolyaa.
3 Áádóó Éíbraham hayeʼ Sárah há yishchínígíí Áízak bee jíízhiʼ.
4 Áko Diyin God tʼáá áhodííniidígi átʼéego Éíbraham hayeʼ Áízak tseebíí biiską́ągo bąąh náhizhneeshgizh.
5 Éíbraham neeznádiin binááhaigo hayeʼ Áízak há yizhchı̨́.
6 Áko Sárah ádííniid, Diyin God yishdlohgo áshiilaa, áádóó tʼáá ałtso deidiiztsʼą́ʼígíí shił daadloh dooleeł.
7 Áádóó ánáázhdooʼniid, Háíyeeʼ, Sárah beʼawééʼ yiʼiiłtʼoʼ dooleeł, Éíbraham yididooniił? Jóʼakon, haastihdi índa biyeʼ bá shéłchı̨́.
Héígar áádóó Íshmeiyel yóóʼabiʼdoolʼaʼ
8 Áádóó awééʼ dínéesą́ągo iʼdíítʼóód, áko Éíbraham éí Áízak iʼdíítʼóód bijı̨́ ayóó átʼéego ádaʼíísįįd.
9 Áko Sárah éí Ííjip dineʼé asdzání Héígar wolyéii biyáázh éí Éíbraham yá yishchínígíí tʼóó há nahałtʼiʼgo baa ákoniizı̨́ı̨́ʼ.
10 Éí bąą Éíbraham ábizhdííniid, Díí naalteʼ asdzání biyáázh tʼáá bił chʼíninołchééh, háálá díí naalteʼ asdzání biyáázh éí shí shiyáázh Áízak bííʼ dooleełii doo bił ałtsʼą́ą́ʼ adzíłkʼiiz da doo.
11 Díí biniinaa Éíbraham biyeʼ tʼáá íiyisí yąąh bíniʼ.
12 Nidi Diyin God éí Éíbraham áyidííniid, Ashkii índa naalteʼ asdzání biniinaa tʼáadoo yínííł nílíní; Sárah áníłnínígíí tʼáá ałtso yísíníłtsʼą́ą́ʼ, háálá Áízak bitsʼą́ą́dóó naʼáłchíní náás ahoolchíiłii bíká ádahodooʼniid.
13 Asdzání naalteʼ nilínígíí ałdóʼ biyáázh łaʼ dineʼé ádeeshłííł, háálá éí niyeʼ átʼé.
14 Áko Éíbraham tʼáá íiyisí abínígo nízhdiiʼnaʼgo bááh áádóó tó abid bił nízhdiinilgo Héígar baazhnínilgo nihiiníłjid, áádóó ashkii bił dashdiiłʼaʼgo dah diiʼáázh, áádóó Bíyer-shííba hoolyéedi kéyah biiʼ doo naagháhídi nijiʼaash.
15 Áko tó abid biiʼ tó ásdįįdgo ashkii chʼil nitsaa léiʼ biyaagi nizhníłtı̨́.
16 Áádóó dashdiiyáago adiltʼoh bíighah ánízahgi dzineezdá; ashkii doo shinááł dadootsaał da jiníigo bitsʼáhwiiníʼą́ądi dzizdáago yéego jííchah.
17 Áko Diyin God nilíinii ashkii yichago yidiiztsʼą́ą́ʼ, áko Diyin God bidiyingo naalʼaʼí yáʼąąsh biyiʼdę́ę́ʼ Héígar yiyíízhiʼgo áyidííniid, Héígar, haashąʼ yinidzaa? Tʼáadoo nił yéʼí; Diyin God éí ashkii sitínígíí yichago yidiiztsʼą́ą́ʼ.
18 Nídiidááh, ashkii nídiiłteehgo dah yíłtééł, háálá łaʼ dineʼé ayóó átʼéii áhodeeshłííł.
19 Ákohgo Diyin God hahoyííłhalgo tó hahaasnilgo dziiłtsą́; ákǫ́ǫ́ jiníyáago tó abid biiʼ tó hazhdééłbįįdgo ashkii baazhníłtsoozgo yoodlą́ą́ʼ.
20 Áko Diyin God éí ashkii yaa áhályą́ągo dínéesą́; kéyah biiʼ doo naagháhídi kééhatʼı̨́, áádóó tʼáá íiyisí doo naʼasiʼgóó kʼaaʼ yee adiłtʼoh silı̨́ı̨́ʼ.
21 Péran hoolyéedi kéyah biiʼ doo naagháhídi kééhatʼı̨́; Ííjip kéyahdę́ę́ʼ asdzání hweʼasdzą́ą́ dooleełígíí hamá há yił nátʼáázh.
Éíbraham éí Abímelek yił ahaʼdeetʼą́
22 Íídą́ą́ʼ Abímelek áádóó bisiláo binanitʼaʼí Fáíkal wolyéii Éíbraham yichʼįʼ haadzíiʼgo ání, Tʼáá haʼátʼíhída tʼáá ałtso baa nanináago Diyin God nił hólǫ́.
23 Éí bąą kʼad Diyin God binááł shichʼįʼ ádee hadídziihgo tʼáadoo shinaʼíloʼí doo; shiyeʼ ałdóʼ dooda, shinálí ałdóʼ dooda; naa jooshbaʼígi átʼéego ni ałdóʼ shichʼįʼ tʼáá ákónítʼée doo, áádóó kéyah bikááʼ níínínánígi ałdóʼ bichʼįʼ ákónítʼée dooleeł.
24 Éíbraham ádííniid, Ádee hadideesdzih.
25 Áádóó Éíbraham tó hahaasʼnilígíí biniinaa Abímelek yideezteh, háálá Abímelek bá nidaalʼaʼí tʼáá naʼníleʼdii haghadeideestʼą́,
26 áko Abímelek ádííniid, Doo shił bééhózin da; háí shı̨́ı̨́ átʼínígíí tʼáadoo bee shił hwíínílneʼ da; doo diistsʼaʼ da nítʼééʼ; díí jı̨́ índa yíniiʼ.
27 Áko Éíbraham éí dibé índa béégashii ałdóʼ Abímelek yeinínil, áádóó ahazhdeetʼą́.
28 Áko Éíbraham éí hadibé yázhí dabiʼádígíí tsostsʼidgo tʼáá sahdii atsʼázhnínil.
29 Áádóó Abímelek éí Éíbraham áyidííniid, Haʼátʼíishąʼ biniyé díí dibé yázhí dabiʼádígíí atsʼéinínil?
30 Áko ázhdííniid, Díí dibé yázhí dabiʼádígíí tsostsidgo shitsʼą́ą́dóó nídidíínił; éí díí tó hahánilígíí shí áshtʼı̨́įgo shá bee bééhózin doo.
31 Díí biniinaa ákweʼé Bíyer-shííba* hoosyeʼ, háálá ákweʼé ałchʼįʼ ádee hazdoodzííʼ.
32 Kótʼéego Bíyer-shííba hoolyéegi ahazhdeetʼą́, ákohgo Abímelek índa hasiláo binanitʼaʼí Fáíkal wolyéii Filístiya dineʼé bikéyahgóó dah nízhdiitʼáázh.
33 Áádóó Éíbraham éí Bíyer-shííba hoolyéegi kʼaiʼ łichííʼ kʼizhdíílá; ákweʼé Bóhólníihii éí hoolʼáágóó Diyin God nilíinii bízhiʼ józhíigo sozdoolzin.
34 Éíbraham éí Filístiya dineʼé bikéyahgi tʼóó átsééd kééhojitʼı̨́įgo ląʼí yiską́.
Footnotes
^ Bíyer-shííba jiníigo éí Hííbrew kʼehjígo ahaʼdeetʼą́ yę́ęgi tó hahadleeh, doodaiiʼ tsostsʼidígíí bitó hahadleeh jiníigo óolyé.
