Genesis 26:1-35
26 Éíbraham hináádą́ą́ʼ átsé hodííchįįdii éí náábíkʼijįʼ kéyahgi nááhodííchįįd. Áko Filístiya dineʼé binanitʼaʼí Abímelek bichʼįʼ Gíírar hoolyéejįʼ Áízak dashdiiyá.
2 Áko Bóhólníihii hachʼįʼ yitʼíní íʼdiilyaago áháłní, Doo Ííjip kéyah góyaa díínáał da; kéyah bikááʼ kééhótʼı̨́į dooígíí bee nił hodeeshnih.
3 Díí kéyahígíí bikááʼ nidíínééł, áko nił honishłǫ́ǫgo nikʼijishdlíi doo, áádóó ni índa naʼáłchíní náás daʼahílchíihii díí kédaayahígíí tʼáá ałtso nihitaadideeshʼaał, áko Éíbraham nizhéʼé bichʼįʼ bee ádee hadeesdzíiʼii biʼdeeshłííł.
4 Áko naʼáłchíní náás daʼahílchíihii wótʼáahdi sǫʼígi ánéelą́ąʼgo kʼeeʼąą nootʼı̨́įłgo ádeeshłííł, áádóó ni índa naʼáłchíní náás daʼahílchíihii díí kédaayahígíí tʼáá ałtso nihitaadideeshʼaał, índa nahasdzáán bikáaʼgi naʼáłchíní náás daʼahílchíihii binahjįʼ ałʼąą dineʼé tʼáá ałtso bikʼidahozhdoodliił,
5 háálá Éíbraham shizaad yikʼeh hóółʼįįd; éí bichʼįʼ yíłʼaadígíí áádóó shibikʼeh óʼooʼníiłii áádóó bee nihoyíʼáanii índa shibee nahazʼáanii yikʼeh hóółʼįįd.
6 Áko Áízak éí Gíírargi kééhojitʼı̨́.
7 Ákweʼé diné kéédahatʼínígíí hweʼasdzą́ą́ yíndahódééłkidgo, Shideezhí jílı̨́, jidííniid, Sheʼasdzą́ą́ átʼé, jididooniiłígíí bikʼee hoł yéeʼgo biniinaa, áádóó Rebékah hodiʼnílʼı̨́įgo jízhóníyeeʼgo biniinaa diné ákweʼé kéédahatʼínígíí dashidiyoołhééł shaʼshin dziniizı̨́ı̨́ʼ.
8 Áádóó ákódzaa, ákweʼé kééhojitʼı̨́įgo nízaad nihoolzhiizhgo Filístiya dineʼé aláahgo binanitʼaʼí Abímelek wolyéii tsésǫʼdę́ę́ʼ dééʼı̨́ı̨́ʼ nítʼééʼ; Áízak índa hweʼasdzą́ą́ Rebékah bił naʼahijiʼnilgo hoołtsą́.
9 Áko Abímelek éí Áízak hágo yidííniidgo ání, Jó, tʼáá aaníí neʼasdzą́ą́ átʼéé lá; haʼátʼéegoshąʼ, Shideezhí jílı̨́, diní? Áko Áízak ázhdííniid, Honiinaa dadeestsaał shaʼshin nisingo biniinaa ádíshní.
10 Áko Abímelek ání, Díishąʼ haa nihííníłʼįįd? Diné łaʼda neʼasdzą́ą́ yił neezhtéezhgo dashąʼ; bąąhági átʼéii yiih nihíínil doo nítʼééʼ.
11 Áádóó Abímelek bidineʼé kótʼéego yiʼníłniiʼgo ání, Díí diné índa beʼasdzą́ąda tʼáá bizhdeelchidígíí éí tʼáá aaníí hodiʼyoolyééł.
12 Áízak éí kéyah yikááʼ kʼiʼdíílá, áko tʼáá éí yihahígíí biyiʼ neeznádiindi ánánéelą́ąʼgo há bilááh násdlı̨́ı̨́ʼ, áádóó Bóhólníihii hakʼijisdliʼ.
13 Tʼáá íiyisí náás deeyá, áádóó yódí boosą́ągo tʼáá íiyisí bidziilgo dah adiilá.
14 Bá dibé dah danéilkaad, áádóó bibéégashii deílʼá, índa tʼóó ahayóí bá nidaalʼaʼ; éí bąą Filístiya dineʼé bikʼee dadeeznih.
15 Áko Éíbraham hazhéʼé yę́ę hináádą́ą́ʼ bá nidaalʼaʼí tó hahadleeh ádayiilaa yę́ę éí Filístiya dineʼé łeezh yee hatsʼą́ą́ʼ háádahodeesbįįd.
16 Áko Abímelek éí Áízak áyidííniid, Nihitsʼánínééh, háálá nihiláahgo ánóodziil sínílı̨́ı̨́ʼ.
17 Áko Áízak dah diináago Gíírar honíteelgi honíbaal nizhnínil; ákwii kéénááhojitʼı̨́ı̨́ nítʼééʼ.
18 Áko Áízak éí Éíbraham hazhéʼé yę́ę hináádą́ą́ʼ tó hadahaasʼnil yę́ęgi tó hahadleeh náádahodeesbįįd yę́ęgi tó háádayiisnil; éí Éíbraham daaztsą́ą́dóó bikʼijįʼ Filístiya dineʼé háádahodeesbįįd nítʼééʼ, áko hazhéʼé yę́ę tó hadahadleeh yee dayízhiʼígíí tʼáá éí bee náádajíízhiʼ.
19 Áádóó honíteelgi Áízak bá nidaalʼaʼí tʼáá bíniʼ tó háálíinii yikʼídaʼazgeed.
20 Áádóó Gíírardóó nidaʼniłkaadii Áízak* bá nidaʼniłkaadii tó biniinaa yił ahinídiijéeʼgo ádaaní, Tó éí nihí, áko tó hahadleeh Íísek bee hojíízhiʼ, háálá biniinaa ahinízhdiijééʼ.
21 Áko tó łaʼ hanáádadziisʼnilgo éí ałdóʼ biniinaa ahinínáázhdiijééʼ, áko éí Sítnah* bee hojíízhiʼ.
22 Áko áádóó dah náázhdiiʼnáago tó łaʼ hanáádadziisʼnil; éí índída tʼáadoo biniinaa ahinízhdiijéeʼ da. Áko Riihóbath* hoolyée doo, jidííniid; kʼad Bóhólníihii nihá hoołʼaʼ, áko díí kéyahgi kʼeeʼąą díníitʼı̨́ı̨́ł.
23 Áko Bíyer-shííbagóó náájíʼná.
24 Tʼáá éí bitłʼééʼ Bóhólníihii haa honíleʼgo ádííniid, Nizhéʼé Éíbraham biDiyin God áshtʼı̨́; tʼáadoo nił yéʼí; nił honishłǫ́, áádóó nikʼijishdlíi doo, índa Éíbraham shinaalʼaʼí yę́ę biniitʼaa naʼáłchíní náás daʼahílchíihgo ádeeshłííł.
25 Áko ákweʼé bikááʼ nááʼiiniihí ájiilaago Bóhólníihii bízhiʼ józhíigo sozdoolzin, áádóó ákweʼé honíbaal nizhnínil. Ákweʼé Áízak há nidaalʼaʼí tó hanáádayiisʼnil.
Áízak éí Abímelek yił ahaʼdeetʼą́
26 Gíírar kin shijaaʼdę́ę́ʼ Abímelek bikʼis Ahózath índa bisiláo binanitʼaʼí Fáíkal wolyéii yił haa yíkaigo
27 Áízak ázhdííniid, Haʼátʼíishąʼ biniyé shaa noohkai? Shą́ą́ʼ dashijiinohłáa niʼ, áádóó yóóʼadashinoołchą́ąʼ niʼ.
28 Áko ádahodííniid, Tʼáá aaníí Bóhólníihii nił hólǫ́ǫgo hadandeelʼı̨́ı̨́ʼ, áko ádadiiʼniid, Ni áádóó nihí bíniʼdii nihitaʼgi saad bee ahádahwiidiilʼaał, índa bee ahadadiʼdiitʼááł,
29 áko tʼáadoo nidadeelchidígi átʼéego doo haada nihidiʼdoolníił da, áádóó nihí yáʼátʼéehgi ádaniilʼı̨́, áádóó kʼé daniidzingo yóóʼadanisiilʼaʼ, áko kʼad Bóhólníihii bikʼijidlíhígíí sínílı̨́ı̨́ʼ.
30 Áko bá ádadzíísįįdgo daʼííyą́ą́ʼ áádóó daʼoodlą́ą́ʼ.
31 Áádóó tʼah abínígo nízhdiijéeʼgo ałchʼįʼ ádee hadahizdeesdzííʼ, áko Áízak hwééʼníłniiʼgo bitsʼą́ą́dóó hoł dahózhǫ́ǫgo dah nízhdiikai.
32 Ákódzaago tʼáá éí bijı̨́ Áízak bá nidaalʼaʼí yíkaigo tó hadayiiznilígíí yee hoł dahoolneʼgo ádahodííniid, Tó bikʼidaʼsiigeed.
33 Áko ákweʼé Shííba yee hóozhiʼ; éí bąą kin haalʼáhígíí díí jı̨́ı̨́góó Bíyer-shííba hoolyé.
34 Íísa dízdiin binááhaigo Het dineʼé Biyérai wolyéii bitsiʼ Júdith hweʼasdzą́ą́ ájiilaa; Het dineʼé Íílan wolyéii bitsiʼ Báshiimath ałdóʼ hweʼasdzą́ą́ ájiilaa.
35 Áko díidí Áízak índa Rebékah tʼáá íiyisí doo bił yáʼátʼééhgóó bíniʼ yiiʼaʼ.
Footnotes
^ Íísek jiníigo éí Hííbrew kʼehjígo ahiníʼdiiltłáád jiníigo óolyé.
^ Sítnah jiníigo éí Hííbrew kʼehjígo ajijoodlá jiníigo óolyé.
^ Riihóbath jiníigo éí Hííbrew kʼehjígo honíteelgo óolyé.
