Genesis 42:1-38
42 Ákohgo Jéíkab éí Ííjip kéyahdi chʼiyáán hólǫ́ǫgo yiyííniiʼgo biyeʼké áyidííniid, Haʼátʼíishąʼ biniyé tʼóó nídaʼahinółʼįįh.
2 Shoo, Ííjip kéyahdi chʼiyáán hólǫ́ǫgo yíniiʼ; dahiniiʼnáa dooleełígíí áádóó doo dadíníiʼnéłígíí biniyé ákóyaa dohkáahgo áádę́ę́ʼ chʼiyáán łaʼ nihá nidahidoołnih.
3 Áko Jóseph bínaaíké neeználtʼéego Ííjip kéyahdę́ę́ʼ doodı̨́įłii nideidiyoołnih yiniyé ákóyaa eekai.
4 Nidi Jéíkab éí Jóseph bitsilí Bénjamin haada náádooʼnííł shaʼshin jiníigo biniinaa bínaaíké tʼáadoo bitah ajííłʼaʼ da.
5 Áko Kéínan kéyahdi dahodííchįįdígíí biniinaa áádę́ę́ʼ Ízrel biyeʼké éí tłʼoh naadą́ą́ʼ nideidiyoołnih biniyé diné nidahaaskaígíí yił yíkai.
6 Áko Jóseph éí kéyah binanitʼaʼí jílı̨́; hó diné tʼáá ałtso haa nidaʼiiłniih, áko Jóseph hánaaíké yíkaigo tʼáá íiyisí hachʼįʼ yaa ádaadzaa.
7 Jóseph hánaaíké dziiłtsą́ągo tʼáá ałtso béédahodzísin, nidi bichʼįʼ doo ádééhodzílzin da, áádóó tʼáá naʼníleʼdii bichʼįʼ hadziisdzíiʼgo ájíní, Háádę́ęʼshąʼ naahkai? bizhdííniid. Áko ádadííniid, Kéínan kéyahdę́ę́ʼ ádeitʼı̨́. Chʼiyáán łaʼ nidahidiilnih biniyé niikai.
8 Áko Jóseph hánaaíké bééhodzísin nidi bí tʼéí doo hwéédahósin da.
9 Áádóó Jóseph baa nidziizyeel yę́ę bééjoolniiʼgo ábizhdííniid, Kéyah doo bichʼą́ą́h hólóní da, danohsingo naalchiʼí danohłı̨́įgo ádaahtʼı̨́.
10 Áko ádahodííniid, Dooda, nihinanitʼaʼí, ná nidaalteʼ yeeʼ chʼiyáán nideidiyoołnih yiniyé yíkai.
11 Nihí diné tʼááłáʼí biyeʼké daniidlı̨́, áádóó tʼáá aaníígóó halneʼii daniidlı̨́; ná nidaalʼaʼí doo naalchiʼí danilı̨́į da.
12 Áko ánáábizhdooʼniid, Kéyah doo bichʼą́ą́h hólóní da, danohsingo yeeʼ noohkai.
13 Áádóó ánáádadooʼniid, Nihí ná naalʼaʼí daniidlíinii naakitsʼáadah niiltʼéego tʼáá łaʼ haijéʼígíí Kéínan kéyahdi diné tʼááłáʼígíí biyeʼké daniidlı̨́, áádóó, shoo, akéédę́ʼígíí éí díí jı̨́ nihizhéʼé yił naaʼaash, áádóó tʼááłáʼí éí ádin.
14 Áádóó Jóseph ánááhodooʼniid, Ánihidishnínígíí éí tʼáá aaníí; naalchiʼígaʼ danohłı̨́.
15 Díí bee nihééhodoozįįł; tʼáá Féro hinánígi átʼéego kodóó doo nihéédoohkah da; nihitsilí akéédę́ʼígíí tʼáá biłgo tʼéiyá nihéédoohkah.
16 Tʼáá nohłáʼígo ákǫ́ǫ́ náhodoołʼaałgo áádę́ę́ʼ nihitsilí bił nídoohtʼash; nihizaad nihééhodoozįįłígíí biniyé nihí tʼáá kǫ́ǫ́ awáalyaa shoojéeʼ doo. Tʼáá aaníinii daatsʼí nihiiʼ dahólǫ́; éí doodaiiʼ tʼáá Féro hinánígi átʼéego tʼáá aaníí naalchiʼí yeeʼ danohłı̨́.
17 Áádóó tááʼ yiską́ąjįʼ tʼáá ádzíłtso yah ahoʼdooʼnil.
18 Áádóó tágí jı̨́ı̨́ góneʼ Jóseph áhodííniid, Díí ádaahłaago tʼéiyá dahinohnáa doo, háálá shí Diyin God díínísin.
19 Diné tʼáá aaníígóó halneʼii danohłı̨́įgo bíniʼdii nihikʼis łaʼ tʼáá kǫ́ǫ́ awáalyaa sidáa doo. Nidi nihí tʼéiyá nihaʼáłchíní dichin danilíinii bichʼįʼ tłʼoh naadą́ą́ʼ nihidadoohééł.
20 Nihitsilí akéédę́ʼígíí áádę́ę́ʼ bił shaa noohkaigo índa tʼáá aaníígóó dahoołneʼ doo, áko doo dínóohnéeł da. Áko ákódadziidzaa.
21 Áko ádaʼahizhdooʼniid, Nihitsilí biniinaa tʼáá íiyisí ádidahodiiltʼiʼ lá; tiʼhooníihgo daníilʼı̨́įgo chʼééh nánihookąąhgo doo deísíiltsʼą́ąʼ da nítʼééʼ. Éí bąą kótʼéego nihichʼįʼ nidahwiiʼná.
22 Áádóó Rúben áhodííniid, Tʼáadoósh kódíshníigo nihichʼįʼ haasdzíiʼ da? Ashkii tʼááká haada daohłeʼ yíilaʼ; bąąhági ádaohłeʼ lágo, nihidííniid, nidi tʼáadoo dashisidootsʼą́ąʼ da. Éí bąą bidiłígíí biniinaa bá naniideeh.
23 Áko Jóseph hazaad yikʼidiʼyiitįįhgo doo hoł béédahózin da, háálá ataʼ halneʼí há ataʼ halneʼ.
24 Áko bitsʼą́ąjigo dashdiiyáago jíícha, áádóó baa nínáádzídzáago bichʼįʼ hanáádzoodzííʼ, áko Símiyan néidiiłtı̨́įgo tʼáá dahanááł beʼestłʼǫ́.
Jóseph bínaaíké Kéínan kéyahgóó anáákai
25 Ákohgo Jóseph ádííniid, Bidaʼazis biiʼ tłʼoh naadą́ą́ʼ hadadołbin, áádóó dabibéeso tʼóó biih nídahidoohnił, áádóó yistʼéí yikiin náákah dooleełígíí bá ádadoohłííł. Áko ákódajiilaa.
26 Áko tłʼoh naadą́ą́ʼ éí télii yił yikʼi nidaʼaztłʼǫ́ǫgo dah nídiikai.
27 Nítʼééʼ łaʼ nídaʼnjahgi hatélii baʼjíjááh biniyé hweʼazis dázhdííʼah; tʼah nítʼééʼ hweʼazis biiʼ habéeso sinilgo dziiłtsą́.
28 Áko hakʼisóó ábizhdííniid, Shibéeso shaa náʼnilgo sheʼazis biiʼ sinil lá. Áko bikʼee bił daayéeʼgo bitah dahoditłidgo ádaʼahidooʼniid, Haa lá hóótʼįįdgo Diyin God kónihiilaa lá?
29 Áko Kéínan kéyahdi hazhéʼé baa níjíkaigo áhoʼdoolʼįįdígíí bee bił dahojoolneʼgo ádajiní,
30 Kéyah binanitʼaʼí léiʼ tʼáá naʼníleʼdii nihichʼįʼ hahaasdzíiʼgo ánihidííniid, Kéyah hadaahsíidgo biniyé hádaahtʼı̨́ı̨́ lá.
31 Áko ádabidiiʼniid, Tʼáá aaníígóó halneʼii daniidlı̨́; doo naalchiʼí daniidlı̨́į da.
32 Nihí tʼááłáʼí nihizhéʼé biyeʼké naakitsʼáadah niiltʼéé nítʼééʼ; tʼááłáʼí éí ádin, áko tsʼídá akéédę́ʼígíí éí díí jı̨́ Kéínan kéyahdi bizhéʼé yił naaʼaash.
33 Áko éí kéyah binanitʼaʼí ánihidííniid, Diné tʼáá aaníígóó halneʼii danohłı̨́įgo díí bee shił bééhodoozįįł: kʼad nihikʼis łaʼ shaʼałkʼee sidáa doo; nihílááh nihaʼáłchíní dichin danilínígíí bichʼįʼ tłʼoh naadą́ą́ʼ nihidahidoohééł.
34 Áko nihitsilí akéédę́ʼígíí áádę́ę́ʼ bił shaa doohkah. Áko doo naalchiʼí danohłı̨́ı̨́góó nidi tʼáá aaníígóó halneʼii danohłı̨́įgo shił bééhodoozįįł. Áko índa nihikʼis nihaa nídeeshtééł áádóó kéyah biyiʼdóó nidaʼayołniih doo, nihidííniid.
35 Ákohgo hweʼazis dadzizghadgo diné tʼááłáʼí jinítínígo habéeso bikʼídaʼdeesdizígíí hwedaʼazis biyiʼ naastsooz lá. Áko hó áádóó hazhéʼé éí habéeso bikʼídaʼdeesdizígíí dadziiłtsą́ągo tʼóó nídadzisdzííd.
36 Hazhéʼé Jéíkab áhodííniid, Shaʼáłchíní shighadahisoohʼnil. Jóseph éí ádin; Símiyan ałdóʼ ádin. Áádóó kʼad Bénjamin bił dah náádoohkááh. Díidí tʼáá ałtso shikʼijįʼ daazlı̨́ı̨́ʼ.
37 Áko Rúben bizhéʼé áyidííniid, Doo nił baa náníshtʼáázhgóó shiyeʼ tʼáá áłah dííghą́ą́ł; shílákʼee hodííníʼą́ągo lá nił baa nídeeshtʼash ni.
38 Áko ádííniid, Shiyeʼ doo ákóyaa bił doohkah da, háálá bínaaí yę́ę ádin, áko tʼáá bí tʼéí yidziih. Áádóó wohkahgóó haada yidzaago, áko lá índa shitsiiʼ tʼáá íiyisí yiigaigo áádóó yíní biih néítłizhgo łeeh dashidoołtéeł ni.
