Genesis 44:1-34
44 Áádóó hakin yaa áhályáanii ábizhdííniid, Hééł tʼáá yídaneelʼánígi diné tʼáá ałtso bidaʼazis biiʼ chʼiyáán hadadidííłbı̨́ı̨́ł, índa dabibéeso bidaʼazis biih náhidííʼnił.
2 Áádóó béésh łigaii shibee adlání índa béeso yee tłʼoh naadą́ą́ʼ nayiisʼniiʼígíí ałdóʼ akéédę́ę́ʼ nilínígíí beʼazis biih díínił. Áko Jóseph áhodííniidígíí biʼjiilaa.
3 Áko hoosʼįįdgo diné áádóó dabitélii bił béédaʼiisniiʼ.
4 Áko kin haalʼáádę́ę́ʼ chʼíjíkaigo tʼáá áhánígóó jookahgo Jóseph bikin yaa áhályáanii áyidííniid, Nílááh, diné bikééʼ dínááh, áko bíínísáago ábididííniił, Haʼátʼéegoshąʼ yáʼátʼéhígi ánihiishłaa nidi nihí éí bąąhági ádashoołʼįįd?
5 Díí shinanitʼaʼí yee adlánígíí átʼé; éí yee náásgóó áhodooníiłii bił bééhózin. Kódaohdzaaígíí bee doo yáʼáshónígi ádaohdzaa, yidííniid.
6 Áko bízhnísáago díí saad bee bichʼįʼ hadzoodzííʼ.
7 Áko ádahodííniid, Haʼátʼéegoshąʼ nihinanitʼaʼí díí saad yee haadzííʼ. Ná nidaalʼaʼí tʼáá íiyisí doo ákódaoneʼ átʼée da.
8 Shoo, niheʼazis biiʼ béeso nídadiiʼnilígíí Kéínan kéyahdę́ę́ʼ nídashiijaaʼ, ákoshąʼ haʼátʼíí biniyé ninanitʼaʼí bighandę́ę́ʼ béésh łigaii áádóó óolada dadíníitʼı̨́ı̨́ł?
9 Ná nidaalʼaʼí tʼáá háí shı̨́ı̨́ neiʼáhígíí hániʼdii bidiʼyoolyééł; nihí ałdóʼ nihinanitʼaʼí yá nidaalteʼ dadiidleeł.
10 Áko ádííniid, Tʼáá ádadohnínígi átʼée doo; tʼáá neiʼáhígíí éí shinaalteʼ doo; nihí éí doo nihikʼíhátʼáah da doo.
11 Áko tʼáá ádzíłtso tsı̨́įłgo hodaʼazis hadadadziizyı̨́įgo ąą ádajiilaa.
12 Áko bíká nikizhʼdiichʼidgo alą́ąjįʼ naagháhígíí bee hodeeshzhiizhgo akéédę́ę́ʼ naagháhígíí bee nihoolzhiizh, áko Bénjamin beʼazis biiʼdę́ę́ʼ bee adlání hanáátʼą́.
13 Ákohgo dahaʼééʼ nidadziizǫ́ǫzgo tʼáá ádzíłtso dahayéél dahatélii bikʼi dah nidadzisʼnilgo kin haalʼáágóó nátʼą́ą́ʼ níjíkai.
14 Áko Júdah hakʼis bił Jóseph bighandi níjíkaigo tʼah tʼáá ákwii lá, áádóó bichʼįʼ yaa ánáádadziidzaa.
15 Áko Jóseph áhodííniid, Díísh haa daohtʼįįd lá? Daʼ doósh nihił béédahózin da, diné shígi átʼéii náásgóó áhodooníiłii bił bééhózin.
16 Áko Júdah ádííniid, Shinanitʼaʼí, haʼátʼíishąʼ dabididiiʼniił? Haʼátʼíishąʼ bee hadadiidzih? Índa haʼátʼéegoshąʼ doo nihidahodiitʼiʼgóó bikááʼ ídadiʼdiilnííł? Diyin God éí ná nidaalʼaʼí doo ákwii ádáátʼįįdígíí bił bééhoozin. Shoo, nihí índa bee adlání hatsʼą́ą́ʼ hanáátʼánígíí hoł shinanitʼaʼí bá nidaalteʼ dasiidlı̨́ı̨́ʼ.
17 Áko ádííniid, Ákódeeshníłígíí tʼáá íiyisí doo óoshneʼ átʼée da. Bee adlání bitsʼą́ą́ʼ hanáátʼánígíí éí shinaalteʼ jílı̨́į doo. Áko nihí tʼéiyá nihił dahózhǫ́ǫgo nihizhéʼé bichʼįʼ nídoohkah.
Júdah éí Bénjamin yichʼą́ą́h náʼookąąh.
18 Ákohgo Júdah hwíighahgi niníyáago ádííniid, Shoo, shinanitʼaʼí, tʼáá shǫǫdí, ná naalʼaʼí yóhółníihii tʼááłáhígo bee nichʼįʼ haasdziih. Áádóó ná naalʼaʼí tʼáadoo bichʼįʼ náháchįʼí, háálá Féro bił ahiníłtʼé.
19 Shinanitʼaʼí, ná nidaalʼaʼígíí nabídííníłkidgo ádííníniid, Daʼ nihizhéʼéésh hólǫ́, índa nihitsilíísh hólǫ́.
20 Áko shinanitʼaʼí ádandiiʼniid, Nihizhéʼé hólǫ́; tʼáá hazhóʼó haastih, índa haastihgo bá yizhchínígíí éí tʼah ániid naaghá; bínaaí ádin, áko bí tʼéí bimá yę́ę yitsʼą́ą́dóó yidziih, áko bizhéʼé ayóóʼábóʼní.
21 Áko ná nidaalʼaʼí daniidlíinii ánihidííníniid, Hwiideestsééł biniyé bił shaa nohkááh.
22 Áko shinanitʼaʼí ádandiiʼniid, Ashkii bizhéʼé doo yitsʼágháah da, háálá bizhéʼé yitsʼáníyáago bizhéʼé dadootsaał.
23 Nihitsilí doo bił noohkaigóó tʼéiyá doo náádashiidoołtséeł da, diníigo ná nidaalʼaʼí bichʼįʼ háínídzíiʼ niʼ.
24 Ákohgo shizhéʼé ná naalʼaʼí nilíinii baa nániikaigo shinanitʼaʼí áníinii bee bił dahwiilneʼ.
25 Áko nihizhéʼé ánáánihidooʼniid, Nihílááh, náádóhkáahgo chʼiyáán áłchʼı̨́ı̨́dígo nihá nináádahołniih.
26 Áko ádadiiʼniid, Doo ákóyaa dookááh átʼée da. Nihitsilí akéédę́ʼígíí biłgo tʼéiyá ákóyaa diikah, háálá nihitsilí akéédę́ę́ʼ nilínígíí tʼáadoo bił niikaigóó éí diné doo náádeidiiltséeł da.
27 Áko ná naalʼaʼí nihizhéʼé ánihidííniid, Nihił béédahózingo sheʼasdzą́ą́ ashiiké naaki shá yishchı̨́.
28 Áko łaʼ shitsʼą́ą́ʼ yóóʼííyá, dííniid, tʼáá aaníí nibiʼdiisdláád lá, áko tʼáadoo néiiłtsą́ą da.
29 Áádóó díidí ałdóʼ bił dah náádadoohkaigo haada yidzaago shitsiiʼ tʼáá íiyisí yiigaigo áádóó yíní biih néítłizhgo dasétsą́ągo łeeh dashidoołtéeł ni.
30 Éí bąą ná naalʼaʼí shizhéʼé baa nánísdzáago ashkii doo nihitah nádzáágóó éí tʼáá íiyisí ádíyóltąʼii nilı̨́,
31 ákohgo doo nihitah nádzáágóó bił bééhoozingo dadootsaał. Áko ná nidaalʼaʼí bizhéʼé bitsiiʼ tʼáá íiyisí yiigaigo áádóó yíní yiih náátłizhgo dadootsaałgo łeeh deidoołtééł.
32 Háálá ná naalʼaʼí bizhéʼé kwíidííniid yę́ędą́ą́ʼ ání, Ashkii bá naashtłizh doo; tʼáadoo bił naa náníshtʼáázhgóó hoolʼáágóó shizhéʼé shikʼíháʼáah doo.
33 Éí bąą tʼáá shǫǫdí, shinanitʼaʼí binaalteʼ nishłı̨́į doo biniyé ná naalʼaʼí bíniʼdii ashkii yitsáskʼehgi sidáa doo, áko ashkii bíniʼ bínaaíké yił nihinákááh.
34 Ashkii tʼáágéedgoshąʼ haash yitʼéego shizhéʼé bichʼįʼ nídeeshdááł. Doodago éí bąąhági átʼéii shizhéʼé bikʼi hwiidooleełígíí binásdzid.
