Genesis 5:1-32
5 Ádam baʼáłchíní náás daʼahílchíihii díí naaltsoos biiʼ baa haneʼ. Diyin God éí diné ájiilaadą́ą́ʼ tʼáá honáłtʼéego ájiilaa.
2 Bikąʼii áyiilaa áádóó biʼáadii ałdóʼ áyiilaago yikʼijisdliʼ, áko áhoʼdiilyaa bijı̨́ı̨́dą́ą́ʼ Ádam yee hóózhiʼ.
3 Ádam jiináago neeznádiindóó baʼaan tádiin honááhaigo hayeʼ nááhásdlı̨́ı̨́ʼ; tʼáá honáłtʼéego índa tʼáá ájítʼéhígi átʼéego há náánázhchı̨́; éí Seth bee jíízhiʼ.
4 Ádam hwíiníłkánígíí éí Seth há yizhchı̨́ı̨́dóó bikʼijįʼ tseebíidi neeznádiin honináánááhaígíí biyiʼ hayeʼké índa hatsiʼké há niheezhchı̨́.
5 Áko Ádam hwíídíiską́ą́dóó jiináago náhástʼéidi neeznádiindóó baʼaan tádiin honááhaigo dadziztsą́.
6 Seth jiináago neeznádiindóó baʼaan ashdlaʼ honááhaigo Íínas há yizhchı̨́.
7 Seth jiináago Íínas há yizhchı̨́ı̨́dóó bikʼijįʼ tseebíidi neeznádiindóó baʼaan tsostsʼid honínáánááhaígíí biyiʼ hayeʼké índa hatsiʼké há niheezhchı̨́.
8 Áko Seth hwíídíiską́ą́dóó náhástʼéidi neeznádiindóó baʼaan naakitsʼáadah honááhaigo dadziztsą́.
9 Íínas jiináago náhástʼédiin honááhaigo Kéínan há yizhchı̨́.
10 Íínas jiináago Kéínan há yizhchı̨́ı̨́dóó bikʼijįʼ tseebíidi neeznádiindóó baʼaan ashdlaʼáadah honínáánááhaígíí biyiʼ hayeʼké índa hatsiʼké há niheezhchı̨́.
11 Áko hwíídíiską́ą́dóó náhástʼéidi neeznádiindóó baʼaan ashdlaʼ honááhaigo dadziztsą́.
12 Kéínan jiináago tsostsʼidiin honááhaigo Mahéílalíyel há yizhchı̨́.
13 Kéínan jiináago Mahéílalíyel há yizhchı̨́ı̨́dóó bikʼijįʼ tseebíidi neeznádiindóó baʼaan dízdiin honínáánááhaígíí biyiʼ hayeʼké índa hatsiʼké há niheezhchı̨́.
14 Áko Kéínan hwíídíiską́ą́dóó náhástʼéidi neeznádiindóó baʼaan neeznáá honááhaigo dadziztsą́.
15 Mahéílalíyel jiináago hastą́diindóó baʼaan ashdlaʼ honááhaigo Jííred há yizhchı̨́.
16 Mahéílalíyel jiináago Jííred há yizhchı̨́ı̨́dóó bikʼijįʼ tseebíidi neeznádiindóó baʼaan tádiin honínáánááhaígíí biyiʼ hayeʼké índa hatsiʼké há niheezhchı̨́.
17 Áko Mahéílalíyel hwíídíiską́ą́dóó tseebíidi neeznádiindóó baʼaan náhástʼédiindóó baʼaan ashdlaʼ honááhaigo dadziztsą́.
18 Jííred jiináago neeznádiindóó baʼaan hastą́diindóó baʼaan naaki honááhaigo Íínak há yizhchı̨́.
19 Jííred jiináago Íínak há yizhchı̨́ı̨́dóó bikʼijįʼ tseebíidi neeznádiin honínáánááhaígíí biyiʼ hayeʼké índa hatsiʼké há niheezhchı̨́.
20 Áko Jííred hwíídíiską́ą́dóó náhástʼéidi neeznádiindóó baʼaan hastą́diindóó baʼaan naaki honááhaigo dadziztsą́.
21 Íínak jiináago hastą́diindóó baʼaan ashdlaʼ honááhaigo Miithúzelah há yizhchı̨́.
22 Íínak jiináago Miithúzelah há yizhchı̨́ı̨́dóó bikʼijįʼ Diyin God bił jooʼashgo táadi neeznádiin honínáánááhaígíí biyiʼ hayeʼké índa hatsiʼké há niheezhchı̨́.
23 Íínak hwíídíiską́ą́dóó táadi neeznádiindóó baʼaan hastą́diindóó baʼaan ashdlaʼ honááhai.
24 Áko Íínak tʼáá Diyin God bił jooʼashgo nihokáaʼgi doo hwééhoozin da, háálá Diyin God nááhodiidlá.
25 Miithúzelah jiináago neeznádiindóó baʼaan tseebídiindóó baʼaan tsostsʼid honááhaigo Léímek há yizhchı̨́.
26 Miithúzelah jiináago Léímek há yizhchı̨́ı̨́dóó bikʼijįʼ tsostsʼidi neeznádiindóó baʼaan tseebídiindóó baʼaan naaki honínáánááhaígíí biyiʼ hayeʼké índa hatsiʼké há niheezhchı̨́.
27 Miithúzelah hwíídíiską́ą́dóó náhástʼéidi neeznádiindóó baʼaan hastą́diindóó baʼaan náhástʼéí honááhaigo dadziztsą́.
28 Léímek jiináago neeznádiindóó baʼaan tseebídiindóó baʼaan naaki honááhaigo hayeʼ há yizhchı̨́.
29 Éí Nóah bee jíízhiʼgo ázhdííniid, Díí lą́ą nideiilnishgo índa nihílaʼ bee yéego nideiilnishgo nihikʼi hałtaʼgo ánihidoolííł, háálá Bóhólníihii éí niʼ hóyéeʼgo yá haadzííʼ.
30 Léímek jiináago Nóah há yizhchı̨́ı̨́dóó bikʼijįʼ ashdladi neeznádiindóó baʼaan náhástʼédiindóó baʼaan ashdlaʼ honínáánááhaígíí biyiʼ hayeʼké índa hatsiʼké há niheezhchı̨́.
31 Léímek hwíídíiską́ą́dóó tsostsʼidi neeznádiindóó baʼaan tsostsʼidiindóó baʼaan tsostsʼid honááhaigo dadziztsą́.
32 Nóah éí ashdladi neeznádiin honááhai. Áko Shem áádóó Ham índa Jéífeth há niheezhchı̨́.
