Genesis 7:1-24
7 Ákohgo Bóhólníihii éí Nóah áyidííniid, Ni áádóó bił dah yíkahii tʼáá ánółtso kʼad tsinaaʼeeł biih wohkááh, háálá tʼáá ákogi ánítʼéego díí oochíłígíí bitahgi nééhonisin.
2 Naaldlooshii daadą́ą dooleełii tʼáá ałtso bitahdóó bikąʼii índa biʼáadii tsostsʼid níjaaʼgo bił yah ahidííkah; naaldlooshii doo daadą́ą da dooleełii éí bikąʼii índa biʼáadii naaki níláago bił yah ahidííkah.
3 Nidaatʼaʼii bikąʼii índa biʼáadii ałdóʼ tsostsʼid níjaaʼgo bił yah ahidííkah; nahasdzáán bikááʼgóó tʼáá átʼéé nítʼééʼ dahináanii ałʼąą ádaatʼéii tʼáá daʼahílchíih doo biniyé baa áhólyą́ą doo.
4 Áko tsostsʼid yiską́ągo shizaad kʼehgo dízdiin jı̨́ áádóó dízdiin tłʼééʼ nahałtin doo, áko tʼáá ałtso dahináanii ádaashłaaígíí nahasdzáán bikáaʼgi ádeeshdįįł.
5 Áko Nóah éí Bóhólníihii hachʼįʼ yee haadzíiʼii tʼáá ałtso biʼjiilaa.
6 Nóah éí hastą́ądi neeznádiin binááhaigo nahasdzáán bikáaʼgi tó yíląąd.
7 Tó dooląąłígíí biniinaa Nóah áádóó hayeʼké áádóó hweʼasdzą́ą́ índa hayeʼké bidaʼasdzą́ą́ tʼáá ádzíłtso tsinaaʼeeł biih jookai.
8 Naaldlooshii daadą́ą dooleełii áádóó naaldlooshii doo daadą́ą da dooleełii áádóó nidaatʼaʼii índa nihokáaʼgi nidaaʼnaʼii tʼáá ałtso
9 bikąʼii índa biʼáadii naaki níláago Nóah yichʼįʼ tsinaaʼeeł yiiʼ yah aheeskai; Diyin God éí Nóah yichʼįʼ haadzíiʼii yikʼeh ádaadzaa.
10 Áádóó ákódzaago tsostsʼid yiską́ą́dóó bikʼijįʼ nahasdzáán bikáaʼgi tó biʼniiląąd.
11 Áko Nóah hastą́ądi neeznádiin binááhaigo áádóó naaki nídízííd binih tsostsʼidtsʼáadahgóó yoołkáałgo tsʼídá éí bijı̨́ı̨́dą́ą́ʼ tónteel biiʼdę́ę́ʼ tó hadadziisxaal, áádóó yá ąą ádaadzaago tó dadeeshchxosh.
12 Áko nahasdzáán bikáaʼgi nahałtingo dízdiin jı̨́ índa dízdiin tłʼééʼ azlı̨́ı̨́ʼ.
13 Nihihoníłtą́ bijı̨́ı̨́dą́ą́ʼ Nóah áádóó hayeʼké Shem áádóó Ham índa Jéífeth áádóó Nóah beʼasdzą́ą́ áádóó hayeʼké bidaʼasdzą́ą́ táltʼéego tsinaaʼeeł biih jookai.
14 Tʼáá ádzíłtso áádóó naaldlooshii ałʼąą ádaatʼéii áádóó alı̨́ı̨́ʼ ałʼąą ádaatʼéii áádóó nihokááʼ nidaaʼnaʼii ałʼąą ádaatʼéii índa nidaatʼaʼii ałʼąą ádaatʼéii
15 bitsʼíís dahináago nídadidzihii nináneelʼą́ąjįʼ naaki níláago Nóah yichʼįʼ tsinaaʼeeł yiiʼ yah aheeskai.
16 Diyin God éí Nóah yichʼįʼ haadzíiʼii bikʼehgo yah adahaaskaígíí éí bitsʼíís dahólóonii ałʼąą ádaatʼéii tʼáá ałtso bitahdóó bikąʼii índa biʼáadii yah aakaii tʼáá yił Bóhólníihii hadádiʼníłkaal.
17 Dízdiin jı̨́ nahasdzáán bikááʼgóó tó de anoolʼąął, áko tó tʼáá íiyisí de adínéesʼąądgo tsinaaʼeeł dah naaʼeeł silı̨́ı̨́ʼ.
18 Áádóó tʼah biláhígo ayóó átʼéego tó de náádíʼnéesʼąądgo nahasdzáán ałtso yikʼi diilkǫʼ, áko tsinaaʼeeł táłkááʼ dah diiʼéél.
19 Tó alááh noolʼąądgo nahasdzáán ałtso yikʼi diilkǫʼ áádóó dził aghádaazʼá yę́ę yá biyaagi tʼáá níłtéél nítʼééʼ ałtso tó bikʼi dadiilkǫʼ.
20 Naadiin naakidóó nááʼáłnííʼ ké silá ánízáádgóó tó néésʼąądgo dził ałtso yikʼi diilkǫʼ.
21 Áko nahasdzáán bikáaʼgi bitsʼíís hólǫ́ǫgo naaldeehii tʼáá ałtso: éí nidaatʼaʼii áádóó alı̨́ı̨́ʼ áádóó naaldlooshii áádóó nihokááʼgóó nidaaʼnaʼii índa diné ałdóʼ tsʼídá ałtso tó ábísdįįd;
22 nídídzihii nináneelʼą́ąjįʼ nihokááʼgóó naasdeeʼ yę́ę tsʼídá ałtso tó ábísdįįd.
23 Áko niʼ bikáaʼgi dahináanii ałtso tó ábísdįįd: diné áádóó naaldlooshii áádóó nidaaʼnaʼii índa nidaatʼaʼii éí nahasdzáán bikáaʼgi ábiʼdisdįįd, áko tsinaaʼeeł biyiʼ góneʼ Nóah hoł hólónígíí tʼéiyá tʼáá bił dzoodzííʼ.
24 Tó éí nahasdzáán tʼáá yikʼi dilkǫǫhgo neeznádiindóó baʼaan ashdladiin yiską́.
