Genesis 8:1-22
8 Áko índa Diyin God éí Nóah yénálniih, índa naaldeehii tʼáá ałtso áádóó alı̨́ı̨́ʼ tʼáá ałtso tsinaaʼeeł yiiʼ hólóonii tʼáá hoł yénálniih. Áko Diyin God éí nahasdzáán bikáaʼgi níyolgo áyiilaa índa tó yaa nídíʼnéesʼąąd;
2 tónteel biiʼdę́ę́ʼ índa yá biiʼdę́ę́ʼ tó dadeeshchxosh yę́ę dánéidiʼníłkaal, áádóó wódahdę́ę́ʼ nahałtin yę́ę áhodiilzeeʼ;
3 nahasdzáán bikáaʼgi tó yaa náʼnoolʼąął. Neeznádiindóó baʼaan ashdladiin yiską́ągo tó yaa anáʼnoolʼąąd.
4 Áko tsostsʼid nídízííd binih tsostsʼidtsʼáadahgóó yoołkáałgo Áraratgi dził naaznil bikáaʼdi tsinaaʼeeł dah názʼéél.
5 Tó tʼáá yaa náʼnoolʼąąłgo neeznáá nídeezid, áko neeznáá nídízííd binih łaʼa jı̨́ı̨́ góneʼ dził bílátahí daatʼı̨́ daazlı̨́ı̨́ʼ.
6 Áádóó ákódzaago dízdiin yiską́ągo Nóah éí tsinaaʼeeł bitsésǫʼ ájiilaii ąą ájiilaago
7 gáagii chʼízhníłtʼeʼ, áko niʼ náhooltseijįʼ tʼáá áadi tádítʼááh.
8 Hasbídí ałdóʼ chʼízhníłtʼeʼ; niʼ bikááʼgóó tó daatsʼí yaa anáʼnoolʼąąd jinízingo bee bééhodoozįįłígíí biniyé chʼízhníłtʼeʼ,
9 nidi hasbídí tʼáadoo nódaahgigóó hachʼįʼ tsinaaʼeeł yaa nátʼaʼ, háálá nahasdzáán bikááʼgóó tʼáá átʼéé nítʼééʼ tó. Áko tsinaaʼeeł biyiʼdę́ę́ʼ chʼízhdeelniiʼgo yah aníjííłtı̨́.
10 Áádóó tʼáá tsinaaʼeeł yiiʼ sidáago tsostsʼid náánéíską́ągo índa tsinaaʼeeł biyiʼdóó hasbídí chʼínáázhníłtʼeʼ,
11 áko iʼííʼą́ągo hasbídí éí áliv bitʼąąʼ kʼélghazhgo yoołtsahgo hoł yah anáátʼaʼ, ákohgo Nóah éí niʼ bikáaʼgi tó yaa anáʼnoolʼąądgo hoł bééhoozin.
12 Áádóó tsinaaʼeeł tʼáá yiiʼ sidáago tsostsʼid náánéíską́, áko índa hasbídí chʼínáázhníłtʼeʼgo tʼáadoo nátʼaʼ da.
13 Éí ákódzaago Nóah hastą́ądi neeznádiindóó baʼaan tʼááłáʼí honááhaigo áłtsé nídízííd binih łaʼa jı̨́ı̨́ góneʼ niʼ bikáaʼgi tó anásdįįd, áko Nóah éí tsinaaʼeeł bikááʼdę́ʼígíí ąą ájiilaago jidééʼı̨́ı̨́ʼ, áko niʼ bikááʼ tʼahdii náháltsááh lá.
14 Áádóó naaki nídízííd binih naadiin tsostsʼidgóó yoołkáałgo ałtso náhooltseii.
15 Áko Diyin God éí Nóah áyidííniid,
16 Tsinaaʼeeł biiʼ haohkááh, ni áádóó neʼasdzą́ą́ áádóó niyeʼké índa bidaʼasdzą́ą́ ałdóʼ.
17 Bitsʼíís dahináanii tsʼídá tʼáá ałtso chʼínínííł; nidaatʼaʼii áádóó alı̨́ı̨́ʼ índa nihokáaʼgi nidaaʼnaʼii tʼáá ałtso, áko niʼ bikáaʼgi ahándaʼiiłchíihgo nahasdzáán bikáaʼgi kʼeeʼąą nootʼı̨́ı̨́ł dooleeł.
18 Áko Nóah áádóó hweʼasdzą́ą́ áádóó hayeʼké índa bidaʼasdzą́ą́ bił chʼíjíkai.
19 Naaldlooshii tʼáá ałtso áádóó nidaaʼnaʼii tʼáá ałtso áádóó nidaatʼaʼii tʼáá ałtso índa nahasdzáán bikáaʼgi naaldeehii ałʼąą ádaatʼéii tsinaaʼeeł biiʼdę́ę́ʼ chʼéheeskai.
20 Áko Nóah éí Bóhólníihii bichʼįʼ náázhdiʼyoołnih biniyé bikááʼ nááʼiiniihí ájiilaa, áádóó alı̨́ı̨́ʼ daadáanii łaʼ, áádóó nidaatʼaʼii daadáanii łaʼ éí didlidgo nááhániihii bikááʼ nááʼiiniihí bikáaʼjįʼ náádziisniiʼ.
21 Áko Bóhólníihii éí náájiiłniihígíí łikání halchingo yishchą́ąʼgo Bóhólníihii bijéí biyiʼdi ádííniid, Diné haniinaa niʼ doo hóyéeʼgo bá hanáádeesdzih da, háálá diné tʼáá áłchíní nilı̨́ı̨́dę́ę́ʼ bijéí biiʼdę́ę́ʼ doo yáʼátʼéehii bił ádaatʼı̨́; hináanii nináneelʼą́ąjįʼ ásíłdįįdígi átʼéego hináanii doo ánáádeeshdįįł da.
22 Nahasdzáán hólǫ́ǫgi bikááʼ kʼéédaʼdilyéehgo baa náhwiilzhíish doo, índa nidaʼntʼąʼ doo áádóó hakʼaz índa hado, shı̨́ índa hai, jı̨́ índa tłʼééʼ, éidí doo nidootʼih da.
