Genesis 9:1-29
9 Áko Diyin God éí Nóah áádóó biyeʼké yikʼijisdliʼgo áyidííniid, Náásgóó nihaʼáłchíní náhoodleeł doo; kʼeeʼąą dínóhtʼįįhgo nahasdzáán bikááʼ nihináánółtʼeeh.
2 Nahasdzáán bikáaʼgi naaldlooshii tʼáá ałtso áádóó nidaatʼaʼii tʼáá ałtso áádóó nahasdzáán bikááʼ naaldeehii tʼáá ałtso índa táyiʼ naaldeehii tʼáá ałtso ałdóʼ nihéédaaldzid doo, índa nihikʼee biyandahalyiz doo, áko bee nihídahólníih dooleeł.
3 Naaldeehii nináneelʼą́ąjįʼ nihichʼiyąʼ doo, naniseʼ daadáanii nihaa diníʼánígi átʼéego nihaa dinishʼaah.
4 Nidi atsįʼ éí dił tʼáá biiʼ hólǫ́ǫgo doo dadoohsı̨́įł da, atsʼíís éí dił yee hiná.
5 Nihidił bee dahinohnáanii nihitsʼádaazlı̨́įgo ánihiilaii tsʼídá tʼáá kʼééhodideeshdlíłí; naaldlooshii éí diné yiyiisxı̨́įgo éí diyoolyéełgo bee hwiideeshʼaał, doodaiiʼ diné dziisxı̨́įgo hodiʼyoolyéełgo bee hwiideeshʼaał; tʼáá háiida hakʼis dziisxı̨́įgo hodiʼyoolyéełgo bee hwiideeshʼaał.
6 Tʼáá háiida diné bidił bitsʼánílı̨́ ájiilaii daaztsą́ągo hó ałdóʼ hadił hatsʼánílı̨́ áhodiʼdoolníiłgo dazdootsaał, háálá Diyin God éí diné tʼáá bináłtʼéego áyiilaa.
7 Áádóó nihí nihaʼáłchíní nídahoodleełgo kʼeeʼąą noohtʼı̨́įł leʼ, índa nahasdzáán bikáaʼgi kʼeeʼąą dínóhtʼįįhgo bilááh nááhdleeł leʼ.
8 Áko Diyin God kóníigo Nóah áádóó biyeʼké yichʼįʼ haadzíiʼgo ání,
9 Shoo, shí lą́ą tʼáá shí, nihí áádóó nihadaʼáłchíní náás daʼahílchíihii tʼáá bił bohoníłdzilgo nihił ałhaʼdinishtʼaah.
10 Áádóó hináanii nináneelʼą́ąjįʼ éí nidaatʼaʼii áádóó alı̨́ı̨́ʼ índa nihokááʼ naaldeehii tʼáá ałtso éí tsinaaʼeeł biyiʼdę́ę́ʼ bił chʼííníkaígíí tʼáá ałtso ałdóʼ bił ałhaʼdinishtʼaah.
11 Áko bohoníłdzilgo nihił ałhaʼdideeshtʼááł; bitsʼíís dahólóonii tʼáá ałtso éí doo tó bee ánáádooldįįł da; doo nidi nahasdzáán bikáaʼgi tó ánáábidoołdįįł da.
12 Áádóó Diyin God ádííniid, Ni áádóó dahináanii nináneelʼą́ąjįʼ índa náásgóó daʼahílchíihii tʼáá ałtso nihił ałhaʼdinishtʼaah; díí bee ééhózin doo;
13 éí kʼos biyiʼ shináátsʼíílid ninílá, áko shí áádóó nahasdzáán bił nihitaʼgi ahaʼdeetʼą́ągo bee bééhózin doo.
14 Ííshją́ą́ kótʼée doo, nahasdzáán bikáaʼgi kʼos ánáshʼįįhgo biyiʼ náátsʼíílid néiltséeh dooleeł,
15 áko shí lá índa ni lá áádóó bitsʼíís dahináanii nináneelʼą́ąjįʼ nihił ahadaʼdiʼnishtʼáanii bénáshniih doo, áko tó nídaadląąhgo bitsʼíís dahólóonii tʼáá ałtso doo tó áńdabiłdįįh da doo.
16 Kʼos biyiʼ náátsʼíílid ninádiłgo náníshʼįįh doo, áko Diyin God áádóó nahasdzáán bikáaʼgi bitsʼíís dahináanii nináneelʼą́ąjįʼ hoolʼáágóó bił ahadiʼnishtʼą́ągo bénáshniih doo.
17 Áádóó Diyin God éí Nóah ánéídooʼniid, Díidí shí áádóó nahasdzáán bikáaʼgi bitsʼíís dahináanii tʼáá ałtso nihitaʼgi bił ahadiʼnishtʼą́ągo bee bééhózinii átʼé.
Nóah áádóó biyeʼké
18 Nóah biyeʼké éí tsinaaʼeeł biyiʼdę́ę́ʼ chʼékaígíí éí Shem áádóó Ham índa Jéífeth ádaatʼı̨́. Áko Ham éí Kéínan bizhéʼé jílı̨́.
19 Díí táltʼéego Nóah biyeʼké danilı̨́; éí bitsʼą́ą́dóó nahasdzáán bikááʼgóó tʼáá átʼéé nítʼééʼ diné kʼeeʼąą náádínéestʼą́.
20 Nóah éí kʼéédídléehii dzizlı̨́ı̨́ʼ, áko chʼil naʼatłʼoʼii kʼizhdíílá.
21 Áko wáin joodlą́ąʼgo hoł honiiłdoi, áko haníbaal góneʼ haʼééʼ hazhdiiltsoozgo tʼáá jilchíʼígo dziztı̨́.
22 Nítʼééʼ Ham éí Kéínan bizhéʼé jílíinii hazhéʼé tʼáá łichíʼígo sitı̨́įgo dziiłtsą́, áko tłʼóoʼdi hakʼisóó bił hojoolneʼ.
23 Áko Shem índa Jéífeth beeldléí hataʼgi hawosjįʼ naníbaalgo tʼą́ąjigo yah ajííʼáázh, áko hazhéʼé tʼáá łichíʼígo sitı̨́įgo bikʼídzístiʼ, áko bitsʼą́ąjįʼ haniiʼgo hazhéʼé tʼáá łichíʼígo sitínígíí tʼáadoo jinééłʼı̨́įʼ da.
24 Áko Nóah bił énáhoosdzingo hayeʼ akéédę́ʼígíí áhóółʼįįdígíí hoł bééhoozingo
25 ázhdííniid,
Kéínan hóyéeʼgo há haʼoodzííʼ;hakʼisóó binaalteʼ jílı̨́į doo.
26 Áádóó ánáázhdooʼniid,Shem biDiyin God Bóhólníihii baa haʼniih;hániʼdii Kéínan hanaalteʼ doo.
27 Diyin God éí Jéífeth agháago ayóó átʼé íidoolííł,áko Shem dabiníbaal góneʼ kééhojitʼı̨́į doo;Kéínan éí hanaalteʼ doo.
28 Tó nahwéskaidóó bikʼijįʼ Nóah táadi neeznádiindóó baʼaan ashdladiin binínáánááhai.
29 Áko Nóah bíídíiską́ą́dóó náhástʼéidi neeznádiindóó baʼaan ashdladiin binááhaigo daaztsą́.
