Habakkuk 1:1-17
1 Habákak éí Diyin God yá halneʼii jílíinii hanaagóó áhootʼéii baa ákozniizı̨́ı̨́ʼ.
2 Bóhólníihii nílíinii, haash nízáagi chʼééh nánooshkąąhgo doo shíísíníłtsʼą́ąʼ da doo? Doodaiiʼ tʼáá naʼníleʼdii áhooníiłii biniinaa nánooshkąąhgo doósh tʼáá kʼad yisdáʼíínínil da?
3 Haʼátʼíishąʼ biniyé doo ákwii ádaatʼéii yishʼı̨́įgo áshiinilaa áádóó doo yáʼáshóonii níshʼı̨́įgo áshíínísin? Jó, nidaʼiiłchxǫǫh índa tʼáá naʼníleʼdii áhooníiłii tʼéí shinááł baa ooldah; ahiníʼdiiltłáád áádóó ałghaʼditʼááh baa ooldah.
4 Éí bąą bee hazʼáanii doo biʼólzin da, áádóó doo tsʼídá ákóneʼ átʼéego ánihótʼááł átʼée da. Háálá doo yáʼádaashóonii éí tsʼídá tʼáá ákwii ádaatʼéii yináhookah, éí bąą tʼóó dzólníígóó ándahwiitʼaah.
Kaldíya dineʼé éí Júdah dineʼé atíidoolííł
5 Ałʼąą dineʼé bitahgóó dadínóhʼı̨́įʼgo, dooládóʼ da! Ayóó átʼéego ádahooníiłii tʼáá íiyisí bikʼee tʼóó nihił adahayóí, háálá níyoołkááł biyiʼ naanish baa naasháii, azhą́ éí bee nihił hóóneʼ nidi, doo deidoohdląął da.
6 Háálá Kaldíya dineʼé nídahidiikáahgo ádeeshłííł, jóʼakon; éí dineʼé bikʼedaʼíyéeʼii índa ee nidahodilzhǫʼii danilı̨́įgo kéyahgóó dabighan doo biniyé tʼáadoo daabíiʼii yichʼįʼ nídahidiibáahgo nidayiiłnée doo.
7 Tʼóó báádahadzid índa bikʼedaʼíyééʼ. Yee á nidahwiiʼaahii índa yee bídahólníhígíí tʼéí tʼáá bí yaa deíkááh.
8 Náshdóítsoh daalkizhii dadilwoʼígíí bilááh átʼéego dabilı̨́ı̨́ʼ ayóó ádeídóolwoʼ; eʼeʼáahgo mąʼiitsoh hashké daniidzįįhígíí bilááh átʼéego hashké dandzin. Bisiláo łı̨́ı̨́ʼ yee nidaabaahii tʼáá nízaadę́ę́ʼ łı̨́ı̨́ʼ bił yijah. Bisiláo łı̨́ı̨́ʼ yee nidaabaahii atsági átʼéego yidooyı̨́įłii yichʼįʼ nídiilwoʼgo yił haatʼahígi átʼéego naaldeeh.
9 Haʼaʼaahdę́ę́ʼ deeyolígi átʼéego tʼáá naʼníleʼdii tʼóó báhádzidgo nidahakááh índa séigi ánéelą́ąʼgo yisnááh áłah ádeilééh.
10 Aláahgo naatʼáanii danilíinii tʼóó yaa daadloh áádóó aláahgo bídahólníihii tʼóó yá nidahałtʼiʼ. Bineʼ naʼadziʼ bił nidahazʼáanii tʼóó yaa daadloh, háálá łeezh bíilkʼidgo ádeileʼgo deiłné.
11 Níyol nahalingo łahjigo ádooníiłgo chʼídookah; bihodiitʼiʼii dineʼé danilı̨́; tʼáá bí bibee adziilii tʼéí bidiyin ádayósin.
Habákak éí Bóhólníihii yichʼįʼ saad nááhółǫ́
12 Bóhólníihii shiDiyin God, ni tʼéiyá shiDiyin nílíinii, hoolʼáádę́ę́ʼ honílǫ́. Doo dadíníiʼnéeł da. Bóhólníihii nílíinii, atídanihiłʼı̨́į doo biniyé náhínílááʼ. Diyin God ayóó ábóodziilii nílíinii, bee hashtʼenináʼdooldah biniyé hashtʼeinilaa.
13 Ninááʼ diyingo bąą tʼóó baaʼihii níníłʼı̨́įgo doo bohónéedzą́ą da áádóó doo yáʼáshóonii doo níníłʼı̨́į da; ákoshąʼ haʼátʼéego diné indahagizii bichʼoníʼní índa diné doo yáʼádaashóonii bilááh átʼéego diné tʼáá ákogi átʼéii ádayoołdįįłgo tʼóó dííníłhéél?
14 Haʼátʼéegoshąʼ tónteel biiʼ łóóʼ naaldeehígi átʼéego áádóó nidaaʼnaʼii binanitʼaʼí bee ádin nahalingo diné íinilaa?
15 Kaldíya dineʼé éí biłóóʼ bee hahadleehí yee ałtso hadayiileeh; biłóóʼ bee biyaʼayiiltsósí biiʼdę́ę́ʼ hadayiijááh, łóóʼ bee hahaltsósí yiiʼ hééł ádahaleʼ. Éí bąą haa bił dahózhǫ́ǫgo bił nidahoozhǫǫh doo.
16 Éí bąą biłóóʼ bee biyaʼayiiltsósí yichʼįʼ náádaʼiiłniih índa biłóóʼ bee hahaltsósí yichʼįʼ tsin bijeeh łikání halchinii deidiłidgo náádayiiłniih, háálá éí bee ląʼí łóóʼ hadayiiłtsóós índa bichʼiyąʼ bee ídaʼazįįd.
17 Daʼ biłóóʼ bee hahaltsósíísh doo biiʼ siláhígóó ádeidoolííł índa ałʼąą dineʼéésh doo yaa hą́ą́h nízingóó tʼóó áyoołdįįł doo?
