Haggai 1:1-15
1 Daráíyas aláahgo naatʼáanii nilı̨́įgo naaki náhááh góneʼ hastą́ą́h nídízííd binih tsʼídá átsé hayííłkání góneʼ Hágeiyai éí Diyin God yá halneʼii jílı̨́įgo Bóhólníihii bizaad baa hojilneʼgo Shiyáltiyel biyeʼ Zerábabel éí Júdah kéyahgi naatʼáanii nilíinii índa Jásedek biyeʼ Jéshuwa alą́ąjįʼ nááʼiiłniihii bił hojoolneʼ.
2 Tʼáá ałtsoní bee Bóhólníihii ání, Díí diné ádaaní, Bóhólníihii bikin biiʼ sohodizin áńdadiilníłígíí tʼah doo baa hoolzhíish da,
3 ákohgo Bóhólníihii yá halneʼii Hágeiyai yinahjįʼ haadzíiʼgo ání,
4 Daʼ díí kin biiʼ sohodizin tʼóó yíchxǫʼgo siʼą́ągo nihí éí kin nizhónígo hashtʼedaalyaii biiʼ kéédahohtʼı̨́įgoósh nihá baa hoolzhiizh?
5 Éí bąą tʼáá ałtsoní bee Bóhólníihii ání, Bee ádanohtʼéii hazhóʼó nabikʼítsídaołkees.
6 Tʼóó ahayóí kʼéédaʼdohdlééh, nidi ałchʼı̨́ı̨́dígo nídaʼohgish; nídaʼohdı̨́ı̨́h, nidi doo hwiih daohłeeh da; nídaʼohdlı̨́ı̨́h, nidi doo nihił dahoniidóoh da; tʼáá nihí ééh nídaahkah, nidi doo bee dasoodo da, índa béeso yikʼé naalnishii éí béeso bizis bighádahasdzą́ągo yiih yiyiinííł.
7 Tʼáá ałtsoní bee Bóhólníihii ání, Bee ádanohtʼéii hazhóʼó nabikʼítsídaołkees.
8 Dziłghą́ą́ʼgóó dahidohkáahgo áádę́ę́ʼ tsin łaʼ ninádahidoohjihgo kin bee ádadoohłííł, áko éí baa shił hózhǫ́ǫgo biiʼ honishłǫ́ǫ doo índa biiʼ bee ayóó áníshtʼéii yitʼíní ádoolnííł, ní Bóhólníihii.
9 Tʼáá áchą́hwíídéeniʼgo bíká dadíínóhʼı̨́ı̨́ʼ nítʼééʼ, nidi ałchʼı̨́ı̨́dí yeeʼ nihee dahazlı̨́ı̨́ʼ; hooghangi ninádahishoojaaʼgo tʼóó yóóʼábiʼíísxol, jóʼakon. Haʼátʼéegoshąʼ? ní tʼáá ałtsoní bee Bóhólníihii. Shikin tʼóó bee nidasooneʼgo tʼááłáʼí nootínígo tʼáá nihí nihighan nahazʼánígi tʼéiyá baa nitsídaohkees, éí biniinaa áshtʼı̨́.
10 Éí bąą yádiłhiłdę́ę́ʼ dahtooʼígíí doo nihichʼįʼ kólnéeh da, áko nahasdzáán bikáaʼgi doo nidaʼntʼąʼ da.
11 Áádóó kéyahgóó índa daadziłgóó tłʼoh naadą́ą́ʼ kʼéédadilyééhgóó áádóó wáin ániidíii nídahadleehgóó índa tsin áliv bitsʼą́ą́dóó akʼah nídahadleehgóó niʼ bikááʼgóó nidantʼąʼii áádóó diné índa naaldlooshii ninádaalnishígóó doo bikʼi nahodoołtı̨́ı̨́łgóó bee haasdzííʼ.
12 Ákohgo Shiyáltiyel biyeʼ Zerábabel áádóó Jásedek biyeʼ Jéshuwa alą́ąjįʼ nááʼiiłniihii nilíinii índa diné daadziihígíí tʼáá ałtso hoł haBóhólníihii Diyin God áníinii índa Diyin God bííłʼaadii Hágeiyai áníinii ałdóʼ yikʼeh dahóółʼįįd, áko Bóhólníihii deidíísįįd.
13 Ákohgo Bóhólníihii yá naalʼaʼí Hágeiyai éí Bóhólníihii ánínígíí bee diné bichʼįʼ yájííłtiʼgo ázhdííniid, Bóhólníihii ání, Nihił dahonishłǫ́,
14 áko Júdah kéyahdóó Shiyáltiyel biyeʼ Zerábabel naatʼáanii nilíinii éí Bóhólníihii áhoniisı̨́ı̨́ʼ áádóó Jásedek biyeʼ Jéshuwa alą́ąjįʼ nááʼiiłniihii nilíinii índa diné daadziihígíí éí Bóhólníihii ádabiniisı̨́ı̨́ʼ, áko nidahaaskaigo biDiyin God éí tʼáá ałtsoní bee Bóhólníihii bikin biiʼ sohodizin yidadeeshnish.
15 Éí Daráíyas aláahgo naatʼáanii nilı̨́įgo naaki náhááh góneʼ hastą́ą́h nídízííd binih, naadiin dı̨́ı̨́ʼgóó yoołkáałgo áhóótʼįįd.
