Haggai 2:1-23
2 Tsostsʼid nídízííd binih naadiin łaʼgóó yoołkáałgo Diyin God yá halneʼii Hágeiyai éí Bóhólníihii áníinii baa hojoolneʼ,
2 Shiyáltiyel biyeʼ Zerábabel éí Júdah kéyahgi naatʼáanii áádóó Jásedek biyeʼ Jéshuwa alą́ąjįʼ nááʼiiłniihii nilíinii índa diné daadziihígíí kódíníigo bichʼįʼ handziih,
3 Háishąʼ nihitahdóó daohdziihígíí átséédą́ą́ʼ díí kin ayóó ánóolningo siʼą́ą́ nítʼééʼ yę́ę daołtsą́? Kʼadshąʼ haitʼéego daahʼı̨́? Tʼáadoo biniyéhí daásh danohsingo danółʼı̨́?
4 Bóhólníihii ání, Zerábabel, nidziilgo íʼdíínílzin áádóó Jásedek biyeʼ Jéshuwa alą́ąjįʼ nááʼiiłniihii nílíinii, nidziilgo íʼdíínílzin índa kéyahdóó dineʼé danohłíinii tʼáá ánółtso, danihidziilgo ídaʼdíínółzingo nidaałnish, ní Bóhólníihii, háálá nihił dahonishłǫ́, ní tʼáá ałtsoní bee Bóhólníihii.
5 Ííjip kéyahdę́ę́ʼ chʼínoohkai yę́ędą́ą́ʼ tʼáá bee nihoníʼáanii bikʼehgo shiNíłchʼi bee nihitahgóó honishłǫ́; tʼáadoo nihił daayéʼí.
6 Jó, tʼáá ałtsoní bee Bóhólníihii kóní, Tʼóó hodíínááʼígo yádiłhił áádóó nahasdzáán áádóó tónteel índa niʼda tʼááłáhídi náádeeshhał,
7 áko ałʼąą dineʼé tʼáá ałtso bitah dahodiyeeshnááł áádóó ałʼąą dineʼé tʼáá ałtso deitʼíinii yił yah ahodooleeł índa kin biyiʼ góneʼ tsʼídá ayóó átʼéii biiʼ hadideeshbı̨́ı̨́ł, ní tʼáá ałtsoní bee Bóhólníihii.
8 Béésh łigaii áádóó óola éí daashí, ní tʼáá ałtsoní bee Bóhólníihii.
9 Chʼóóshdą́ą́dą́ą́ʼ átʼéé nítʼééʼ yę́ę biláahgo átʼéego díí kin ayóó átʼée dooleeł, ní tʼáá ałtsoní bee Bóhólníihii, áádóó kweʼé hashtʼehodítʼéego hazʼą́ągo áhodeeshłííł, ní tʼáá ałtsoní bee Bóhólníihii.
10 Daráíyas aláahgo naatʼáanii nilı̨́įgo naaki náhááh góneʼ náhástʼéí nídízííd binih naadiin dı̨́ı̨́ʼgóó yoołkáałgo Diyin God yá halneʼii Hágeiyai éí Bóhólníihii bizaad baa hojoolneʼ,
11 Tʼáá ałtsoní bee Bóhólníihii kóní, Kʼad náádaʼiiłniihii díí bee hazʼáanii bídadéétʼiʼgi bíndabídíłkid,
12 Tʼáá háiida biʼééʼ yee atsįʼ dílzinii yooʼáałgo éí bááhda, atooʼda, wáinda, akʼahda, doodaiiʼ chʼiyáán łaʼda haʼééʼ bíhidééʼnáaʼgo dílzinísh dooleeł? Áádóó náádaʼiiłniihii hadaasdzíiʼgo ádaaní, Nidagaʼ.
13 Ákohgo Hágeiyai ání, Tʼáá háiida éí diné daaztsáanii bizhdeelchidgo chin dzizlı̨́įʼgo éí díí daadáanii bizhdeelchidgo daʼ éísh ałdóʼ doo dílzin da dooleeł? Náádaʼiiłniihii hadaasdzíiʼgo ádaaní, Doo dílzin da dooleeł.
14 Áko Hágeiyai haadzíiʼgo ání, Lą́ʼąą, díí diné áádóó díí dineʼé shináałgo ákódaatʼé, ní Bóhólníihii, índa tʼáá ałtso yindaalnishii ałdóʼ ákódaatʼé, áádóó áadi náádayiiłniihígíí éí doo dadílzin da.
15 Áko kʼad ánihidishní, Díí jı̨́ı̨́dóó náásgóó baa nitsídaohkees: tʼah doo Bóhólníihii bikin biiʼ sohodizingi tsé łaʼ ałkʼi dah yitʼaah yę́ędą́ą́ʼ;
16 íídą́ą́ʼ łaʼda tłʼoh naadą́ą́ʼ naadiindi yikááł bíighahgo yanáaʼá jinízingo biniyé jiníyáá nítʼééʼ tʼáá neeznání yikááł lá; łaʼda chʼil naʼatłʼoʼii yiljizhgi ashdladiindi yikááł bíighahgo jinízingo biniyé jiníyáá nítʼééʼ tʼáá naadiiní yikááł lá.
17 Nihí índa kʼidadooláii dibááʼ áádóó dláád índa níló bee atínihiishłaa, nidi tʼáadoo shichʼįʼ ninánoohkai da, ní Bóhólníihii.
18 Díí jı̨́ı̨́dóó índa náásgóó díí baa ntsídaohkees: náhástʼéí nídízííd binih naadiin dı̨́ı̨́ʼgóó yoołkáałgo Bóhólníihii bikin biiʼ sohodizin bitłʼááh nástłʼinii áłtsé ahéédasootłʼinii éí hazhóʼó baa nitsídaohkees.
19 Daʼ nooh nídaʼachííh góneʼésh tłʼoh naadą́ą́ʼ tʼahdii daanooʼ? Tʼáá aaníí chʼil naʼatłʼoʼii áádóó fig sikaadii áádóó pámgrenit sikaadii índa áliv sikaadii tʼahdii doo bineestʼąʼ dahaleeh da; ákondi díí jı̨́ı̨́dóó náásgóó nihikʼijishdlíi doo.
20 Tʼáá éí yiziłígíí naadiin dı̨́ı̨́ʼ yoołkááł góneʼ Hágeiyai éí Bóhólníihii kóníigo néidiiztsʼą́ą́ʼ,
21 Júdah dineʼé binanitʼaʼí Zerábabel bichʼįʼ handziihgo ábidiní, Yádiłhił índa nahasdzáán deeshhał;
22 bee ídahólníihii bił nahazʼą́ą́góó bee bídahólníihii bikʼeh dideeshdleeł, áádóó ałʼąą dineʼé bił nidahazʼą́ą́góó bee dabidziilii ádadeeshdįįł, áádóó tsindaabąąs bijáád naakiígíí áádóó yiiʼ dah naazdáii bikʼeh dadideeshdleeł índa łı̨́ı̨́ʼ áádóó yee nidaabaahii tʼáá bił naaʼahidínóodah; tʼááłáʼí jinítínígo hakʼis éí diltłish yee nidahodoołtsił.
23 Tʼáá ałtsoní bee Bóhólníihii ání, Éí bijı̨́įdi Shiyáltiyel biyeʼ shinaalʼaʼí Zerábabel nándideeshtééł, ní Bóhólníihii, áádóó yoostsah bee naʼntʼáhígíí nahalingo ándeeshłííł, háálá ni nándiiłtı̨́, ní tʼáá ałtsoní bee Bóhólníihii.
