Hebrews 4:1-16
4 Éí bąą hááʼáyı̨́ı̨́h Diyin God yee hoołʼaʼii biih dadiikahgi tʼahdii nihá ąą átʼéhídą́ą́ʼ, haaʼíshąʼ yéego ádeiitʼı̨́įgo biih dahidiikah. Doo baa dahonohsą́ą́góó tʼéí nihí łaʼ chʼééh yahadaahkáahgo nihił béédahodoozįįł.
2 Háálá haneʼ yáʼátʼéehii bee Ízrel dineʼé bił dahóóneʼígi átʼéego nihí ałdóʼ bee nihił dahóóneʼ. Nidi íídą́ą́ʼ haneʼ nilíinii deidiiztsʼą́ʼígíí tʼáadoo biniyéhígóó deidiiztsʼą́ą́ʼ, háálá deidiiztsʼą́ʼígíí tʼáadoo dayoosdląądgo nídeidiiláa da.
3 Áko nihí daʼiisiidląądii tʼéiyá hááʼáyı̨́ı̨́h Diyin God yee hoołʼaʼígíí biih hiikááh. Jó, tʼáá bí ádííniid,
Tʼóó báhádzidgo atíʼéshʼíinii binahjįʼ ádee hadeesdzíiʼgo ádííniid,Hááʼáyı̨́ı̨́h bee hoołʼaʼígíí tsʼídá doo biih dazhdookah da!
Azhą́ nahasdzáán ałtso niiníʼą́ąjįʼ binaanish łaʼyiyiilaa nidi ádííniid.
4 Háálá haaʼí shı̨́ı̨́ éí Diyin God bizaad bee akʼeʼashchíinii ání,
Diyin God binaanish ałtso áyiilaago tsostsʼid jı̨́ı̨́ góneʼ hanáályı̨́ı̨́ʼ.
5 Jó, kweʼé ałdóʼ ánáádíʼní,Hááʼáyı̨́ı̨́h bee hoołʼaʼígíí tsʼídá doo biih dazhdookah da.
6 Jó áko, tʼáá átséedi haneʼ yáʼátʼéehii deidiiztsʼą́ąʼ nidi doo yikʼeh dahółʼı̨́ı̨́góó biniinaa hááʼáyı̨́ı̨́h Diyin God yee hoołʼaʼígíí tʼáadoo biih dadziiskai da. Nidi łaʼ hááʼáyı̨́ı̨́h yee hoołʼaʼígíí yiih dahidookahgi tʼahdii bá ashjaʼósin.
7 Háálá nízaad nihoolzhiizhgo ashja nááhoodzaa, Díí jı̨́, níigo tʼáá íídą́ą́ʼ kóníigo yee haadzííʼ yę́ęgi átʼéego David yinahjįʼ yee hanáánáádzíiʼgo ání, Díí jı̨́ Diyin God biinééʼ dadoohtsʼaʼgotʼáadoo nihijéí dantłʼizí.
8 Jáshowa éí Ízrel dineʼé hááʼáyı̨́ı̨́h Diyin God yee hoołʼaʼígíí biih jííʼeezhgo tʼáá nízaadgóó hodíínaʼgo daʼoodlánígíí hááʼáyı̨́ı̨́h yiih dahidookahii ashja nááʼoodlíiłii doo yá yeinístʼįįd da doo nítʼééʼ.
9 Éí bąą Diyin God baʼáłchíní hááʼáyı̨́ı̨́h tʼahdii bá hólǫ́.
10 Háálá tʼáá háiida hááʼáyı̨́ı̨́h Diyin God yee hoołʼaʼígíí biih jííyáago Diyin God binaanish ałtso áyiilaago hanáályı̨́ʼígi átʼéego tʼáá hó hanaanish ááhozhdootʼįįłgo háázhdoolyįh.
11 Áko haaʼíshąʼ éí hááʼáyı̨́ı̨́h biih dahidiikahgi tʼáá awołí bee ádeiitʼı̨́į doo, łaʼ doo akʼeh dahółʼı̨́ı̨́góó biniinaa chʼééh ádáátʼįįd yę́ęgi átʼéego éí dooda.
12 Háálá Diyin God bizaad éí hiná, áádóó bidziilgo naalnish. Diltłish ałtsʼą́ąjįʼ deeníinii bilááh átʼéego deeníigo haʼániʼ índa hwiiʼ sizíinii ałtsʼáyiinííł, ahadaditʼą́ índa awol nidi ałtsʼáyiinííł. Hajéí biiʼ nitsáhákees índa íiznízinii há neiłkaah.
13 Áko Diyin God ádayiilaii doo łaʼ bitsʼąą nídótʼįįh átʼée da, nidi binááł tʼáá ałtsoní tʼáadoo bahatʼaadí índa tʼáá ííshjání danilı̨́. Tʼáá bí tʼéí bichʼįʼ nihaʼátʼeʼ tʼáá ałtso bee ádaa nidahodiilnih.
Jesus aláahgo nááʼiiłniihii ayóó átʼéii nilı̨́
14 Jó áko, Jesus éí Diyin God biYeʼ ayóó átʼéii nihá aláahgo nááʼiiłniihii nilíinii yáʼąąshgóó anáádzá. Éí bąą haaʼíshąʼ niheʼoodląʼ bee ádee hadiidzíʼígíí yéego bee ádaniitʼée doo.
15 Nihá aláahgo nááʼiiłniihii doo danihidziilígíí bąą nihaa aʼááh dínóozįįłgi yíneelʼą́. Tsʼídá tʼáá ałtsojįʼ tʼáá nihígi átʼéego nabíhodiʼneestą́ą́ʼ, nidi doo bąąhági ádzaa da.
16 Éí bąą haaʼíshąʼ tʼáadoo dasiitiʼí Diyin God bibikááʼdóó nahatʼáii bitʼááh dahidiikah. Áadi Diyin God bibee ajoobaʼ hólǫ́. Áadi nihaa aʼááh hodínóodzįįł, áádóó nihide ánídahootʼįįhgo Diyin God nihaa joobaʼgo nihíká análwoʼ doo.
